N̄kpọntịbe Oro Owo Mîkemeke Ndifre Ke France
“NNYỊN IYOMKE OBIO JEHOVAH!” ntre ke mme babru oro ẹkediande ẹyọhọ obio ọkọdọhọ. “Ẹyak Kpukpru Nnyịn Idiana Kiet Ibiọn̄ọ Utom Jehovah” ntem ke otu kiet oro ọbiọn̄ọde ọkọdọhọ. Ke ata ata usụn̄ ediwak ibuotikọ ke mme itie ikie ke n̄wedmbụk n̄kpọntịbe ẹma ẹnam mme owo ẹdiọn̄ọ ẹban̄a n̄kpọ emi. Ẹma ẹsịn ubọk ke ediwak n̄wed eben̄e, ndien ata ediwak tract ẹmi ẹkewakde ẹbe ubak miliọn kiet ẹnyụn̄ ẹtịn̄de ẹban̄a utom oro ẹma ẹbụn̄ọ ẹdụk mme ekebe ubọ n̄wed n̄kann̄kụk. Nso ikedi utom oro eketịmerede ifụre ndobo ndobo obio Louviers, ke ufọt edem edere ye edem usoputịn France ntre? Ekedi utom edibọp obufa ọfis n̄kọk itieutom ye itieidụn̄ eke Mme Ntiense Jehovah.
Jehovah Anam Enye Ọkọri
Utom Mme Ntiense Jehovah ke France ebịghi afiak edem ekesịm utịt ọyọhọ isua ikie 19. Ẹkeberede akpa itie ubon mme n̄wed Bible ke 1905 ke Beauvène, ke usụk usụk France, ndien ke 1919, ekpri ọfis ama ọtọn̄ọ ndinam utom ke Paris. Ẹkeberede akpa ọfis n̄kọk itieutom an̄wan̄wa ke obio oro ke 1930, ndien ke isua oro eketienede mbonutom ọfis ẹma ẹtọn̄ọ ndidụn̄ ke ufọkidụn̄ Bethel emi okodude ke Enghien-les-Bains, ke edem edere Paris. Ke Ekọn̄ Ererimbot II ama okokụre, ubon Bethel ama afiak ọnyọn̄ aka Paris, ndien ke 1959 ẹma ẹsio n̄kọk itieutom ẹka ufọk oro ekedide enyọn̄ ition ke Boulogne-Billancourt, ke adan̄a n̄kan̄ edem usoputịn ibuot obio.
Ke ntak editat utom ukwọrọikọ Obio Ubọn̄, ke 1973 ẹma ẹsio itie umịn̄n̄wed ye itie unọ n̄wed ọwọrọ ẹka Louviers, kilomita 100 ke n̄kan̄ edem usoputịn Paris, ke adan̄aemi mme ọfis ẹkesụk ẹdude ke Boulogne-Billancourt. Nte ededi, n̄kọri ke ibat mme asuanetop ke France ama anam itieutom ke Louviers okûkem, kpa ye oro ẹketatde enye ke 1978 ye 1985. Ntre ẹma ẹbiere nditat nnyụn̄ nnam ofụri ubon Bethel ẹdidu ọtọkiet ke itie kiet. Idịghe kpukpru owo ẹkema utom emi, nte ẹketịn̄de ke ntọn̄ọ ntọn̄ọ. Kpa ye mme utọ ubiọn̄ọ oro, ẹma ẹkụt itie okoyomde usụn̄ ọkpọn̄ itie umịn̄n̄wed ke kilomita kiet ye ubak kpọt. Ẹma ẹtọn̄ọ ọkpọsọn̄ utom isua itiokiet, ndien ke akpatre, ke ẹma ẹkedu nsio nsio ke isua 23, ofụri ubon Bethel ama edidiana kiet ke Louviers ke August 1996.
Ntem ye akwa idatesịt otu mme okop-inemesịt ẹkedide owo 1,187, ẹsịnede mbon ubon Bethel France 300, ye mme andidụk 329 ẹketode n̄kọk itieutom 42 en̄wen, ẹma ẹsop idem ke Saturday, November 15, 1997, ndikpan̄ utọn̄ nnọ utịn̄ikọ ediyak nnọ oro Brọda Lloyd Barry, andibuana ke Otu Ukara, ọkọnọde. Nte ededi, ke ikerede iban̄a akpanikọ oro nte ke ediyak nnọ emi akada itie ke ufọt ọkpọsọn̄ usua ye ubịnikọt edidọk, emi ndutịm usuanetop ke anyan ini akadade etiene Mme Ntiense Jehovah ke ofụri France, ẹma ẹkere nte ke kpukpru Mme Ntiense ke France ẹkpenyene nditiene mbuana ke ndidia usọrọ edikan emi. Nte utịp, ke Sunday, November 16, ẹma ẹdiomi san̄asan̄a mbono esop ye ibuotikọ oro “Ẹka Iso Ẹdu ke Ima Christ” ke Villepinte Exhibition Center, ke edem edere Paris. Ẹma ẹnọ kpukpru Mme Ntiense Jehovah ke France ye Mme Ntiense ẹmi ẹsemde French ke Belgium ye Switzerland ikot, ọkọrọ ye mme esop ke Britain, Germany, Luxembourg, ye Netherlands.
N̄wọrọnda Mboho
Ntịmidem mboho emi ọkọtọn̄ọ ọfiọn̄ itiokiet ke edem. Ekem, urua iba kpọt mbemiso ediyak nnọ oro, mme awat o-moto mbiomo ke France ẹma ẹtre utom, ẹsịri ikpọ usụn̄ mbakara ye mme itie udep aran uwat. Nte ẹyeda mme akpakaha ye mme n̄kpọutom efen ẹkesịm do ke eti ini? Ndi usụn̄ oro ẹsịride ayakpan nditọete ndidi? Ke adade ubọhọ ọsọk kpukpru owo, ke ufan̄ urua kiet edinam utre utom oro ama okụre, ndien ẹma ẹfiak ẹsịrede usụn̄ ẹnọ mme moto ndibe. Ke mbubịteyo Friday mbemiso utịturua ediyak nnọ oro, moto mbiomo 38 ẹma ẹda akpakaha 84,000 ẹka ikpọ ufọkmbono iba oro ẹkebọde ke ukpeokụk kaban̄a edinam oro. Se ibede nditọete iren ye iban 800 ẹma ẹnam utom ọkpọsọn̄ ke ofụri okoneyo tutu esịm ebe usụkkiet ke usenubọk Saturday man ẹtịm n̄kpọitie, mbot utịn̄ikọ, ukwak ikwọ, ye ata ikpọ iso ekebe ndise usụkkiet.
Ke n̄kanika itiokiet ke usenubọk Sunday, ẹma ẹberede usụn̄, ndien otuowo ẹma ẹtọn̄ọ ndibụn̄ọ ndụk. San̄asan̄a tren 17 ẹmi ẹkebọde ke ukpeokụk ẹma ẹmen se iwakde ikan Mme Ntiense 13,000 ẹka ibuot obio. Se ibede nditọete iren ye iban ikie iba ẹtode n̄kann̄kụk oro ẹma ẹdu ke mme itiembehe tren ndikọm mme akaisan̄ nnyụn̄ nsan̄a ye mmọ ke mme otu n̄ka itie mbono oro. Eyenete an̄wan kiet ọkọdọhọ ete ke ima ima ndutịm emi ama anam mmimọ “idu ke ifụre inyụn̄ ikop inemesịt.”
Mbon efen ẹkesan̄a ke ubomofụm m̀mê moto ẹdi Paris. N̄wakn̄kan owo, nte ededi, ẹkesan̄a ke bọs 953 ẹdi, ke adan̄aemi Mme Ntiense ẹtode n̄kann̄kụk Paris ẹkesan̄ade ke n̄kpọisan̄ ofụri owo ẹka Exhibition Center oro. Ediwak owo ẹkesan̄a ofụri okoneyo mîdịghe ẹkpọn̄ ufọk mmọ ata tụhi-tụhi usenubọk, edi ẹma ẹkụt nduaidem oro mmọ ẹkenyenede ndidụk mbono emi. Mfiori idara ye ufiop ufiop mfari ẹma ẹnịm edifiak ndiana ye mme ufan ẹmi mîkekwe kiet eken ke ediwak isua idiọn̄ọ. Ndiye uduot usịnen̄kpọ idụt oro ama anam ẹkụt ke idara idara otuowo ẹmi ẹto ediwak idụt. Nte eyịghe mîdụhe, n̄wọrọnda n̄kpọ ke okoyom ndida itie.
Etisịm ini emi edinam ọkọtọn̄ọde, ke n̄kanika duop usenubọk, n̄kpọitie ndomokiet ikodụhe aba, edi ediwak owo ke mme itie ikie ke ẹkedi ẹdibehe ke kpukpru minit. Ebiet ekededi oro owo ekesede, enyịn okokụt otuowo oro iso ọyọhọde ye imam. Ediwak tọsịn owo ẹkedada mîdịghe ẹsụhọde ẹtetie ke isọn̄ itiat. Ke ndiwụt edu ibuotikọ mbono oro, ediwak n̄kpri owo ke ima ẹma ẹdaha ẹdada man mbonusọn̄ ẹtetie. “Nnyịn ikokop inemesịt didie ntem ndikpọn̄ n̄kpọitie nnyịn nnọ nditọete iren ye iban oro nnyịn mîkọfiọkke, edi ẹmi nnyịn imade etieti!” ntre ke ebe ye n̄wan kiet ẹkewet. Ediwak owo ẹma ẹwụt eti edu n̄waidem: “Ke ofụri ini edinam oro nnyịn ikadada ikpere mme akpakaha oro ikan̄wamde ndibon ke ofụri okoneyo Friday. Edi ndikam ndodu do ama anam nnyịn iyọhọ ye ekọm oro inọde Jehovah.”
Kpa ye mba m̀mê mmemidem, mme andidụk ẹma ẹtịm ẹkpan̄ utọn̄ ke mbụkutom oro ẹketode mme idụt efen ye mme utịn̄ikọ oro Lloyd Barry ye Daniel Sydlik, emi n̄ko edide andibuana ke Otu Ukara, ẹkenọde. Brọda Barry akatat ibuotikọ oro “Jehovah Anam Ukeme Awak,” onyụn̄ owụt in̄wan̄în̄wan̄ nte Jehovah ọdiọn̄de ikọt esie ye n̄kọri kpa ye nsio nsio idomo. Ibuotikọ utịn̄ikọ Brọda Sydlik ekedi “Ọfọfọn ọnọ Mbon eke Jehovah Edide Abasi Mmọ!” Utịn̄ikọ mbiba ẹmi ẹkenen̄ede ẹdi ekemini ke ẹkerede ẹban̄a ubiọn̄ọ oro Mme Ntiense Jehovah ẹsobode idahaemi ke France. Brọda Sydlik ama owụt ete ke ata inemesịt ikọn̄ọke ke mme n̄kpọ oro ẹkụtde ke enyọn̄ enyọn̄ edi ọkọn̄ọ ke itie ebuana nnyịn ye Jehovah ye edu nnyịn kaban̄a uwem. Ẹma ẹda ọkpọsọn̄ edikwak ubọk ẹbọrọ mbụme oro enye okobụpde otuowo ete, “Nte mbufo ẹmekop inemesịt?”
Eyenete an̄wan kiet oro ama “akataba idatesịt esie” ama ewet ke oro ebede ete: “Mma ndifiọk ke ndondo oro nte ke mmekeme ndisọp nnyene inemesịt. N̄kesịn mme ukeme mi ke idiọk afan̄, ndien ebede ke utịn̄ikọ emi, Jehovah ama owụt mi nte n̄kpanamde ukpụhọde.” Eyenete eren efen ama ọdọhọ ete: “Idahaemi nyom ndin̄wana ndinam esịt Jehovah enem. Nyomke ndiyak n̄kpọ ndomokiet ọbọ mi idatesịt oro mma n̄kọtọn̄ọ ndinyene ke esịtidem.”
Nte mbono oro akasan̄ade ekpere utịt, etieibuot okpokoro ye akwa nduaidem ama ọtọt ibat mme andidụk: 95,888—n̄kponn̄kan mboho oro akanam Mme Ntiense Jehovah ẹnyenede ke France!
Ke ikwọ ediberi ama okokụre, emi ediwak owo ẹkekwọde ye mmọn̄eyet idara ke enyịn mmọ, ye akpatre akam, nditọete ẹma ẹtọn̄ọ isan̄ unyọn̄ ye mbuaha ntụk. Ufiop ufiop, ufan ufan idaha mboho oro ikedịbeke. Mme awat bọs ẹma ẹtịn̄ ediwak nti ikọ ẹban̄a edu uwem mme andikodụk. Ndutịm oro ẹkenamde man kpukpru bọs 953 ẹkeme ndikpọn̄ Exhibition Center oro ke ufan̄ hour iba ye unana moto ndisịri usụn̄ ama otụk mmọ n̄ko! Mme anamutom tren ye n̄kpọisan̄ mbio obio n̄ko ẹma ẹma edu uwem mme andikodụk. Ẹma ẹtọn̄ọ ediwak nti nneme, ndien ẹma ẹnọ eti ikọ ntiense.
“Eti Isọn̄ ke Desat”
Apostle Paul ama akpak mme ekemmọ Christian ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; . . . inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Ke akpanikọ, san̄asan̄a mbono esop emi ekedi n̄kpọ akwa nsịnudọn̄ ọnọ kpukpru owo, “eti isọn̄ ke desat” nte eyenete an̄wan kiet eketịn̄de aban̄a enye. “Nnyịn ima inyọn̄ ye obufa odudu, nsịnudọn̄, nsọn̄idem, inyụn̄ idọdiọn̄ ibiere ndidara ke utom Jehovah n̄kan nte akanam edide,” ntre ke nditọete ẹtode n̄kọk itieutom Togo ẹkewet. “Mbon oro ẹkedude ke mfụhọ ẹma ẹnyọn̄ ye inemesịt,” ntre ke esenyịn circuit kiet ọkọdọhọ. Efen ọkọdọhọ ete: “Nditọete ẹma ẹkop nduaidem ye nsịnudọn̄.” Ama onụk ebe ye n̄wan kiet ndiwet ẹte: “Akananam itiehe nnyịn ke idem ntem nte ke imesịk ikpere esop Jehovah.”
Andiwet psalm ọkọdọhọ ete: “Ukot mi akada ke una-isọn̄: nyọkọm Jehovah ke otu mbon-esop.” (Psalm 26:12) Mme utọ mboho Christian oro ẹma ẹnam kpukpru owo ẹfiak ẹnyene nsọn̄ọ ke n̄kan̄ eke spirit ke ẹsobode mme ubiọn̄ọ. Eyenete an̄wan kiet ama ọsọn̄ọ ete: “Yak ukụt oro edi se ekpededi, mme n̄wọrọnda idaha ẹmi ẹnen̄ede ẹwụhọ nnyịn ke esịt ndien mmọ ẹyedu do ndidọn̄ nnyịn esịt.” Ke ukem afan̄ oro, esenyịn emi asan̄ade-san̄a ama ewet ete: “Ke ini n̄kpọsọn̄ idaha ẹdemerede, nditi uyarade aban̄ade Paradise emi ayan̄wam nnyịn ndiyọ mmọ.”
Psalm 96:7 eteme ete: “Mbufo mme orụk ererimbot, ẹnọ Jehovah, ẹnọ Jehovah ubọn̄ ye odudu.” Nte eyịghe mîdụhe, ediyak mbufa ufọkutom n̄kọk itieutom nnọ ke France edi in̄wan̄în̄wan̄ edikan ọnọ Jehovah. Edi enye ikpọn̄ ekpekeme ndinam ẹnam utom emi ke idak utọ n̄kpọsọn̄ ye ntatara ubiọn̄ọ oro. Mme Ntiense Jehovah ke France ẹtetịm ẹbiere akan nte akanam edide ‘ndika iso ndu ke ima Christ’ nnyụn̄ ‘nyak un̄wana mmọ ayama.’ (John 15:9; Matthew 5:16) Kpukpru mbon oro ẹkedụkde edinam ediyak nnọ oro ẹbuana ntụk andiwet psalm emi in̄wan̄în̄wan̄: “Emi oto Jehovah; nnyịn inyụn̄ ise enye ke utịbe.”—Psalm 118:23.
[Ndise ke page 26]
Daniel Sydlik
[Ndise ke page 26]
Lloyd Barry
[Ndise ke page 26]
Owo 95,888 ẹkedụk san̄asan̄a edinam oro ke Villepinte Exhibition Center
[Mme ndise ke page 28]
Ediwak tọsịn ke otu mbon oro ẹkedụkde ẹkedada mîdịghe ẹtie ke isọn̄ ẹkpan̄ utọn̄