Edibọp Ufọkmbono Obio Ubọn̄ ke Nigeria

¹ Ke ini nnyịn isede an̄wautom ofụri ererimbot, edi n̄kpọ idatesịt ndikụt akwa n̄kọri oro esop Jehovah eke isọn̄ enyenede! Ke isua oro ekebede, ẹma ẹsiak mbufa esop 172 ke Nigeria ikpọn̄, ke adan̄aemi ẹkediande ofụri ibat esop edide 3,348 ke ofụri ererimbot. Ye ofụri n̄kọri emi, idịghe n̄kpọ n̄kpaidem nte ke oyom ẹnyene mme Ufọkmbono Obio Ubọn̄ efen efen.

² Ediwak nditọete iren ye iban ẹwụt n̄wọrọnda ifịk ye ibetedem ẹnọ esop Jehovah ebe ke ndinọ ini ye inyene mmọ ke unyịmesịt ke edibọp Ufọkmbono Obio Ubọn̄. Kọmiti Ubọpufọk eke Ikpehe ke Ikpehe 25 oro ẹnamde utom ke Nigeria ẹse ẹban̄a mme udọn̄ ẹdude ke n̄kpọ nte esop 160 ke ikpehe mmọ kiet kiet. Ẹyak edise enyịn ke mme utom edibọp ye edifiak ndiọn̄ ẹnọ kọmiti eke ikpehe ke ikpehe, ẹnyụn̄ ẹdara utom mmọ. Ẹda edu Christian eke edinọ ye n̄waidem ẹyọhọ ofụri ndutịm aban̄ade edibọp Ufọkmbono Obio Ubọn̄—kpa se idide isio ye ọsọ edu oro ẹwụtde ke ererimbot.—2 Tim. 3:2, 4.

³ Man an̄wam ke ndinam mme Ufọkmbono Obio Ubọn̄ ẹda ẹkekem ye idaha, N̄ka ọnọ mme kọmiti eke ikpehe ke ikpehe mme mbuwed Ufọkmbono Obio Ubọn̄. Emi ayan̄wam etre ndibiat ini ye inyene mme anamutom unyịmesịt. Enye n̄ko ayan̄wam ke edida Okụk Ufọkmbono Obio Ubọn̄ N̄ka nnam n̄kpọ ye eti ibuot. Mbiowo ke emi ẹkeme ndinam edimek mmọ nto mme akpan mbuwed ẹmi. Ndinyene mbuwed emi ayan̄wam ndinyene mme idaha Ufọkmbono Obio Ubọn̄ oro ẹtịmde ẹdi ukem ukem ẹnyụn̄ ẹnyenede iwụk. Nte mme esop ẹdianade kiet ke ndinọ ibetedem ke ndinam mme Ufọkmbono Obio Ubọn̄ ẹnyene ukem idaha, nnyịn idori enyịn ite ke mbiomo ediwak mme ewet mbuwed ufọk, ọdiọn̄-ukwakutom, ye mme anamutom usọ eken oro ke unyịmesịt ẹnọde un̄wam mmọ ẹyefere akamba akamba.

⁴ Se Iwakde Ikan Usụn̄ Kiet Ndinam Enye: Mme esop kiet kiet ẹsinam mme ubiere ke n̄kann̄kụk edide ndibọ ufọk ke ukpe okụk m̀mê ndibọbọp mme Ufọkmbono Obio Ubọn̄. Mmọ n̄ko ẹsise ẹban̄a mme ubiatokụk ke edibọp ye editịm n̄kama. Man ẹtịm okụk ẹkama, ata ediwak esop ẹdomo ndida un̄wam mme anamutom unyịmesịt oro ẹnyenede usọ nnam adan̄a ediwak utom edibọp nte ẹkekeme.

⁵ Ẹkeme ndida mme kọrikọri, itiat, ntan, eto, m̀mê mme n̄kpọutom efen mbọp mme ufọkmbono ke idemmọ, ọkọn̄ọde ke ekọmurua ọkọrọ ye se idude inyụn̄ idide ọsọ ke n̄kann̄kụk oro. Edi n̄kpọ mfụhọ nditịn̄, owo ikụreke ediwak Ufọkmbono Obio Ubọn̄ oro ẹketọn̄ọde ndibọp ke n̄kann̄kụk idem ke ediwak isua ẹma ẹkebe. Ndusụk mbon oro ẹnyenede udọn̄ ẹda idaha m̀mê ebiet oro ndusụk Ufọkmbono Obio Ubọn̄ ẹdude nte ntak nditre ndidụk mme mbono esop. Eyịghe idụhe ke ini ẹbọpde mme Ufọkmbono Obio Ubọn̄ oro ẹfọnde ẹnyụn̄ ẹdotde, emi ayan̄wam mbio obio oro ẹdude ke n̄kann̄kụk ndikụt nte utom emi edide akpan n̄kpọ.

⁶ Ntak kiet emi anamde owo mîkemeke ndikụre Ufọkmbono Obio Ubọn̄ ke ediwak isua ekeme ndidi koro esop ọkọtọn̄ọde ufọkmbono oro okokponde akaha m̀mê ekemekde ọsọn̄urua ndudiọn̄, n̄kukụre ndikụt nte ke mmimọ ikemeke ndikụre enye ke ntak unana okụk. Ediwak ‘ikebemke iso itie ibat se iditakde’ man ẹkụt m̀mê mme asuanetop ẹyekeme ndikpe ekọmurua ẹdidade ẹkụre utom oro. (Luke 14:28) Mbon en̄wen ẹketọn̄ọ ye esisịt okụk oro ẹkenyenede kpọt ndien ẹkenyene nditre ke ediwak isua mbemiso mmọ ẹkekemede ndika iso. Edieke oro edide se itịbede inọ mbufo, mbọk ẹsobo ye Kọmiti Ubọpufọk eke Ikpehe ke Ikpehe eke n̄kann̄kụk mbufo. Ẹdọhọ mmọ ẹsịn ukeme mmọ ke ndikụre adan̄a ediwak Ufọkmbono Obio Ubọn̄ oro owo mîkụreke kan̄a nte ẹkekeme man ẹkeme ndiyak mmọ ẹmi nnọ.

⁷ Ndida usọp usọp usụn̄ ubọp ufọk edi usụn̄ efen nditọn̄ọ nnyụn̄ n̄kụre utom Ufọkmbono Obio Ubọn̄ ke ata ekpri ibio ini. Mme esop oro ẹduakde ndibọp obufa ufọkmbono ẹkpenyene ndikere mban̄a usọp usọp usụn̄ ubọp ufọk. Ediwak owo inịmke ke akpanikọ kan̄a nte ke ẹkeme nditọn̄ọ nnyụn̄ n̄kụre utom Ufọkmbono Obio Ubọn̄ ke ufan̄ ọfiọn̄ kiet. Nte ededi, ẹma ẹnam emi ẹwụt ke nsio nsio itie iba ke Nigeria (Ewossa, Edo State, ye Dopemu, Lagos State), ndien nditọete ẹma ẹkop idatesịt ndikụt emi. Nnyịn iyokop inemesịt ndikụt ẹbọpde mme Ufọkmbono Obio Ubọn̄ efen efen ke usụn̄ emi.

⁸ Ke Lagos, edibọp Ufọkmbono Obio Ubọn̄ kiet ọkọtọn̄ọ ke isua 25 ẹmi ẹkebede. Ke ndondo emi, mme esop ẹmi ẹdade ufọkmbono oro ẹnam n̄kpọ ẹma ẹbiere ndikụre enye man ẹyak ẹnọ. Nte ẹnamde emi, mmọ ẹma ẹkere ke ọkpọfọn ndibọp ufọkmbono efen man ẹsụhọde ebeubọk udomo ini oro ẹdade ufọkmbono oro odude idahaemi ẹnam n̄kpọ. Sia mbon oro ẹdidade obufa ufọkmbono emi ẹnam n̄kpọ ẹdide ubak esop oro esede aban̄a edin̄wam ufọkmbono oro odude idahaemi ke okụk, mmọ ẹma ẹkere ẹte ke ẹkpenyene ndikụre nnyụn̄ nyak ufọkmbono iba ẹmi nnọ ke ukem ini. Ke ẹdade usọp usọp usụn̄ ubọp ufọk, edibọp obufa ufọkmbono ekebịghi ke usen 15 kpọt ndien ẹma ẹyak ufọkmbono mbiba ẹnọ ke ukem usen.

⁹ Sia ini oro adade nditọn̄ọ nnyụn̄ n̄kụre usọp usọp usụn̄ ubọp ufọk etịmde ekpri, ẹtoro ẹte ke esop ekededi oro oyomde ndida usụn̄ emi ekpenyene ndibem iso nnyene nnennen n̄wed oro ekemde ye ibet, n̄wed udomo isọn̄, ye mme n̄wed ubọpufọk oro ẹnọde unyịme. Ke ofụri ofụri, ọfọn mbufo ndibọ unyịme ubọpufọk mbemiso mbufo ẹtọn̄ọde ndibọp. Nte ededi, ke ebiet emi owo mîkemeke ndinam oro, ekpenyene ndidi mbufo ẹma ẹsịn eben̄e ẹyom utọ unyịme oro etisịm ini oro mbufo ẹtọn̄ọde edibọp ẹkpenyụn̄ ẹnyene ndisịn ifịk nyom n̄wed eben̄e oro. Edi akpan n̄kpọ nte mbufo ẹnọ mme n̄wed isọn̄ mbufo ẹsọk N̄ka man ẹsọn̄ọ ke enen. Ẹyenam okụk otode ndutịm Okụk Ufọkmbono Obio Ubọn̄ N̄ka odu edieke esop oro oyomde ndibọ utọ un̄wam oro. Esop ekededi oro oyomde ndida usọp usọp usụn̄ ubọp ufọk ekpenyene ndibem iso nneme mban̄a utom oro ye Kọmiti Ubọpufọk eke Ikpehe ke Ikpehe n̄kann̄kụk mmọ. Ẹkpenyene ndinọ n̄wed eben̄e oro ẹwetde-wet ẹsọk N̄ka.

¹⁰ Mme Anamutom Unyịmesịt Ẹnam Eti Utom: N̄ka owụt esịtekọm ọnọ ediwak mbonutom unyịmesịt oro ẹn̄wamde ke edibọp Ufọkmbono Obio Ubọn̄. Enen̄ede edi n̄kpọ inemesịt ndikụt ediwak mbonutom unyịmesịt ẹnọde idemmọ ke kpukpru ikpehe edibọp Ufọkmbono Obio Ubọn̄. Ndutịm emi okụt unen ke ntak utọ edu unyịmesịt, ntatubọk, ye edidianakiet eke mbonutom unyịmesịt ẹmi, oro ẹyakde ini oro ẹkpebiatde mfọn mfọn ye mme esop ye ubon mmọ ẹsịn. (Ps. 110:3; Col. 3:23) Ima ima edinam emi anam mmọ ẹdot itoro, esịtekọm, ye ọyọhọ ibetedem nnyịn.—Rome 12:10; Heb. 13:1.

¹¹ Ẹben̄e kpukpru mbon oro ẹdotde ndin̄wam mme Kọmiti Ubọpufọk eke Ikpehe ke Ikpehe ndiwet n̄kpọ nyọhọ mme babru Kingdom Hall Volunteer Worker Questionnaire (S-82). Esop ọyọnọ mmọ ẹmi ẹsọk kọmiti eke ikpehe ke ikpehe ndiwụt mme n̄kpọ ẹnamde anamutom odot ye ini emi enye edikemede ndidu. Ke ini mme ukpụhọde ẹdude ke idaha anamutom unyịmesịt, nte ke ini owo ọwọrọde idụn̄ m̀mê ẹmekde owo nte asan̄autom unamutom m̀mê ebiowo, ẹkpenyene ndiwet n̄kpọ nyọhọ mbufa babru usọp usọp ẹnyụn̄ ẹyak ẹnọ ebe ke ewetn̄wed esop. Edieke anamutom unyịmesịt mîdotke aba, mbiowo ẹkpenyene ndida leta nsian kọmiti ubọpufọk eke ikpehe ke ikpehe usọp usọp. Ke ini ẹyomde babru efen efen, ẹkeme ndida Literature Order Form eke ọfiọn̄ ke ọfiọn̄ ntobo mmọ. Esenyịn circuit n̄ko enyene udọn̄ ke idem mbon oro ẹnọde idem ke unyịmesịt ke ikpehe edisana utom emi. Ke ntre, enye ekpenyene ndidụn̄ọde n̄kpọ udọn̄ n̄wed oro ọdọn̄ọde mme udiana ikọn̄ n̄wed Kingdom Hall Volunteer Worker Questionnaire ini kiet kiet emi enye akade ekese esop.

¹² Ndisụhọde Ekọmurua Ubọpufọk: Ẹma ẹnọ mme Kọmiti Ubọpufọk eke Ikpehe ke Ikpehe ndausụn̄ nditịm itie utom udep n̄kpọ oro ebiowo emi enyenede ukeme esede enyịn. Nditọete ẹmi ẹnamde utom ke itie utom emi ẹbem iso ẹdụn̄ọde urua n̄kpọ ye ntịn̄enyịn man ẹyom ekọmurua oro ọfọnde ebe ke ndimen ekọmurua mme n̄kpọ ndomo onyụn̄ ebe ke ndikpe urua. Ke usụn̄ emi, ẹkeme ndinam ubiere m̀mê ẹkpedep n̄kpọ ẹto mmanie ye m̀mê mme n̄kpọ ewe ke ẹkpedep. Ndusụk ini, ke ini ẹnamde utom ke Ufọkmbono Obio Ubọn̄, ẹsinọ nditọete oro ẹdotde ke esop n̄kann̄kụk ikot ndin̄wam ke itie utom emi. Ini ekededi oro utom Ufọkmbono Obio Ubọn̄ abuanade ediyom un̄wam mbonutom unyịmesịt ẹtode mme esop efen ke ẹsiode mbon oro ẹsisopde idem ke ufọkmbono oro ẹfep, edide obufa m̀mê edifiak mbọp, kọmiti eke ikpehe ke ikpehe edise enyịn aban̄a utom oro.

¹³ Okposụkedi ima ediwak owo osụhọrede ke mme akpatre usen ẹmi, ikọt Abasi ẹka iso ndiwụt uyarade ima oro mmọ ẹmade kiet eken, kpa ima oro ebede mme adan̄a eke orụk ye obio. (Matt. 24:12) Ke ndikpebe Ete nnyịn eke heaven, nnyịn ikpakam ika iso iwụt utọ ima oro ebe ke nnyịn ndinyịme ndin̄wam utom edibọp Ufọkmbono Obio Ubọn̄ ke Nigeria. Nnyịn ndinam ntre ayada uwak edidiọn̄ ye unyịme Jehovah edi.—Mal. 3:10; Heb. 6:10.