Ima Akakan Idiọk Ufụp

“Ima ifụbeke ufụp.”—1 CORINTH 13:4.

1, 2. (a) Nso ke Jesus eketịn̄ ọnọ mme mbet esie aban̄a ima? (b) Nte ẹkeme ndima ima nnyụn̄ mfụbe ufụp, ndien ntak emi afo ọbọrọde ntre?

IMA edi se ẹdade ẹdiọn̄ọ ata Ido Ukpono Christ. Jesus Christ ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Apostle Paul ke odudu spirit ama anam an̄wan̄a nte ima ekpenyenede nditụk itie ebuana Christian. Ke adianade ye mme n̄kpọ eken, enye ama ewet ete: “Ima ifụbeke ufụp.”—1 Corinth 13:4.

² Ke ini Paul ekewetde mme ikọ oro, enye eketịn̄ aban̄a idiọk ufụp. Mîkpedịghe ntre enye ikpeketịn̄ke inọ ukem esop oro ite: “Mmenyene ufụp Abasi mban̄a mbufo.” (2 Corinth 11:2) Ẹma ẹdemerede “ufụp Abasi” esie ke ntak iren ẹmi ẹkedide idiọk odudu ke esop. Emi ama onụk Paul ndiwet mme Christian ke Corinth ọyọhọ n̄wed iba eke odudu spirit emi ọdọn̄ọde ekese ima ima item.—2 Corinth 11:3-5.

Ufụp ke Otu Mme Christian

3. Didie ke mfịna aban̄ade ufụp ekedemerede ke otu mme Christian ke Corinth?

³ Ke akpa n̄wed emi enye ekewetde ọnọ mbon Corinth, Paul ekenyene ndineme mban̄a mfịna emi akakpande mbufa Christian ẹmi ndikaiso ye kiet eken. Mmọ ẹkemenede ndusụk owo ke enyọn̄, “ẹkohode idem, ẹda ye andikpep kiet, ẹn̄wana ye andikpep eken.” Emi ama anam ubahade odu ke esịt esop, ye nsio nsio owo ẹdọhọde ẹte: “Ami nda ke n̄kan̄ Paul, m̀mê, Ami nda ke n̄kan̄ Apollos, m̀mê, Ami nda ke n̄kan̄ Cephas.” (1 Corinth 1:12; 4:6) Ke idak ndausụn̄ edisana spirit, apostle Paul ama ekeme ndisịm orụn̄ mfịna oro. Mbon Corinth ẹkenam n̄kpọ nte mbon obụkidem, idịghe nte “mbon spirit.” Ntem, Paul ama ewet ete: “Mbufo ẹsụk ẹdidi mbon obụkidem; koro adan̄a ini nte ufụp ye utọk ẹdude ke otu mbufo, nte mbufo idịghe mbon obụkidem, inyụn̄ isan̄ake nte mme owo ẹsan̄ade?”—1 Corinth 3:1-3.

4. Nso uwụtn̄kpọ ke Paul akada ndin̄wam nditọete esie ndisịm nnennen ekikere mban̄a kiet eken, ndien nso ukpepn̄kpọ ke nnyịn ikeme ndikpep nto emi?

⁴ Paul ama an̄wam mbon Corinth ndifiọk nnennen ekikere kaban̄a enọ ye mme ukeme oro nsio nsio owo ke esop ẹnyenede. Enye ama obụp ete: “Anie anam fi okpụhọde ye owo en̄wen? Nso n̄kpọ ke onyụn̄ enyene eke mûkọbọhọ-bọ? Ndien edieke ọkọbọde-bọ, nsinam obụrede mbụre nte n̄kpọ eke mûkọbọhọ-bọ?” (1 Corinth 4:7) Ke 1 Corinth ibuot 12, Paul ama anam an̄wan̄a ete ke mbon oro ẹkedide ubak esop ẹketie nte nsio nsio ndido ke idemowo, utọ nte ubọk, enyịn, ye utọn̄. Enye ama osio owụt ete ke Abasi akanam mme ndido idem ke usụn̄ oro mmọ ẹsede ẹban̄a kiet eken. Paul n̄ko ama ewet ete: “Edieke ẹnyụn̄ ẹnọde ndido kiet ubọn̄, kpukpru ndido eken ẹtiene enye ẹdara.” (1 Corinth 12:26) Kpukpru mme asan̄autom Abasi mfịn ẹkpenyene ndida edumbet emi nsịn ke edinam ke itie ebuana mmọ ye kiet eken. Utu ke ndifụbe owo en̄wen ufụp ke ntak se ẹnọde enye anam m̀mê ke unen oro enye okụtde ke utom Abasi, nnyịn ikpenyene ndidara ye owo oro.

5. Nso ke ẹyarade ke James 4:5, ndien didie ke N̄wed Abasi owụt akpanikọ oro odude ke mme ikọ ẹmi?

⁵ Nte ẹnyịmede, emi emem nditetịn̄ akan ndinanam. James andiwet Bible eti nnyịn ete ke “ntụhọ edisịn enyịn” odu kpukpru owo ẹdide mme anamidiọk ke idem. (James 4:5, NW) Akpa n̄kpa emi owo akakpade akada itie koro Cain ama ayak idem ọnọ idiọk ufụp esie. Mbon Philistine ẹkekọbọ Isaac koro mmọ ẹkesịnde enyịn ke n̄kaiso uforo esie. Rachel ama ofụbe eyeneka esie ufụp ndikụt enye okụtde unen ke uman nditọ. Nditọ Jacob ẹma ẹfụbe ufụp ke ntak ima Jacob ekenyenede ọnọ Joseph ekpri eyeneka mmọ. Miriam nte an̄wan̄ade okofụbe ufụp aban̄a n̄wan eyeneka esie emi mîkedịghe eyen Israel. Korah, Dathan, ye Abiram ke isịnenyịn ẹma ẹdụk odu ẹban̄a Moses ye Aaron. Edidem Saul ama ofụbe ufụp aban̄a mme unen oro David okokụtde ke ekọn̄. Eyịghe idụhe nte ke ufụp n̄ko ekedi n̄kpọ emi akanamde mme mbet Jesus ẹneni eneni ndien ndien ẹban̄a enyeemi edide n̄kponn̄kan ke otu mmọ. Akpanikọ edi nte ke idụhe anana mfọnmma owo emi ọbọhọde “ntụhọ edisịn enyịn” ofụri ofụri.—Genesis 4:4-8; 26:14; 30:1; 37:11; Numbers 12:1, 2; 16:1-3; Psalm 106:16; 1 Samuel 18:7-9; Matthew 20:21, 24; Mark 9:33, 34; Luke 22:24.

Ke Esop

6. Didie ke mbiowo ẹkeme ndikara ntụhọ edisịn enyịn?

⁶ Kpukpru Christian ẹnyene ndikpeme mbiọn̄ọ isịnenyịn ye idiọk ufụp. Emi esịne mme otu mbiowo ẹmi ẹmekde ndise mban̄a mme esop ikọt Abasi. Edieke ebiowo enyenede nsụhọde-esịt, enye idiyomke ọkpọsọn̄ ọkpọsọn̄ ndidomo ndinam nte imọ ikpọn̄ idu. Ke n̄kan̄ eken, edieke ebiowo ekededi enyenede n̄wọrọnda ukeme nte anam ndutịm m̀mê nte ọnọ utịn̄ikọ an̄wa, mmọ eken ẹyedara ẹban̄a emi, ẹsede emi nte edide edidiọn̄ ọnọ esop. (Rome 12:15, 16) Eyenete ekeme ndinam eti n̄kọri, ọnọde uyarade nte ke imosion̄o mbun̄wụm spirit Abasi ke uwem imọ. Ke ndikere mban̄a se inamde enye odot, mbiowo ẹkpenyene ndikpeme mbak ẹdinam ndusụk n̄kpri ndudue ẹkponi man ẹwụt nte ke enen nditre ndimek enye nte asan̄autom unamutom m̀mê ebiowo. Oro okpowụt unana ima ye eti ibuot.

7. Nso mfịna ekeme ndidemerede ke ini ẹnọde Christian ndusụk utom ukara Abasi ndinam?

⁷ Edieke owo ọbọde utom ukara Abasi ndinam m̀mê edidiọn̄ eke spirit, mmọ eken ke esop ẹnyene ndikpeme mbiọn̄ọ isịnenyịn. Ke uwụtn̄kpọ, ẹkeme ndisida eyenete an̄wan kiet emi enyenede ukeme ediwak ini nnam mme nnamn̄wụt ke mbonoesop Christian ẹkan nte ẹdade owo en̄wen. Emi ekeme ndinam ndusụk nditọete iban ẹfụbe ufụp. Eyedi ukem mfịna oro ama odu ke ufọt Euodia ye Syntyche ke esop Philippi. Utọ iban oro ke eyomfịn ẹkeme ndiyom ima ima nsịnudọn̄ ẹto mbiowo man ẹsụhọde idem ẹnyụn̄ “ẹnyene esịt kiet ke Ọbọn̄.”—Philippi 2:2, 3; 4:2, 3.

8. Ufụp ekeme ndida n̄kosụn̄ọ ke mme edinam idiọkn̄kpọ ewe?

⁸ Christian ekeme ndifiọk mban̄a akani ndudue owo emi enyenede mme ifetutom idahaemi ke esop. (James 3:2) Ke ntak ufụp, ekeme ndinyene ntụhọ editịn̄ emi nnọ mbon en̄wen nnyụn̄ mfan̄a mban̄a utom ẹnọde owo oro anam ke esop. Emi ikpekemke ye ima, emi “ofụkde ekese idiọkn̄kpọ.” (1 Peter 4:8) Ikọ ufụp ekeme ndibiat emem esop. Mbet oro James ama odụri owo utọn̄ ete: “Edieke mbufo ẹnyenede ndotndot ufụp ye ndomoidem ke esịt mbufo, ẹkûda oro ẹbụre mbụre ẹsu nsu ẹdian akpanikọ. Emi idịghe eti ibuot eke otode ke enyọn̄, edi oto isọn̄, oto obụkidem, oto mme demon.”—James 3:14, 15.

Ke Ubon Mbufo

9. Didie ke mme nsan̄andọ ẹkeme ndikara mme ntụk ufụp?

⁹ Ediwak ndọ ẹkpu ke ntak idiọk ufụp. Ndiwụt unana mbuọtidem ke idem nsan̄andọ iwụtke ima. (1 Corinth 13:7) Ke n̄kan̄ eken, nsan̄andọ kiet ekeme nditre ndiyak ntụk ufụp owo enye eken afịna enye. Ke uwụtn̄kpọ, n̄wan ekeme ndifụbe ufụp ke ntak ntịn̄enyịn emi ebe esie ọnọde owo isio uduot en̄wen. Mîdịghe ebe ekeme ndifụbe ufụp ke ntak udomo ini oro n̄wan esie abiatde ke ndise mban̄a iman oro odude ke unana. Edide se mme utọ ntụk oro afịnade, mme nsan̄andọ ẹkeme ndidop uyo ẹnyụn̄ ẹwụt edikpu oro mmọ ẹnyenede ke usụn̄ oro anamde mfịna oro ọdiọk akan. Utu ke oro, oyom nsan̄andọ emi ofụbede ufụp enyene nneme onyụn̄ etịn̄ nte etiede enye ke idem nnennen. Ekem, nsan̄andọ enye eken enyene ndiwụt mbufiọk nnyụn̄ nsọn̄ọ ima oro enyenede ọnọ enye. (Ephesus 5:28, 29) Ekeme ndiyom mmọ mbiba ẹnam mme ekikere ufụp ẹsụhọde ubọk ebe ke ndifep mme idaha oro ẹdemerede enye. Ndusụk ini ekeme ndiyom esenyịn Christian an̄wam n̄wan esie ọfiọk ete ke imọ inọ mbon isio uduot ekpri ntịn̄enyịn emi odotde man iyọhọ mbiomo imọ nte andikpeme otuerọn̄ Abasi. (Isaiah 32:2) Nte ededi, ebiowo ekpenyene ndikpeme mbak enye edinam eti ntak odu ọnọ ufụp. Emi oyom edida ukem ukem, okụtde ete ke imọ imada ini ndisọn̄ọ itie ebuana ndọ imọ.—1 Timothy 3:5; 5:1, 2.

10. Didie ke mme ete ye eka ẹkeme ndin̄wam nditọ mmọ ẹyọ mme ntụk ufụp?

¹⁰ Ana mme ete ye eka n̄ko ẹn̄wam nditọ mmọ ẹfiọk se idide idiọk ufụp. Nditọwọn̄ ẹsiwak ndibuana ke utọk emi amande en̄wan. Ekese ini akpan ntak esidi ufụp. Koro se eyen kiet kiet oyomde edi san̄asan̄a, owo ikemeke ndinam n̄kpọ ye nditọwọn̄ ke ukem usụn̄. Akan oro, oyom nditọwọn̄ ẹfiọk ẹte ke mmọ owo kiet kiet ẹnyene nsio nsio ukeme ye mmeme. Edieke ẹsisịnde udọn̄ kpukpru ini ẹnọ eyen kiet ndinam n̄kpọ ukem nte enye eken, emi ekeme ndidemede isịnenyịn ke idemowo kiet ye ntan̄idem ke enye eken. Ntem, mme ete ye eka ẹkpenyene nditeme nditọ mmọ ndidomo n̄kọri mmọ ebe ke ndikere mban̄a mme uwụtn̄kpọ Ikọ Abasi, idịghe ke ndidomo idem ye kiet eken. Bible ọdọhọ ete: “Nnyịn ikûtan̄ idem, ikûyat kiet eken esịt [“ikûdomo idem ye kiet eken,” NW], ikûnyụn̄ ifụbe ufụp ye kiet eken.” Utu ke oro, “yak owo kiet kiet odomo utom esie ọfiọk, ekem enye eyenyene se enye obụrede aban̄a ke idemesie ikpọn̄, idibụreke ke idemowo en̄wen.” (Galatia 5:26; 6:4) Ke edide akpan n̄kpọ akan, oyom mme ete ye eka ẹdide Christian ẹn̄wam nditọ mmọ ebe ke ukpepn̄kpọ Bible ofụri ini, ẹsiode nti ye ndiọi uwụtn̄kpọ ẹdude ke Ikọ Abasi ẹwụt.—2 Timothy 3:15.

Uwụtn̄kpọ Mme Owo Ẹmi Ẹkekande Ufụp

11. Didie ke Moses ekedi eti uwụtn̄kpọ ke ndise mban̄a ufụp?

¹¹ Ke mîbietke mme oyom odudu adaiso ererimbot emi, “Moses . . . [ekedi] ata sụn̄sụn̄ owo, akan kpukpru owo ẹmi ẹdude ke iso ererimbot.” (Numbers 12:3) Ke ini edinọ nditọ Israel ndausụn̄ okodobide akan se Moses anamde ikpọn̄, Jehovah ama anam spirit Esie odụk nditọ Israel 70 en̄wen ke idem, ọnọde mmọ odudu ndin̄wam Moses. Ke ini owo iba ke otu emi ẹketọn̄ọde ndinam n̄kpọ nte mme prọfet, Joshua ama ekere ke emi nte mîdotke ama ọwọn̄ọde ọkpọn̄ ndausụn̄ oro Moses ọkọnọde. Joshua ama oyom ndikpan iren ẹmi, edi Moses ama ọdọhọ ete: “Nte afo ofụbe ufụp ọnọ mi? Ofụri ikọt Jehovah ẹkpekam ẹkabade ẹdi prọphet: Jehovah akpakam ọnọ mmọ spirit esie!” (Numbers 11:29) Ih, Moses ama okop inemesịt ke ini mbon en̄wen ẹkenyenede mme ifetutom. Enye ikofụbeke ufụp iyom ubọn̄ inọ idemesie.

12. Nso ikan̄wam Jonathan ndifep mme ntụk ufụp?

¹² Jonathan, eyen Edidem Saul eke Israel, ama ọnọ eti uwụtn̄kpọ ke nte ima ekemede ndikan idiọk ekikere ufụp emi ekemede ndidu. Jonathan ekedi owo en̄wen nditie ke ebekpo ete esie, edi Jehovah ama emek David, eyen Jesse, ndidi edidem. Ekese owo emi ẹdude ke idaha Jonathan ẹkpekefụbe David ufụp, ẹsede enye nte owo ndomoidem. Nte ededi, ima oro Jonathan akamade David ikayakke utọ ekikere oro edede akara enye. Ke okopde aban̄a n̄kpa Jonathan, David ama ọdọhọ ete: “Esịt ayat mi aban̄a fi, eyenete mi Jonathan; afo ama enem mi etieti: ima oro afo akamade mi edi utịbe, akan ima iban.”—2 Samuel 1:26.

Mme Ata N̄wọrọnda Uwụtn̄kpọ

13. Anie edi mfọnn̄kan uwụtn̄kpọ ke n̄kpọ aban̄ade ufụp, ndien ntak?

¹³ Jehovah Abasi edi ata n̄wọrọnda uwụtn̄kpọ owo emi enyenede odudu ndikara idem eti ufụp. Enye akara mme utọ ekikere ẹmi ke mfọnmma usụn̄. Okopodudu uyarade ufụp Abasi ekededi kpukpru ini esidi ke n̄kemuyo ye ima, unenikpe, ye ọniọn̄ Abasi.—Isaiah 42:13, 14.

14. Nso uwụtn̄kpọ ke Jesus okonịm emi edide isio ye eke Satan?

¹⁴ Ọyọhọ n̄wọrọnda uwụtn̄kpọ iba eke owo emi owụtde edikan ke mme ekikere ufụp edi edima Eyen Abasi, Jesus Christ. “Okposụkedi nte Enye ekedide mbiet Abasi,” Jesus “ikabatke ndida n̄kan̄ka ye Abasi ke n̄kpọ eke okpomụmde akama.” (Philippi 2:6) Nso ata ukpụhọde ke emi edi ntem ye usụn̄ emi enyene idiọk udọn̄ angel emi akakabade edi Satan kpa Devil eketienede! Ukem nte “edidem Babylon,” Satan ke ufụp ama oyom ‘ndinịm idem nte Ata Edikon̄’ ebe ke ndinịm idemesie nte abasi emi odomode ndibiọn̄ọ Jehovah. (Isaiah 14:4, 14; 2 Corinth 4:4) Satan ama akam odomo ndinam Jesus “[ọduọ] ke isọn̄ atuak ibuot” ọnọ enye. (Matthew 4:9) Edi idụhe n̄kpọ ndomokiet emi ekekemede ndiwọn̄ọde Jesus n̄kpọn̄ sụn̄sụn̄ usụn̄uwem nsụkibuot esie nnọ itie edikara Jehovah. Ke edide isio ye Satan, Jesus “akan̄wan̄a Idemesie, ada mbiet ofụn, owụt idem nte owo; ndien sia Enye ọwọrọde edi ke ido owo, Enye osụhọde idem, akabade osụk ibuot tutu osụn̄ọ ke n̄kpa, kpa n̄kpa [eto ndutụhọ].” Jesus ama omụm unen ukara Ete esie akama, esịnde usụn̄uwem ntan̄idem ye ufụp eke Devil ofụri ofụri. Ke ntak edinam akpanikọ Jesus, “Abasi [ama emenede] Enye onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄; man ke enyịn̄ Jesus kpukpru edọn̄ ẹkpetọn̄ọ ẹnọ Abasi, ye eke mme andidu ke heaven, ye eke mme andidu ke isọn̄, ye eke mme andidu ke idak isọn̄; kpukpru edeme ẹkpenyụn̄ ẹnyịme ẹte Jesus Christ edi Ọbọn̄, ẹnọ Abasi Ete ubọn̄.”—Philippi 2:7-11.

Ndikan Ufụp Fo

15. Ntak emi anade nnyịn inọ ntịn̄enyịn ke ndikpeme mme ntụk ufụp?

¹⁵ Ke mîbietke Abasi ye Christ, mme Christian ẹdi mme anana mfọnmma. Ẹdide mme anamidiọk, mmọ ndusụk ini ẹkeme ndinam n̄kpọ ke ntak idiọk ufụp. Utu ke ndiyak ufụp onụk nnyịn ndikụt ndudue nnọ ekemmọ andinịm ke akpanikọ kaban̄a ndusụk n̄kpri ndudue m̀mê idiọk oro ẹkekere-kere, edi akpan n̄kpọ, ke ntre, nnyịn nditie n̄kere mme ikọ eke odudu spirit ẹmi: “Kûnịm idem fo ke eti owo ukan: kûnyụn̄ unịm idem fo ke enyene-ibuot ukaha: afo edinam didie abiara?”—Ecclesiastes 7:16.

16. Nso eti item aban̄ade ufụp ke ẹkenọ ke nsiondi magazine emi eke ini edem?

¹⁶ Ke ibuot nneme aban̄ade ufụp, Enyọn̄-Ukpeme (Ikọmbakara) eke March 15, 1911, ama ọnọ item ete: “Ke adan̄aemi nnyịn ikpenyenede ndinen̄ede nsịn ifịk, ndinen̄ede mfụbe ufụp ke uduak Ọbọn̄, edi ana nnyịn itịm ikụt ite ke emi idịghe mbubehe idemowo; ndien nnyịn ikpenyene ndikere m̀mê idi ‘mme andinọhọ ke mbubehe owo efen’ m̀mê idịghe. Ndien, n̄ko, nnyịn ikpenyene ndikere m̀mê ekpedi n̄kpọ emi odotde mbiowo ndise mban̄a ndien m̀mê ekpedi mbiomo nnyịn ndika mbịne mbiowo m̀mê idịghe. Akpana kpukpru nnyịn inyene akwa udomo ufụp inọ uduak Ọbọn̄ ye utom Ọbọn̄, edi itịm ikụt ite ke enye idịghe ndotndot esie . . . ke nditịn̄ ke usụn̄ efen, nnyịn ikpenyene nditịm n̄kụt nte ke enye idịghe edifụbe owo efen, edi edifụbe mban̄a owo efen, mban̄a mme udọn̄ ye mme mfọnọn̄kpọ esie.”—1 Peter 4:15.

17. Didie ke nnyịn ikeme ndifep ndiọi edinam eke ufụp?

¹⁷ Didie ke nnyịn nte mme Christian ikpefep ntan̄idem, ufụp, ye isịnenyịn? Usọbọ ọkọn̄ọ ke ndiyak edisana spirit Abasi asan̄a ifụre ifụre ke uwem nnyịn. Ke uwụtn̄kpọ, oyom nnyịn isibọn̄ akam iyom spirit Abasi ye un̄wam ke ndision̄o nti mbun̄wụm esie. (Luke 11:13) Oyom nnyịn isidụk mme mbonoesop Christian, ẹmi ẹsitọn̄ọde ke akam ẹnyụn̄ ẹnyenede spirit ye edidiọn̄ Abasi. Akan oro, oyom nnyịn ikpep Bible, emi Abasi ọkọnọde odudu ewet. (2 Timothy 3:16) Ndien oyom nnyịn ibuana ke utom edikwọrọ Obio Ubọn̄ emi ẹnamde ye odudu edisana spirit Jehovah. (Utom 1:8) Ndin̄wam mme ekemmọ Christian emi ndusụk idiọk n̄kpọntịbe ọnọmọde edi usụn̄ en̄wen ndiyak idem nnọ eti odudu eke spirit Abasi. (Isaiah 57:15; 1 John 3:15-17) Ndiyọhọ kpukpru mbiomo Christian ẹmi ifịk ifịk eyen̄wam ndikpeme nnyịn nsio ke ndiọi edinam eke ufụp, koro Ikọ Abasi ọdọhọde ete: “Ẹsan̄a ke Spirit, ndien mbufo idinamke se idọn̄de obụkidem.”—Galatia 5:16.

18. Ntak emi nnyịn mîdinyeneke ndin̄wana kpukpru ini ye ndiọi ntụk ufụp?

¹⁸ Ẹsiak ima akpa ke otu mme mbun̄wụm edisana spirit Abasi. (Galatia 5:22, 23) Ndiwụt ima eyen̄wam nnyịn ndikara ntụhọ idiọkn̄kpọ idahaemi. Edi nso kaban̄a ini iso? Ediwak miliọn mme asan̄autom Jehovah ẹnyene idotenyịn uwem ke Paradise isọn̄ emi edide, ke ebiet emi ẹkemede ndisak iso nse edidi se ẹdade ẹsịm mfọnmma eke owo. Ke obufa ererimbot oro, ima eyekara ndien owo ndomokiet idiyakke idem inọ mme idiọk ntụk ufụp, koro “ẹyen̄yan̄a ekondo ke idemesie nde ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.”—Rome 8:21.

Mme Akpan N̄kpọ Nditie N̄kere

◻ Nso uwụtn̄kpọ ke Paul akada an̄wam ndibiọn̄ọ ufụp?

◻ Didie ke ufụp ekeme ndibiat emem esop?

◻ Didie ke mme ete ye eka ẹkeme ndikpep nditọ mmọ ndiyọ ufụp?

◻ Didie ke nnyịn ikeme ndifep ndiọi edinam eke ufụp?

[Ndise ke page 16]

Ẹkûyak ufụp abiat emem esop

[Ndise ke page 17]

Mme ete ye eka ẹkeme ndikpep nditọ mmọ ẹyọ mme ekikere ufụp