Fiak Bịne Udọn̄ Oro Ẹkewụtde ke Mbụk Obio Ubọn̄
1 Ke mme akpatre urua ifan̄ ẹmi, nnyịn ima idara ifet edideme Mbụk Obio Ubọn̄ Nọ. 35, emi ibuotikọ edide “Ndi Tutu Amama Kpukpru Owo Ẹyema Kiet Eken?” Mme asuanetop ke kpukpru ebiet ke ẹdomo ndida nsiondi Mbụk Obio Ubọn̄ emi nsịm adan̄a ediwak owo nte ẹkekeme. (Matt. 10:11) Okposụkedi ẹdiomide ubịnikọt emi nditre ke Sunday, November 16, edieke efakutom efen efen osụk odude ndikụre, mbiowo ẹkeme ndidọhọ mbufo ẹka iso ẹdeme Mbụk Obio Ubọn̄ Nọ. 35 ke adan̄a nte se ẹkenọde esop odude.
2 Nsiondi Mbụk Obio Ubọn̄ emi edemede udọn̄ ediwak owo. Mmọ ẹkụt ke mme owo ke ofụri ofụri ẹduọk ima uduot owo mmọ ndien ke ntre ẹkere ẹban̄a se ini iso akamade. (2 Tim. 3:3) Nnyịn iyom ndifiak mbịne udọn̄ oro ikedemerede.
3 Mbụk Obio Ubọn̄ Enyene Mme Utịp: Ke ini ubịnikọt Mbụk Obio Ubọn̄ ke 1995, n̄wan kiet emi ọkọbọde idem kiet ama odụk mbonoesop ke Ufọkmbono Obio Ubọn̄ koro enye okoyomde ndikpep n̄kpọ efen efen mban̄a se Mme Ntiense Jehovah ẹnịmde ke akpanikọ. Enye ama ọsọsọp enyịme ukpepn̄kpọ Bible ke mbonoesop oro inyụn̄ iwakke nditaba mbonoesop ke oro ebede. Ke mîbịghike, enye ama ọnọ n̄wed ẹsọk akani ufọkabasi esie, etrede ebuana esie!
4 Etisịm emi, mme owo ke mme itie ikie ke efakutom ẹmekot etop oro ke Mbụk Obio Ubọn̄ Nọ. 35. Edi didie ke mmọ ẹkenam n̄kpọ ẹban̄a emi? Idem edieke ẹnen̄ede ẹma se mmọ ẹkekotde, ata ediwak idinamke n̄kpọ tutu kiet ke otu Mme Ntiense Jehovah afiak awaha edem mmọ. Nte afo ke anam ndutịm ndifiak n̄ka? Ima ima edikere oro ikerede iban̄a ekemmọ owo ekpenyene ndinụk nnyịn ndinam ntre. Ẹkpenyene ndifiak n̄ka mbịne kpukpru mbon ẹwụtde udọn̄ ke Mbụk Obio Ubọn̄.
5 Nso ke Afo Editịn̄ ke Ini Afiakde Aka? Afo emekeme nditịn̄ ikọ ifan̄ mban̄a nte etop Mbụk Obio Ubọn̄ edide ekem ini ndien ekem obụp mbụme oro anamde owo ekere n̄kpọ. Tịm nọ n̄kpan̄utọn̄ nte enyeneufọk etịn̄de ekikere esie man otodo afo ekeme ndifiọk se idude enye ke esịt. Ekem dụri ntịn̄enyịn wụt akpan n̄kpọ emi odotde ke ediye uduot ekpri n̄wed Oyom, emi ẹkewụtde ke Mbụk Obio Ubọn̄. Edieke ẹnamde n̄kpọ ẹban̄a ke eti usụn̄, domo nditọn̄ọ ukpepn̄kpọ Bible ke ndondo oro.
6 Ndusụk nneme ẹmi ẹnọde ekikere emi afo ekemede ndidomo nse ke ini afiakde aka ebịne mbon oro ẹkewụtde udọn̄ ke “Mbụk Obio Ubọn̄” Nọ. 35 ẹdi ẹmi:
◼ “Afo emekeme nditi ntọt oro ẹmịn̄de-mịn̄ emi n̄kọnọde fi ndondo emi. Etop esie otụk akpan n̄kpọ oro abaharede ubonowo mfịn—unana edinyene ima nnọ mbon en̄wen.” Dụri ntịn̄enyịn wụt uyarade ẹwụtde ke page 2 ke Mbụk Obio Ubọn̄ ke idak ibuotikọ oro “Ima Mbọhọidụn̄ Omosụhọde.” Ekem bụp ete, “Ndi afo ekere ke edi uduak Abasi ubonowo ndidu uwem ntem?” Bet ibọrọ. Kụbọde ka ukpepn̄kpọ 5 ke ediye uduot ekpri n̄wed Oyom, nyụn̄ domo nditọn̄ọ ukpepn̄kpọ Bible.
◼ “Ke ini ikosobode isan̄ oko, mma nnọ fi ndusụk ntọt ke ibuotikọ oro ‘Ndi Tutu Amama Kpukpru Owo Ẹyema Kiet Eken?’ Nte afo emekere ke utọ ererimbot oro ekeme ndidu?” Bet ibọrọ. Kụbọde ka ukpepn̄kpọ 6 ke ediye uduot ekpri n̄wed Oyom, nyụn̄ kot ikpehe ekikere 6. Ekem kot un̄wọn̄ọ Abasi ke Micah 4:3, 4. Edieke etiede nte enyeneufọk enyene udọn̄, nọ ediye uduot ekpri n̄wed ye ukpepn̄kpọ.
◼ “Ke ini n̄kedide isan̄ oko, mma nọ fi n̄wed oro ẹkotde ‘Ndi Tutu Amama Kpukpru Owo Ẹyema Kiet Eken?’ Enye ama esịne ikot ẹnọde ndinyene ukpepn̄kpọ Bible mfọn. Mfiak ndi ndiwụt fi un̄wam ukpepn̄kpọ oro nnyịn ikamade. [Wụt n̄wed Ifiọk.] N̄wed emi etịm anam an̄wan̄a ini emi kpukpru owo ẹdimade kiet eken, enye onyụn̄ ọbọrọ mme mbụme eken oro afo ekemede ndikere mban̄a: Ntak emi nnyịn ikọride isọn̄ inyụn̄ ikpade? Ntak emi Abasi ayakde ndutụhọ odu? Nso itịbe inọ mbon ima nnyịn ẹmi ẹkpan̄ade?” Ekem bụp ete, “Nte mmekeme ndinam n̄wụt fi nte ẹsinịmde ukpepn̄kpọ emi?” Edieke enye enyịmede ukpepn̄kpọ Bible, tọn̄ọ ukpepn̄kpọ oro. Edi edieke enye mînyịmeke ukpepn̄kpọ, nọ n̄wed oro ke etịbe oro ẹsinọde. Diomi ndifiak n̄ka.
7 Ndondo oro ẹma ẹkeda Mbụk Obio Ubọn̄ Nọ. 35 ẹkụre efakutom mfọn mfọn, nnyịn imekeme ndinọ n̄wed Ifiọk ke mme usen ẹsụhọde ke ọfiọn̄ oro. Ẹkeme ndikụt ekese nneme ẹnọde ekikere kaban̄a n̄wed emi ke page edem Utom Obio Ubọn̄ Nnyịn ke mme nsiondi eke March, June, ye November 1996; ye June 1997.
8 San̄asan̄a edideme Mbụk Obio Ubọn̄ emi ekpenyene ndinụk kpukpru nnyịn ndidọdiọn̄ nsịn ukeme nnyịn ke utom ukwọrọikọ. Ye un̄wam Jehovah nnyịn imekeme ndinịm ke akpanikọ nte ke ubịnikọt emi eyetịm okụt unen, an̄wamde mme owo ẹkụt uduak Abasi kaban̄a ubonowo ndima kiet eken. Jehovah akpakam aka iso ndidiọn̄ ifịk ifịk ukeme nnyịn nte nnyịn ifiakde ibịne udọn̄ ẹnyenede ke Mbụk Obio Ubọn̄.