Ẹfiak Ẹsọn̄ọ Unen Edinyịme Oro Asan̄ade Ye Ifiọk

UBIEREIKPE ndondo emi oro Ebiereikpe ke Esop Akpa Ndụn̄ọde eke Messina, Italy, ọkọnọde afiak ọsọn̄ọ nte ke se owo udọn̄ọ oro edide akwa owo oyomde ẹnam ke n̄kan̄ ibọkusọbọ obiomo mme dọkta ke idem ndinam. Ẹkenọ ubiereikpe emi ke ikpe abuanade kiet ke otu Mme Ntiense Jehovah.

Ke January 1994, ẹma ẹmen Antonino Stellario Lentini, Ntiense edide isua 64 emi ekedide owo udọn̄ọ uwọrọ iyịp, ẹfehe ẹka ufọkibọk kiet ke Taormina, Messina. N̄wan Antonino, Catena, ama anam an̄wan̄a mme anamutom ufọkibọk ete ke nte Mme Ntiense Jehovah imọ ye ebe imọ idinyịmeke usọbọ edikịm iyịp nsịn ke idem. (Utom 15:20, 28, 29) Ẹma ẹkpono se mmọ ẹkeyomde.

Nte ededi, ke usụn̄ edimen n̄ka itie usọbọ efen, Antonino ikakanke ikot ibifịk aba ndien ẹkemen ẹkesịm ke ata idiọk idaha. Esisịt ini ke oro ebede, enye ama akpa. Mfụhọ ama akan Catena ubọk, edi enye ama okụt akwa ndọn̄esịt ke un̄wọn̄ọ ediset ke n̄kpa eke Bible. (Utom 24:15) Ekem, ke ata n̄kpaidem esie, mme ayaraiwat—ndusụk ẹdide se nsunsu mbụk oro ndutịm usuanetop otụnde usụn̄—ẹma ẹkot enye ikpe nte ke enye ekedi ntak n̄kpa ebe esie koro enye mîkenyịmeke ẹnọ enye usọbọ oro mme dọkta ẹkekụtde ke odot.

Ke se ibede isua kiet ama ekebe, ke July 11, 1995, ẹma ẹtebe Catena ikpe, koro enye mîkabiatke ibet ndomokiet. Ke akpanikọ, ikọ ntiense nta mme ọnọ usọbọ owụt nte, ke ẹkerede ẹban̄a idaha owo udọn̄ọ oro, usọbọ ibọkusọbọ nte ededi ikpekenyeneke ufọn.

Edi ikọ ebiereikpe ama owụt se idide ata idem n̄kpọ. Enye ama osio owụt nte ke ọsọsọn̄ ndinyịme nte ke mbon ufọkibọk ẹnyene ndisịbe ndụk ke owo udọn̄ọ m̀mê owo oro adade ke ibuot esie esịnde usọbọ. Enye ama adian do ete ke ibet ukpepn̄kpọ ibọkusọbọ aban̄ade mbiomo ido uwem ke Italy “ada okụt ufọn edibọ unyịme oro asan̄ade ye ifiọk nto owo oro enyenede udọn̄ọ mbemiso edisịbe ndụk ekededi.” Ntem, enye ama ọdọhọ ke Catena “nte ekemde ye ibet ọkọbiọn̄ọ ndiyak ẹnam ebe esie utọ n̄kpọ oro.”

Ubiereikpe emi afiak ọsọn̄ọ unen oro akwa owo enyenede ndisịn usọbọ ibọkusọbọ oro atuahade ye uduak esie.