Ndikam Nsịm Mbon Efen Efen ye Eti Mbụk

NTE n̄kekerede mban̄a mme owo ke obio mi, mma ndiọn̄ọ nte ke ediwak owo ẹkediọn̄ọ Mme Ntiense Jehovah ẹto ntọt mbụk n̄kpọntịbe kpọt. Mma n̄kere nte, akpana ẹnyene nneme ye mme owo ẹmi, man mmọ ẹfiọk mbon ẹmi Mme Ntiense Jehovah ẹdide ye se mmọ ẹnen̄erede ẹnịm ke akpanikọ. Edi didie ke n̄keme ndin̄wam? Ebe mi edi ebiowo Christian, ndien enye esinọ mi ọniọn̄ ọniọn̄ ndausụn̄ ye ekikere.

Nnyịn ima ikụt akpan ekikere ke ibuotikọ oro “Mme Magazine Oro Ẹnọde Ata Ndọn̄esịt,” emi ẹkemịn̄de ke nsiondi magazine Awake! eke January 8, 1995. Kaban̄a utom Ntiense kiet, ibuotikọ oro ọdọhọ ete: “Enye esinam edi ido ndibọ n̄kani ndusụk magazine Awake! ẹmi Mme Ntiense eken ẹkebonde ke ufọk. Ekem enye awaha aka mme itieutom ẹmi enye ekerede ke ẹyewụt akpan udọn̄ ke ndusụk ibuotikọ oro.”

Ye un̄wam ebe mi, ikebịghike mma mbọ mme magazine ke itie ikie. Mma n̄keme ndimek mme nsio nsio ibuotikọ ẹmi ẹdifọnde ye mme owo ẹmi ndidomode ndisobo nto mmọ ẹmi.

Ke ndade n̄wed enyịn̄ mbon oro ẹnyenede urụk ukopikọ ye n̄wetnnịm n̄kpọ ofụri owo, mma ntịm udịm enyịn̄ adade ọnọ mme ufọkibọk, itieidụn̄ mme uyen, ye itie ubọk nditọwọn̄. Mma nnyụn̄ nsịn enyịn̄ mme anam ndutịm ubụk owo, mme esenyịn ye mme ọnọ-item ufọkn̄wed, mme anam ndụn̄ọde nsọn̄idem, ye mme ikpọ owo ufọk n̄kpọkọbi ye esopikpe. Udịm enyịn̄ n̄kewetde ama esịne mme adausụn̄ ke mme itie unọ mbon mmịn ye mme ada n̄kpọsọn̄ ibọk ke idiọk usụn̄ ukpep, mme n̄ka ẹsede n̄kpọ ẹban̄a mbubehe n̄kann̄kụk, eke mbon n̄kpọnnam ye mbon unọmọ ekọn̄, ye eke ndụn̄ọde kaban̄a udia. N̄konyụn̄ mfụmike mme etubom itie utom kaban̄a mfọnọn̄kpọ, utom obio, ye mme mbubehe ubon.

Nso ke Nditịn̄?

Akpa n̄kpọ n̄kesinamde ke ini nnamde mme ediwaha ekedi nditịn̄ owo emi ndide in̄wan̄în̄wan̄. Ekem ndọhọ ke ediwaha mi edida minit ifan̄ kpọt.

Ndondo oro nsobode iso ye iso ye adausụn̄, nyọdọhọ: “Ami ndi kiet ke otu Mme Ntiense Jehovah. Nte ededi, ndịghe mi ndinyene nneme ido ukpono, emi mîkpodotke ke ini utom.” Nte ido edide idaha ama esikabade efere. Ekem, ke nnamde utịn̄ikọ mi ekekem ye idaha, nyaka iso nte: “Uduak ediwaha mi edi adiana-iba. Akpa, nyom ndiwụt esịtekọm mban̄a utom emi ọfis fo etịmde. Kam se, inaha ẹda owo ndibiat ini ye odudu esie ke ufọn ofụri owo ke didie didie. Emi enen̄ede odot itoro.” Ke ediwak idaha idem ama akpa owo emi ẹtọn̄ọde nneme ye enye ke usụn̄ emi.

Etisịm idahaemi owo oro eyenen̄ede eyịk se udiana ntak edidi mi ekedide. Nyaka iso nte: “Udiana ntak ediwaha mi edi emi: Otode ke magazine Awake! nnyịn, emi ẹmịn̄de ke ofụri ererimbot, mma nsion̄o ndusụk ibuotikọ ẹmi ẹnyenede n̄kpọ ndinam akpan akpan ye orụk utom fo ye mme mfịna ẹmi ẹnyenede ebuana ye enye. Mmenịm ke akpanikọ nte ke afo ayama ndifiọk nte n̄wedmbụk ofụri ererimbot esede mme mfịna ẹmi. Nyenem esịt ndikpọn̄ mmọ ẹmi ye afo.” Ediwak ini ẹma ẹsidọhọ mi ẹte ke ẹdara mme ukeme mi.

Mme Akama-Nduaidem ye Mme Ọnọ-Uyụhọ Utịp

Ke ini n̄kadade usụn̄ edisobo enye emi, ekese owo ẹma ẹsidara mi; owo kiet kpọt ke otu 17 mîkamaha. Mma nnyene akpakịp ifiọkutom ẹmi ẹkeduaide owo idem ẹkenyụn̄ ẹkamade utịp.

Ke uwụtn̄kpọ, ke mma n̄kodomo ikanan̄ nnyụn̄ mbet ke ime, mma n̄kụt unen ke ndisobo ye esenyịn ufọkn̄wed ikpehe kiet. Enye ekedi owo emi ọyọhọde ye utom. Kpa ye oro, enye eketie ata ufan ufan onyụn̄ etịn̄ ikọ ye ami ke esisịt ini. Ke ini n̄koyomde ndinyọn̄, enye ama ọdọhọ ete: “Mmenen̄ede n̄wụt esịtekọm mban̄a ukeme fo, ndien nditreke ndikot n̄wed fo ye ntịn̄enyịn.”

Ke idaha efen, mma n̄ka esop n̄kann̄kụk, n̄kosobo ye etubom ebiereikpe, owo emi odude ke ufọt ufọt isua emana. Ke ini n̄kodụkde ọfis esie, enye ama emenede enyịn ke babru esie ye iyatesịt.

Enye ama etịn̄ uyat uyat ete: “Mme ini utom ẹdi usenubọk Tuesday ikpọn̄, ndien nyodu kaban̄a ntọt ekededi.”

“Yak n̄kpe ubọk ke ndidi ke ini oro mîdotke,” n̄kọbọrọ ntre ini kiet nnyụn̄ ndian do nte, “Ke akpanikọ, nyama ndifiak ndi ini efen. Edi edidi mi enen̄ede edi ọkpọkpọ n̄kpọ.”

Idahaemi ebiereikpe oro ama enyene udọn̄. Enye ama obụp, ke uyoikọ oro mîtiehe ekọn̄ ekọn̄, se n̄koyomde. Mma mfiak ndọhọ ke nyafiak ndi ke Tuesday.

Ke n̄kpaidem mi, enye ama eyịre ete, “Mbọk, da itie. Nso ke oyom?”

Enyene-uwem nneme ama etiene, ndien enye ama ekpe ubọk ke nditre nditie ufan ufan ke ntọn̄ọ koro enye ekenen̄erede ọyọhọ ye utom.

“Nte afo ọmọfiọk se mmade mban̄a Mme Ntiense Jehovah?” ebiereikpe oro ama obụp ke esisịt ini ebede. “Mmọ ẹnyene mme edumbet oro enyenede nsọn̄ọ emi mmọ mîwọn̄ọkede ikpọn̄. Hitler ama odomo ofụri se enye ekekemede, edi Mme Ntiense ikosụk ikaha ekọn̄.”

Ke ini nnyịn mbiba ikodụkde ọfis kiet, mme ewetn̄wed ẹkedude do ẹma ẹdiọn̄ọ nnyịn. Ekem akpan ewetn̄wed ama etịn̄ ikọ sụn̄sụn̄, “Etieibuot akanam iyomke mme owo ndomokiet ẹdụk ẹdi.”

Mma mbọrọ sụn̄sụn̄ nte, “Edi enye ayayak nnyịn idụk, koro nnyịn idi Mme Ntiense Jehovah. Nnyịn idịghe mme esịn eben̄e, ndien edidi nnyịn idibịghike ikan minit ita.” Mma mbọn̄ akam ifịk ifịk ke esịt mi nte, “O Jehovah, mbọk yak enyịme isan̄ enye emi!”

Ewetn̄wed oro ama ọbọrọ mmen̄e mmen̄e ete: “Ọfọn, ndien, nyodomo nse.” Enye ama asan̄a adaha. Ke n̄kpọ nte minit iba ama ekebe, oro eketiede mi nte ebịghi akaha, enye ama afiak edi asan̄ade ye etieibuot ke idemesie. Ye unana editịn̄ n̄kpọ ndomokiet, enye ama ada nnyịn odụk aka ọfis esie, ebede ubet iba en̄wen.

Nte nnyịn ikọtọn̄ọde nneme, enye ama akabade etie ufan ufan akan. Enye ama enyịme san̄asan̄a nsiondi magazine Awake! ke ini ikọnọde. Nnyịn ima ikọm Jehovah ke ifet emi ndinọ eti ikọ ntiense mban̄a uduak utom nnyịn.

Ke mfiakde nse ekese utịbe utịbe ifiọkutom, mmokụt ọyọhọ ọyọhọ se apostle Peter ọkọdọhọde ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) Uduak Abasi edi nte ẹnọ mme owo ke kpukpru idaha ke uwem, usem, m̀mê mme ifetutom n̄kaowo ifet edifiọk uduak esie kaban̄a ubonowo ye kaban̄a isọn̄.—Utịp usịn.