Mmọ Ẹma Ẹnam Uduak Jehovah

Owo Samaria Owụt ke Idi Eti Mbọhọidụn̄

KE EYO Jesus, in̄wan̄în̄wan̄ usua ama odu ke ufọt mme Jew ye mme Gentile. Nte ini akakade, Mishnah mme Jew ama akam esịn ibet oro akakpande iban Israel ndimụm owo emi mîdịghe Jew uman, sia emi n̄kukụre edin̄wamde ndida Gentile efen ndi ke ererimbot.—Abodah Zarah 2:1.

Mbon Samaria ẹma ẹnen̄ede ẹkpere mme Jew ẹkan mme Gentile, ke n̄kan̄ eke ido ukpono ye eke orụk. Kpa ye oro, ẹkeda mmọ n̄ko nte mbon oro ẹbịnde ẹsio ke obio. “Mme Jew isan̄ake n̄kpọ ye mbon Samaria,” ntem ke apostle John ekewet. (John 4:9) Ke akpanikọ, Talmud ekekpep ete ke “ubak bred oro owo Samaria ọnọde akam edehe akan obụk edi.” Ndusụk mme Jew ẹkekam ẹda ikọ oro “owo Samaria” nte ikọ emiom ye esuene.—John 8:48.

Ke ikerede iban̄a idaha emi, mme ikọ oro Jesus eketịn̄de ọnọ eren kiet emi ọkọfiọkde ibet mme Jew ẹnen̄ede ẹsịne ukpepn̄kpọ. Eren oro ama aka ebịne Jesus okobụp ete: “Andikpep, ndinam nso man nnyene nsinsi uwem?” Ke ibọrọ, Jesus ama odụri ntịn̄enyịn esie owụt Ibet Moses, emi owụkde ete ‘nyụn̄ ma Jehovah ke ofụri esịt, ukpọn̄, odudu, ye ekikere fo,’ nyụn̄ ‘ma mbọhọidụn̄ fo nte idem fo.’ Ọfiọkibet oro ndien ama obụp Jesus ete: “Anie edi mbọhọidụn̄ mi nan̄a?” (Luke 10:25-29; Leviticus 19:18; Deuteronomy 6:5) Nte mme Pharisee ẹtịn̄de, ikọ oro “mbọhọidụn̄” enyene n̄kpọ ndinam ye mbon oro ẹnịmde mme ido edinam Jew kpọt—ikemeke-keme ndidi ye mme Gentile m̀mê mbon Samaria. Edieke ọfiọkibet emi okobụpde mbụme mi ekekerede ke Jesus eyenyịme ye ekikere oro, enye oyokop n̄kpaidem.

Owo Samaria Oro Okowụtde Mbọm

Jesus ọkọbọrọ mbụme eren oro ebe ke nditop n̄ke kiet.a Enye ọkọdọhọ ete: “Owo kiet okoto Jerusalem osụhọde aka Jericho.” Tọn̄ọ ke Jerusalem sịm Jericho ekedi n̄kpọ nte kilomita 23. Usụn̄ oro eyịride obio iba ẹmi ama enyene ikpọ iwọn̄ọde ye ikpọ itiat oro ẹsion̄ode iso ẹnyan, anamde edi mmemmem n̄kpọ mme inọ ndidịbe, ndin̄wana, ndinyụn̄ mfehe mbọhọ. Nte ekedide, akaisan̄ oro ke n̄ke Jesus ama “ọduọ ke otu mbon n̄wo, ẹmi [ẹkekpọkde] enye edisịnen̄kpọ ke idem ẹfep, ẹmia enye, ẹnyụn̄ ẹdaha ẹkpọn̄ enye ekpere n̄kpa.”—Luke 10:30.

Jesus ama aka iso ete: “Nte n̄kpọ anade, oku kiet osụhọde edi ke usụn̄ oro, okụt owo oro, onyụn̄ asan̄a ebe ke n̄kan̄ eken. Kpasụk ntre Levite kiet esịm ọtọ oro, ada ese enye, onyụn̄ asan̄a ebe ke n̄kan̄ eken.” (Luke 10:31, 32) Mme oku ye mme Levite ẹkedi mme ekpep Ibet—esịnede ibet ima mbọhọidụn̄. (Leviticus 10:8-11; Deuteronomy 33:1, 10) Ke akpanikọ, mmọ ke akande kpukpru mbon efen ẹkpekenyene ndin̄wam akaisan̄ oro ẹkenọde unan do.

Jesus ama aka iso ete: “Edi eyen Samaria kiet, emi asan̄ade isan̄, edisịm ọtọ emi owo oro odude.” Ndisiak owo Samaria nte eyịghe mîdụhe ama anam udọn̄ ọfiọkibet oro okpon. Ndi Jesus eyenyịme ye etikwo etikwo ekikere eke orụk esie? Ke edide isio, ke okụtde akaisan̄ oro okodude ke nnanenyịn do, owo Samaria oro ama “atua enye mbọm.” Jesus ama ọdọhọ ete: “[Ntre enye] asan̄a adiana enye, ọtọhọ wine ye aran ke unan esie, onyụn̄ ọbọp mmọ: onyụn̄ emen enye odori ke enyọn̄ enan̄ esiemmọ, ada enye edi ke ufọk-isen, onyụn̄ ekpeme enye.b Ndien ke ndan̄nsiere enye osio okụk iba ọnọ ete ufọk, ete enye, Kpeme owo emi; ndien mma mfiak ndi, nyosio se edibiatde akan oro nnọ fi.”—Luke 10:33-35.

Jesus ke emi ama obụp owo oro okobụpde mbụme ete: “Ke otu owo ita oro, ese ete anie edi mbọhọidụn̄ owo emi ọkọduọde ke otu mbon n̄wo?” Ọfiọkibet oro ama ọdiọn̄ọ ibọrọ, edi etie nte enye ama emen̄e ndidọhọ “eyen Samaria.” Utu ke oro, enye n̄kukụre ọkọbọrọ ete: “Owo emi akatuade enye mbọm.” Do Jesus ama ọdọhọ ete: “Ka kanam kpasụk ntre.”—Luke 10:36, 37.

Ukpepn̄kpọ Odude ọnọ Nnyịn

Owo oro okobụpde Jesus mbụme akanam ntre ndidomo “ndiwụt ete imọ imenen.” (Luke 10:29) Eyedi enye ekekere ke Jesus oyotoro imọ ke ndisọn̄ọ nyịre eto eto ke Ibet Moses. Edi ama oyom owo oro akadade idemesie ke n̄kpọ n̄kaha mi ekpep akpanikọ eke n̄ke Bible emi: “Kpukpru usụn̄ owo enen ke enyịn owo: edi Jehovah odomo esịt.”—Mme N̄ke 21:2.

N̄ke Jesus owụt ete ke owo oro enen̄erede edi edinen edi enye oro mînịmke mme ibet Abasi kpọt edi n̄ko ekpebede mme edu esie. (Ephesus 5:1) Ke uwụtn̄kpọ, Bible asian nnyịn ete ke “Abasi iten̄eke owo enyịn.” (Utom 10:34) Nte nnyịn imekpebe Abasi ke afan̄ emi? Edemede-owo-udọn̄ n̄ke Jesus oro owụt ete ke ima mbọhọidụn̄ nnyịn ekpenyene ndikan mme n̄kpọ ubiọn̄ọ eke idụt, orụk, ye ido ukpono. Ke akpanikọ, ẹteme mme Christian ẹte ‘ẹfọn ido ye kpukpru owo’—idịghe sụk ye mbon ẹdude ke ukem idaha ke n̄kaowo, orụk, m̀mê idụt inyụn̄ idịghe ye mme andinịm ke akpanikọ kpọt.—Galatia 6:10.

Mme Ntiense Jehovah ẹdomo nditiene item N̄wed Abasi emi. Ke uwụtn̄kpọ, ke ini mme oto-obot afanikọn̄ ẹtịbede, mmọ ẹsinam enọ un̄wam mmọ atara esịm mme ekemmọ andinịm ke akpanikọ ọkọrọ ye mbon oro mîdịghe Mme Ntiense.c Ke adianade do, mmọ nte otu ẹsibiat se ibede hour biliọn kiet kpukpru isua ndin̄wam mme owo ẹdiọn̄ọ Bible ọfọn akan. Mmọ ẹsidomo ndida etop Obio Ubọn̄ nsịm kpukpru owo, koro uduak Abasi edi ‘kpukpru orụk owo ndinyene edinyan̄a, nnyụn̄ nsịm ifiọk akpanikọ.’—1 Timothy 2:4; Utom 10:35.

[Mme Ikọ idakisọn̄]