Yom Mbon Oro Ẹkemede Ndinọ Ukpep
1 “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Jehovah, emi odụn̄ọrede esịt, eyenọ mbon oro ẹkemede ndinọ ukpep ẹnyụn̄ ẹnamde n̄kpọ nte ekemde ye se mmọ ẹkpepde utịp. (Jer. 17:10; John 6:45) Nnyịn imenyene ifet edidi ekemmọ mbonutom ye enye ke ndiyom mbon ẹnyenede sụn̄sụn̄ ido ẹmi ẹyomde obufa ererimbot.—Ps. 37:11; 1 Cor. 3:9.
2 Jesus eketịn̄ aban̄a mme mbet esie nte “mme ọkọ owo.” (Matt. 4:19) Ke adan̄aemi utọ utom oro ndusụk ini ekemede ndidi ọkpọsọn̄ utom, ekese uyụhọ odu ke ndibọ nti utịp. Utu ke ndinam n̄kpọ kaban̄a udori idem nnyịn, nnyịn ke akpanikọ inyan̄a “iyak” ision̄o ke nsobo. Ọkọiyak oro enyenede uforo enyene ndifiọk se anade anam man atap iyak. Ukem ntre, ana nnyịn ineme etop Obio Ubọn̄ ke inem inem usụn̄ oro edidemerede udọn̄ mbon oro ẹkopde se nnyịn itịn̄de. Emi enen̄ede edi akpanikọ ke ini nnyịn inamde mfiakn̄ka. Nso ke nnyịn ikeme nditịn̄?
3 Edieke ẹkewụtde udọn̄ ke mme ibuotikọ “Enyọn̄-Ukpeme” etịn̄de n̄kpo ẹban̄a ido ukpono, afo emekeme ndidọhọ:
◼ “Ke akpa nnyịn ima ineme iban̄a ntak emi ediwak owo mîmaha ndineme mban̄a ido ukpono. Nte itiehe fi nte ke oro edi esen esen n̄kpọ, sia ata ediwak mbọhọidụn̄ nnyịn ẹdọhọde ke idi Christian? Eyedi afo emeyịk ntak emi ido ukpono edide utọ ibuot nneme oro akamade ubahade onyụn̄ okponde eneni ntre.” Bet ibọrọ. Kụbọde ka page 322 ke n̄wed Reasoning, nyụn̄ buana ekikere ifan̄ ke idak ibuotikọ oro “Why Are There So Many Religions?” (Ntak Emi Ata Ediwak Ido Ukpono Ẹdude?)
4 Afo emekeme ndida mbiet usụn̄ unyene nneme emi nditọn̄ọ nneme ke ibuot nneme abanade ido ukpono:
◼ “Nte ndusụk usụn̄ ẹdu oro nnyịn ikemede ndifiọk m̀mê nnyịn imenyene ido ukpono akpanikọ? [Bet ibọrọ.] Sia ediwak nsio nsio ido ukpono ẹdude, emi otịmede ediwak owo mmọ inyụn̄ inyeneke iwụk.” Kụbọde ka n̄wed Reasoning, page 328-329, emi enye enemede mbụme oro “How can a person know which religion is right?” (Didie ke owo ekeme ndifiọk m̀mê ewe ido ukpono enen?) Tịn̄ ibio ibio ban̄a ọyọhọ mbụme 5, “Do its members truly love one another?” (Nte mme andibuana ke enye ẹnen̄ede ẹma kiet eken?) Nam an̄wan̄a nte ẹkemede ndikpep ekese n̄kpọ ebe ke ukpepn̄kpọ Bible idemowo.
5 Edieke etiede nte ke enyeneufọk etịmede esịt aban̄a mme idaha ererimbot, afo emekeme ndidomo emi nse:
◼ “Nte an̄wan̄ade afo omokop editịmede esịt aban̄a mme idiọk idaha oro nnyịn inyenede ndiyọ ke uwem ye ke ndibọk ubon nnyịn. Bible ayarade utịbe utịbe un̄wọn̄ọ oro Abasi edisude ke n̄kpet, n̄kpet ini iso.” Kot Mme N̄ke 2:21, 22, nyụn̄ nam an̄wan̄a nte Jehovah ọn̄wọn̄ọde ererimbot emem oro edibịghide.
6 Sia Ikọ Abasi ‘enyenede odudu,’ nnyịn ikpenyene ndidomo ndikama enye ke mme nneme nnyịn. (Heb. 4:12, NW) Kụt ete ke imesịn udọn̄ inọ enyeneufọk okot Bible ke idemesie. (Men Utom Mme Apostle 17:11 domo.) Edieke nnyịn itịn̄de enyịn inam udeme nnyịn, Jehovah eyediọn̄ ukeme nnyịn.