“Okop-Inemesịt Ebe Ediye N̄wan”

KE INI ke ini, ndusụk owo ẹsidori Mme Ntiense Jehovah ikọ nnennen nnennen ẹte ke ẹbiat mme ndọ. Nte ededi, ediwak ndọ oro ẹkụtde unen ẹmi nsan̄a kiet kpọt edide kiet ke otu Mme Ntiense Jehovah ẹwụt ke emi ikemeke-keme ndidi akpanikọ. Ndida item Bible nsịn ke edinam ke uwem ubon anam mme ndọ ẹnyene inem, nte leta etienede mi oro ẹkemịn̄de ke n̄wedmbụk n̄kpọntịbe kiet ke France owụtde.

“Ke se ikperede ndisịm isua 28 idahaemi, ami ndi okop-inemesịt ebe ediye n̄wan emi edide kiet ke otu Mme Ntiense Jehovah. Enye ọkọbọk nditọ mi ition, ẹmi iba mîkedịghe esie, ọnọde ukem ukem ntịn̄enyịn ye ekese ima. Sia ndide adausụn̄ idahaemi ke usiakifia enyenede mbonutom 45, mmekeme ndisọn̄ọ ntịn̄ nnọ fi nte ke enye etịp esịn akamba akamba ke unen oro n̄kụtde ke utom mi. Oro edi ntak ke ini n̄kokụtde ibuotikọ kiet ke n̄wedmbụk oro nsikotde kpukpru ini nte ọdọhọde ke Mme Ntiense Jehovah ẹdi n̄kpọndịk ẹnọ n̄kann̄kụk Lot-et-Garonne, mma mbiere ndinọ mbufo ikọ ntiense oro enyenede nsọn̄ọ.”

Leta oro ọdọhọ n̄ko ete: “Mmọ isin̄wọn̄ke sika m̀mê ndikpa mmịn. Ndi emi edi n̄kpọndịk? Mmọ ẹdi mme Christian ẹmi ẹyọde n̄kpọ, ẹmi mînyịkke mme edumbet oro mmọ ẹtienede idori owo ekededi. Utu ke oro, mmọ ẹdi uwụtn̄kpọ ke ediwak ikpehe. . . . Mmọ ibuanake ke udia okụk ke n̄wo m̀mê ke ndinyam n̄kpọsọn̄ ibọk. Mmọ isitaha un̄wọn̄ọ udu edisana uwem, ndien mmekeme ndisọn̄ọ ntịn̄ nnọ fi, mmọ ẹdu ata uwem. . . .

“Afo emekeme ndibụp mi nte odotde ete: Ntre ntak emi afo ke idemfo mûdịghe kiet ke otu Mme Ntiense Jehovah? Koro oyom mbuọtidem Christian ye n̄kokon̄ ido uwem, ndien imemke utom ata ediwak owo ndinyene mmọ ẹmi.”