Sese! Ufọkmbono Obio Ubọn̄ Odu ke Niue
NIUE edi ekpri isuo emi ebietde eme ke Edem Usụk Pacific, emi odude kilomita 2,160 ke n̄kan̄ ufọt edem edere ye edem usiahautịn New Zealand. Nte ekemde ye ediye uduot ekpri n̄wed isan̄, ẹda enyịn̄ oro Niue ẹto ikọ iba, Niu, emi ọwọrọde “isịp mbakara,” ye e, emi ọwọrọde “se,” m̀mê “sese.” Ediye uduot ekpri n̄wed oro ọdọhọ ete: “Mbụk ọdọhọ ete ke akpa mbon Polynesia ẹmi ẹkedide ẹdidu do ẹketịn̄ mme ikọ oro ke ẹkedide ẹdibehe ẹnyụn̄ ẹkụt nte isịp mbakara ẹkọride ke idụt oro.”
Mfịn, Mme Ntiense Jehovah ke Niue ẹkop inemesịt ndidọhọ isenowo ete, “E! Fale he Kautu ha mautolu!” emi ọwọrọde, “Sese! Ufọkmbono Obio Ubọn̄ Nnyịn!” Ntak emi mmọ ẹnyenede ọkpọsọn̄ ntụk ntre ẹban̄a ufọkmbono emi? Mme Ntiense Jehovah ke kpukpru ebiet ẹsikop inemesịt ẹban̄a mme Ufọkmbono Obio Ubọn̄ mmọ, akpan akpan edieke edide mmọ ẹkebọp. Edi ndibọp Ufọkmbono Obio Ubọn̄ ke isuo oro odude nsannsan ke ufọt ufọt akwa ikpehe Edem Usụk Pacific enen̄ede edi n̄kpọ en̄wen. Kamse, Niue edi kilomita 260 kpọt ke ubom, ndien n̄kpasịp owo 2,300 ẹdu ke ofụri isuo oro.
Eyịghe ama odu aban̄a m̀mê mmanie ẹdibọp Ufọkmbono Obio Ubọn̄ oro. N̄kukụre esop kiet emi odude ke Niue enyene Ntiense 32 kpọt. Ukara ekenyene kpukpru ikpọ ukwakutom oro ẹkeyomde, utọ nte moto mbiomo, moto udiọn̄isọn̄, ye ukwak umenede mbiomo. N̄ko-n̄ko, ekpere ndidi ẹkenyene ndinọ kpukpru akpan n̄kpọ ubọpufọk—ukwak, itiat, tian, mme n̄kpọutom ikan̄ ilektrik ye eke usịn mmọn̄ esan̄ ukwak, ukwak ikwọ, ye mme n̄kpọitie—ẹto New Zealand ẹdi ke ndutịm n̄kpọisan̄ emi esinamde utom inikiet ke urua ition. Ke akpatre, isọn̄ isuo oro emi etiede itiat itiat eyenam edi ọkpọsọn̄ n̄kpọ ndibọp n̄kpọ, ndien ẹnyene ndibọp ufọkmbono oro edikemede ndisọn̄ọ nda ke oyobio ofụmede. Ke akpanikọ, emi ekedi ata ọkpọsọn̄ utom ọnọ owo ekededi!
Nte ededi, akamba ukpụhọde ama odu mi. Ye Mme Ntiense Jehovah, Ufọkmbono Obio Ubọn̄ edi iwụk ebiet utuakibuot ke n̄kann̄kụk, ndien mmọ ẹsise Jehovah Abasi kaban̄a ndausụn̄ ye un̄wam. (Psalm 56:11; 127:1) Nditọete Christian ke New Zealand, ẹsịnede mme andibuana ke esop mbon Niue ke Auckland, ẹma ẹdinọ ekpri otu Mme Ntiense emi ke Niue un̄wam, ẹnọde un̄wam ofụri esịt ke utom ubọpufọk oro.
Ubiere Ndikaiso
Ke June 1994 ke itie ubọp Ufọkmbono Obio Ubọn̄ ke Rotorua, New Zealand, ẹma ẹnọ ikot ẹyom mbon ẹmi ẹnyenede udọn̄ nditiene mbuana ke utom oro ke Niue. Ke n̄kpaidem, nditọete iren ye iban Christian 200 ẹma ẹnọ idem unyịme unyịme. Ẹma ẹsio owo 80 ke otu ẹmi, ẹsịnede mme anamusọ eto, mme anamusọ ukwak, mme esịn mmọn̄ esan̄ ukwak, mme ọkọn̄ a-tian, mme ọyọn̄ọ ibibene ke semen, mme eyet a-benti, mme anamutom usịn ikan̄ ilektrik, mme ọdiọn̄ ukwak ikwọ, mme anamutom ubuakitiat, mme ọkọkufọk, ye mbonutom.
Nditọete ẹma ẹnam ndutịm ẹnyụn̄ ẹtọn̄ọ utom, ẹbuọtde idem ke Jehovah. Kiet ke otu mbiowo iba ẹdude ke Niue, anam mbubehe n̄kann̄kụk, ama ọtọn̄ọ ndinam ndutịm kaban̄a edinọ kpukpru mme n̄kpọ oro ẹyomde ẹdi. Ẹma ẹdiomi ẹban̄a ekọmurua ubomofụm ye eke ufọkidụn̄ ẹnọ mme anamutom ẹtode isenidụt, ẹmi ẹkenyịmede ndikpe okụk ke idemmọ, ẹnyụn̄ ẹnịm usen emi ẹditọn̄ọde utom ubọpufọk. Ẹkenyene ndikụre utom emi ke usen 20, ọtọn̄ọde ke March 4 osịm March 23, 1995, emi ẹdiyakde Ufọkmbono Obio Ubọn̄ oro ẹnọ.
Esenyịn utom emi okotode New Zealand, emi ekedide urua kiet mbemiso man editịm mme n̄kpọ obon ọkọdọhọ ete: “Idem ama enyek mi etieti ke ini n̄kokụtde itieutom oro. Isọn̄ etie itiat itiat. Ẹyeda urua iba ndisiak isọn̄ usịn itiat idakisọn̄ kpọt.” Edi enye ikekereke ke Mme Ntiense n̄kann̄kụk ẹyenam n̄kpọ ndomokiet, ntre ke enye ọkọdọhọ ke akpatre. Enye ọkọdọhọ ete: “Nditọete Niue ẹmehe ye nte mme itiat ẹbohode. Mmọ ẹfiọk ebiet emi ẹkemede ndibom itiat man enye asiaha mbai mbai.” Ẹkekụre ẹdisịn itiat idakisọn̄ ke usen iba!
Akpa ubomofụm emi ekemende Mme Ntiense New Zealand ama edibehe ke March 4, ndien ẹma ẹkụre utom usịn itiat. Ẹma ẹsinam nsio nsio iso utom ẹkụre nte otu mbonutom ẹkedide ẹdibehe ke adiana ke adiana. Mme usen utom ẹkesitọn̄ọ ke n̄kanika itiaba usenubọk ye ibio ibio edineme itien̄wed Bible eke usen ke usen. Ndusụk nditọete ẹkesinam utom hour 12 ke usen ke idaha eyo okofiopde ke Celsius 36. Ke akpatre, ke March 23, ẹma ẹdiọn̄ isọn̄ oro. Ediye idiọn̄ọ oro ẹkedade eto mango ẹnam ama anam ẹdiọn̄ọ ufọk oro nte “Ufọkmbono Obio Ubọn̄ eke Mme Ntiense Jehovah.”
Edu Edidianakiet ye Mfọnido
Akpan n̄kpọ oro okotịpde esịn ke uforo utom emi ekedi edidianakiet eke mbon Niue. Edu emi ẹkewụtde ama otụk mbon obio n̄kann̄kụk, tutu mmọ ẹnọ udia ye okụk. Ekese owo ẹkeda edibọp ufọkmbono oro nte utom mmọ. Ikpọ owo ukara ye mme anam mbubehe ẹma ẹnam n̄kpọ ẹkan nte ẹkekerede. Ẹma ẹnam ukwakutom ẹyomde odu, ọkọrọ ye ufọkutom usọ eto. Usiakifia unọ n̄kpọ ẹwọrọ ama akam afiak anam ndutịm isan̄ nsụn̄ikan̄ man ẹkụt ẹte ke mme n̄kpọutom oro ẹyomde ẹbehe ke ata nnennen ini.
Isenowo ẹma ẹwụt esịtekọm etieti ke ọkpọsọn̄ utom ye mfọnido Mme Ntiense Niue, ẹmi ẹkebuanade mme ufọkidụn̄ ye mme inyene mmọ. “Nditọete iban ẹkedi utịbe,” ntre ke anamutom ubọpufọk kiet ọkọdọhọ. Ke adianade ye udia ke ufiop ufiop uwemeyo kpukpru usen, nditọete iban ẹma ẹsinọ udia usenubọk kpukpru usenubọk ke n̄kanika ebe itiokiet. Ndusụk owo ẹma ẹsidemede ke idap ke n̄kanika ebe inan̄ usenubọk ndinam udia. Anamutom ubọpufọk kiet ọkọdọhọ ete: “N̄kere ke nnyịn imodu uwem mi nte ọfọnde akan nte ikodude ke obio nnyịn.”
Ke March 10 Niue Star ama ọtọt aban̄a n̄kpọntịbe emi ke mbụk page iso ye ibuotikọ emi “Akpa Ufọkmbono Obio Ubọn̄ ke Niue” ye ndise mbon New Zealand ye mbon Niue nte ẹnamde utom ke itieutom oro. Enye ama obụk ete ke ufọkmbono oro edi mita 280 ke ubom ndien odụk owo 70 osịm 100. Ibuotikọ oro ama adian ete: “Ke akpanikọ ẹkeme ndinam utom oro n̄kụre ke [urua] iba, edi ke idaha enyeemi eyebe oro. Ini emi, usen iba kpọt ke utom ama ọkọtọn̄ọ, ẹma ẹbebem iso ẹsịn itiat idakisọn̄, ẹwụk mme itịm, ndori ye ọkọm.”
Anam mbubehe kiet ke n̄kann̄kụk oro ama etịn̄ uduak esie ete kpukpru owo ke Isuo Niue ẹka ẹkese utom oro ẹnyụn̄ ẹkpep n̄kpọ ẹto oro. Enye ọkọdọhọ ke imọ ikere ke emi eyewụt kpukpru owo se ẹkemede ndinam ke ima ye edidianakiet odude.
Owo 204 ẹkedi edinam ediyak nnọ oro. Ifiọkutom emi okotụkde kpukpru owo ẹmi ẹkedude do etieti ekedi san̄asan̄a edinam emi nditọete iren, iban, ye nditọwọn̄ Niue ẹkenamde ẹwụt ke ndikwọ ikwọ nnyụn̄ nnek unek kaban̄a edibọp Ufọkmbono Obio Ubọn̄ oro. Ẹma ẹkọm otu mme ọbọpufọk emi ye Jehovah, emi spirit esie okonụkde mme ekikere, mme esịt, ye mme ubọk ndinam utom emi mma.—Isaiah 40:28-31.