Nso Ini Iso ke Afo Oyom ọnọ Nditọ Fo?

NTE afo amabat nditọ fo nte udeme oro enen̄ede ọsọn̄ urua? (Psalm 127:3) Mîdịghe nte afo ese edibọk mmọ nte mfịghe ke n̄kan̄ okụk oro mînyeneke nsọn̄ọ m̀mê oyokụt unen? Utu ke ndida udori eke okụk ndi, edibọk nditọ oyom okụk tutu mmọ ẹkeme ndibọk idem mmọ. Kpa nte edikama n̄kpọ akpa oyomde eti ndutịm, ukem ntre ke edi ye edidi ete m̀mê eka oro okụtde unen.

Mme ete ye eka oro ẹkerede ẹban̄a ẹyom ndinọ nditọ mmọ eti ntọn̄ọ ke uwem. Okposụkedi ndiọi n̄kpọ ye ata n̄kpọ mbọm ẹkemede nditịbe ke ererimbot emi, mme ete ye eka ẹkeme ndinam ekese ndikpeme nditọ mmọ. Kere ban̄a Werner ye Eva, oro ẹketịn̄de ẹban̄a ke ibuotikọ oro ekebemde iso.a

Ke Ini Mme Ete ye Eka Ẹnen̄erede Ẹkere Ẹban̄a

Werner obụk ete ke utu ke ndinana udọn̄ ete ye eka imọ ẹma ẹwụt ata udọn̄ ke se ikakade iso ke ufọkn̄wed. “Mma nnen̄ede mma nti ekikere oro mmọ ẹkenọde mi, ama onyụn̄ etie mi ke idem nte ke mmọ ẹma ẹkere ẹban̄a mi ẹnyụn̄ ẹnọ mi ibetedem. Nte mme ete ye eka, mmọ ẹma ẹnen̄ede ẹnyene iwụk, edi mma ndiọn̄ọ nte ke mmọ ẹkedi mme ata ufan mi.” Ndien ke ini Eva akayatde esịt etieti aban̄a utom ufọkn̄wed esie tutu enye okop mfụhọ onyụn̄ enyene mfịna ndide idap, ete ye eka esie, Francisco ye Inez, ẹma ẹbiat uwak ini n̄ko ndinyene nneme ye enye nnyụn̄ n̄n̄wam enye ndifiak nda ukem ukem ke ekikere ye ke spirit.

Didie ke Francisco ye Inez ẹkeyom ndikpeme nditọ mmọ nnyụn̄ ntịm mmọ idem mben̄e uwem akwa owo? Ọfọn, ọtọn̄ọde ke ini nditọ ẹmi ẹkedide nsek, ima ima ete ye eka emi ẹma ẹsibuan mmọ ke mme edinam ofụri usen mmọ. Utu ke ndidụk ndụk ye mme ufan mmọ ẹdide ikpọ owo, Inez ye Francisco ẹma ẹnam nditọ oro ẹdu ye mmọ ke ebiet ekededi eke mmọ ẹkekade. Nte ima ima ete ye eka, mmọ n̄ko ẹma ẹnọ eyeneren ye eyenan̄wan mmọ nnennen ndausụn̄. Inez ọdọhọ ete: “Nnyịn ima ikpep mmọ ndise mban̄a ufọk, ndifam ubọk, nnyụn̄ nse mban̄a mme ọfọn̄ mmọ. Nnyịn n̄ko ima in̄wam mmọ owo kiet kiet ndimek ubọkọkọ nnyụn̄ nnam mme mbiomo mmọ ẹda ukem ukem ye mme udọn̄ n̄kpọ eke spirit mmọ.”

Edi akpan n̄kpọ didie ntem ndidiọn̄ọ nditọ fo nnyụn̄ nnọ ndausụn̄ eke ete ye eka! Yak nnyịn idụn̄ọde usụn̄ ita ẹmi afo ekemede ndinam emi: (1) N̄wam nditọ fo ndimek utom idịbi udia oro odotde; (2) tịm mmọ idem ndiyọ mme mfịghe eke ntụk ke ufọkn̄wed ye ke itie utom; (3) wụt mmọ nte ẹkpeyụhọde mme udọn̄ eke spirit mmọ.

N̄wam Mmọ Ẹmek Utom Oro Odotde

Sia utom idịbi udia owo mîtụkke idaha okụk esie kpọt edi n̄ko adade ekese ini esie, ndidi eti ete m̀mê eka esịne edikere mban̄a mme udọn̄ ye ukeme eyen kiet kiet. Sia mîdụhe enyene-ibuot owo ndomokiet oro oyomde ndidi mbiomo nnọ mbon efen, mme ete ye eka ẹkpenyene ndikere ọkpọsọn̄ ọkpọsọn̄ mban̄a nte mmọ ẹkemede nditịm eyen mmọ mben̄e edibọk idemesie ye ubon. Nte oyom eyen fo ekpep ubọkutom man ekeme ndidu uwem oro ọnọde uyụhọ? Nte ete m̀mê eka oro enen̄erede ekere aban̄a, sịn ukeme oro enyenede iwụk ndin̄wam eyen fo ọkọri mme utọ edu nte udọn̄ ndinam utom ọkpọsọn̄, unyịmesịt ndikpep n̄kpọ, ye ukeme ndidu uwem mfọn mfọn ye mmọ en̄wen.

Kere ban̄a Nicole. Enye ọdọhọ ete: “Ete ye eka mi ẹma ẹnam mi nnam utom ye mmọ ke utom mmọ eke edinam n̄kpọ asana. Mmọ ẹma ẹnọ ekikere ẹte nsibahade ubak okụk-utom mi nsịn ke ndutịm ubiat okụk ubon nnyịn nnyụn̄ nnịm se ikosụhọde nnọ ubiat okụk idemmi m̀mê nnịm nnọ idem. Emi ama ọnọ mi n̄kokon̄ ifiọk ubiom mbiomo oro ekenyenede ufọn etieti ke uwem nte ini akade.”

Ikọ Abasi, kpa Bible, itịn̄ke orụk utom idịbi udia oro owo ekpemekde. Edi enye ọnọ nti ndausụn̄. Ke uwụtn̄kpọ, apostle Paul ọkọdọhọ ete: “Edieke owo mînyịmeke ndinam utom, enye okûnyụn̄ adia n̄kpọ.” Ke ewetde n̄wed ọnọ ẹsọk mme Christian ke Thessalonica, enye n̄ko ama ọdọhọ ete: “Nnyịn imokop iban̄a ndusụk owo eke ẹsan̄ade etịme etịme ke otu mbufo, mînyụn̄ inamke utom, edi ẹnọhọde ke mbubehe owo en̄wen. Ima ida uyo Ọbọn̄ Jesus Christ isọn̄ọ iwụk inyụn̄ iteme mmọ eke ẹtiede ntem, ite mmọ ẹtie sụn̄, ẹnam utom, ẹn̄wana se ẹdade ẹkama idem.”—2 Thessalonica 3:10-12.

Kpa ye oro, ndinyene utom nnyụn̄ n̄n̄wana okụk idịghe ukụre se idude ke uwem. Ke akpatre, eyedi mbon oro ẹnyenede udọn̄ ikpọ n̄kpọ idikopke uyụhọ ẹnyụn̄ ẹkeme ndikụt nte ke mmimọ ibịne “idomo eke mîwọrọke usụn̄.” (Ecclesiastes 1:14) Utu ke ndikpak nditọ mmọ ndibịne edidi se ẹdiọn̄ọde ye uforo, mme ete ye eka ẹnam ọfọn ndin̄wam nditọ mmọ ẹkụt ọniọn̄ oro odude ke mme ikọ odudu spirit Abasi eke apostle John oro: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:15-17.

Didie ke Afo Ekeme Ndiyụhọ Mme Udọn̄ eke Ntụk Mmọ?

Nte ete m̀mê eka, ntak mûnamke n̄kpọ nte andinọ mbon mbuba ukpep? Enye iwụkke ntịn̄enyịn esie ke ndifori ukeme mbon mbuba oro enye esede enyịn man ẹfehe ẹsọp ẹkan m̀mê ẹfrọ usụn̄ ọniọn̄ akan kpọt. Anaedi enye n̄ko odomo ndin̄wam mmọ ndikan etikwo etikwo edu ekededi, ntem afiakde edemede ukeme eke ntụk mmọ. Ke n̄kan̄ fo, didie ke afo ekeme ndisịn udọn̄ nnọ, ndibọp, nnyụn̄ ndemede udọn̄ nditọ fo?

Kere ban̄a Rogério, uyen isua 13. Ke ẹsiode ndutịme esịtidem ke ntak mme ukpụhọde eke ikpọkidem ẹfep, enye ama enyene mfịghe eke ntụk ke ntak unana edidianakiet ye unana ntịn̄enyịn eke ete ye eka. Nso ke ẹkeme ndinam nnọ n̄kpri owo nte enye? Okposụkedi mûkemeke ndifụk nditọ fo ofụri ofụri mbiọn̄ọ kpukpru editịmede esịt ye mme idiọk odudu, kûdede usịn utom fo nte ete m̀mê eka. Ye unana editie ukpan ukpan n̄kaha, tụnọ nditọ fo ke ifiọk, etide kpukpru ini nte ke eyen kiet kiet edi n̄wọrọnda. Ke ndiwụt mfọnido ye ima, afo emekeme ndinam ekese ke ndinam ekpri owo odu ke ifụre. Emi n̄ko eyekpeme enye ọbiọn̄ọ edikọri n̄wọrọ owo ye unana uko ye ukpono idemowo.

Inamke n̄kpọ m̀mê ete ye eka fo ẹkekụt unen adan̄a didie ke ndiyụhọ mme udọn̄ eke ntụk fo, n̄kpọ ita ẹkeme ndin̄wam fi ndikụt unen nte ete m̀mê eka oro enen̄erede an̄wam: (1) Fep ndiyak mme mfịna fo ẹdia fi idem tutu afo ofụmi se itiede nte n̄kpri mfịna ẹmi nditọ fo ẹnyenede; (2) domo ndinyene eti ye inem inem nneme kpukpru usen ye mmọ; (3) sịn udọn̄ nọ in̄wan̄în̄wan̄ edu kaban̄a nte ẹkpebierede mme mfịna ye nte ẹkpenamde n̄kpọ ye mme owo.

Ke afiakde ese uwem esie nte uyen, Birgit ọdọhọ ete: “Akana n̄kpep nte ke afo ukemeke ndikpụhọde mme owo ẹdi se afo oyomde mmọ ẹdi. Eka mi ama ọkọk ibuot ye ami ete ke n̄kụtde n̄kpọ ke idem mbon efen oro ami mmemaha, se n̄kemede ndinam edi ami ndifep nditie nte mmọ. Enye n̄ko ama ọdọhọ ete ke mfọnn̄kan ini ndikpụhọde mme usụn̄ mi edi idahaemi nsụk ndide uyen.”

Edi, nditọ fo ẹyom se ikande utom ye edida ukem ukem eke ntụk. Bụp idemfo, ‘Nte ami mmese edidi ete m̀mê eka nte mbiomo oro Abasi ọnọde?’ Edieke afo esede, afo oyoyom ndise mban̄a mme udọn̄ eke spirit nditọ fo.

Mme Usụn̄ Ndiyụhọ Mme Udọn̄ eke Spirit Mmọ

Ke Ukwọrọikọ esie oro ke Obot, Jesus Christ ọkọdọhọ ete: “Ọfọfọn ọnọ mmọ eke ẹbuenede ke spirit: koro Obio Ubọn̄ Heaven enyene mmọ.” (Matthew 5:3) Ndiyụhọ mme udọn̄ n̄kpọ eke spirit abuana nso? Nditọwọn̄ ẹsibọ ufọn akamba akamba ke ini mme ete ye eka ẹnịmde eti uwụtn̄kpọ ke ndiwụt mbuọtidem ke Jehovah Abasi. Apostle Paul ekewet ete: “Ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ ẹmi ẹyomde Enye utịp.” (Mme Hebrew 11:6) Nte ededi, man mbuọtidem enyene se enen̄erede ọwọrọ, oyom akam. (Rome 12:12) Edieke afo ọdiọn̄ọde udọn̄ n̄kpọ eke spirit fo, afo oyoyom ndausụn̄ Abasi, nte ete eyen oro akakabarede edi ọwọrọetop Ebiereikpe Samson eke Israel okoyomde. (Judges 13:8) Idịghe akam ikpọn̄ ke afo edibọn̄ edi ayaka ebịne Ikọ Abasi eke odudu spirit, kpa Bible, okoyom un̄wam n̄ko.—2 Timothy 3:16, 17.b

Kpa ye ofụri ọkpọsọn̄ utom oro abuanade ke ndinọ eti ndausụn̄, un̄wam eke ntụk, ye un̄wam eke spirit, edidi ete m̀mê eka ekeme ndinọ utịp. Ete oro enyenede nditọ iba ke Brazil etịn̄ ete: “N̄kemeke ndikere nte mmen̄kpenyeneke nditọ mi. Ata ediwak nti n̄kpọ ẹdu ndibuana ye mmọ.” Ke ndinam an̄wan̄a ntak emi nditọ ẹnamde ọfọn, eka mmọ adian ete: “Nnyịn isidu ọtọkiet kpukpru ini, inyụn̄ idomo ndinam mme n̄kpọ ẹtie idara idara ye inem inem. Ndien, ke edide akpan n̄kpọ akan, nnyịn imesibọn̄ akam kpukpru ini iban̄a nditọ nnyịn.”

Priscilla eti ima ye ime oro ete ye eka esie ẹkesiwụtde enye ini ekededi emi mfịna okodude. Enye ọdọhọ ete: “Mmọ ẹkedi mme ata ufan mi ẹnyụn̄ ẹn̄wam mi ke kpukpru n̄kpọ. Nte eyenọwọn̄, mma nnen̄ede n̄kere nte ke ẹkekama mi nte ‘udeme Jehovah.’” (Psalm 127:3) Ntak mûdiomike ini ye nditọ fo man mbufo ẹkot Bible ye mme n̄wed Christian ọtọkiet nte ediwak mme ete ye eka eken? Ndikere mban̄a mme mbụk ye mme edumbet Bible ke in̄wan̄în̄wan̄ idaha ekeme ndin̄wam nditọ fo ndinyene mbuọtidem ye ata idotenyịn kaban̄a ini iso.

Ke Ini Kpukpru Nditọwọn̄ Ẹdinyenede Ifụre

Okposụkedi ini iso etiede mfụhọ mfụhọ ọnọ ediwak nditọwọn̄ mfịn, Ikọ Abasi ọnọ nsọn̄ọ nte ke ibịghike isọn̄ nnyịn eyedi ebietidụn̄ ifụre ọnọ ubonowo. Kere ban̄a ini emi mme ete ye eka mîditịmekede esịt iban̄a ifụre nditọ mmọ ke obufa ererimbot emi Abasi ọn̄wọn̄ọde! (2 Peter 3:13) Domo ndida n̄kụt utịbe utịbe edisu prọfesi emi: “Wolf oyodụn̄ ye eyen erọn̄, nawụri-ekpe oyonyụn̄ osụhọde ana ye eyen-ebot: eyen-enan̄, ye abak lion, ye enan̄ ubom, ẹyenyụn̄ ẹna ọtọ kiet: ekpri eyenọwọn̄ oyonyụn̄ akama mmọ.” (Isaiah 11:6) Idem mfịn emi, ifụre eke spirit emi ẹnamde an̄wan̄a ke mme ikọ ẹmi enyene ndamban̄a edisu ke otu mbon oro ẹnamde n̄kpọ ẹnọ Jehovah. Afo oyokụt ima ima ukpeme Abasi ke ufọt mmọ. Edieke afo owụtde ima ọnọ Abasi, afo emekeme ndinịm ke akpanikọ nte ke enye ọdiọn̄ọ aban̄a ekikere fo nte ete m̀mê eka ndien ayan̄wam fi ndiyọ editịmede esịt ye mme idomo oro afo ekemede ndisobo. Kpep Ikọ esie nyụn̄ kọn̄ idotenyịn fo ke Obio Ubọn̄ esie.

N̄wam nditọ fo ke usụn̄ oro adade esịm nsinsi uwem ebe ke ndinịm eti uwụtn̄kpọ. Edieke afo adade Jehovah Abasi nte ebiet udịbe fo, ini iso fo ye eke nditọ fo ekeme ndikan kpukpru se afo odoride enyịn. Afo emekeme ndinyene uko ukem nte andiwet psalm emi ọkọkwọde ete: “Yak Jehovah onyụn̄ adat fi esịt; ndien enye ọyọnọ fi se esịt fo oyomde.”—Psalm 37:4.

[Mme Ikọ idakisọn̄]