Nso ke Ndidọhọ?

Ke ini nnyịn isobode ye mme owo ẹmi ẹnọde n̄kpan̄utọn̄ ke utom ukwọrọikọ, esidọn̄ nnyịn ndifiak n̄ka n̄kọnọ n̄kaiso ikọ ntiense. Nte ededi, nnyịn imekeme nditre ndifiọk se ikpetịn̄de man idemede nneme en̄wen. Afo emekeme ndidomo usụn̄ nneme emi: Bụp mbụme emi edemede udọn̄, ndien ekem kụbọde ka n̄wed Reasoning ndiwụt ibọrọ N̄wed Abasi. Ọkpọfọn ndinyene udịm udịm mbụme emi afo ekemede ndisio kiet oro ekerede ke ekeme ndinen̄ede nnyene ufọn ke akpan ini emi afo awahade. Udịm udịm mbụme ẹdude mi ke idak, ẹsion̄ode ẹto n̄wed Reasoning, ẹwụt nọmba page emi ẹkụtde ibọrọ kiet kiet:

◼ Ntak emi nnyịn ikọride isọn̄ inyụn̄ ikpade? (98)

◼ Nte nti ntak ẹdu ndinịm Abasi ke akpanikọ? (145)

◼ Nte Abasi enen̄ede ekere aban̄a se itịbede inọ nnyịn mme owo? (147)

◼ Nte ana owo aka heaven man enyene ata inem inem ini iso? (163)

◼ Ntak emi edide akpan n̄kpọ ndifiọk nnyụn̄ nda ọkpọkpọ enyịn̄ Abasi? (196)

◼ Nso ke Obio Ubọn̄ Abasi edinam? (227)

◼ Nso idi uduak uwem owo? (243)

◼ Ntak emi ido ukpono ẹwakde ntem? (322)

◼ Owo ekeme ndisan̄a didie mfiọk m̀mê ewe ido ukpono enen? (328)

◼ Satan edi owo emi okopde odudu adan̄a didie ke ererimbot mfịn? (364)

◼ Ntak emi Abasi ayakde ndutụhọ odu? (393)

◼ Ntak emi idiọkn̄kpọ awakde ntem? (427)

Afo emekeme ndisịn utọ udịm udịm mbụme ẹmi ke Bible m̀mê ke n̄wed Reasoning fo man ekeme ndisọp n̄ka mbịne. Ndinyene akpan n̄kpọ ke ekikere nditịn̄ ke mme mfiakn̄ka eyesịn udọn̄ ọnọ fi ndisifiak n̄ka mbịne kpukpru udọn̄ oro okụtde.