Nte Ẹkemede Ndimụm Idatesịt N̄kama ke Utom Uyọhọ Ini
EDISU prọfesi Bible owụt in̄wan̄în̄wan̄ ete ke nnyịn idu uwem ke ukperedem ini eke editịm n̄kpọ emi mîfiọkke Abasi mi. Ke ẹfiọkde emi, mme asan̄autom Jehovah Abasi ẹbiat ini ke usụn̄ owụtde eti ibuot nte mmọ ẹkekeme ndisuan eti mbụk Obio Ubọn̄ esie. Se ibede Mme Ntiense Jehovah 600,000 ẹnam ndutịm ke uwem mmọ man otodo ẹbuana ke utom uyọhọ ini. Ndusụk mmọ ẹdi mme anditan̄a Obio Ubọn̄ uyọhọ ini ẹkotde mme asiakusụn̄. Mbon en̄wen ẹdi mbonutom unyịmesịt Bethel ẹnamde utom ke ibuot itieutom Watch Tower Society m̀mê mme ọfis n̄kọk itieutom esie. Ediwak n̄ko ẹdi mme isụn̄utom ye mme esenyịn oro ẹsan̄ade-san̄a.
Bible owụt ete ke ukperedem ini, “ndiọkeyo” oyodu. (2 Timothy 3:1-5) Bible ẹwetde ke usem Greek ada ikọ oro ẹkemede ndikabade nte “mmek-nnịm ini enyenede ndịk.” Ntem, baba owo kiet ikpodorike enyịn ndidu uwem oro mfịna mîdụhe ke eyo nnyịn. Ye ndusụk mme asan̄autom Christian, ekeme nditie nte mme mfịna ẹmi ẹnen̄ede ẹkponi tutu mmọ ẹkeme ndibụp idemmọ, ‘Nte ami mmekeme ndika iso ke utom uyọhọ ini, mîdịghe nte ana ntre?’
Nso mme idaha ẹkeme ndinam owo afiak odụn̄ọde idaha esie nte asiakusụn̄, owo utom unyịmesịt Bethel, esenyịn oro asan̄ade-san̄a m̀mê isụn̄utom? Ekeme ndidi ọkpọsọn̄ mfịna unana nsọn̄idem. Ndusụk iman oro ọsọn̄de m̀mê oro edide owo n̄kpọnnam oyom un̄wam kpukpru ini. Ekeme ndidi n̄wan ye ebe ẹtọn̄ọ ubon. Owo ekededi emi etrede utom uyọhọ ini kaban̄a mme ntak ẹmi ye kaban̄a mme mbiomo N̄wed Abasi inyeneke ndikop bụt mban̄a edinam utọ ukpụhọde oro.
Nte ededi, nso edieke owo odiomide nditre utom uyọhọ ini ke ntak unana idatesịt? Ndusụk asiakusụn̄ okụt ibat ibat owo oro ẹnyenede udọn̄ ke utom ukwọrọikọ esie ndien obụp ete, ‘Ntak emi n̄kade iso ke usụn̄uwem n̄waidem mi ke ini esisịt ibat owo kpọt ẹnọde n̄kpan̄utọn̄?’ Ekeme ndidi owo utom unyịmesịt Bethel ikopke inemesịt iban̄a utom esie. Mîdịghe ekeme ndidi uyịre uyịre mfịna unana nsọn̄idem, ke adan̄aemi mîkpanke owo ndinam utom usiakusụn̄, ke akpatre ọbọ owo inemesịt. Didie ke mme utọ owo oro ẹkeme ndimụm idatesịt mmọ n̄kama? Ẹyak nnyịn idụn̄ọde se ndusụk mme asan̄autom oro ẹnyenede ifiọkutom ẹtịn̄de.
Ndiyọ Mme Edikpu
Anny, emi otode Switzerland, okodụk Ufọkn̄wed Enyọn̄-Ukpeme Ukpep Bible eke Gilead ke 1950. Enye okodori enyịn ndika utom isụn̄utom ke esenidụt. Ke ini ẹkenọde afiak akanam utom ke Bethel ke Europe, Anny ama okụt edikpu. Kpa ye oro, enye ama enyịme ndinam utom ke Itieutom Ukabade N̄wed ndien ke osụk ananam utom oro. Didie ke enye akakan edikpu esie? “Ekese ama odu ndien ke osụk ododu ndinam. Nte etiede mi ke idem ye se mmade n̄kan idịghe akpan n̄kpọ nte utom emi,” ntre ke Anny anam an̄wan̄a.
Edieke nnyịn ikụtde edikpu ke utom nnyịn, eyedi nnyịn imekeme ndikọri edu Anny. Idịghe n̄kpọ oro nnyịn imade ikan edi ata akpan n̄kpọ. Se idide akpan n̄kpọ ikan edi nditịm nnam kpukpru nsio nsio utom oro ẹnyenede ebuana ye edisuan etop Obio Ubọn̄. Mme N̄ke 14:23 asian nnyịn ete “ke kpukpru orụk utom enyene udori.” Inamke n̄kpọ m̀mê nso utom ke ẹnọ nnyịn, ndinam enye ke edinam akpanikọ etịp esịn ke edinam utom Obio Ubọn̄ mma. Ndien akwa uyụhọ ekeme ndidu—ih, idatesịt—ke utọ utom oro Abasi ọnọde do.—Men 1 Corinth 12:18, 27, 28 domo.
Ndinyene Eti Itie Ebuana ye Mmọ En̄wen
Utom uyọhọ ini abuana edinyene n̄kpet n̄kpet ebuana ye kpukpru orụk owo—ke utom ukwọrọikọ, ke Bethel, ke ufọkidụn̄ isụn̄utom, m̀mê ke adan̄aemi ẹsan̄ade ẹkese nsio nsio esop nte esenyịn oro asan̄ade-san̄a. Ntem, idatesịt ọkọn̄ọ akamba akamba ke ndinyene eti itie ebuana ye mmọ en̄wen. Nte ededi, ‘ini ndịk’ oro ẹkebemde iso ẹtịn̄ ẹban̄a ke ukperedem ini emi esịn itie ebuana owo ke akamba nsịn̄ede. Didie ke asan̄autom ekeme ndifep nditaba idatesịt esie, idem edieke owo anamde esịt ayat enye? Iso-ọfọn nnyịn imekeme ndikpep n̄kpọ nto Wilhelm.
Wilhelm akakabade edi andibuana ke ubon Bethel ke Europe ke 1947. Ke oro ebede, enye ama abiat ini ke utom usiakusụn̄ ye ke utom nte esenyịn oro asan̄ade-san̄a. Wilhelm anam an̄wan̄a ete: “Edieke ami ye n̄wan mi ikụtde mme n̄kpọ oro nnyịn ikerede ke inenke m̀mê n̄kpọ oro afịnade nnyịn ọkpọkpọ, nnyịn iyetịn̄ inọ Jehovah nte nnyịn ikerede ndien ekem iyak mme n̄kpọ oro inọ enye ndise mban̄a.”—Psalm 37:5.
Ndusụk afo ke idemfo ama okop editịmede esịt aban̄a eduuwem ekemmọ Christian oro eketịn̄de ikọ ye afo ke usụn̄ oro mîwụtke ukpono m̀mê ubiak ubiak. Ti ete ke kpukpru nnyịn inanam ndudue ediwak ini ke ikọ inua nnyịn. (James 3:2) Ntre ntak mûdaha ifet emi ndisan̄a n̄kpere ‘Enyeemi okopde akam’? (Psalm 65:2) Tịn̄ n̄kpọ oro nọ Jehovah, ndien ekem yak sịn enye ke ubọk. Edieke Abasi oyomde ndinam mme ukpụhọde, enye ayanam ntre. Ẹkeme ndiyom mbon oro ẹdụn̄de ke ufọkidụn̄ isụn̄utom ẹnyene emi ke ekikere edieke mfịghe edemerede ke mme utọ afan̄ ẹmi, koro emi ayan̄wam mmọ ndimụm idatesịt mmọ n̄kama ke utom Jehovah.
Ke Ini Odude ke Unana Nsọn̄idem
Ibat ibat owo ẹnyene nsọn̄idem kpukpru ini. Idem mbon oro ẹdude ke se ẹkotde ini nsehe uwem ẹkeme ndikop mfịghe m̀mê ndiduọ udọn̄ọ. Unana nsọn̄idem esinam ndusụk owo ẹtre utom uyọhọ ini, edi ke oro ebede mmọ ẹsinam eti utom nte mme asuanetop Obio Ubọn̄. Nte ededi, mmọ en̄wen ẹkeme ndika iso ke utom uyọhọ ini kpa ye unana nsọn̄idem. Ke uwụtn̄kpọ, kere ban̄a Hartmut ye Gislind.
Hartmut ye Gislind ẹdi mme ọdọ ndọ ẹmi ẹma ẹkebiat isua 30 nte mme asiakusụn̄, mme isụn̄utom, ye ke utom emi ẹsan̄ade-san̄a. Mmọ mbiba ẹnyene ọkpọsọn̄ udọn̄ọ oro esinamde mmọ ẹkop mmemidem ke n̄kan̄ eke ikpọkidem ye ke n̄kan̄ eke ntụk ndusụk ini. Kpa ye oro, mmọ ẹnam nti utom ẹnyụn̄ ẹkeme ndisịn udọn̄ nnọ mbon en̄wen ẹmi ẹsobode utọ mfịna oro. Nso item ke mmọ ẹnọ? “Wụk ekikere ke ini iso kûwụk ke edem. Da kpukpru idaha nam n̄kpọ ke mfọnn̄kan usụn̄. Usen kiet kiet ekeme ndikam nda ifet kiet nditoro Jehovah ndi. Da ifet oro nam n̄kpọ, nyụn̄ dara enye.”
Kere ban̄a Hannelore. Enye esikop editịmede esịt aban̄a udọn̄ọ oro esifịnade enye ndien ndien ke isua 30 oro enye anamde utom nte asiakusụn̄, isụn̄utom, ke utom oro ẹsan̄ade-san̄a ye ebe esie, ye ke utom Bethel. Hannelore ọdọhọ ete: “N̄wụk ekikere ke eneni oro Satan ekedemerede—nte ke mme owo ẹnam n̄kpọ Jehovah n̄kukụre ke ini edinam ntre edide mmemmem ọnọ mmọ. Ebede ke ndiyọ mme idomo, ami mmekeme ndinyene udeme ke ndiwụt nte ke Satan inenke.” Emi ekeme ndidi okopodudu n̄kpọ oro onụkde owo anam n̄kpọ. Ti ete ke ọkpọkpọ ima nsọn̄ọnda fo ye Jehovah ke ini osobode idomo edi akpan n̄kpọ ọnọ enye.—Job 1:8-12; Mme N̄ke 27:11.
Ke ini odomode ndinam ubiere oro adade ukem ukem kaban̄a nsọn̄idem fo, kere ban̄a ikpehe iba eke prọfesi Jesus Christ oro ẹban̄ade utịt editịm n̄kpọ emi. Jesus ama ebem iso etịn̄ aban̄a mme idiọk udọn̄ọ ndidu ke nsio nsio ebiet. Enye ama ọdọhọ n̄ko ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo.” (Matthew 24:3, 14; Luke 21:11) Jesus ama ọfiọk ete ke ukperedem ini emi, mme anditiene enye ẹyesobo udọn̄ọ. Edi enye ama ọfiọk ete ke idịghe sụk mbon oro ẹnyenede nsọn̄idem ẹkenyene ndinam utom ukwọrọikọ emi edi n̄ko mme owo oro ẹnyenede ọkpọsọn̄ udọn̄ọ. Edieke nnyịn ikemede ndika iso ke utom uyọhọ in kpa ye unana nsọn̄idem, Jehovah idifreke ima oro nnyịn iwụtde kaban̄a enyịn̄ esie.—Mme Hebrew 6:10.
Ndimụm Idatesịt N̄kama Kpa ye Unana Udọn̄ Mbon An̄wa
Nte mme owo ẹnamde n̄kpọ ẹban̄a utom ukwọrọikọ Obio Ubọn̄ ekeme nditụk edu nnyịn. Asan̄autom kiet oro enyenede ifiọkutom etịn̄ ete: “Esidi ọkpọsọn̄ n̄kpọ ọnọ idem mme asiakusụn̄ nditọn̄ọ nneme ye enyeneufọk. Ana kpukpru nnyịn in̄wana ndimụm idatesịt nnyịn n̄kama.” Ih, unana udọn̄ mbon an̄wa ekeme ndinam idatesịt nnyịn ke utom ukwọrọikọ osụhọde. Ntre didie ke asiakusụn̄ oro osobode unana udọn̄ kpukpru emi ekeme ndimụm idatesịt esie n̄kama? Mme asan̄autom oro ẹnyenede mbufiọk ẹnọ mme ekikere ẹtienede mi oro ẹma ẹkedomo ẹse ẹnyụn̄ ẹkụt nte ọfọnde.
Unana udọn̄ enịm n̄kpọ-ata, edi enye inyeneke ndidi edikpu. Unana udọn̄ ke idem esie nditara nsuana idịghe ntak editre edika iso ke utom uyọhọ ini. Nnyịn imekeme ndimụm idatesịt nnyịn n̄kama ke ini isobode unana udọn̄ edieke nnyịn isiode ini oro ekemde inịm inọ edikpep N̄wed Abasi ifịk ifịk. Mmọ ‘ẹtịm nnyịn idem ẹnọ kpukpru nti utom,’ ndien oro esịne ndinyene nneme ye mbon oro ẹsịnde ndikop eti mbụk. (2 Timothy 3:16, 17) Okposụkedi mme owo mîkoyomke ndikpan̄ utọn̄ nnọ prọfet Jeremiah, oro ikakpanke enye. (Jeremiah 7:27) Ke ini ikpepde Bible ye un̄wam mme n̄wed Christian, nnyịn imekeme ndibọ ufọn akamba akamba edieke nnyịn itịn̄de enyịn ke mme ekikere oro ẹsọn̄ọde mbuọtidem nnyịn ẹnyụn̄ ẹn̄wamde nnyịn ndinam n̄kpọ mban̄a unana udọn̄.
Sia unana udọn̄ edide n̄kpọ-ata, ẹyak nnyịn idụn̄ọde edu nnyịn kaban̄a mbon oro nnyịn ikwọrọde ikọ inọ. Ntak emi mmọ ẹnanade udọn̄? Ntak kiet kaban̄a ntatara unana udọn̄ ke ndusụk ikpehe ke Europe, ke uwụtn̄kpọ, edi idiọk mbụk emi nsunsu ido ukpono enịmde. Mme owo ikereke aba ke ido ukpono enyene odudu ke uwem mmimọ, m̀mê ndiyom ndinam n̄kpọ ndomokiet mban̄a enye. Oyom nnyịn ikpụhọde ida ekekem ye idaha, inemede nneme ye mme owo iban̄a mme n̄kpọ oro ẹtụkde mmọ, utọ nte unana utom, nsọn̄idem, ubiatibet, unana ime, n̄kann̄kụk, ye ndịk ekọn̄.
Ke ntọn̄ọikọ nnyịn ye enyeneufọk, nnyịn imekeme nditịn̄ mban̄a n̄kpọ oro edemerede udọn̄ ke n̄kann̄kụk. Oro edi se Dietmar okodomode ndinam ke ini ọkọkwọrọde ikọ ke obio-in̄wan̄ oro enye mîkenen̄ekede ikụt unen. Eren kiet odụn̄de do ama etịn̄ ete ke n̄kpọ mmọn̄eyet ama etịbe ke obio-in̄wan̄ oro ke usen oro ekebemde iso. Ekem ke kpukpru enyịnusụn̄, Dietmar ama eseme ke ofụri esịt aban̄a n̄kpọ mmọn̄eyet oro. Enye ọkọdọhọ ete: “Inikiet inikiet, mme owo ẹma ẹtọn̄ọ ndineme nneme. N̄kpọ mmọn̄eyet oro ama odu ke ekikere kpukpru owo. Mma nnyene inem inem nneme ye ediwak owo usen oro koro n̄kowụtde udọn̄ ke uwem mmọ.”
Oyom nnyịn inọ mme owo ikọ ntiense Obio Ubọn̄ ke ebiet ekededi oro nnyịn ikụtde mmọ. Ikọ ntiense ido nneme ekeme ndin̄wụm mfri, ndien nnyịn imekeme ndinọ idem nnyịn ukpep ke afan̄ emi ebe ke ndida mme ekikere oro ẹnọde ke mme n̄wed ẹkọn̄ọde ke Bible nnam n̄kpọ. Idatesịt ekeme ndisụn̄ọ nto inem inem ikọ ifan̄ m̀mê ke ndikpọn̄ mme magazine Enyọn̄-Ukpeme ye Awake! nnọ enyeneufọk. Edieke edide nnyịn ima inam mme mfiakn̄ka ima inyụn̄ itọn̄ọ ndinịm ukpepn̄kpọ Bible ye owo oro enyenede udọn̄, nnyịn imekeme ndinyene owo efen oro enyenede udọn̄ ke ndibụp: “Ndi ọmọdiọn̄ọ owo efen oro akpamade ndikpep Bible?” Emi ekeme ndida n̄kesịm editọn̄ọ ukpepn̄kpọ Bible efen. Ke usụn̄ ekededi, ẹyak nnyịn inyene in̄wan̄în̄wan̄ edu, iberi edem ke Jehovah ebe ke akam, iyakke unana udọn̄ anam idem emem nnyịn.
Nsịnudọn̄ Otode Mmọ En̄wen
Jürgen ye Christiane ẹnam utom usiakusụn̄ ẹnyụn̄ ẹbuana ke utom oro ẹsan̄ade-san̄a ke isua 30. Inikiet mmọ ẹma ẹnyene utom oro akabuanade edikwọrọ ikọ ke ikpehe oro ata ekese owo mînyeneke udọn̄ ẹnyụn̄ ẹsọn̄de obot itọn̄. Jürgen ye n̄wan esie ẹkeyom nsịnudọn̄ didie ntem! Nte ededi, kaban̄a ndusụk ntak, mbon en̄wen ke esop ikanamke n̄kpọ iban̄a udọn̄ emi.
Ntre Jürgen ọfiọk oto ifiọk n̄kpọntịbe nte ke “ndusụk mme asiakusụn̄ ẹsobo n̄kpọsọn̄ idaha. Mmọ ẹyom ekese nsịnudọn̄ ẹto mbiowo ye mme asuanetop eken.” Abasi ama ọdọhọ Moses esịn udọn̄ ọnọ onyụn̄ ọsọn̄ọ Joshua idem. (Deuteronomy 3:26-28) Ndien mme Christian ẹkpenyene ndidi ebiet emi nsịnudọn̄ otode nnọ kiet eken. (Rome 1:11, 12) Mme asuanetop Obio Ubọn̄ ẹkeme ndisịn udọn̄ nnọ mbon oro ẹdude ke utom uyọhọ ini ke nditịn̄ mme ikọ oro ẹbọpde-bọp ye ke ndisan̄a ye mmọ ke an̄wautom ke ini ke ini.
Idatesịt Jehovah—Odudu Nnyịn
Mme Christian oro ẹbiatde n̄kponn̄kan ini uwem mmọ nte mme asiakusụn̄ m̀mê mme isụn̄utom, ke ndinam utom ke Bethel, m̀mê ke ndisan̄a nse mme esop ke utom oro ẹsan̄ade-san̄a ẹkụt ẹte ke ata ediwak mfịna ẹdi ke ibio ini, edi ndusụk ẹkeme ndinen̄ede mbịghi. Idem ibat ibat mfịna oro ẹtiede nte idikụreke ikpenyeneke ndibọ nnyịn idatesịt nnyịn. Ramon, emi ama akanam utom ke esenidụt ke se ibede isua 45, ọnọ ekikere ete ini ekededi oro mme mfịna ẹnamde nnyịn ikop mfụhọ, “nnyịn ikpenyene ndikere mban̄a ediwak edidiọn̄ oro nnyịn inyenede ye ediwak tọsịn mbon en̄wen oro ẹsobode nsọn̄ọn̄kpọ oro okponde akan.” Ke akpanikọ, ekemmọ mme andinịm ke akpanikọ ke ofụri ererimbot ẹkụt ndutụhọ, ndien Jehovah enen̄ede ekere aban̄a kpukpru nnyịn.—1 Peter 5:6-9.
Ntre, ndien, edieke mme ọkpọkpọ idaha nnyịn ẹyakde nnyịn ibuana ke utom uyọhọ ini inyụn̄ isọn̄ọ idu, ẹyak nnyịn imụm idatesịt nnyịn ikama ebe ke ndiberi edem ke Ete nnyịn eke heaven. Enye ọsọn̄ọ mme asan̄autom esie idem, ndien kpukpru nnyịn ikpenyene nditi nte ke ‘idatesịt Jehovah edi odudu nnyịn.’—Nehemiah 8:10.
[Ndise ke page 21]
“Nte etiede mi ke idem ye se mmade n̄kan idịghe akpan n̄kpọ nte utom emi”
[Ndise ke page 22]
“Nnyịn iyetịn̄ inọ Jehovah nte nnyịn ikerede ndien ekem iyak mme n̄kpọ oro inọ enye ndise mban̄a”
[Mme ndise ke page 23]
“Da kpukpru idaha nam n̄kpọ ke mfọnn̄kan usụn̄. Usen kiet kiet ekeme ndikam nda ifet kiet nditoro Jehovah ndi”
[Ndise ke page 23]
“Ebede ke ndiyọ mme idomo, ami mmekeme ndinyene udeme ke ndiwụt nte ke Satan inenke”
[Mme ndise ke page 24]
“Ndusụk mme asiakusụn̄ ẹsobo n̄kpọsọn̄ idaha. Mmọ ẹyom ekese nsịnudọn̄ ẹto mbiowo ye mme asuanetop eken”
[Ndise ke page 24]
“Nnyịn ikpenyene ndikere mban̄a ediwak edidiọn̄ oro nnyịn inyenede”