Ntọt Mme Anditan̄a Obio Ubọn̄
“Kpukpru Usen ke An̄wa-Urua”
APOSTLE Paul ama ada kpukpru ifet ndisuan etop Obio Ubọn̄. Man oyom mbon oro ẹdotde, enye ama ebuen ikọ “ke synagogue ye mme Jew . . . onyụn̄ eneme kpukpru usen ke an̄wa-urua ye mmọ eke ẹsobode ye enye.”—Utom 17:17.
Utọ ifịk oro edi idiọn̄ọ mme ata andituak ibuot nnọ Jehovah toto ke akpa isua ikie E.N. (Matthew 28:19, 20) Mfịn, Mme Ntiense Jehovah ukem ntre ẹda nsio nsio usụn̄ ẹnam n̄kpọ nte mmọ ẹsịnde ifịk ẹn̄wam mbon esịt akpanikọ ndinyene nnennen ifiọk akpanikọ. (1 Timothy 2:3, 4) Ifiọkutom oro etienede mi emi otode Australia anam emi an̄wan̄a.
Usen ition ke urua kiet kiet, Sid ye Harold ke adiana ke adiana ẹsise ẹban̄a ekpri itie emi ẹsibonde mme n̄wed Bible man ẹkụt emi ekperede itiembehe tren ke Sydney. Mmọ ẹmebuana eti mbụk Obio Ubọn̄ Abasi ke usụn̄ emi ke n̄kpọ nte isua ition idahaemi. Sid, emi edide isua 95 ke emana, anam an̄wan̄a ete: “Ke ini n̄kedide isua 87, n̄kekemeke ndiwat moto aba. Oro ama anam mi n̄kụt edikpu koro mma nsima an̄wan̄wa utom unọ ikọ ntiense. Usen kiet ke ini n̄kodude n̄kpere ọwọrọetop itie mme akaisan̄ emi ẹkotde Echo Point ke Katoomba, mma n̄kụt ewet ndise anyamde mme ndise unaisọn̄. Mma ndụn̄ọde mme ndise oro nnyụn̄ n̄kere ke idemmi nte, ‘Mmenyene mme ndise oro ẹyede ẹkan oro ke ekpat ukwọrọikọ mi—ndien mmọ isọn̄ke urua ntre!’ Ntre mma mbiere ndinam ekpri okpokoro, n̄n̄wụk enye ke ọwọrọetop itie oro, nnyụn̄ nnọ mme andisan̄a mbe mme n̄wed Bible oro ẹnyenede ndiye ndise emi Mme Ntiense Jehovah ẹsuande.
“Ke isua inan̄ ẹmi ẹkebede, mma nsio itie oro n̄ka Sydney, ndien Harold ama etiene mi aka. Nnyịn isise iban̄a itie oro ke adiana ke adiana inyụn̄ inam utom ye mme esop n̄kann̄kụk nnyịn.” Harold, emi edide isua 83 idahaemi, ọdọhọ ete: “Ọtọn̄ọde ke Monday esịm Friday ibat ibat owo ẹsidu ke ufọk. Ntre ndibuana etop Obio Ubọn̄ ke usụn̄ emi anam nnyịn idu ke ebiet emi mme owo ẹdude. Nte ido edide, nnyịn imenyene nti utịp. Ibat n̄wed oro inịmde edi ata n̄wọrọnda ke idụt emi.”
“Okposụkedi nnyịn idude isịm nsio nsio itie inan̄ m̀mê ition ke mme isua ẹmi ẹbede,” Sid ọdọhọ ntem, “isibịghike mbemiso ẹdiọn̄ọde nnyịn. Ndusụk owo ẹsidi ẹbịne nnyịn ndibọ n̄wed. Mbon en̄wen ẹnyene mme mbụme oro ẹyomde ẹbọrọ. Ndien ndusụk owo ẹsikam ẹyom ndineme nneme ke minit ifan̄. Emi edi n̄kukụre ini emi nsinyenede mme mfiakn̄ka,” ntre ke enye etịn̄ ye inua imam.
Harold adian ete: “Ediwak owo ẹnen̄ede ẹnyene udọn̄ ke Bible. Ke ọfiọn̄ kiet owo inan̄ ẹma ẹtọn̄ọ ndikpep Bible ye Mme Ntiense nte utịp n̄wed oro mmọ ẹkebọde ẹto nnyịn ye ke ntak mme mbụme oro nnyịn ikekemede ndida Bible mbọrọ. Mme ifiọkutom ntem ẹsịn udọn̄ ẹnọ nnyịn akamba akamba.”
Ukem nte Sid ye Harold—ndien ukem nte apostle Paul—Mme Ntiense Jehovah ke kpukpru ebiet ẹsida kpukpru usụn̄ oro odude ndisuan akpan etop mmọ. Ntem, ẹka iso ndikwọrọ ‘gospel nnọ kpukpru mme idụt.’—Matthew 24:14.