N̄kpọ-Obot Ayarade Ọniọn̄ Abasi
‘Abasi eteme nnyịn akan mme unam isọn̄, onyụn̄ anam nnyịn inyene ibuot ikan inuen enyọn̄.’—JOB 35:11.
INUEN ẹnyene n̄wọrọnda ukeme. Mmọ ẹsife ke usụn̄ oro akpade mme anam ubomofụm idem. Ndusụk inuen ẹsife ediwak tọsịn kilomita ẹbe inyan̄ibom ẹkesịm ebiet mmọ, iduehe usụn̄, kpa ye oro mmọ mînyeneke n̄wed usụn̄isan̄.
N̄wọrọnda n̄kpọ efen oro inuen ẹsinamde—emi onyụn̄ anamde ẹfiọk ọniọn̄ Andibot mmọ—edi ndida ikwọ ye uyom nneme nneme. Ẹyak ise ndusụk usụn̄ oro mmọ ẹsinamde emi.
Nneme Inuen
Ndusụk inuen ẹsitọn̄ọ ndineme nneme idem ke ini ẹsịnede ke nsen. Ke uwụtn̄kpọ, nsan̄kot esisịn n̄kpọ nte nsen itiaita ke nsụhọde n̄kaha, kiet kiet ke usen. Edieke nditọ ẹkọride ke mme nsen emi nte ekemde ye usen emi ẹkesịnde mmọ kiet kiet, ọwọrọ ke ayada n̄kpọ nte usen itiaita ndibot kpukpru mmọ. Edieke etịbede ntem, emi ọkpọnọ uman inuen emi ọkpọsọn̄ utom ndise mban̄a nditọ emi ẹsịmde urua kiet, ke adan̄aemi enye osụk okụbọde ke nsen kiet oro mîbotke kan̄a. Edi utu ke emi nditịbe, ofụri nsen inuen itiaita oro ẹsida n̄kpọ nte hour itiokiet kpọt ẹbot. Emi esisan̄a didie etịbe? Mme anam-ndụn̄ọde ẹdọhọ ke se isinamde emi etịbe edi koro nditọ inuen emi ẹsisịne ke esịt nsen ẹneme nneme ye kiet eken ẹnyụn̄ ẹdiomi nte idisan̄ade ibot idem ke ukem usen.
Ke inuen ẹma ẹkekponi, nyara ẹsikwọ ikwọ. Mmọ ẹsikwọ ikwọ akpan akpan ke ini ẹyomde ndidoro uman, man ẹwụt ke mmimọ ikara ebiet oro idude m̀mê ndida n̄kot uman. Kpukpru inuen ẹnyene usem mmọ, ndien emi esinam uman inuen ọfiọk nyara oro ẹdide uduot mmọ.
Enyene se isinamde inuen ẹsikwọ ikwọ tụhi-tụhi usenubọk ye ke mbubịteyo. Ofụm isinen̄ekede ifụme, uyom isinyụn̄ ikponke ini emi. Mme anam-ndụn̄ọde ẹdọhọ ke ikwọ inuen esinen̄ede ọsọn̄ uyo ke usenubọk ye ke mbubịteyo akan uwemeyo.
Okposụkedi nyara ẹsiwakde ndikwọ ikwọ, nyara ye uman ẹsisioro uyo oro esiwọrọde nsio nsio n̄kpọ. Odu orụk inuen oro ẹnyenede nsio nsio usụn̄ usụkkiet oro ẹsidade ẹneme nneme. Kiet edi nditọt ke asua ke efe ke enyọn̄ oyom se editade, efen edi nditọt ke asua do ke isọn̄.
Ọsọn̄urua Enọ
Ọniọn̄ oro Andibot ọnọde inuen enen̄ede enyene ndyọ. Edi nte owo esinemede nneme akam enyene ndyọ akan oro. Job 35:11 ọdọhọ ke Abasi “anam nnyịn inyene ibuot ikan inuen enyọn̄.” Owo kpọt ekeme ndida uyo ye idem ntịn̄ se isịnede enye ke esịt, ọkpọkọm se enye oyomde nditịn̄ ọsọn̄ adan̄a didie.
Nseknditọ ẹnyene ndammana ukeme ndikpep n̄kpọsọn̄ usem ẹkan mme edibotn̄kpọ ekededi. N̄wed oro American Scientist emi odude ke Intanet ọdọhọ ete: “Eyennsek emi ẹkpepde isan̄ esikeme ndikpep usem, idem ke ini ete ye eka mîsinemeke nneme ye enye; nditọ oro ẹdide inan ẹsikam ẹsion̄o usem idiọn̄ọ mmọ ẹdi edieke owo mîkpepke mmọ usem idiọn̄ọ.”
Ndikeme ndida uyo ye idiọn̄ọ ntịn̄ se isịnede nnyịn ke esịt enen̄ede edi utịbe utịbe enọ Abasi. Edi enọ Abasi oro akam akande oro edi ndiyak owo ekeme ndineme nneme ye enye ke akam. Ke akpanikọ, Jehovah Abasi ke idemesie ọdọhọ nnyịn inyene nneme ye imọ. Ikọ Abasi ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹsian Abasi eben̄e mbufo.”—Philippi 4:6.
Ke ini iyomde ndinam n̄kpọsọn̄ ubiere, Jehovah oyom nnyịn ida akpakịp ọniọn̄ oro enye akanamde ẹwet ẹdọn̄ ke Bible inam ubiere. Enye oyonyụn̄ anam nnyịn ifiọk nte ikpadade item Bible idu uwem. James oro eketienede ewet Bible ọdọhọ ete: “Edieke owo mbufo ekededi ananade ọniọn̄, yak enye aka iso eben̄e Abasi, koro enye ọnọ kpukpru owo ke ntatubọk inyụn̄ isueneke owo; ndien ọyọnọ enye.”—James 1:5.
Etie Fi Didie ke Idem?
Esitie fi didie ke idem ke ini okopde ndinem ikwọ inuen m̀mê ke ini okopde nte nsekeyen ekpepde nditịn̄ ikọ? Nte emesikụt ọniọn̄ Abasi ke mme n̄kpọ oro enye obotde?
Ke David emi eketienede ewet psalm ama eketie ekere nte ẹkebotde imọ, enye ọkọdọhọ Abasi ete: “Nyọkọm fi, koro nnyenede ndyọ ye ndịk; se afo anamde ẹdi utịbe; ukpọn̄ mi onyụn̄ ọfiọk enene.” (Psalm 139:14) Nte afo akade iso ekpep n̄kpọ aban̄a ọniọn̄ Abasi oro okụtde ke n̄kpọ-obot, afo eyenen̄ede enyene mbuọtidem nte ke Abasi ekeme ndinọ fi eti ndausụn̄.
[Se ẹwetde ke ikpọ abisi ke page 5]
Ndikeme ndineme nneme edi enọ Abasi
[Ebiet Ẹdade Ndise Ẹto ke page 4]
© Dayton Wild/Visuals Unlimited