Mbono “Idara Idara Mme Anditoro”—Nte Afo Eyedu Do?

IDATESỊT! Nte ikọ oro etie esen esen ke eyo emi ọyọhọde ye afanikọn̄ mi? Ke akpanikọ mme n̄wedmbụk n̄kpọntịbe inọhọ ediwak ntak ndikop idatesịt. Ekọn̄ ekpụk, ntatara ntatara ọbiọn̄, unana utom, enyene-ndịk usabaden̄kpọ, mfịna ke ukaraidem, ubiatibet—mmọemi idịghe mme n̄kpọ ndinam esịt owo ọyọhọ ye idatesịt, nte mmọ ẹdi?

Mfịn ekese owo ẹsinyene se ededi inemesịt oro mmọ ẹkemede ndinyene ke uwem. Edi nso kaban̄a idatesịt? Ẹtịn̄ ẹban̄a idatesịt nte “idaha inemesịt; idara.” Idịghe ekese owo ẹnyene ata idatesịt, ndien ke ini ẹnyenede, esiwak ndidi ke ata ibio ini.

Edi, ke asakde iso ese usen nnyịn, Bible ama ebem iso etịn̄ ete: “Ntem ke Ọbọn̄ Jehovah ọdọhọ, ete, Sese, . . . ikọt mi ẹyedat esịt, . . . sese, ikọt mi ẹyekwọ ke idatesịt.” (Isaiah 65:13, 14) Didie ke oro ekeme nditịbe?

Man enyene ibọrọ, nnyịn imọnọ fi ikot ndidụk kiet ke otu mme mbono district Mme Ntiense Jehovah oro ẹdinịmde ke 1995. Ibuotikọ mbono oro edi “Idara Idara Mme Anditoro,” ndien owo ibọhọ okụk ke ndidụk. Ndutịm mbono usen ita oro eyesịne mme utịn̄ikọ ẹkọn̄ọde ke Bible, nnamn̄wụt, nneme, ye n̄kpọ efen efen. Ke ofụri ndutịm oro, ẹyesio mme akpan n̄kpọ ke ibuotikọ idatesịt emi ẹwụt.

Mbono ẹtọn̄ọ ke United States ke June ndien ẹyekaiso ke ofụri ererimbot tutu osịm ntọn̄ọ ntọn̄ọ 1996. Eyedi, kiet eyedu ekpere fi. Ntak mûbụpke Mme Ntiense Jehovah ẹmi ẹdụn̄de ke n̄kann̄kụk fo? Nnyịn imọnọ fi ufiop ufiop ikot ndidu do.