Ẹtaba Fi!
1 Ke ini ke ini, nnyịn imekeme nditaba mbonoesop kiet m̀mê awakde akan oro, ikerede ite ‘idụhe owo eke editabade mi; ekikere idikam idaha mmọ ika ke ami ndụhe do.’ Oro idịghe akpanikọ! Ukem nte ndido ikpọkidem nnyịn ekededi, nnyịn owo kiet kiet imenyene akpan udeme ke nte esop anamde n̄kpọ. (1 Cor. 12:12) Nnyịn nditre ndika mbonoesop eke urua ke urua ekeme nditụk mfọnọn̄kpọ eke spirit mbon en̄wen oro ẹdụkde. Edieke afo mûdụhe do, fiọk ete—ẹtaba fi!
2 Akpan Udeme Emi Afo Enyenede: Ama ọdọn̄ Paul ndibuana ye nditọete esie. Rome 1:11, 12 anam ntak an̄wan̄a ete: “Man nnọ mbufo ndusụk enọ eke spirit . . . man ntiene mbufo n̄kop ndọn̄esịt emi otode mbufo, nnyịn inyụn̄ ida mbuọtidem nnyịn edem mbiba idọn̄ kiet eken esịt.” Kpasụk ntre, ebede ke mme ibọrọ nnyịn, mme ikpehe nnyịn ke mbonoesop, ye nnyịn ndikam ndu do, nnyịn inam ekese ke ndibọp kiet eken ndika iso ke usụn̄ edinam akpanikọ.—1 Thess. 5:11.
3 Ndi afo usudorike enyịn ndikụt mbon en̄wen ke mme mbonoesop? Afo emesinen̄ede ọnọ n̄kpan̄utọn̄ ke mme ibọrọ mmọ onyụn̄ owụt esịtekọm ke mme ikọ mbuọtidem mmọ. Mme enọ eke spirit mmọ ẹtịp n̄kpọ ẹsịn ke ndinam fi ọkọri. Edieke mmọ mîkpodụhe ke mbonoesop, ekpetie fi ke idem nte ke ama ataba akpan n̄kpọ. Nditọete fo iren ye iban ẹsikere ukem ntre ẹban̄a fi edieke afo mûdụhe.
4 Akpan Udeme Emi Mme Mbonoesop Ẹnyenede: Enyọn̄-Ukpeme ama etịn̄ inikiet aban̄a nte mme mbonoesop ẹdide akpan n̄kpọ kaban̄a ubọhọ eke spirit nnyịn, ọdọhọde ete: “Ke oburobụt ererimbot oro en̄wan abaharede mi, esop Christian edi ata itie udịbe eke spirit . . . , itie oro emem ye ima odude. Ke ntre, di andidụk mbonoesop kpukpru ini.” (w93-EF 8/15 11) Usen kiet kiet, nnyịn imesisobo mme idaha oro ẹnamde nnyịn ikpa mba ke n̄kan̄ eke spirit. Edieke nnyịn mîkpemeke idem, nnyịn imekeme ndikabade nnyịne ke mme editịmede esịt nnyịn tutu nnyịn itre ndikụt mme udọn̄ eke spirit ẹmi ẹdide akpan n̄kpọ ẹkan. Kpukpru nnyịn iberi edem ke kiet eken kaban̄a nsịnudọn̄ oro iyomde man idu ke edidianakiet inyụn̄ inyene ifịk ke utom Abasi.—Heb. 10:24, 25.
5 Nnyịn ndidụk mme mbonoesop edi akpan n̄kpọ. Udọn̄ọ ye unọmọ ẹkeme ndinam nnyịn ifiak ke ini ke ini. Ke ẹsiode oro ẹfep, ẹyak nnyịn kpukpru ini ibiere ndidi se ẹbatde ẹsịn ke otu mbon esop ẹmi ẹtorode Jehovah ọtọkiet!—Ps. 26:12.