Mbụme Oro Mme Andikot Ẹbụpde
Ndi Abasi Esida Afanikọn̄ Amia Owo Ufen?
Ndi akanam n̄kpọ mmọn̄eyet ọwọrọ fi tutu afo ekere m̀mê Abasi akam amia imọ ufen? Iyara udọn̄ọ ekeme ndinam fi, mbabuat unọmọ onyụn̄ ekeme ndibiomo fi ata idiọk ndo, mîdịghe, n̄kpa ekeme ndida owo fo, anam ekere m̀mê Abasi akam amia imọ ufen.
Utu ke ndinyene utọ ntaha ekikere oro, akpana esịt enem fi ndifiọk ke Abasi akam oyom owo okop inemesịt okûnyụn̄ odụk afanikọn̄. Ntak edi oro Abasi okobotde Adam ye Eve esịn ke “in̄wan̄ Eden,” kpa ediye Paradise emi afanikọn̄ ndomokiet mîkodụhe.—Genesis 2:15.
Edi n̄kpọ mbọm nditịn̄ nte ke akpa ete ye eka nnyịn emi ẹma ẹkokoi ẹsọn̄ ibuot ye Abasi ẹnyụn̄ ẹtaba utọ edidiọn̄ oro. Nsọn̄ibuot mmọ ama esịn mmọ ye kpukpru nnyịn emi idide nditọ mmọ ke afanikọn̄. Ntak-a? Se iketịbede etie nte ete oro mînyịmeke ndikpe okụk ufọk—n̄kọ enyeneufọk edibịn kpukpru owo ke ubon oro isio ke ufọk esie. Ndien oro ekeme ndinam mmọ ẹbọ ufen. Ntre n̄ko, tọn̄ọ akpa ete ye eka nnyịn ẹkesọn̄ ibuot ye Abasi, afanikọn̄ editie nte edịm, ibọn̄ke ọkọm kiet. (Rome 5:12) Ke ediwak isua ẹma ẹkebe, Job emi ekedide edinen owo ekeseme ete ke edieke ẹkpedomode ukụt ye ndutụhọ imọ ke udomon̄kpọ, ke ‘ẹkpedobi ẹkan ntan-inyan̄.’—Job 6:2, 3.
Ntak en̄wen emi nnyịn isidụkde afanikọn̄ edi nte ke nnyịn isifiọkke se iditịbede ke ini iso. Ke uwụtn̄kpọ, owo ekeme ndibọp ufọk ke ebiet oro ikan̄ esisọpde obụbede. Afo onyụn̄ ọkọbọ ufọk do odụn̄, unyeneke-nyene ifiọk uban̄a se isitịbede ke n̄kann̄kụk oro. Ndi idịghe afanikọn̄ ke osio idemfo ye ubon fo anyan ọnọ oro? Edieke n̄kpọ etịbede, ndi oyosụk ọdọhọ ke Abasi amia fi ufen? Bible etịn̄ nnennen nnennen se isiwakde ndinam owo odụk afanikọn̄ ete: “Ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.”—Mme N̄ke 14:15.
Edi n̄kpọ ndọn̄esịt ndifiọk nte ke okposụkedi emi afanikọn̄ mîsioho owo eto, ke Abasi ọmọn̄ ananam ubonowo ọbọhọ kpukpru emi. Ini ama ekem, ududụkke aba afanikọn̄ ndomokiet, udunyụn̄ ukwe owo odụkde, m̀mê ndikop-kop afanikọn̄ ke utọn̄. Mmọn̄eyet mfụhọ, ubiak, ye n̄kpa ‘ẹyebe ẹfep.’ (Ediyarade 21:4) Edi n̄kpọ ndọn̄esịt n̄ko ndifiọk ke Abasi ọn̄wọn̄ọ ke afanikọn̄ ndomokiet idibiatke aba ufọk m̀mê in̄wan̄ fo. Utu ke oro, mme owo “ẹyedia se ubọk mmọ ẹnamde” ẹyụhọ.—Isaiah 65:21-25.
Ke adan̄aemi etiede ebet ini emi Abasi edisiode kpukpru afanikọn̄ ifep ke isọn̄, nso ke akpanam idahaemi mbak udusio idem ukaha unyan unọ afanikọn̄? Akpa kan̄a, Bible eteme nnyịn ete ‘ibuọt idem ye Jehovah ke ofụri esịt, ikûnyụn̄ uberi edem ke asian nnyịn.’ (Mme N̄ke 3:5) Yak Jehovah ada fi usụn̄ onyụn̄ ọdọn̄ fi esịt. Kop nti item esie emi ẹdude ke Bible. Emi ayan̄wam fi anam nti ubiere, idinyụn̄ iyakke odụk afanikọn̄ oro mûkpodụkke.—Mme N̄ke 22:3.