Nte Afo Ke Ekpebe Abasi Nnyịn Oro Mîten̄eke Owo Enyịn?

UNANA EDITEN̄E OWO ENYỊN—m̀mọ̀n̄ ke ẹkeme ndikụt enye? Odu Owo oro mîten̄eke owo ndomokiet enyịn, emi ọbọhọde asari, ediwụt uma, ye odusat. Enye edi Jehovah Abasi, kpa Andibot ubonowo. Nte ededi, kaban̄a mme owo, Charles Lamb ewetn̄wed eke ọyọhọ isua ikie 19 otode England ama ewet in̄wan̄în̄wan̄ ete: “Ami, ke nditịn̄ ke mmemmem usụn̄, nyọhọ ye asari—emi se mmade ye se nsuade anamde.”

Ke edide edisịm unana editen̄e owo enyịn, enen̄ede anana ke edu owo. Ediwak isua ikie emi ebede enyene-ọniọn̄ Edidem Solomon eke Israel ama okụt nte ke “owo akara owo tutu ọnọ enye unan.” (Ecclesiastes 8:9, NW) Usua orụk, en̄wan obio, ye utọk ubon ẹka iso nditọt. Ke ntre, nte edi ata idem n̄kpọ ndinịm ke akpanikọ nte, ke ẹyakde ẹnọ idemmọ ikpọn̄, ke mme owo ẹkeme nditọn̄ọ n̄ka unana uten̄e owo enyịn?

Ẹyom ukeme ofụri esịt ndikara mme edu nnyịn nnyụn̄ nsio asari ekededi oro ama ekenyene orụn̄ ke idem nnyịn mfep. (Ephesus 4:22-24) Ye unana edidiọn̄ọ nnyịn imekeme ndinyene ntụhọ edika iso ye mme edu oro n̄kaowo ye n̄kann̄kụk ufọkn̄wed ẹtịbide ẹdi ye oro ẹnyenede orụn̄ ẹto idaha ubon, orụk, ye idụt. Se itiede nte ukeuke edu ẹmi ẹsiwak ndinyene orụn̄ ẹnyụn̄ ẹsịn udọn̄ ẹnọ ido oro ẹdade ẹkesịm editen̄e owo enyịn. Idem Lord Francis Jeffrey ọfiọkibet ye ewetn̄wed otode Scotland ama enyịme ete: “Idụhe n̄kpọ oro owo ekemede nditre ndidiọn̄ọ ke ata anyanini, nte udomo oro asari esie okponde onyụn̄ ọsọn̄de ubọk.”

Lenaa edi owo kiet emi enyịmede ke oyom ukeme ofụri esịt ndin̄wana ye udọn̄ unana asari. Enye ọdọhọ ete ke ndifịk ntụk asari oro esịnede owo ke idem nnịm “oyom akamba ukeme koro nte ẹkebọkde owo enyene ata ọkpọsọn̄ odudu.” Lena ama enyịme n̄ko ete ke oyom mme n̄kpọ editi kpukpru ini.

N̄wetnnịm N̄kpọ eke Unana Jehovah Nditen̄e Owo Enyịn

Jehovah edi mfọnmma uwụtn̄kpọ unana editen̄e owo enyịn. Tọn̄ọde ke mme ntọn̄ọ ntọn̄ọ page Bible, nnyịn imokot nte enye okowụtde unana editen̄e owo enyịn ke mme edinam esie ye mme owo. Nnyịn imekeme ndikpep ekese n̄kpọ nto mme mfọnn̄kan uwụtn̄kpọ ye mme n̄kpọ editi ẹmi.

Jehovah ama owụt unana editen̄e owo enyịn ebe ke ndinam n̄kpọ man apostle Peter owo Jew akpatan̄a eti mbụk ọnọ Cornelius ye mme Gentile eken ke 36 E.N. Ke ini oro Peter ama etịn̄ ete: “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.”—Utom 10:34, 35.

Ke kpukpru edinam esie ye ekpụk ubonowo, Jehovah kpukpru ini esiwụt unana enye nditen̄e owo enyịn. Christ Jesus eketịn̄ aban̄a Ete esie ete: “Enye [anam] utịn Esie asiaha ọnọ mme idiọk owo ye nti owo, onyụn̄ [anam] edịm edep ọnọ ndinen owo ye mme anam ukwan̄-ido.” (Matthew 5:45) Ke akade iso otoro Jehovah nte Abasi emi mîten̄eke owo enyịn, Peter ama ọnọ ikọ ntiense ete: “Enye akam enyene anyan ime ye mbufo, inyụn̄ iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.”—2 Peter 3:9.

Ke eyo Noah, ke ini ‘idiọkn̄kpọ owo okokponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdide idiọk kpukpru ini,’ Jehovah ama ebiere ndisobo ererimbot ubonowo oro. (Genesis 6:5-7, 11, 12) Nte ededi, ke ewụhọ Abasi ye ke iso kpukpru mbon eyo esie, Noah ama ọkọn̄ ubom. Ke adan̄aemi enye ye nditọ esie ẹkekọn̄de ubom oro, Noah ekedi n̄ko “ọkwọrọ edinen ido.” (2 Peter 2:5) Kpa ye oro ọkọfiọkde aban̄a idiọk ekikere eke emana oro, Jehovah ye unana editen̄e owo enyịn ama ọnọ in̄wan̄în̄wan̄ etop ọsọk mmọ. Enye ama edemede mmọ ekikere ye esịt ebe ke ndinam Noah ọkọn̄ ubom onyụn̄ ọkwọrọ ikọ. Mmọ ẹma ẹnyene kpukpru ntak ndinam n̄kpọ mban̄a, edi utu ke oro mmọ “[ikọfiọkke] tutu ukwọ edi edimen mmọ kpukpru efep.”—Matthew 24:39.

Nso mfọnn̄kan uwụtn̄kpọ unana Jehovah nditen̄e owo enyịn ke emi ekedi ntem! Ke ndiọkeyo ẹmi, onụk mme asan̄autom Abasi nditan̄a eti mbụk Obio Ubọn̄ ye ukem unana editen̄e owo enyịn oro. N̄ko-n̄ko, mmọ itreke nditan̄a usen usiene Jehovah. Ke enyịn kpukpru owo, mmọ ẹkwọrọ etop Jehovah ye unana editen̄e owo enyịn man kpukpru owo ẹkpekop.—Isaiah 61:1, 2.

Mme un̄wọn̄ọ oro Jehovah ọkọn̄wọn̄ọde ọnọ mme ete-ekpụk oro Abraham, Isaac, ye Jacob ẹyarade ẹwụt nte ke enye edi Abasi oro mîten̄eke owo enyịn. Ebede ke udịm ubon mmọ oro ẹsiakde Enyeoro ẹmekde emi ebede ke enye ‘kpukpru mme idụt ke ererimbot ẹdikụtde mfọn’ ọyọwọrọ edi. (Genesis 22:18; 26:4; 28:14) Christ Jesus ama owụt nte idide Enyeoro ẹmekde do. Ebede ke n̄kpa ye ediset ke n̄kpa Jesus, Jehovah ama ọnọ ofụri okopitem ubonowo usụn̄ edinyene edinyan̄a. Ih, mme ufọn uwa ufak Christ ẹdu ye unana editen̄e owo enyịn.

Ke eyo Moses, unana Jehovah nditen̄e owo enyịn ama owụt idem ke usụn̄ oro enen̄erede edemede owo udọn̄ ke ebuana ye nditọiban Zelophehad. Iban ition ẹmi ẹkesak iso ẹse mfịna enyenede ebuana ye udeme ete mmọ ke Isọn̄ Un̄wọn̄ọ. Emi ekedi ntre koro ekedi ido ke Israel owo ndiyak udeme isọn̄ nnọ nditọiren. Nte ededi, Zelophehad ikakpaha ikpọn̄ eyeneren ndomokiet ndibọ udeme. Nditọiban Zelophehad ition ẹmi ke ntre ẹma ẹmen eben̄e mmọ kaban̄a edinam n̄kpọ ye unana editen̄e owo enyịn ẹkenịm Moses ke iso, ẹdọhọde ẹte: “Ẹdinam didie ẹsio enyịn̄ ete nnyịn ke orụk esie ẹfep, koro enye mîkenyeneke eyen-eren? Kam nọ nnyịn udeme ke otu nditọ-ete ete nnyịn.” Jehovah ama okop eben̄e mmọ onyụn̄ eteme Moses ete: “Ke ini owo akpade, ndien mînyeneke eyen-eren, mbufo ẹnam udeme esie ebe osịm eyen esie an̄wan.”—Numbers 27:1-11.

Nso uwụtn̄kpọ ima ima unana editen̄e owo enyịn ke emi ekedi ntem! Man ẹkụt ẹte ke owo ikemenke udeme esien inọ esien efen ke ini nditọiban ẹdọde ndọ, ẹma ẹyom mmọ ẹdọ owo ke “otu ubon esien ete mmọ” ikpọn̄îkpọn̄.—Numbers 36:5-12.

Ẹka iso ẹkụt unana Jehovah nditen̄e owo enyịn ke eyo ebiereikpe ye prọfet Samuel. Jehovah ama ọdọhọ enye eyet obufa edidem ke esien Judah ke ubon Jesse eyen Bethlehem aran. Edi Jesse ekenyene nditọiren itiaita. Anie ke ẹdiyet aran nte edidem? Idaha Eliab ama eye Samuel. Nte ededi, nte n̄kpọ etiede ke enyọn̄ enyọn̄ idem iwọn̄ọkede ntịn̄enyịn Jehovah. Enye ama ọdọhọ Samuel ete: “Kûse enye iso, kûnyụn̄ use nte enye okon̄de idaha; koro mmesịn enye: koro (mmensehe) nte owo esede; koro owo esede enyịn, edi Jehovah ese esịt.” Ẹma ẹmek David, akpatre eyen Jesse.—1 Samuel 16:1, 6-13.

Ndikpep N̄kpọ Nto Unana Jehovah Nditen̄e Owo Enyịn

Mbiowo Christian ẹnam ọfọn ndikpebe Jehovah ebe ke ndise mme edu eke spirit oro ekemmọ andinịm ke akpanikọ enyenede. Emem utom ndida mme idaha nnyịn mbiom owo ikpe, iyakde mme ekikere idem nnyịn ẹfụk ubiereikpe nnyịn. Nte ebiowo kiet esịnde, “Mmodomo ndinam n̄kpọ ye mbon en̄wen ke usụn̄ oro enemde Jehovah esịt, ikọn̄ọke ke ekikere oro mma n̄kenyenyene.” Ọfọn didie ntem kpukpru mme asan̄autom Jehovah ndida Ikọ esie nte udomon̄kpọ mmọ!

Mme uwụtn̄kpọ Bible ẹsiakde mi ẹn̄wam nnyịn in̄wana ye mme ekikere asari eke orụk m̀mê eke idụt oro ẹsụk ẹdude nnyịn ke idem. Ebede ke ndikpebe unana Jehovah nditen̄e owo enyịn, nnyịn ikpeme esop Christian isio ke asari, odusat, ye ediwụt uma.

Apostle Peter ama ekpep ete ke “Abasi iten̄eke owo enyịn.” (Utom 10:34) Ediwụt uma edi asua ye unana editen̄e owo enyịn onyụn̄ abiat mme edumbet ima ye edidianakiet. Jesus ama edemede udọn̄ mme ubuene, mbon mmeme, ye mme usụhọde owo, onyụn̄ anam mbiomo mmọ efere. (Matthew 11:28-30) Enye ama ọwọrọ ada ata san̄asan̄a ọkpọn̄ mme adaiso ido ukpono mme Jew, ẹmi ẹkesọn̄de ubọk ẹkara mme owo, ẹfekde mmọ ye ndodobi ewụhọ. (Luke 11:45, 46) Ndinam emi nnyụn̄ n̄wụt mme enyene-n̄kpọ ye mme ọwọrọiso owo uma ke akpanikọ ikekemke ye mme ukpepn̄kpọ Christ.—James 2:1-4, 9.

Mfịn, mbiowo Christian ẹsụk ibuot ẹnọ itieibuot Christ ẹnyụn̄ ẹwụt unana editen̄e owo enyịn ẹnọ kpukpru ikọt Jehovah oro ẹyakde idem ẹnọ. Nte mmọ ‘ẹkpemede udịm-erọn̄ Abasi emi odude ke otu mmọ,’ mmọ ẹtre ediwụt uma ke ntak idaha ndutịm uforo, utọk owo ye owo, m̀mê ebuana ubon. (1 Peter 5:2) Ebede ke ndikpebe Abasi oro mîten̄eke owo enyịn nnyụn̄ nnam ntọt esie akpande edinam ediwụt uma, mbiowo Christian ẹsịn udọn̄ ẹnọ edu unana editen̄e owo enyịn ke esop.

Esop Christian eke Mme Ntiense Jehovah edi otu nditọete ofụri ererimbot. Edi in̄wan̄în̄wan̄ uyarade nte ke n̄kaowo oro ọbọhọde asari ye unana editen̄e owo enyịn ekeme ndidi ata idem n̄kpọ ke idak ndausụn̄ Jesus Christ. Mme Ntiense ẹmen “obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” (Ephesus 4:24) Ih, mmọ ke ẹkpep n̄kpọ ẹto mfọnmma uwụtn̄kpọ Abasi oro mîten̄eke owo enyịn, Jehovah, ẹnyụn̄ ẹnyene idotenyịn uwem nsinsi ke obufa ererimbot oro ọbọhọde kpukpru editen̄e owo enyịn.—2 Peter 3:13.

[Ikọ idakisọn̄]

[Ndise ke page 26]

Apostle Peter ama ekpep ete ke Abasi iten̄eke owo enyịn