Mme Mbụme Ẹtode Mme Andikot
Didie ke mme ufọn utom itie Akwa Oku Christ Jesus, ẹmi ẹtịn̄de ẹban̄a ke Mme Hebrew 4:15, 16, ẹnyene n̄kpọ ndinam idahaemi ye mme “erọn̄ en̄wen”?
Okposụkedi utom Jesus nte Akwa Oku enyenede ufọn akpan akpan ọnọ mbon ẹmi ẹdidude ye enye ke heaven, mme Christian ẹnyenede idotenyịn eke isọn̄ ẹnyene ufọn idem idahaemi ẹto mme utom itie oku Jesus.
Toto ke Adam, mme owo ẹdu ke idiọkn̄kpọ. Nnyịn imọbọ ndutụhọ ito ndammana unana mfọnmma, nte nditọ Israel ẹkebọde. Mmọ ẹma ẹwọn̄ọde ẹbịne anyan udịm ikpọ oku ye nsan̄a mme oku, ẹmi ẹkesiwade uwa kaban̄a mme idiọkn̄kpọ mmọ ọkọrọ ye eke mme owo oro. Nte ini akade, ẹma ẹyet Jesus aran nte oku “nte utọ Melchizedek asan̄ade.” Ke ẹma ẹkenam eset ke n̄kpa, Jesus ama ada ke iso Jehovah ndinọ ekọmurua mfọnmma uwa esie eke owo.—Psalm 110:1, 4.
Nso ke emi ọwọrọ ọnọ nnyịn mfịn? Ke n̄wed emi enye ọkọnọde ẹsọk Mme Hebrew, Paul ama eneme utom Jesus nte Akwa Oku. Ke Mme Hebrew 5:1, nnyịn ikot ite: “Ẹkemek kpukpru akwa oku, eke ẹsiode ke otu owo ẹnịm ẹnọ owo kaban̄a n̄kpọ Abasi, man enye emen enọ ọsọk Abasi, onyụn̄ awa uwa kaban̄a mme idiọkn̄kpọ.” Ndien, ke Heb 5 ufan̄ikọ 5 ye 6, Paul ama owụt ke Jesus ama akabade edi akwa oku, emi ekemede ndida mme ufọn nsọk nnyịn.
Didie ke edi ntre? Paul ekewet ete: “Okposụkedi nte Enye edide Eyen, Enye ekpep nsụkibuot ọfiọk oto ke ndutụhọ eke Enye okụtde; ndien ke ẹma ẹkenam Enye ọfọn ama, Enye akabade edi ntak nsinsi edinyan̄a ọnọ kpukpru owo emi ẹkopde uyo Esie.” (Mme Hebrew 5:8, 9) Akpa kan̄a, ufan̄ikọ oro ekeme ndinam nnyịn ikere iban̄a nte nnyịn idikemede ndibọ ufọn ke obufa ererimbot, ke ini mbon oro ẹnamde akpanikọ ẹnọ Abasi ye Jesus ẹdibọhọde idaha idiọkn̄kpọ mmọ ndien ẹnyene nsinsi uwem. Oro edi idotenyịn akpanikọ, emi ọkọn̄ọde ke uwa ufak Jesus ye utom esie nte Akwa Oku.
Ke akpanikọ, nte ededi, nnyịn imekeme ndibọ ufọn idem idahaemi nto itie ye utom esie nte Akwa Oku. Tịmfiọk Mme Hebrew 4:15, 16: “Nnyịn [inyeneke] Akwa Oku eke mîkemeke nditiene nnyịn n̄kụt mmemidem nnyịn; edi Akwa Oku emi okokụtde idomo ke kpukpru nde kpa nte nnyịn, edi mînyeneke idiọkn̄kpọ. Mmọdo ẹyak nnyịn isan̄a ikpere ebekpo mfọn ye uko, man nnyịn ibọ mbọm, inyụn̄ ikụt mfọn eke edin̄wamde nnyịn ke ini nnanenyịn.” Ini ewe edidi “ini nnanenyịn”? Enye edi ini emi idiyomde mbọm ye mfọnido oro owo mîdotke. Akpana kpukpru nnyịn, ke ntak unana mfọnmma, inyene udọn̄ emi idahaemi.
Mme Hebrew 4:15, 16 osio akpan n̄kpọ oro owụt nte ke Jesus—edide oku idahaemi ke heaven—ama edi owo n̄ko, ntre enye ekeme ndikop mbọm. Ye mmanie? Ye nnyịn. Ini ewe? Idahaemi. Ke ini emi enye ekedide owo, Jesus ama osobo nsịn̄ede ye mfịghe ẹmi ẹkemede ndisịm mme owo. Ini kiet, Jesus ama okop biọn̄ ye nsatitọn̄. Ndien kpa ye oro ekedide mfọnmma, idem ama emem enye. Oro ekpenyene ndisọn̄ọ nnyịn idem. Ntak-a? Sia Jesus okokopde ndammana mmemidem, enye ọfiọk nte esitiede nnyịn ediwak ini ke idem. Ti, n̄ko, ete ke Jesus ekenyene ndiyọ ndomoidem ke otu mme apostle esie. (Mark 9:33-37; Luke 22:24) Ih, enye ama osobo mme edikpu. Nte oro ikpanamke nnyịn inyene mbuọtidem nte enye otịm ọfiọk ke ini nnyịn isobode edikpu, ikopde mmemidem? Ke akpanikọ anam.
Ke ini okopde mmemidem, nso ke afo ekeme ndinam? Nte Paul ọkọdọhọ ke afo enyene ndikam mbet tutu, ke obufa ererimbot, Akwa Oku fo, Jesus, an̄wam fi akabade edi mfọnmma ke ekikere ye ke ikpọkidem? Baba. Paul ọkọdọhọ ete: “Man nnyịn ibọ mbọm, inyụn̄ ikụt mfọn eke edin̄wamde nnyịn ke ini nnanenyịn,” ndien oro esịne idahaemi. N̄ko-n̄ko, ke ini Jesus ekedide owo, enye ama osobo ndutụhọ ye nsọn̄ọn̄kpọ, “[okụtde] idomo ke kpukpru nde kpa nte nnyịn.” Ntre ke ini nnyịn isobode mme utọ n̄kpọ oro, enye odu ke mben̄eidem ndin̄wam nnyịn, ọkọn̄ọde ke ifiọk esie kaban̄a se nnyịn isobode. Nte oro inamke fi asan̄a ekpere enye?
Tịmfiọk Heb 4 ufan̄ikọ 16 idahaemi. Paul ọdọhọ ke nnyịn—ndien emi esịne mbon oro ẹyetde aran ye mme erọn̄ en̄wen—imekeme ndisan̄a n̄kpere Abasi ye ifụre utịn̄ikọ. (John 10:16) Apostle oro ikọdọhọke ke nnyịn imekeme nditịn̄ n̄kpọ ekededi oro nnyịn iyomde ke akam, idem mme n̄kpọ iyatesịt, emi mîwụtke ukpono. Utu ke oro, ke isọn̄ uwa Jesus ye itie esie nte Akwa Oku, nnyịn imekeme ndisan̄a n̄kpere Abasi kpa ye oro idide mme anamidiọk.
Usụn̄ en̄wen emi nnyịn idahaemi ikemede ndibọ ufọn nto mme utom Akwa Oku nnyịn, Jesus Christ, abuana mme idiọkn̄kpọ, m̀mê mme ndudue nnyịn. Ke akpanikọ nnyịn idorike enyịn nte ke Jesus eyenam nnyịn inyene ufọn uwa ufak esie ọyọhọ ọyọhọ ke editịm n̄kpọ emi odude kemi. Idem edieke enye akanamde, nnyịn ikposụk inyeneke nsinsi uwem. Nte emeti idaha oro ẹwetde ke Luke 5:18-26, emi aban̄ade owo akpauben̄ emi ẹkesịnde n̄kpana esie ke odudu enyọn̄ ọkọm? Jesus ama ọdọhọ enye ete: “Owo, ẹmefen mme idiọkn̄kpọ fo.” Oro ikọwọrọke mme akpan idiọkn̄kpọ ẹmi ẹkedide ntak akpauben̄ oro. Anaedi oro akada aban̄a idiọkn̄kpọ eren oro ke ofụri ofụri, ndien ke ndusụk udomo ekeme ndidi ama abuana unana mfọnmma oro enye akadade-da amana, emi edide ntak ukụt.
Ọkọn̄ọde ke uwa oro enye okoyomde ndiwa, Jesus ama ekeme ndimen mme idiọkn̄kpọ owo oro mfep, nte ebot Azazel ekemende mme idiọkn̄kpọ Israel ke Usen Usio-Isop efep. (Leviticus 16:7-10) Edi, owo akpauben̄ oro okosụk edi owo. Enye ama afiak anam idiọkn̄kpọ, enye ama onyụn̄ akpa nte ini akade, nte anade mme anamidiọk ẹkpa. (Rome 5:12; 6:23) Se Jesus eketịn̄de ikọwọrọke ite ke eren oro ama enyene nsinsi uwem ke ebe oro. Edi ẹma ẹda ndusụk udomo edifen nnọ ẹdiọn̄ eren oro ke ini oro.
Kemi kere ban̄a idaha nnyịn. Nte mme anana mfọnmma, nnyịn idedue ke usen ke usen. (James 3:2) Nso ke nnyịn ikeme ndinam mban̄a oro? Ọfọn, ke heaven nnyịn imenyene Akwa Oku emi okopde mbọm emi nnyịn ikemede ndisan̄a n̄kpere Jehovah ke akam oto ke enye. Ih, nte Paul ekewetde, kpukpru nnyịn imekeme ‘ndisan̄a n̄kpere ebekpo mfọn [Abasi] ye uko, man nnyịn ibọ mbọm, inyụn̄ ikụt mfọn eke edin̄wamde nnyịn ke ini nnanenyịn.’ Mmọdo, kpukpru owo mfịn ẹmi ẹdide eke mme erọn̄ en̄wen ke ẹnen̄ede ẹnyene mme utịbe utịbe ufọn, esịnede eti ubieresịt, oto mme utom akwa oku Christ.
Kpukpru Christian ẹmi ẹnyenede idotenyịn uwem eke isọn̄ ẹkeme ndisak iso nse mme ufọn ẹkponde ẹkan ke obufa ererimbot emi asan̄ade ekpere. Ndien Akwa Oku eke heaven nnyịn eyeda ufọn uwa esie anam n̄kpọ ọyọhọ ọyọhọ, adade okosụn̄ọ ke edifen mme idiọkn̄kpọ ọyọhọ ọyọhọ. Enye eyenam mme ufọn ẹmi ẹkponde ẹkan ẹdu ebe ke ndise mban̄a nsọn̄idem ikpọkidem ye eke spirit mme owo. Ndien Jesus eyetịm atat ukpep oro ẹnọde ikọt Abasi ke isọn̄, sia edikpep Ibet ekedide akpan mbiomo mme oku ke Israel. (Leviticus 10:8-11; Deuteronomy 24:8; 33:8, 10) Ntem, ke adan̄aemi ibọde mme ufọn ito utom itie oku Jesus idahaemi, ata ekese ke ẹna ẹbet nnyịn!