Okụt N̄kpọ ke Enyịn Ọfiọk Mbụk
Ndusụk owo “ẹkere ke owo ikemeke ndifiọk Abasi ye se iditịbede inọ owo ke ini iso nte Ido Ukpono Christ ye mme ido ukpono en̄wen ẹkpepde. Mîdịghe, edieke ẹdikemede, edidi ke ini iso.”—BERTRAND RUSSELL, OWO AKWAIFIỌK, EKETỊN̄ IKỌ EMI KE 1953.
THOMAS HUXLEY, kpa ataifiọk emi esikpepde n̄kpọ aban̄a unam ama etịn̄ n̄kpọ aban̄a utọ ekikere emi. Enye akamana ke 1825, okonyụn̄ odu uwem ke eyo mme Charles Darwin, onyụn̄ etiene ekpep ke unam okoforo owo. Ke 1863, Huxley ama ewet ete ke imọ ikwe n̄kpọ ndomokiet ndiwụt ke Abasi do, ye nte ke enye “ekere aban̄a onyụn̄ ama nnyịn nte mme Christian ẹdọhọde.”
Ediwak owo ẹyenyịme ye se mme ọwọrọetop owo emi ẹtịn̄de, ẹnyụn̄ ẹdọhọ ke okụt n̄kpọ ke enyịn ọfiọk mbụk. Mmọ ẹkeme ndidọhọ ke ọkọi esinịm se enye mîkwe.
Ndi Bible ọdọhọ nnyịn inịm Abasi ntre nnan nnan? Baba-o! Bible ọdọhọ ke owo oro enịmde se ededi oro ẹtịn̄de—ye unana edidụn̄ọde nse m̀mê edi akpanikọ m̀mê idịghe—edi ọkọi m̀mê ndisịme. Mme N̄ke 14:15 ọdọhọ ke “ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.”
Nso ndien kaban̄a edinịm ke Abasi odu? Ndi n̄kpọ ndomokiet odu oro owụtde ke Abasi do, owo ikpetịn̄ke-tịn̄ iban̄a m̀mê enye ekere aban̄a onyụn̄ ama nnyịn?
Mme N̄kpọ-Obot Ẹnam Ifiọk Mme Edu Abasi
Ke ini Paul emi eketienede ewet Bible ekenyenede nneme ye nditọ Athens emi ẹkenen̄erede ẹfiọk n̄wed, enye ọkọdọhọ ke Abasi akanam “ererimbot ye kpukpru n̄kpọ emi ẹdude ke esịt.” Paul ama asian otuowo esie ke Abasi ama ubonowo, ye nte ke Enye iyomke “usụn̄ ikpọn̄ owo nnyịn kiet kiet,” okposụkedi mmọ mîkenịmke enye ke akpanikọ.—Utom 17:24-27.
Ntak emi Paul ekenịmde ke Abasi odu, ye nte ke enye ama mme owo emi Enye okobotde? Paul ama etịn̄ ntak kiet ke ini enye ekewetde n̄wed ọnọ ekemmọ mme Christian ke Rome. Enye ọkọdọhọ ke ‘tọn̄ọ ẹkebot ererimbot, ke mme owo ẹtịm ẹkụt mme edu Abasi oro enyịn mîkwe, ebe ke mme n̄kpọ oro Enye anamde.’—Rome 1:20.
Mme ibuotikọ oro ẹtienede ẹneme ita ke otu mme edu Abasi oro mme n̄kpọ oro enye obotde ẹnen̄erede ẹwụt. Nte okotde mme ibuotikọ emi, bụp idemfo ete, ‘Didie ke se n̄kpepde mban̄a mme edu Abasi emi otụk mi?’
[Se ẹwetde ke ikpọ abisi ke page 3]
Bible idọhọke nnyịn inịm Abasi ntre nnan nnan