Didie ke Afo Ekeme Ndikpeme Nditọ Fo?

KE AMA akaka ufọkn̄wed n̄kann̄kụk ke ediwak isua, Wernera ama ọtọn̄ọ akwa ukpepn̄kpọ ke adianade ye n̄kpọ nte mme uyen 3,000 efen ke São Paulo, Brazil. Ke akpa ini, enye ama okụt ekemmọ nditọ ufọkn̄wed ẹnyamde ẹnyụn̄ ẹdade n̄kpọsọn̄ ibọk. Sia omụhọde idaha, ikebịghike enye ama osobo esuene esuene ye akama-ndịk edinam umen owo nsịn ke itie ke ubọk n̄kani nditọ ufọkn̄wed.

Eva edide eyeneka Werner an̄wan ama enyene mme mfịna n̄ko. Ke oyomde ndinam ofụri ukeme esie, enye ama ekpep n̄kpọ ọkpọsọn̄ ọkpọsọn̄ tutu okop ọkpọsọn̄ mmemidem ye ndutịme eke ekikere. Nte mme uyen eken, Werner ye Eva ẹkeyom ukpeme eke obụkidem ye eke ntụk. Nso orụk un̄wam ke nditọ fo ẹyom? Didie ke afo ekeme nditịm mmọ idem nnọ uwem akwa owo? Ke akpanikọ, nso ini iso ke afo oyom ọnọ nditọ fo?

Mmọ Ẹyom Se Ikande N̄kpọ Udu Uwem

Kere esisịt ban̄a n̄kpọ-ata oro mme ete ye eka ẹsobode ke ndikpeme nditọ mmọ mfịn. Ke ntak eti uwem ubon osụhọrede, ubuene ẹnyụn̄ ẹwakde ke ibat, ke ediwak idụt ibat nditọwọn̄ oro ẹdụn̄de ke mme efak ke ọkọri. Nditọwọn̄ ndinam utom edi utịp unana edikpeme n̄kpri owo mbiọn̄ọ edida nnam mbubịne. Edida ibọk ke idiọk usụn̄ n̄ko abiat ediwak n̄kpri owo. Ke uwụtn̄kpọ, ke ini uyen Brazil kiet akakabade enyene mbumehe uda n̄kpọsọn̄ ibọk, emem ama osop ke ufọk esie. Ke ẹsiode ekikere nditịmede ete ye eka esie ẹfep, ama oyom ẹn̄wana ẹkpe okụk usọbọ esie, ndien mme anana-mbọm anyam n̄kpọsọn̄ ibọk ẹma ẹsidi enyịnusụn̄ mmọ ẹdiyom ẹkpe mmimọ okụk.

Kpa ye mme mfịghe uwem, nte ededi, ediwak ete ye eka in̄wanake ndinọ nditọ mmọ udia, ọfọn̄, ye itie udakibuot kpọt edi n̄ko ndinọ mmọ ukpeme mbiọn̄ọ afai, edida ibọk ke idiọk usụn̄, ye mme mfịna eken. Ukeme emi ọfọn, edi nte enye ekem? Nso kaban̄a edikpeme mbiọn̄ọ unọmọ eke ntụk ye eke spirit? Ediwak owo ẹkụt nte ke ndidi ete m̀mê eka oro okụtde unen esịne ndin̄wana ye mme n̄kpọ-ata oro abuanade mme ufan ye unọ idem nduọkodudu oro nditọ mmọ ẹmekde. Edi, didie ke mme ete ye eka ẹkeme ndifep ediwụt ukpeme n̄kaha m̀mê edinana ukpan n̄kaha? Ẹnọ fi ikot ndikere mban̄a mme ibọrọ oro ẹkụtde ke ibuotikọ oro etienede mi.

[Mme Ikọ idakisọn̄]