Jehovah Eyenyan̄a Isọn̄

ẸSIBERI an̄wambehe ubomofụm emi odude ke isuo Maldives ke ediwak hour kpukpru usen. Ntak-a? Koro mmọn̄ ọkpọsọn̄ ọtọ esiyọhọ usụn̄ uwat, anamde edi se mîfọnke ubomofụm ndiduọ. Ndusụk ntaifiọk ẹkop ndịk nte ke udomo inyan̄ ke mme isuo Maldives ekeme ndidọk ke nsụhọde n̄kaha ke mita kiet ke isua ikie efen. Ke adan̄aemi emi etiede nte ata ekpri udomo, utọ n̄kọri oro ekeme ndisobo idụt itiaba ke otu mme idụt ẹmi ẹdude ke isuo emi efep ofụri ofụri. Ke akpanikọ, nte ekemde ye UN Chronicle, mmọn̄ ndidọk ke mita iba ekeme ndikpere ndisobo ofụri ediwak otu isuo, n̄kpọ nte isuo 1,200 mfep!

Nso inam udomo inyan̄ ọdọk? Nte ekemde ye Ndutịm N̄kann̄kụk UN, edisabade ofụm isọn̄ ebe ke “ata ọkpọsọn̄ ufiop ofụm” anam mme inyan̄ ke mme ikpehe oro ẹnen̄erede ẹfiop ẹtara, eboho ice emi ofụkde isọn̄ ẹtara, ndien ke ntem, anamde udomo inyan̄ ọdọk. Panos Institute emi odude ke London ọdọhọ ete ke ekeme ndidi usabaden̄kpọ “edemede nsobo ererimbot oro asan̄ade sụn̄sụn̄ emi abiatde mme adan̄a isọn̄ ye inyan̄.”

Ke ẹsụk ẹfafan̄a ẹban̄a edifiop oro ekondo ofiopde ke otu ntaifiọk. Nte ededi, nnyịn imekeme ndinyene nsọn̄ọ nte ke mme mfịna n̄kann̄kụk idibiatke uduak Abasi ifep. “Ererimbot eyesọn̄ ada,” ntre ke Bible ọdọhọ. “Idinyụn̄ isehekede.” (1 Chronicles 16:30) Jehovah akara ofụri n̄kann̄kụk isọn̄, ndien nnyịn imekeme ndidat esịt nte ke enye eyesọp anyan̄a isọn̄ ye ubonowo osio ke nsobo.—Psalm 24:1, 2; 135:6; 2 Peter 3:13.

[Ebiet Ẹdade Ndise Ẹto ke page 31]

Ndise ọkọn̄ọde ke foto NASA