“Ami Mmọsọn̄ Urua ke Enyịn Jehovah!”

KE MME “ndiọk eyo” ẹmi, ediwak mme anam-akpanikọ asan̄autom Jehovah ẹsin̄wana kpukpru ini ye ekikere oro nte ke mmimọ iwọrọke n̄kpọ. (2 Timothy 3:1) Emi idịghe n̄kpọ n̄kpaidem, koro kiet ke otu “n̄kari n̄kari edinam” Satan edi ndinam nnyịn ikere ke Andibot nnyịn ikam imaha nnyịn! (Ephesus 6:11, ikọ idakisọn̄, NW) Nte odotde, nsiondi Enyọn̄-Ukpeme eke April 1, 1995, ama akama ibuotikọ iba ẹmi ẹkedọhọde “Afo Ọmọsọn̄ Urua ke Enyịn Abasi!” ye “Demede Nọ Ima ye Nti Utom—Didie?” ọnọ ukpepn̄kpọ esop. Ẹketịm mme ibuotikọ ẹmi man ẹti nnyịn nte ke Jehovah abat mme ukeme nnyịn ke ọsọn̄urua n̄kpọ. Se itienede mi edi mme ikọ esịtekọm oro ẹkebọde:

“Akanam magazine itụkke mi ntre ke ofụri isua 27 emi ndide kiet ke otu Mme Ntiense Jehovah. N̄kekemeke ndinyan̄a akan nditua eyet—mme ibuotikọ ẹmi ẹma ẹn̄wam mi. Etie mi idahaemi nte ke Jehovah enyene ima etieti ọnọ mi. Etie nte n̄kpọ eke ẹdororede mi akamba mbiomo ke afara ẹfep.”—C. H.

“Mma n̄kot magazine emi ikanan̄ ke usen kiet. Mma n̄kop inemesịt ke usụn̄ nte ibuotikọ oro ọkọdọhọde ete ẹma ẹkpep fi nsu edieke onịmde ke akpanikọ ete ke afo uwọrọke n̄kpọ ndomokiet. Mmọn̄ nda ibuotikọ emi nnam n̄kpọ ke utom ubọkerọn̄ ye ke edikwọrọ ikọ to ke enyịnusụn̄ sịm enyịnusụn̄.”—M. P.

“Satan amanam akakan utom ke ndinam idem mbon oro ẹmade Jehovah ẹkere ke mmimọ iwọrọke n̄kpọ ye nte ke owo imaha mmimọ. Kiet ke otu ata n̄kpọ nsịnudọn̄ oro n̄kokotde ekedi ndidi se otu ‘ofụn anam akpanikọ’ etide nte ke Jehovah otịm ama nnyịn onyụn̄ owụt esịtekọm ke kpukpru n̄kpri n̄kpọ oro inamde inọ enye. Mma nsinyene ekikere emi mbufo ẹtịn̄de ke mme ibuotikọ ẹmi ke ediwak isua. Akanam n̄kekereke ke mma ndot ima Jehovah, ntre mma nsidomo ndinam ata ekese ke utom esie nte usụn̄ ndibọ utọ ima oro. Edi esịt ubiomikpe ye bụt ẹkesinụk mi. Ntre inamke n̄kpọ m̀mê hour ifan̄ ke n̄kabiat ke utom ukwọrọikọ, m̀mê owo ifan̄ ke n̄kan̄wam, n̄kesikere ke oro ikemke. N̄kesikụt sụk ebiet oro mmenamke ọfọn. Idahaemi ke nnamde n̄kpọ Jehovah ke ntak ima, mmekere ke enye onyịme ndien nte ke enye okop inemesịt aban̄a mi. Emi anam ima emi nnyenede nnọ enye enen̄ede okpon onyụn̄ anam mi nyom ndinam ekese. Idahaemi mmenyene akamba idatesịt ke utom oro nnamde nnọ Jehovah.”—R. M.

“Mmọemi ke akpanikọ ẹdi mfọnn̄kan nsịnudọn̄ n̄kan, ih, mme n̄wọrọnda ibuotikọ ẹmi ẹtụkde esịt nnyịn oro akanam n̄kotde! Ami mmokot Enyọn̄-Ukpeme ke isua 55, ndien ediwak n̄wọrọnda nsiondi ẹsidu. Edi nsiondi enyeemi akan ekededi oro akananam inyenede ke ndida nsụhọde eyịghe, oyomonsia, ye ndịk nte ke nnyịn ‘iwọrọke n̄kpọ’ ye nte ke owo ‘imaha’ nnyịn ye nte ke tutu amama owo idinamke n̄kpọ ikem ‘ndibọ’ ima Jehovah. Enyọn̄-Ukpeme emi ọdọn̄ọ orụk un̄wam eke spirit oro nditọete nnyịn ẹnen̄erede ẹyom. Edi uduak mi ndikama mme ibuotikọ ẹmi ndien ndien ke ini utom ubọkerọn̄.”—F. K.

“Ye ndusụk nnyịn oro in̄wanade ye edu edisụhọde idem idaha, m̀mê idem ye ekikere edise idem ke ndek, ekeme ndidi ata ọkpọsọn̄ n̄kpọ ọnọ nnyịn ndikop odudu ndikaiso ke akpanikọ. Ibuotikọ emi ama owụt ata ntotụn̄ọ mbọm ye asian, enye eketie nte ediyet ibọk usụk ubiak, ye eke uwot unan nnennen ke esịt. Didie ke akama ndọn̄esịt ntem ndikot mme utọ ikọ emi ke Enyọn̄-Ukpeme ndinyụn̄ mfiọk ye unana eyịghe nte ke Jehovah akam enyene ifiọk aban̄a! Ẹsọsọn̄ọ ke ndinam nnyịn iti nte ke Jehovah isidomoke ndida esịt ubiomikpe, bụt, ye ndịk nsịn udọn̄ nnọ ikọt esie. Idem okposụkedi mfịna okụk ye mfịna nsọn̄idem ke ubon mi enen̄erede anam se ntịpde nsịn ke utom ukwọrọikọ ke ndondo emi osụhọde, ami nsụk nnyenyene uyụhọ ke se n̄kemede ndinam. Mmokụt nte ke mmesitịm n̄kop inemesịt n̄kan ke utom ke ini ndomode ndiyak ima edi odudu emi onụkde mi.”—D. M.

“Ami ndisụk n̄kụre ndikot ‘Afo Ọmọsọn̄ Urua ke Enyịn Abasi!’ edi emi. Kpukpru ikpehe ekikere ẹnam mmọn̄eyet asiaha mi. Ami nto ubon oro owo mîkesinen̄ekede iwụt ima. Ẹma ẹsisụhọde mi itie, ẹyat mi esịt, ẹnyụn̄ ẹsak mi. Ntre, eketie nte n̄wọrọke n̄kpọ ke ntọn̄ọ ntọn̄ọ uwem mi. Ami nsụk nyenyene ọkpọsọn̄ ekikere nto uwem mi ini edem oro esinọmọde mi ke ini nsobode afanikọn̄. Ke ini n̄ketrede ndinam utom nte ebiowo esop, nte ido edide eketie nte mma n̄kpu—Abasi, ubon mi, ye nditọete mi ke esop. Ekikere ẹmi ikụreke ke okoneyo kiet, edi ekemini ibuotikọ emi an̄wam mi ndifiak nda ukem ukem ke ndusụk udomo. Enye amanam idaha ekikere mi ayama.”—D. L.

“Ẹsọsọn̄ọ ke ibuotikọ oro ‘Afo Ọmọsọn̄ Urua ke Enyịn Abasi!’ Ami mmesin̄wana ye ọkpọsọn̄ edu edisua idemmi ye ntotụn̄ọ ekikere oro nte ke n̄wọrọke n̄kpọ, ẹmi ẹkenyenede ntọn̄ọ mmọ ẹto edisabade eke ini uyen. Ke akpanikọ odot ndise utọ ukwan̄ ekikere emi nte n̄kari n̄kari edinam Satan ke idemesie. Enye akam ekeme ndiwot udọn̄ oro owo enyenede ndidu uwem. Ke akpanikọ ana nnam n̄kpọ kpukpru usen ndibiọn̄ọ nsu oro nte ke owo imaha mi. Ibuotikọ emi enyene ekese se ọwọrọde ọnọ mi akan nte mbufo ẹkemede ndifiọk.”—C. F.

“Mfịn nditọete ẹsinam n̄kpọ akpan akpan ẹban̄a ekikere oro nte ke Jehovah esidara mme edinam oro ima onụkde utu ke enyeoro otode edinyenyịk m̀mê edifefịk. Edikere mban̄a ufiop ufiop ye ima ima edu Jehovah, udọn̄ esie ke idem ikọt esie nte owo kiet kiet, ye ima ima usụn̄ oro enye anamde n̄kpọ ọnọ ifụre onyụn̄ akama nsịnudọn̄. Ke ikerede iban̄a emi, ndondo oro nnyịn ikọbọde ibuotikọ oro ‘Afo Ọmọsọn̄ Urua ke Enyịn Abasi!’ ediwak owo ẹma ẹwụt esịtekọm. Etie nte emi eberede usụn̄ ọnọ ediwak owo ndikọri ata ọkpọkpọ itie ebuana ye Jehovah. Ami ye n̄wan mi imama ndiwụt esịtekọm kaban̄a usụn̄ ye mbufiọk oro ẹwụtde ke mme magazine Enyọn̄-Ukpeme eke ndondo emi. Nnyịn ke inam n̄kpọ ndida ekese ke otu mme akpan n̄kpọ ẹmi nsịn ke edinam nte nnyịn ikade ndikese mme esop.”—Oto esenyịn emi asan̄ade-san̄a.

“Ami ndi andikot emi okotde kpukpru ini ke se ikperede ndisịm isua 30, edi akananam n̄kotke n̄kpọ ekededi oro akamade nsịnudọn̄ ntre onyụn̄ edemerede owo udọn̄ ntre. Mme okopodudu itien̄wed ẹmi ẹbuande ke usọ usọ usụn̄ ẹmen̄wam mi ndisio abian̄a emi okodịbede ke ekikere mi mfep, anamde mi nsan̄a n̄kpere Jehovah. Mmanam n̄kpọ Jehovah ye esịt ubiomikpe ke ediwak isua. Ami n̄kukụre n̄kenyene enyọn̄ enyọn̄ ifiọk aban̄ade ufak ye ima Abasi. Ẹsọsọn̄ọ ke mme utọ ibuotikọ oro ẹwụtde ikike ye editịm n̄kere do. Mmodori enyịn ndikot ediwak efen efen oro ẹtiede nte mmọ.”—M. S.

“Ke ofụri isua 29 mi emi ndude ke akpanikọ, n̄kemeke nditi ini emi ibuotikọ anamde mi nnyene esịtekọm ye ntotụn̄ọ ntụk ntre. Okposụkedi ẹkebọkde mi ye akwa ima ye ke ubon oro owụtde edikere mban̄a, akananam n̄kereke ke mmodot ndidu uwem, ntịn̄ke-tịn̄ edidot ndinam n̄kpọ Jehovah. Ke mma n̄kokot ibuotikọ emi, mma ntọn̄ọ edọn̄, n̄kọm Jehovah ke mma n̄kokot ibifịk ọkpọsọn̄ nduọk. Nyema ibuotikọ emi ke nsinsi. Nyese idemmi ke isio isio usụn̄ sia mfiọkde idahaemi nte ke ami mmọsọn̄ urua ke enyịn Jehovah.”—D. B.