Nte Afo Eyetoro Jehovah?
“KPA nte enyịn̄ fo etiede, O Abasi, kpa ntre ke itoro fo etie tutu osịm ke utịt ererimbot.” Mmọemi ẹdi mme ikọ ẹtode ikwọ prọfesi nditọ Korah. (Psalm 48:10) Mfịn, akwa otu eke ediwak miliọn Mme Ntiense Jehovah ke ẹtoro Abasi ẹnyụn̄ ẹnam ẹfiọk enyịn̄ esie ebe ke ndikwọrọ eti mbụk Obio Ubọn̄ esie. Ke ndinam emi ke mme isọn̄ ye mme isuo inyan̄ibom 232 ye ke usem ẹwakde ẹbe 300, mmọ ke ataata usụn̄ ẹmesịm “utịt ererimbot.”
Nso idi n̄kpọ oro onụkde mme owo ẹmi ẹnyenede nsio nsio idaha ido uwem, idaha n̄kaowo, ye usem nditoro Jehovah? Esịtekọm oro mmọ ẹnyenede ẹnọ nnennen ifiọk Ikọ Abasi, kpa Bible, edi akpan ntak. Akpanikọ eke spirit anam mmọ ẹbọhọ nsunsu ekikere ye mme ukpepn̄kpọ ido ukpono oro ẹsịnde owo ke ufụn utọ nte nsinsi ndutụhọ. (John 8:32) Akpanikọ n̄ko aman̄wam mmọ ndiwụt esịtekọm mban̄a mme utịbe edu Abasi, utọ nte ima, odudu, ọniọn̄, ye unenikpe esie oro asan̄ade ye mbọm. Ndidi ndinyene ifiọk mban̄a Abasi ndinọ ikpọn̄îkpọn̄ edibon Eyen esie, Jesus Christ, nte uwa ufak kaban̄a ubonowo omonụk nti owo nditoro nnyụn̄ nnam n̄kpọ Jehovah.
Nte ekemde ye n̄wed Ediyarade eke Bible, akwa otu mbon ikwọ eke heaven ẹtan̄a ẹte: “Ọbọn̄ ye Abasi nnyịn, Afo omodot ndibọ ubọn̄ ye ukpono ye odudu, koro Afo okobotde kpukpru n̄kpọ; ndien oto uduak Fo ke mmọ ẹdu, ẹkenyụn̄ ẹboro.” (Ediyarade 4:10b) Utọ itoro oro idịghe se ẹnamde n̄kukụre nte se ẹnyenede ndinam. Utu ke oro, enye ọkọn̄ọ ke mbak oro ẹnyenede ẹnọ Jehovah.
Toro Abasi ebe ke Ndikwọrọ Eti Mbụk
Ke nditoro Jehovah, owo ekpebe n̄wọrọnda uwụtn̄kpọ Jesus Christ, kpa akpan anditoro Abasi. Ndisan̄a ke nde-ikpat Jesus esịne edibuana ke utom edikwọrọ eti mbụk Obio Ubọn̄ Abasi. (Matthew 4:17, 23; 24:14) Utom ukwọrọikọ emi amakabade edi n̄kponn̄kan ukeme oro esịnde ke ofụri ererimbot ke nditoro Jehovah.
Utom ukwọrọikọ emi edi ata akpan n̄kpọ tutu Bible emen enye in̄wan̄în̄wan̄ akabuan ye edinyan̄a. N̄wed Mbon Rome 10:13-15 okot ete: “Owo ekededi eke edisemede okot enyịn̄ Jehovah eyebọhọ. Edi mmọ ẹdinam didie ẹseme ẹkot Enyeemi mmọ mîkọbuọtke idem ye Enye? Mmọ ẹdinyụn̄ ẹnam didie ẹbuọt idem ye Enyeemi mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọikọ mîdụhe? Mmọ ẹdinyụn̄ ẹnam didie ẹkwọrọ, ke mîbọhọke ẹdọdọn̄ mmọ? Kpa nte ẹwetde ete, Ikpat mmọemi ẹdade etop eti n̄kpọ ẹye adan̄a didie!”
Ke isua oko ikpọn̄, Mme Ntiense Jehovah ẹma ẹsịn se iwakde ibe hour biliọn kiet ke utom ukwọrọikọ. Ndien nso nti utịp ke editoro Abasi emi okosion̄o edi ntem! N̄kpọ nte owo 314,000 ẹma ẹdiana ye otu mbon itoro emi ebe ke ndiyak idemmọ nnọ Jehovah ke mmọn̄ baptism.
Edi, nso ke ekeme nditịn̄ mban̄a owo 12,288,917 ẹmi ẹkedụkde Editi n̄kpa Christ ke 1994? Se iwakde ikan owo 7,000,000 ẹmi mîtoroke Jehovah kan̄a nte mme ọkwọrọ eti mbụk ẹma ẹdu ke otu mmọ. Edi mmọ ndidụk akpan edinam emi ke akpatre ekeme ndisụn̄ọ ke ediwak miliọn owo efen efen ndidiana ye otu mbon itoro ẹmi. Nso ke ẹkeme ndinam man ẹn̄wam mbon oro ẹnyenede udọn̄ mi ẹkabade ẹdi mme anditoro Jehovah?
Un̄wam Oro Odude
Ediwak mbon oro ẹnyenede udọn̄ ẹkeme ndiyom nditoro Jehovah edi ẹkere ke mmimọ ikemeke ndisịm mme n̄kpọ oro ẹyomde. Ọfọn mmọ ẹti mme ikọ andiwet psalm: “M̀mọ̀n̄ mmenede enyịn mi nse ikpọ obot. Edinyan̄a mi oto m̀mọ̀n̄? Edinyan̄a mi oto Jehovah, emi akanamde enyọn̄ ye isọn̄.” (Psalm 121:1, 2) Nte an̄wan̄ade, andiwet psalm ekemenede enyịn esie ese ikpọ obot Jerusalem ẹmi temple Jehovah ye ifụm ukara Abasi eke isọn̄ ẹkedude. Ọkọn̄ọde ke emi nnyịn nte enende imekeme ndibiere nte ke un̄wam oro ẹyomde man ẹtoro Abasi ẹnyụn̄ ẹtan̄a etop Obio Ubọn̄ oto Jehovah ye esop esie ikpọn̄.—Psalm 3:4; Daniel 6:10.
Mfịn, mbon oro ẹyomde nditoro Jehovah ẹkeme ndidori enyịn ndibọ ima ima un̄wam nto esop esie eke isọn̄. Ke uwụtn̄kpọ, Mme Ntiense Jehovah ẹnọ un̄wam ebe ke ndinịm mme ukpepn̄kpọ Bible mfọn ye mbon oro ẹnyenede udọn̄. Ndutịm unọ ukpep emi esịne se ikande sụk edikpep mme akpan ukpepn̄kpọ Bible. Enye an̄wam eyen ukpepn̄kpọ ndikọri esịtekọm nnọ se enye ekpepde ye esop oro Jehovah adade anam n̄kpọ.
Ke n̄kemuyo ye emi, Ntiense oro onịmde ukpepn̄kpọ Bible odomo ndikụt nte ke mbufa akpanikọ ẹmi idụkke ibuot ikpọn̄ edi ke osịm esịt n̄ko. Ndien andikpep ikpetreke ndiwụt eyen ukpepn̄kpọ nte Jehovah adade esop Esie anam n̄kpọ ndiyọhọ uduak Esie ke isọn̄. Ediye uduot ekpri n̄wed oro Mme Ntiense Jehovah—Ẹdiana Kiet Ẹnam Uduak Abasi ke Ofụri Ererimbot ye tape video oro Jehovah’s Witnesses—The Organization Behind the Name ẹsiwak ndidi n̄kpọ un̄wam ke ndiyọhọ emi.
Mme mbonoesop Christian n̄ko ẹnyene akpan udeme ke ndin̄wam mbon oro ẹyomde ndidi mme anditoro Jehovah. Ke ata ntọn̄ọ ntọn̄ọ ukpepn̄kpọ Bible, ẹkeme ndinọ eyen ukpepn̄kpọ ikot ndidụk mme mbonoesop Christian. Nte ini akade, enye eyefiọk ufọn edidụk ofụri ini ye edibuana ke kpukpru mme mbonoesop. (Mme Hebrew 10:24, 25) Mme esenyịn ẹkeme ndinọ ekemmọ mme andinịm ke akpanikọ ye mbon oro ẹyomde ndidi mme anditoro Jehovah ata akpan un̄wam ebe ke nditịm mme mbonoesop oro ẹbọpde-bọp ẹnyụn̄ ẹsịnede item eke spirit.
N̄wam Nditọwọn̄ Ẹtoro Jehovah
Nditọwọn̄ ẹsịne ke otu ediwak owo oro ẹkemede ndikabade ndi mme asuanetop eti mbụk ke n̄kpet n̄kpet ini iso. Mme ete akpan akpan ẹnyene mbiomo eke Bible ndibọk nditọ mmọ ke “ntụnọ ye item Ọbọn̄.” (Ephesus 6:4) Ke ini mme ete ye eka oro ẹbakde Abasi ẹtịmde ẹnọ ukpep, idem ata n̄kpri nditọwọn̄ ẹkeme ndikọri udọn̄ nditoro Jehovah.
Ekpri eyenan̄wan kiet ke Argentina ama aka ebịne mbiowo esop ndien ndien ke ediwak ọfiọn̄, oyomde mmọ ẹn̄wam man enye okpodot nte asuanetop Obio Ubọn̄. Nte ini akade, ete ye eka esie ye mbiowo ẹma ẹnyịme enye ndidi asuanetop oro mînaha baptism. Enye ke esikwọrọ etop Obio Ubọn̄ uforo uforo ke enyịnusụn̄ mme owo. Idem okposụkedi eyenan̄wan emi edide isua ition kpọt ke emana mînyụn̄ ifiọkke ndikot n̄wed, enye esimụm ebiet emi ndusụk itien̄wed Bible ẹdude ọdọn̄ ke ibuot. Ke ama okokụbọde itien̄wed, enye esidọhọ enyeneufọk okot, ndien ekem enye anam an̄wan̄a.
Ana in̄wan̄în̄wan̄ nte ke mbiowo ye mme ete ye eka ẹkeme ndinam ekese ufọn ebe ke ndisịn udọn̄ nnọ nnyụn̄ n̄n̄wam mbon oro ẹnamde n̄kọri ndikabade ndi mme anditoro Jehovah.—Mme N̄ke 3:27.
Nsinsi Itie Ebuana ye Jehovah
Edi, nso edieke edide afo ke idemfo emesibuana ye Mme Ntiense Jehovah ke ndusụk ini edi utieneke mmọ ubuana ke utom ukwọrọikọ mmọ? Ekeme ndidi ọyọfọn obụp idemfo mme mbụme ẹtienede mi, ‘Nte ami mmonịm ke mmokụt akpanikọ ye nte ke Jehovah edi n̄kukụre Abasi akpanikọ? Nte ami mmonịm ke akpanikọ nte ke Obio Ubọn̄ Abasi edi n̄kukụre usọbọ ọnọ mme mfịna ubonowo? Nte ami mmọkpọn̄ kpukpru nsunsu ido ukpono ye mme edu ye mme edinam ererimbot oro mînemke Jehovah esịt? Nte ami mmenyene ntotụn̄ọ ima nnọ Abasi ye ndinen edumbet esie?’ (Psalm 97:10) Edieke afo ye esịt akpanikọ ekemede ndibọrọ ih ke mme mbụme ẹmi, nso ikpan fi nditoro Jehovah?—Men Utom 8:36 domo.
Nditoro Jehovah esịne n̄kpọ akan edikwọrọ eti mbụk. Edieke edide afo ọmọbọ nnennen ifiọk, enyene ata mbuọtidem, ndien ke anam uwem fo ekekem ye mme edumbet Abasi, oyom afo ọsọn̄ọ ọkpọkpọ itie ebuana fo ye Abasi. Didie? Ebe ke ndinam uyakidem nnọ enye ke akam ndien ekem ayarade emi ebe ke mmọn̄ baptism. Nsinsi uwem odu ke itiendịk. Ke ntre, nam item Jesus emi idahaemi: “Ẹbe ke mfafaha inuaotop ẹdụk: koro inuaotop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inuaotop emi adade owo osịm uwem afafaha, usụn̄ onyụn̄ esịre; ndien mme andikụt enye iwakke.”—Matthew 7:13, 14.
Ye editịm n̄kpọ emi odude kemi ekperede akama-nsobo utịt esie, ini emi idịghe ini ndimen̄e. Nam n̄kpọ usọp usọp bịne ndinyene nsinsi itie ebuana ye Jehovah. Ke akpanikọ, idahaemi edi ini ndinam n̄kpọ ke eti usụn̄ mban̄a mbụme oro, Nte afo eyetoro Jehovah?