Mmọ Ẹma Ẹnam Uduak Jehovah

Mary “Ememek Eti Udeme”

KE EYO Jesus, ibet mme rabbi ikayakke iban Jew ẹnyene ifụre. Ntem, ẹma ẹnam mmọ ẹnana udọn̄ ndikpep Ibet. Ke akpanikọ, ekikere kiet emi ẹkotde ẹsịn ke Mishnah ọkọdọhọ ete: “Edieke owo ekededi ọnọde eyenan̄wan esie ifiọk Ibet etie nte n̄kpọ eke enye ekpepde eyenan̄wan oro ebeubọk edinam idan̄.”—Sotah 3:4.

Nte utịp, ediwak iban ke Judea akpa isua ikie iketịmke ifiọk n̄wed. The Anchor Bible Dictionary ọdọhọ ete: “Uyarade ndomokiet idụhe nte ke mbemiso utom ukwọrọikọ Jesus akananam ẹma ẹyak iban Jew ẹdi mme mbet akwa andikpep, idịghe nditetịn̄ ndisan̄a ye utọ andikpep oro, m̀mê ndinọ owo en̄wen ekededi ukpep ke mîbọhọke nditọwọn̄.” Ke ndika iso nsụhọde iban itie, ndusụk mme adaiso ido ukpono ẹma ẹkam ẹwụk ewụhọ ọdọhọde ke erenowo ikpenyeneke ndineme nneme ye n̄wan ke eferife!

Jesus iketieneke mme utọ idiọk ido oro. Enye ama ekpep iban ọkọrọ ye irenowo n̄kpọ, ndien ẹma ẹkeme ndikụt iren ye iban ke otu mme mbet esie. (Luke 8:1-3) Ke idaha kiet, Martha ye Mary ẹma ẹkot Jesus ufọk. (Luke 10:38) Iban iba ẹmi ẹkedi nditọeka Lazarus, ndien kpukpru mmọ mbita ẹkedi mme mbet ye mme ata ufan Jesus. (John 11:5) Ekeme ndidi ubon emi ama ọwọrọ iso, ke ikerede iban̄a ediwak owo ẹmi ẹkedide ndidọn̄ Martha ye Mary esịt ke ini Lazarus akakpade. Ke idaha ekededi, se iketịbede ke ufọk mmọ ke ini Jesus akakade esen ikọnọhọ mmọ kpọt eti ukpep edi ọnọ nnyịn n̄ko.

Nditie ke Isọn̄ ke Ukot Jesus N̄kpep N̄kpọ

Nte eyịghe mîdụhe, Martha ye Mary ẹma ẹnyene ọkpọsọn̄ udọn̄ ndisịn ọkpọmiọk usọrọ nnọ Jesus, ndien iso-ọfọn mmọ ẹma ẹnen̄ede ẹnyene ukeme ndinam emi. (Men John 12:1-3 domo.) Nte ededi, ke ini esenowo mmọ ekedide edisịm, Mary “[eketie] ke isọn̄ ke ukot Ọbọn̄, okop ikọ Esie.” (Luke 10:39) Ido edinam owo ndomokiet ikpakpanke Jesus ndikpep n̄wan oro ekenyenede esịt akpanikọ emi ekenyenede udọn̄ ntre ndikpep n̄kpọ! Nnyịn imekeme ndikere nte Mary eketiede ke iso Jesus, adade idemesie nte eyen ufọkn̄wed emi enen̄erede akpan̄ utọn̄ ọnọ ukpepn̄kpọ Andikpep esie.—Men Deuteronomy 33:3; Utom 22:3 domo.

Ke mîbietke Mary, Martha ama ayak “utom . . . efịghe enye akaha.” Ke nditem ekese udia, enye ama enen̄ede enyene ekese ndinam ke utom esịtufọk oro okoyomde ekese oto enye. Ikebịghike, esịt ama ayat Martha nte ke imọ ikanam n̄kpọ ikpọn̄ ke adan̄aemi eyeneka imọ eketiede ke ukot Jesus! Ntre Martha ama esịbe odụk ikọ oro Jesus eketịn̄de ọnọ Mary, eyedi etịn̄de ke ibụmede ete: “Ọbọn̄, nte ukereke emi eyen-eka mi ọkpọn̄de utom ọnọ mi ikpọn̄? dọhọ enye edi edin̄wam mi nan̄a.”—Luke 10:40.

Eben̄e Martha emi ikakwan̄ake ke idemesie. Kamse, nditem udia nnọ otuowo edi ọkpọsọn̄ utom, ndien idịghe owo kiet kpọt okpobiom mbiomo emi. Nte ededi, Jesus ama okụt ifet ke ikọ esie ndida nnọ eti ukpep. Enye ọkọdọhọ ete: “Martha, Martha, afo ayak ediwak n̄kpọ ẹtịmede fi ekikere, ẹnyụn̄ ẹnọ fi afanikọn̄: n̄kpọ kiet edi se nyomde; koro Mary ememek eti udeme, eke mîdibọhọ enye ifep.”—Luke 10:41.

Jesus ikọdọhọke ite ke Martha ama anana udọn̄ ke mme n̄kpọ eke spirit. Ke edide isio, enye ama ọfiọk ete ke enye ekedi n̄wan emi ekenyenede ntotụn̄ọ uten̄e Abasi.a Nte eyịghe mîdụhe, oro akakam onụk enye ndikot Jesus ufọk. Nte ededi, ke mmemmem nsuannọ oro enye ọkọnọde, Jesus okowụt ete ke Martha, ebede ke enye nditịmede esịt mban̄a udia oro, ama ataba n̄wọrọnda ifet ndibọ ọkpọkpọ ukpepn̄kpọ nto Eyen Abasi.

Edi akpanikọ, ekeme ndidi ido edinam eyo oro ama ọsọn̄ọ ekikere oro nte ke ẹdiọn̄ọ ufọn an̄wan ke nte enye enyenede ukeme unam utom esịtufọk. Edi mme ikọ Jesus ẹwụt ẹte ke iban, ukem nte irenowo, ẹkeme nditie ke isọn̄ ke ukot Eyen Abasi mbọ mme ikọ uwem! (John 4:7-15; Utom 5:14) Ke ikerede iban̄a emi, ekpeketịm ọfọn ye Martha nditem orụk udia ifan̄—m̀mê idem orụk kiet kpọt—edieke oro ọkpọkọnọde enye ifet nditie ke ukot Andikpep n̄kpep n̄kpọ nto enye.—Men Matthew 6:25 domo.

Ukpepn̄kpọ Odude ọnọ Nnyịn

Mfịn, iren ye iban ẹdu ke otu mbon oro ẹyerede ikot Jesus ‘ndibọ mmọn̄ uwem ke ikpîkpu.’ (Ediyarade 22:17) Ke ntak ima, ndusụk—ukem nte Martha—ẹnam ofụri ukeme mmọ ke ndinam n̄kpọ man ẹnọ se mme ekemmọ andinịm ke akpanikọ ẹyomde. Mmọ ẹsinen̄ede ẹnyene ufọn ẹnyụn̄ ẹsọp ndinam n̄kpọ, ndien Jehovah ọn̄wọn̄ọ ndinọ mme utom ima mmọ utịp. (Mme Hebrew 6:10; 13:16) Iso-ọfọn mbon eken ẹnen̄ede ẹbiet Mary. Mmọ ẹtie sụn̄sụn̄ ẹsinyụn̄ ẹkere n̄kpọ ntotụn̄ọ ntotụn̄ọ. Ọkpọsọn̄ udọn̄ mmọ nditie n̄kere Ikọ Abasi an̄wam mmọ ndinen̄ede ndọn̄ n̄kam ke mbuọtidem.—Ephesus 3:17-19.

Orụk owo mbiba ẹmi ẹnyene akpan udeme ke esop Christian. Nte ededi, ke akpatre, kpukpru owo ẹkpenyene ‘ndimek eti udeme’ ebe ke ndida mme n̄kpọ eke spirit ke ata akpan n̄kpọ. Ebede ke ndidomo mfiọk se ifọnde ikan, nnyịn iyenyene mfọn ye edidiọn̄ Jehovah.—Philippi 1:9-11.

[Ikọ idakisọn̄]