Nte Ikọ Fo Esikekịm M̀mê Esikọkọk Unan?

KE N̄KPỌSỌN̄ ini ẹmi, idịghe n̄kpọ n̄kpaidem nte ke ‘esịt obụn̄ọ’ ediwak owo mmọ ẹnyụn̄ ‘ẹkop iduọesịt.’ (Psalm 34:18) Ntem, ke mme ikọ apostle Paul, ufọn odu kpukpru ini ‘ndisọn̄ọ mbon iduọesịt idem’ nnyụn̄ ‘n̄n̄wam mbon mmemidem.’ (1 Thessalonica 5:14) Edi nso edieke ekemmọ owo eduede nnyịn m̀mê anamde n̄kpọ oro enen̄erede ọdiọk? Ke utọ idaha oro, ekeme nditie nnyịn ke idem nte ke enen ndikam nnọ edinen̄ede ke ọkpọsọn̄ ubọk. Nte ededi, oyom ẹwụt ukpeme. Item, idem ke ini odotde, ekeme ndinọ unan edieke ẹnọde enye ke ọkpọsọn̄ usụn̄. Mme N̄ke 12:18 ọdọhọ ete: “Enyene mmọ eke ẹken̄de inua nte ofụk ekịmde.”

Ke ntre, ke ini nnyịn iyomde ndinọ edinen̄ede m̀mê ndise mban̄a mfịna, edi akpan n̄kpọ nditi udiana ikpehe eke Mme N̄ke 12:18 oro: “Edi edeme mbon eti ibuot ọkọk unan.” Bụp idemfo kpukpru ini ete, ‘Edieke nyomde edinen̄ede, didie ke ami n̄kpoyom ẹnam n̄kpọ ye ami?’ Ata ekese nnyịn imesiwak ndinam n̄kpọ mban̄a nsịnudọn̄ akan nte inamde iban̄a edikụt ndudue nnọ. Ntre wụt ntatubọk ke ndinọ itoro. Emi ayawak ndinam andidue oro enyene udọn̄ ndinam n̄kọri, ndien enye eyetetịm ama un̄wam ekededi oro ẹnọde.

Edi akpan n̄kpọ didie ntem nditịn̄ ikọ nnyịn ke sụn̄sụn̄ ido kpukpru ini! Mme ikọ oro ẹkọkde unan ẹyenam etie andikpan̄ utọn̄ ke idem nte eketiede andiwet psalm, emi ekewetde ete: “Yak owo eti ido amia mi ke ima, onyụn̄ asua ọnọ mi: aran ibuot ke ibuot mi idisịnke.”—Psalm 141:5.