Tịn̄ Ban̄a Jehovah Kpukpru Usen
1 Mme owo ẹsidara ndinyene nneme mban̄a se ededi oro mmọ ẹmade ke esịt mmọ, koro oto ke uyọhọ esịt ndien inua etịn̄. (Luke 6:45b) Nso ikpere esịt nnyịn? Andiwet psalm ekewet ete: “Ndien edeme mi eyetịn̄ eti ido fo, ye itoro fo, ofụri usen.” (Ps. 35:28) Enye ama enyene ntotụn̄ọ esịtekọm ọnọ Jehovah onyụn̄ abat editịn̄ mban̄a Abasi ye editoro enye ke kpukpru idaha nte ata ifet. Sia eketịmde emehe ye Jehovah, andiwet psalm ama enyene ediwak n̄kpọ ndidara. (Ps. 35:9) Didie ke nnyịn ikeme ndikpebe eti uwụtn̄kpọ esie?
2 Tịn̄ Ban̄a Jehovah ke Ufọk Fo: Jehovah ekpenyene ndidi ibuot nneme eke usen ke usen ke ekpụk ubon. Mme ete ye eka ẹmi ẹnyenede ọkpọsọn̄ ima ẹnọ Jehovah nte ido edide ẹyetịn̄ ẹban̄a enye ke kpukpru edinam mmọ. (Deut. 6:5-7) Nte mmọ ẹtịn̄de, nditọ ẹyekụt ke ete ye eka mmọ ẹdu uwem ke mbuọtidem ẹnyụn̄ ẹma ibet Abasi. Nditọ ndien ẹyese ukpepn̄kpọ Bible ubon nte ata ediwụt uten̄e Abasi oro ete ye eka mmọ ẹwụtde.—2 Pet. 3:11.
3 Tịn̄ Ban̄a Jehovah ye Nditọete Fo: Ke ini edinam ukara Abasi nnyịn ofụri ini eke urua ke urua, nnyịn imesinyene ediwak ifet ndibọk ekikere ye esịt nnyịn ke udia eke spirit. Nnyịn idehede inana nti n̄kpọ nditịn̄ mban̄a. (Luke 6:45a) Nte odu akpan n̄kpọ oro afo ekekpepde ke ọkpọkpọ ukpepn̄kpọ m̀mê edikot Bible eke urua ke urua fo emi ekenen̄ede enem fi? Buana enye ye nditọete fo, ke ntre an̄wamde mmọ ndikọri ima oro mmọ ẹnyenede ẹnọ Jehovah.—Ps. 35:18; Heb. 10:24.
4 Tịn̄ Ban̄a Jehovah nọ Mbon En̄wen: Ke mme edinam nnyịn eke usen ke usen ye mme owo—ke utom, ke ufọkn̄wed, ye mbon ubon oro mînịmke ke akpanikọ—ekpenyene ndisọsọp nna in̄wan̄în̄wan̄ nte ke akpan n̄kpọ ke uwem nnyịn edi editie ntiense mban̄a Jehovah. Utu ke ndiyak mme ikọ oro owo mîkereke-kere ye mme etịme etịme ikọ ererimbot ẹsabade nnyịn, ikọ inua nnyịn ekpenyene ndinọ Abasi itoro. Ke usen ke usen, ke kpukpru ifet, tịn̄ nọ mbon en̄wen ban̄a eti mbụk emi enye ọdọn̄de nnyịn ete ikwọrọ.—Utom 5:42; Col. 4:6.
5 Nte mme ata andituak ibuot nnọ Jehovah, nnyịn ikpakam ida mme ifet ke usen ke usen itịn̄ iban̄a anana-mbiet Abasi nnyịn, Jehovah.—Ps. 106:47.