Udeme Fo ke Ndibọp nnọ Ini Iso

¹ Mfịn mme Christian ke ẹka iso ndise mban̄a utom edibọp eke spirit oro Jesus ọkọtọn̄ọde ke n̄kpọ nte isua 1,970 ẹmi ẹkebede ke ini enye ọkọtọn̄ọde nditan̄ mme mbet mbok. (Matt. 4:17; 7:24, 25, 28; John 7:46) Jehovah ọmọdiọn̄ utom emi akamba akamba. (N̄ke 10:22) Nte nnyịn inọde ntọt Obio Ubọn̄ Abasi, nnyịn n̄ko ke ibọp man ise iban̄a n̄kọri ini iso.

² Ke adan̄aemi anade ẹfiak ẹdiọn̄ ediwak n̄kani Ufọkmbono Obio Ubọn̄, ẹyom mme ufọkmbono efen efen ẹnọ mbufa esop ẹmi ẹsiakde. Isua oko kpọt esop ke Nigeria ama ada 153 awak akan nte ekedide. Ẹyom okụk ye mme anamutom unyịmesịt man ẹkụt unen ke ndikụre mme utom ubọpn̄kpọ ẹmi. Ẹmediọn̄ in̄wan̄în̄wan̄ edu nditọete ndiyụhọ udọn̄ emi akamba akamba.

³ Ima Ima Un̄wam Oro Ediwak Owo Ẹnọde: Nnyịn iwụt ima inọ “ofụri ebuana nditọete” ebe ke nditịp n̄kpọ nsịn ke Okụk Ufọkmbono Obio Ubọn̄ N̄ka. (1 Pet. 2:17) Mme etịbe oro ẹbọde ke n̄kọk itieutom emi ama anam okụk odu ndin̄wam ẹbọp mbufa Ufọkmbono Obio Ubọn̄ 110. Edi udọn̄ akaka iso ndikọri nte utom editan̄ mbok awarade. Ntre Jehovah ke aka iso ndidiọn̄ ndutịm emi, ndien mbiowo ẹkpenyene ndikụt nte ke ẹwet n̄kpọ in̄wan̄în̄wan̄ ke ekebe etịbe Ufọkmbono Obio Ubọn̄ N̄ka ẹnyụn̄ ẹnam enye odu ọnọ kpukpru owo ke nsio nsio itie Ukpepn̄kpọ N̄wedesop. Ẹnọ mme etịbe oro ẹbọde, ọkọrọ ye okụk ukpe ebuọt, ẹsọk mme esop man ẹda ẹbọp mbufa Ufọkmbono Obio Ubọn̄ ye mme akpan n̄kpọ oro ẹyomde ẹfiak ẹdiọn̄.

⁴ N̄ka, adianade ye kpukpru esop oro ẹbọde ufọn ẹto ndutịm emi, ẹwụt ntotụn̄ọ esịtekọm ẹnọ ediwak owo ye mme ubon oro ẹsitịpde okụk kpukpru ini ẹsịn ke Okụk Ufọkmbono Obio Ubọn̄ N̄ka. Kpukpru esop ẹkpenyene nditịp Okụk Ufọkmbono Obio Ubọn̄ N̄ka, edide mmọ ke ẹbọp Ufọkmbono Obio Ubọn̄ ke idemmọ m̀mê ibọpke. Kpukpru urua, mme ada ukpepn̄kpọ n̄wedesop ikpenyeneke nditre nditọt otu oro ibatokụk oro ẹketịpde ke urua oro ekebede. Emi edi eti ifet ọnọ kpukpru owo ndibuana, ikpọ ye n̄kpri, inamke n̄kpọ m̀mê nso idi idaha ndutịm uforo mmọ. Nnyịn owo kiet kiet imekeme nditịm idem mbemiso ikade Ukpepn̄kpọ N̄wedesop man inyene n̄kpọ nditịp nsịn ke Okụk Ufọkmbono Obio Ubọn̄ N̄ka.

⁵ Udọn̄ kaban̄a etịbe ofụri ini odu kpukpru ini. Idahaemi, nnyịn inyene An̄wa Mbono 44 ke Nigeria, ndien owo ikemeke ndidọhọ ke ẹbọp ndomokiet ẹkụre. Ediwak Ufọkmbono Obio Ubọn̄ ẹdu ke edibọbọp ke ediwak isua ye unana edibọp n̄kụre. Mme utom ẹdop ẹda ke ntak unana okụk. Ke adan̄aemi edide akpanikọ nte ke se nnyịn ikemede ndinọ ke n̄kan̄ okụk ekeme ndikpụhọde, nnyịn imekeme ndikụt nte ke imekeme nditịm nnyene ebuana ke ndinọ utom edibọp ibetedem ebe ke ndinam ukpụhọde ke ọkpọkpọ ubiatokụk nnyịn. Nnyịn ikpakam ida ‘inyene nnyịn’ ikpono Jehovah. Ke usụn̄ emi ke nnyịn iwụt ima inyenede inọ Enye, Enye esinyụn̄ ọdiọn̄ mbon oro ẹtịpde etịbe ke unyịmesịt.—N̄ke 3:9; 1 Chron. 29:14-17.

⁶ Nte afo emenyene usọ ke utom ubọpn̄kpọ? Ke edide ntre, ndien edieke afo ekemede ndin̄wam ke utom ubọp Ufọkmbono Obio Ubọn̄, afo emekeme ndinam mbiowo n̄kann̄kụk, mme andibuana ke Kọmiti Ubọpufọk eke Ikpehe ke Ikpehe, ye esenyịn circuit ẹfiọk ẹban̄a emi. Ẹyom mme anamutom unyịmesịt ẹmi ẹnyenede usọ ke ofụri idụt emi. Ekpere ndidi kpukpru Kọmiti Ubọpufọk eke Ikpehe ke Ikpehe ẹtọt ẹte ke ẹyom mme anamutom unyịmesịt efen efen. Adianade do, ke idak ndausụn̄ Mme Kọmiti Ubọpufọk eke Ikpehe ke Ikpehe oro N̄ka emekde, ẹnọ nditọete oro ẹdotde ke n̄kan̄ eke spirit ukpep ndinam utom oro ẹyomde man otode ẹkeme ndin̄wam mme esop efen efen ke mme utom ubọpufọk mmọ.

⁷ Udeme Mme Kọmiti Ubọpufọk eke Ikpehe ke Ikpehe: Ke March 1994, N̄ka ama emek Kọmiti Ubọpufọk eke Ikpehe ke Ikpehe ition ke Nigeria. Nte ededi, ke ntak n̄kaiso udọn̄, nnyịn idahaemi inyene Kọmiti Ubọpufọk eke Ikpehe ke Ikpehe 25 oro ẹmekde. Ntak ẹmekde mme kọmiti ẹmi? Ẹmek mmọ man ẹnọ un̄wam ke kpukpru ikpehe ndutịm ye edibọp n̄kpọ. Mmọ ẹnyene mme ndudiọn̄ oro N̄ka ọnọde ẹmi ẹnyenede n̄kpọ ndinam ye usụn̄ ubọpn̄kpọ emi anamde ẹsọp ubọk. Nditọete ẹmi ẹdude ke mme kọmiti ẹdi mbiowo ẹmi ẹnyenede mbufiọk, ndien mmọ ẹkeme ndinọ nti ekikere ke ndibọp mme Ufọkmbono Obio Ubọn̄ oro ẹdidide ukeuke ẹnyụn̄ ẹyede ọkọrọ ye nditre ndibiat ini ye okụk. Ke ntak mbufiọk mmọ, mmọ ẹkeme ndin̄wam mbiowo n̄kann̄kụk ẹbiere m̀mê ọkpọfọn ndifiak ndiọn̄ Ufọkmbono Obio Ubọn̄ oro odude m̀mê ẹkpebọp obufa, ẹnyụn̄ ẹkeme ndin̄wam mmọ ndibiere mbemiso ẹdepde isọn̄ m̀mê itie emi ẹyomde ndibọp obufa n̄kpọ mi m̀mê enyeoro ama okododu odot. Mmọ n̄ko ẹkeme ndin̄wam mbiowo ndibiere ekọmurua ubọpn̄kpọ oro nnennen ye ekọmurua oro ẹkpekemede ndinyam Ufọkmbono Obio Ubọn̄ emi odude.

⁸ Ẹnọ Mme Kọmiti Ubọpufọk eke Ikpehe ke Ikpehe mme ndausụn̄ ke nte ẹkemede ndinam utom kọn̄krit, nte ẹbọpde eto enyọn̄ ọkọm emi ọsọn̄de idem, nte ẹbuakde kọn̄krit ye mbat ukọkufọk, ye mme ikpehe utom ubọpn̄kpọ eken. Ebede ke nditiene mme ndausụn̄ N̄ka ye mme ekikere eken ẹtode Kọmiti Ubọpufọk eke Ikpehe ke Ikpehe, nnyịn iyekeme ndibọp ataata, nti uduot ufọk oro ẹdibịghide. Okposụkedi ekọmurua ubọp eti uduot Ufọkmbono Obio Ubọn̄ okponde, edi mfọnn̄kan usụn̄ edida mme inyene oro ẹyakde ẹnọ nnam n̄kpọ ke eti usụn̄ utu ke edibọp idiọk uduot Ufọkmbono Obio Ubọn̄ oro mîdibịghike. Ntọt owụt ete ke mme ọkọmufọk ẹsiwụre mîdịghe ofụm ayarade ke ntak idiọk ubọpn̄kpọ. Emi ada okosịm mme esop ndikpe okụk utịm ikaba, owụtde ke esimem urua akan ndibiat ekese nnam enye ọfọn ke akpa ini.

⁹ Anyanini mbemiso ẹdepde isọn̄, owụt ọniọn̄ ndisobo ye Kọmiti Ubọpufọk eke Ikpehe ke Ikpehe. Ẹnọ mme kọmiti ẹmi ndin̄wam ke edibọp Ufọkmbono Obio Ubọn̄ ke ikpehe oro ẹmekde emi ediwak circuit ẹnamde, mmọ ẹnyụn̄ ẹkeme ndin̄wam ke ndidep isọn̄ nnyụn̄ nse m̀mê isọn̄ oro ẹyomde ndibọp Ufọkmbono Obio Ubọn̄ enyene unen nte ibet onyịmede. Mmọ ẹnyene mme ndausụn̄ ndin̄wam nditọete ẹfep mme mfịna oro ẹkemede ndisobo ke ndidep isọn̄. Nnyịn imonịm ite ke mbiowo ẹyenam n̄kpọ usọp usọp ẹban̄a mme ekikere oro mme andibuana ke Kọmiti Ubọpufọk eke Ikpehe ke Ikpehe ẹnọde man ẹfep ọkpọsọn̄ utom ye mme ikpehe ubọpn̄kpọ oro ọsọn̄de urua ke Mme Ufọkmbono Obio Ubọn̄.

¹⁰ Ke ini ẹmekde isọn̄ ndida mbọp Ufọkmbono Obio Ubọn̄ ke obio oro enyenede se ibede esop kiet, mbiowo n̄kann̄kụk ẹkpenyene ndineme n̄kpọ emi ye Kọmiti Ubọpufọk eke Ikpehe ke Ikpehe, (mme) esenyịn circuit, esenyịn obio, ndien ke ẹkemede mbiowo ke mme esop oro ẹdude ẹkpere. Emi ekeme ndin̄wam mbiowo n̄kann̄kụk ndimek ebiet oro edinyenede ufọn ọnọ (mme) esop ẹmi ẹbuanade ke utom oro ẹkamade ke ubọk ndien iso-ọfọn ẹtrede ediwak n̄kaha ke mme Ufọkmbono Obio Ubọn̄ ẹdude ẹkpere, ke adan̄aemi n̄ko ayakde ufan̄ odu ọnọ n̄kọri ini iso ke ikpehe oro. Ke ikpọ obio, esop ita m̀mê awakde akan oro ẹsida Ufọkmbono Obio Ubọn̄ kiet ẹnam n̄kpọ. Idem ke mme ebiet oro owo mîwakke, ẹkeme ndimek itie kiet oro ọfọnde ye esop iba m̀mê awakde akan oro.

¹¹ Ke ndikama mme ndausụn̄ oro N̄ka ọnọde, Mme Kọmiti Ubọpufọk eke Ikpehe ke Ikpehe ẹnam utom enyenede ufọn nte mmọ ẹnọde mme esop n̄kann̄kụk un̄wam ke mme utom edifiak ndiọn̄ ye edibọp mbufa n̄kpọ. Ke ini ubọpn̄kpọ, ẹnam ndutịm ẹnọ mme anamutom unyịmesịt n̄kukụre ke ini oro ẹdinen̄ede ẹyom mmọ ke itie ubọpn̄kpọ man mmọ ẹkûtaba ndibuana ke mme mbonoesop ye utom an̄wautom ke esop mmọ. Ndutịm ye usọ oro mmọ ẹkpepde ke mme utom ẹmi eyedi n̄kpọ un̄wam n̄ko ke mme utom ubọp An̄wa Mbono.

¹² Kpukpru owo ẹkeme ndiwụt mbun̄wụm mfọnido ke ndidiana kiet ye mbon ẹmi ẹsede ẹban̄a utom ubọpn̄kpọ emi. Ke usụn̄ emi ẹnam utom oyomde ẹnam ‘ẹma’ ẹnyụn̄ ‘ẹnam ke idara idịghe ke mfụhọ.’ (Utom 14:26; Heb. 13:17) Kọmiti Ubọpufọk eke Ikpehe ke Ikpehe ke Lagos eketịn̄ ikọ emi ke mbụkutom eke isua ke isua mmọ: “Ifiọkutom nnyịn ke 1995 ama akama nduaidem etieti onyụn̄ on̄wụm mfri. N̄ka ye mme andibuana ke Kọmiti Ubọpufọk eke Ikpehe ke Ikpehe ẹma ẹnen̄ede ẹnam ẹfiọk uduak ye mme utom Kọmiti Ubọpufọk eke Ikpehe ke Ikpehe ke nsio nsio mbono oro ẹkenyenede ye mme otu mbiowo ye/m̀mê mme kọmiti ubọpufọk ke kpukpru ebiet ke ikpehe emi. N̄ko-n̄ko, ẹyekụt nte ke ẹnanam ndusụk utom ke Mme Ufọkmbono Obio Ubọn̄, ke adan̄aemi ediwak eken ẹsụk ẹdude ke ekikere m̀mê ke n̄wed. Ẹma ẹnọ ndusụk mme anamutom unyịmesịt m̀mê mbonutom nnyịn ukpep ke isua oro, ndien mmọ ẹmekabade ẹdi akwa inyene nnyịn ke ndinam ọsọn̄urua utom emi.”

¹³ Okụk Ndida Nnam Utom Ubọp Ufọkmbono Obio Ubọn̄: Ẹkpenyene ndinam ndutịm kaban̄a okụk ekededi ke ntọn̄ọ ntọn̄ọ. (Luke 14:28-30) Mbiowo ẹkpenyene ndibiere m̀mê esop enyene ukeme ndikpe ofụri ekọmurua oro abuanade ebe ke ndinam ndụn̄ọde man ẹbiere (1) okụk ifan̄ ke ẹditịp ke eboho man an̄wam ke okụk udep isọn̄ ye eke ubọpn̄kpọ, (2) okụk ifan̄ ke ẹkeme ndibuọt ke n̄kann̄kụk ye udomo ini oro okụk emi edidude, ye (3) okụk ifan̄ ke mme asuanetop ẹnyene ke ekikere ndisitịp ke ọfiọn̄ ke ọfiọn̄ ndida n̄kpe ebuọt ekededi oro oyomde ekpe ke adianade ye okụk edise mban̄a ubiatokụk ofụri ini.

¹⁴ Ke oro ebede, mbiowo esop oro ẹyomde un̄wam okụk ẹto Okụk Ufọkmbono Obio Ubọn̄ N̄ka ẹkpenyene ndineme utom oro mmọ ẹduakde ye okụk oro ẹyomde ye Kọmiti Ubọpufọk eke Ikpehe ke Ikpehe, emi ekemede ndin̄wam mmọ ke ndikama babru Kingdom Hall Loan Survey ntọt N̄ka mban̄a se mmọ ẹyomde ye ofụri se isịnede ke utom oro. Ke mbiowo ẹma ẹkewet n̄kpọ ẹyọhọ ikpehe eke mmọ ke babru oro, esenyịn circuit eyewet ekikere esie esịn onyụn̄ ọkpọn̄ babru oro ọnọ Kọmiti Ubọpufọk eke Ikpehe ke Ikpehe man ẹsịn ekikere mmọ. Mmọ ẹyewet n̄kpọ ẹyọhọ babru emi ẹnyụn̄ ẹnọ akpa oro ẹsọk N̄ka. Ke Kọmiti Ubọpufọk eke Ikpehe ke Ikpehe ama ọkọnọ ntọt ẹsọk N̄ka, ẹdinọ n̄wed nnennen ẹsọk mme esop oro ẹbuanade. Ẹdinọ un̄wam okụk sụn̄sụn̄ adan̄a nte okụk odude onyụn̄ ekemde ye udọn̄.

¹⁵ Nyene Ifịk Ifịk Edu: Ẹnyene nditoro kpukpru owo ke ntatubọk mmọ ke ndinọ Okụk Ufọkmbono Obio Ubọn̄ N̄ka ibetedem. Ẹbọ ediwak ikọ ekọm ẹto mme esop oro ẹkenọde un̄wam. ‘Ubọk ke aka onyụn̄ ọnyọn̄’ ke otu mme esop. (2 Cor. 8:14, 15) Esop kiet ke Ohafia ekewet ete: “Nnyịn, kpukpru mme andibuana ke esop emi, imotoro mbufo etieti ke nditọn̄ọ Okụk Ufọkmbono Obio Ubọn̄ N̄ka emi ndien akpan akpan Kọmiti Ubọpufọk eke Ikpehe ke Ikpehe emi nnyịn idahaemi ibọde ufọn ito. Kpukpru ini nnyịn imesiti mbufo ke akam nnyịn inyụn̄ iben̄e Jehovah ọnọ n̄kaiso ndutịm mbufo ibetedem.” Esop efen ke Ikom, Cross River State, ama ewet n̄ko ete: “Nnyịn kemi iwụt idatesịt ye esịtekọm ke nditọn̄ọ Kọmiti Ubọpufọk eke Ikpehe ke Ikpehe eke Edem Usiahautịn. Ke October 5, 1995, ke ini ikenyenede mbono ye kiet ke otu mme andibuana ke Kọmiti Ubọpufọk eke Ikpehe ke Ikpehe, ẹma ẹnọ nnyịn item ẹban̄a usụn̄ ye ebiet oro ẹkemede ndibọp Ufọkmbono Obio Ubọn̄. Ke nditiene item emi, nnyịn ima ikụt ufọn ediyom isọn̄ efen ke ẹsiode enyeoro nnyịn ikadade inam n̄kpọ ke mbemiso ẹfep. Nnyịn imọbọ ufọn ito utịbe utịbe ndutịm emi Jehovah anamde ke ndisiak utọ kọmiti emi.”

¹⁶ Ke ini edibọp obufa Ufọkmbono Obio Ubọn̄, ifiopesịt, ifịk, ye in̄wan̄în̄wan̄ edu ẹtịp ẹsịn ke edikụt unen ke utom emi. Ukem edu oro ekpenyene ndika iso adan̄a nte iyomde ndinam ediwak owo efen efen ẹdinyene ifiọk akpanikọ inyụn̄ isịn udọn̄ inọ mmọ ndisop idem ye nnyịn ke Ufọkmbono Obio Ubọn̄. Utọ ifịk oro edi uyarade esịtekọm oro otode ke n̄wọrọnda n̄kọri oro odude ke ibatowo oro ẹdụkde mbonoesop ye ke ofụri n̄kọri esop.

¹⁷ Nte nnyịn ikade iso nditat utom ukwọrọikọ nnyịn, in̄wanade etieti ke utom oro ikamade ke ubọk, edidiọn̄ Jehovah nte eyịghe mîdụhe eyeka iso ndidu ye nnyịn. (Luke 13:24) Nnyịn ifiọkke m̀mê nso n̄kọri ana ebet nnyịn ke ini iso. Edi oyom nnyịn iben̄e idem ndidara mme andituak ibuot ekededi oro ẹdibụn̄ọde ẹdụk ke ini iso. Oro oyom mben̄eidem ke n̄kan̄ nnyịn idahaemi. Ntem, nnyịn ibọn̄ akam iben̄e n̄kaiso edidiọn̄ ye ndausụn̄ Jehovah. Ke ndibọp nnọ ini iso, kpukpru nnyịn ikpakam idi mme anamutom ye Jehovah—ke n̄kan̄ eke ikpọkidem, ke n̄kan̄ n̄kpọ obụkidem, ye ke n̄kan̄ eke spirit. Enye ke akpanikọ eyediọn̄ nnyịn nte nnyịn itịmde ise mbon oro ẹfen̄ede ẹdụk esop Obio Ubọn̄ esie enyịn ke mme akpatre ikpehe ukperedem ini ẹmi.—Isa. 60:8, 10, 11, 22.