Mme Mbụme Ẹtode Mme Andikot
Ephesus 3:14, 15 ọdọhọ ke ẹsio “kpukpru ubon ke enyọn̄ ye ke isọn̄ enyịn̄” ke Abasi. Nte mme ubon ẹdu ke heaven, ndien nte ubon eke owo kiet kiet ke usụn̄ ekededi enyene enyịn̄ esie oto Jehovah?
Mme ubon idụhe ke heaven nte ẹmi ẹdude ke isọn̄, ẹnyenede ete, eka, ye nditọ—kpukpru ẹbuanade n̄kpọ ye kiet eken ke n̄kan̄ eke obụk. (Luke 24:39; 1 Corinth 15:50) Jesus ama owụt in̄wan̄în̄wan̄ nte ke mme angel idọhọ ndọ, n̄kpọ inyụn̄ idụhe ndiwụt nte ke mmọ ke usụn̄ ekededi ẹnyene nditọ.—Matthew 22:30.
Nte ededi, Bible etịn̄ aban̄a Jehovah Abasi ke ndamban̄a usụn̄ nte ọdọde esop esie eke heaven; enye ọdọ ndọ ke usụn̄ eke spirit. (Isaiah 54:5) Esop eke heaven oro enyene nditọ, utọ nte mme angel. (Job 1:6; 2:1; 38:4-7) Ke usụn̄ifiọk emi, ndien, utịbe utịbe ubon eke spirit odu ke heaven.
Akan oro, obufa ndamban̄a ubon ke ọkọri ke heaven, esịnede Jesus Christ ye esop n̄wanndọ esie eke owo 144,000. (2 Corinth 11:2) Ata ediwak ke otu mbon oro ẹyetde aran mi ẹma ẹkpakpan̄a, ye idotenyịn uwem eke heaven ke ekikere. Ndusụk ẹsụk ẹdodu uwem ke isọn̄. Kpukpru mmọ ke ẹbet “ndọ Eyenerọn̄” ye ọkpọsọn̄ udọn̄. Bible abuan ndọ oro ye ini akwa ukụt emi ekperede—kpa nsobo Akwa Babylon, ndien ekem edimen editịm n̄kpọ Satan eken mfep.—Ediyarade 18:2-5; 19:2, 7, 11-21; Matthew 24:21.
Kaban̄a mme ubon eke isọn̄, apostle Paul iwụtke ke Ephesus 3:15 nte ke otu ubon kiet kiet enyene enyịn̄ esie nnennen oto Jehovah. Utu ke oro, Paul nte an̄wan̄ade ekenyene ntatara udịm ubon oro ẹkerede enyịn̄ kiet ke ekikere. Joshua 7:16-19 ọnọ uwụtn̄kpọ. Jehovah ama odu do ndiyarade idiọkn̄kpọ Achan. Akpa, ubiomikpe ekenyene mîdịghe eketre ke esien Judah. Ekem enye ama osụhọde ke udomo okosịm ubon nditọ Zerah. Ke akpatre, ẹma ẹyararede ufọk Achan. Ẹkese, mîdịghe ẹketịn̄ ẹban̄a Achan ọkọrọ ye n̄wan ye nditọ esie, nte ẹdide ubak ufọk (m̀mê, ubon) Zabdi, eteete Achan. Ubon oro, ndien, ekedi ntatara udịm otu oro ekekerede enyịn̄ Zerah, eteete mmọ.
Ke otu nditọ Hebrew, utọ udịm ubon oro ẹma ẹnyene akamba ufọn ẹsiak ediwak mmọ ke Bible. Abasi ama onyịme editịm oro ẹketịmde mmọ ẹnịm ebe ke ndinam ndutịm, ke ebiet emi oyomde, nnọ mme adiakpa ndinam enyịn̄ ubon osụk akaiso ebe ke owo ndidọ n̄wan eyenete esie.—Genesis 38:8, 9; Deuteronomy 25:5, 6.
Nte uwụtn̄kpọ en̄wen kaban̄a utọ ikpọ m̀mê ntatara ubon oro, kere ban̄a Jesus nte eyen David. Enye nte an̄wan̄ade ikedịghe ata eyen Edidem David, ikamanake tutu ke ediwak isua ikie ẹma ẹkebe ke David ama akakpa. Edi, idiọn̄ọ oro ẹkedade ẹdiọn̄ọ Messiah ekedi nte ke enye ekenyene ndito ubon David, kpa nte mme Jew ke ofụri ofụri ẹkediọn̄ọde. (Matthew 22:42) Jesus ekedi eke udịm David ebe ke eka esie ye ete esie oro ekemende enye akama.—Matthew 1:1; Luke 2:4.
Edi didie ke mme utọ ubon oro ẹnyene enyịn̄ mmọ ẹto Jehovah? Akpanikọ edi nte ke ibat ibat idaha ẹma ẹdu—utọ nte eke Abraham ye Isaac—emi Jehovah ke ataata usụn̄ okosiode ibuotufọk enyịn̄. (Genesis 17:5, 19) Mbon oro ẹkedi san̄asan̄a. Ke ata ediwak idaha, Jehovah isioho ubon kiet kiet enyịn̄ oro nditọ esie ẹkerede.
Nte ededi, Jehovah ọkọtọn̄ọ ekpụk ubonowo ke ini enye ọkọdọhọde Adam ye Eve ete “ẹtọt, ẹnyụn̄ ẹwak, ẹnyụn̄ ẹyọhọ ke isọn̄.” (Genesis 1:28) Ndien Jehovah ama onyịme ete mme anana mfọnmma Adam ye Eve ẹnyene nditọ, ntem esịnde itiat idakisọn̄ ọnọ kpukpru ubon eke owo. (Genesis 5:3) Mmọdo ke usụn̄ifiọk en̄wen, ẹkeme ndikot Abasi Anditọn̄ọ enyịn̄ ubon.
Ediwak ntatenyịn mfịn ikwe aba ufọn edinịm enyịn̄ ubon esie osịm ediwak emana. Edi, ke kpukpru idụt mme Christian ẹnọ Jehovah ekọm kaban̄a ndutịm ubon ẹnyụn̄ ẹnọ enye ukpono ke ndinam utom ọkpọsọn̄ ndinam ekpụk ubon mmọ kiet kiet okụt unen.