Ndi Bible Ekeme Ndidọn̄ Mi Esịt?
Se Bible etịn̄de
Ih. (Rome 15:4) Se ndusụk itie Bible emi ọdọn̄de mbon emi ẹnyenede ikpọ mfịna esịt, onyụn̄ an̄wamde mbon emi esịt mînaha sụn̄ m̀mê emi ekikere oyode ẹyọ.
Ke ibuotikọ emi
Afanikọn̄
Psalm 23:4: “Idem edieke nsan̄ade ke itịghede ọkpọsọn̄ ekịm, ndifeheke idiọk, koro afo odude ye ami.”
Se ọwọrọde: Ke ini ọbọn̄de akam ọnọ Abasi, onyụn̄ ayakde ikọ esie an̄wam fi, eyenyene uko ọyọ mfịna.
Philippi 4:13: “Mmenyene ukeme ndinam kpukpru n̄kpọ ebe ke enye emi ọnọde mi odudu.”
Se ọwọrọde: Abasi ekeme ndinọ fi odudu ọyọ se ededi oro ọwọrọde fi.
N̄kpa owo fo
Ecclesiastes 9:10: ‘Baba utom, baba uduak, baba ifiọk, baba ọniọn̄ idụhe ke Udi.’
Se ọwọrọde: Mbon emi ẹma ẹkekpan̄a ibọhọ ufen, mmọ inyụn̄ ikemeke ndinam nnyịn ibak, mmọ idiọn̄ọke n̄kpọ ndomokiet.
Utom 24:15: ‘Mme owo ẹyeset ke n̄kpa.’
Se ọwọrọde: Abasi ekeme ndinam mbon nnyịn oro ẹkekpan̄ade ẹfiak ẹdidu uwem.
Nditịmede esịt n̄kaha
Psalm 86:5: “Koro afo ọfọnde, O Jehovah,a onyụn̄ enyịmede ndifen nnọ; ima-mfọnido oro afo owụtde kpukpru mbon oro ẹsemede ẹkot fi onyụn̄ okpon.”
Se ọwọrọde: Abasi esifen ọnọ mbon emi ẹnen̄erede ẹkabade esịt ẹkpọn̄ idiọkn̄kpọ mmọ, ẹnyụn̄ ẹbierede ke mmimọ idinamke aba.
Psalm 103:12: “Kpa nte edem usiahautịn oyomde usụn̄ ọkpọn̄ edem usoputịn, ntre ke enye enịm mme ndudue nnyịn oyom usụn̄ ọkpọn̄ nnyịn.”
Se ọwọrọde: Jehovah ama efen ọnọ nnyịn, Enye esifre idiọkn̄kpọ oro ofụri ofụri. Enye inyụn̄ isifiakke iti idiọkn̄kpọ oro man ada amia nnyịn ufen.
Mfụhọ
Psalm 31:7: “Afo omokụt ukụt mi; afo ọmọfiọk nnanenyịn ukpọn̄ mi.”
Se ọwọrọde: Abasi enen̄ede ọdiọn̄ọ kpukpru se iwọrọde fi. An̄wan̄a Enye nte etiede fi ke idem—idem ke ini mîn̄wan̄ake mbon en̄wen.
Psalm 34:18: “Jehovah emekpere mmọ eke esịt obụn̄ọde; Enye onyụn̄ anyan̄a mmọ eke spirit mmọ anuahade.”
Se ọwọrọde: Abasi ọn̄wọn̄ọ ke iyan̄wam fi ke ini ofụhọde. Enye ekeme ndinọ fi odudu ọyọ se iwọrọde fi.
Udọn̄ọ
Psalm 41:3: “Jehovah eyese aban̄a enye ke bed udọn̄ọ esie.”
Se ọwọrọde: Abasi ekeme ndinọ fi ata emem man ọyọ idiọk udọn̄ọ, Enye n̄ko ọyọnọ fi odudu, an̄wam fi ekeme ndiyọ, onyụn̄ ọnọ fi ifiọk ebiere nnennen se akpanamde.
Isaiah 33:24: “Baba andidụn̄ kiet ididọhọke ite: “Ndọdọn̄ọ.”
Se ọwọrọde: Abasi ọn̄wọn̄ọ ke oyodu ini emi mme owo mîdidọn̄ọke aba.
Editịmede esịt
Psalm 94:19: “Ke ini ediwak ekikere ẹtịmerede mi esịt, ndọn̄esịt fo enem ukpọn̄ mi.”
Se ọwọrọde: Edieke iben̄ede Jehovah an̄wam nnyịn esịt ama etịmede nnyịn, Enye ekeme ndinam esịt ana nnyịn sụn̄.
1 Peter 5:7: ‘Ẹtop kpukpru editịmede esịt mbufo ẹdori enye ke idem, koro enye ekerede aban̄a mbufo.’
Se ọwọrọde: Abasi imaha nte ibọde ufen. Enye akam ọdọhọ nnyịn ibọn̄ akam inọ enye, mfịna ama esịm nnyịn.
Ekọn̄
Psalm 46:9: “Enye amanam ekọn̄ etre tutu esịm utịt isọn̄.”
Se ọwọrọde: Idibịghike, Obio Ubọn̄ Abasi ayanam kpukpru ekọn̄ etre.
Psalm 37:11, 29: “Mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt. . . . Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”
Se ọwọrọde: Nti owo ẹdidu ke emem ke isọn̄ emi ke nsinsi.
Ndifịna idem mban̄a nte ini iso editiede
Jeremiah 29:11: “‘Ami mmọfiọk ekikere oro ami n̄kerede mban̄a mbufo,’ uyo Jehovah edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn.’”
Se ọwọrọde: Abasi oyom ikọt esie ẹnịm ke n̄kpọ ọyọfọn ke ini iso.
Ediyarade 21:4: “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”
Se ọwọrọde: Abasi ọn̄wọn̄ọ ke iyetre kpukpru mfịna ubonowo.
a Jehovah edi ata enyịn̄ Abasi. (Psalm 83:18) Kot ibuotikọ emi “Anie Edi Jehovah?”