N̄kọri Ke Ifiọk Ibet

KE April 1995, ẹma ẹnyene akwa edikan ke esop. Emi ọkọtọn̄ọ ke January 28, 1992, ke ini ẹkedade Luz Nereida Acevedo Quiles, emi ekedide isua 24 ke emana, ẹka Ufọkibọk El Buen Pastor ke Puerto Rico man ẹkesiak idem. Ke ẹma ẹkenịm enye ke bed, enye ama etetịn̄ ke inua onyụn̄ ewewet ete ke nte kiet ke otu Mme Ntiense Jehovah, imọ idinyịmeke edikịm iyịp nsịn ke idem. (Utom 15:28, 29) Mme anamutom ufọkibọk, esịnede dọkta emi ọkọnọde enye usọbọ, ẹma ẹtịm ẹfiọk mme udọn̄ esie.

Usen iba ke ẹma ẹkesiak enye idem, iyịp ama ọwọrọ Luz ke idem ebe nde ndien enye ama enyene ọkpọsọn̄ udọn̄ọ unana iyịp ke ntak uwọrọiyịp. Dr. José Rodríguez Rodríguez, abia ibọkusọbọ emi ọkọnọde enye usọbọ, okonịm ke akpanikọ ete ke n̄kukụre usụn̄ emi edin̄wamde enye ekedi edikịm iyịp nsịn ke idem. Ke ntre, ye unana n̄wan emi ndinyene ifiọk mban̄a m̀mê ndinọ unyịme, dọkta oro ama ọbọ ewụhọ oto esop man okịm iyịp esịn Luz ke idem.

Okposụkedi Luz ọkọdiọn̄ọde idem mfọn mfọn onyụn̄ ekemede nditịn̄ ikọ mban̄a idemesie, Dr. Rodríguez Rodríguez ama ọsọn̄ọ ọdọhọ ete ke ntak emi okoyomde ẹnam n̄kpọ usọp usọp ẹban̄a udọn̄ọ oro, ifet ikodụhe ndibọ unyịme nto owo ndomokiet. Eduardo Pérez Soto, ekpeikpe n̄kann̄kụk oro, ama esịn ubọk ke babru oro, ndien Odot Ukpono Ángel Luis Rodríguez Ramos, ebiereikpe n̄kann̄kụk oro, ama ọnọ ewụhọ otode esop ndikịm iyịp nsịn enye ke idem.

Ntem, ke January 31, 1992, ẹma ẹda Luz ẹka ubet usiakidem, ebiet emi ẹkekịmde iyịp ẹsịn enye ke idem. Nte ẹkesụk ẹsịnde enye iyịp, enye ama okop ndusụk mme anamutom ufọkibọk nte ẹsakde imam. Mbon eken ẹtọk enye, ẹdọhọde ẹte ke se ẹkenamde ekedi ke ufọn esie. Enye ama an̄wana ke ofụri ukeme esie—kpukpru ekedi ikpîkpu. Etisịm utịt usen oro, Luz ama ọbọ ekpeme iyịp inan̄.

N̄kpọntịbe Luz ikedịghe akpa m̀mê akpatre ke se iban̄ade edikịm iyịp nsịn ke idem ye Mme Ntiense Jehovah ke Puerto Rico. Mbemiso se ikotịbede inọ enye oro, ẹma ẹnọ ke nsụhọde n̄kaha ewụhọ 15 ẹtode esop ndinọ edikịm iyịp nsịn ke idem nte atuahade ye udọn̄ Mme Ntiense Jehovah ẹmi ẹdide ikpọ owo, ndien ẹmenọ ekese toto do. Ke ọdiọkde akan, ke idaha kiet ẹma ẹnam ewụhọ esop, ndien ẹma ẹnyịk owo udọn̄ọ kiet ẹkịm iyịp ẹsịn enye ke idem ke adan̄aemi enye mîkọdiọn̄ọke idem.

Nte ededi, en̄wan Luz iketreke ke ubet usiakidem. Ke October 1993 ẹma ẹkot Idụt Puerto Rico ikpe. N̄kponn̄kan Esopikpe ekekpe ikpe oro, ndien ke April 18, 1995, ẹma ẹnọ ubiereikpe oro okotịmde ọfọn ye n̄wan emi. Esop oro ọkọdọhọ nte ke ewụhọ ndikịm iyịp nsịn owo ke idem “ikekemke ye ibet ama onyụn̄ ọbọ owo emi okotde ikpe mi unen esie ndinyene ifụre ndinam ido ukpono, ifụre ndibiere n̄kpọ nnọ idemesie ye edinam ubiere nnọ idemesie ye unana editiene usụn̄ edinam ibet nte odotde.”

Ubiere emi ekedi akpan n̄kpọ, koro emi ekedi akpa ini emi esop ke Puerto Rico ọkọnọde Mme Ntiense Jehovah utebeikpe ke ikpe aban̄ade edikịm iyịp nsịn ke idem. Ẹma ẹnam n̄kpọ ke enyene-ndịk usụn̄ ẹban̄a ubiereikpe emi. Ẹma ẹdụk mbono mme asuan mbụk n̄kpọntịbe, ye mme ọwọrọiso ọkọmbụk ke n̄wedmbụk n̄kpọntịbe, radio, ye television ẹdude do.

Ke okoneyo oro edinam radio ama ọtọt ndụn̄ọde emi ẹkenamde ye kiet ke otu mme ekpeikpe Luz. Ẹma ẹdọhọ mme andikokop ẹnọ ikot ke urụk ukopikọ ẹnyụn̄ ẹbụp mme mbụme. Ediwak dọkta ye mme lọya ẹma ẹkot ẹnyụn̄ ẹtịn̄ nti ikọ ẹban̄a ikpe oro. Owo kiet emi ọkọnọde ikot ọkọdọhọ ete: “Ifiọk ntaifiọk ikemeke ndinọ nsọn̄ọ nte ke edikịm iyịp nsịn ke idem ekeme ndinyan̄a uwem, ndien owo ndikere n̄kpọ ke utọ usụn̄ emi edi abian̄a.” Enye ama ọdọhọ n̄ko ete: “Ibịghike, edikịm iyịp nsịn ke idem eyedụk mbụk nte kiet ke otu n̄kponn̄kan edikpu ye ndudue eke ibọkusọbọ eyomfịn.”

Ke ukperedem prọfesọ kiet ke ibet emi ẹtịmde ẹkpono ama okot ọfis n̄kọk itieutom Watch Tower Society ke urụk ukopikọ onyụn̄ etịn̄ ntotụn̄ọ uyụhọ oro enye okopde aban̄a se enye okokotde “akwa edikan.” Enye ama adian do ete ke ubiereikpe esop oro ikọsọn̄ọke iwụt unen oro ekemde ye ibet oro Mme Ntiense Jehovah ikpọn̄ ẹnyenede, edi eke kpukpru nditọisọn̄ ke Puerto Rico.