“Akananam N̄kwe Orụk N̄kpọ Emi!”

KE 1993 ẹma ẹnọ ọfis Watch Tower Society ke Argentina ikot ndinọ owo tọsịn kiet ẹka Santiago, Chile, ẹkedụk Mbono District “Ukpepn̄kpọ Abasi” eke Mme Ntiense Jehovah eke usen inan̄. Emi ekedi akpa ini oro ẹkenọde Mme Ntiense ẹtode Argentina ikot ndisan̄a nte akwa otu n̄ka mbono ke esenidụt.a Ẹkenam n̄kpọ didie ẹban̄a oro? Ẹma ẹbọ se ikawakde ikan n̄wed eben̄e 8,500, ẹmi ẹkemekde mme andidụk 1,039 ẹto.

Ẹma ẹbọ bọs 14 ke ukpeokụk ndida n̄ka isan̄ emi edide kilomita 1,400 mi ọtọn̄ọde ke Buenos Aires osịm Santiago. Ndiye n̄kann̄kụk ẹma ẹdian uyai ke isan̄ hour 26 emi. Ke ẹbede Obot Andes, mme aka mbono ẹmi ẹma ẹbe ke mben Aconcagua, edide mita 6,960, kpa n̄kon̄n̄kan obot ke Edem Usoputịn Ererimbot. Se ẹketide akpan akpan edi n̄kokon̄, n̄kanade n̄kanade obot oro osụhọrede odụk Chile. Ẹma ẹkwak ubọk ke anyanini ẹnọ mme awat bọs oro ke usọ oro mmọ ẹkewụtde ke ndiwat uwat ke utọ ikpehe oro!

Nte ededi, nye-n̄kan ndise ekedi ke mbono oro. Ke ererimbot en̄wan eke idụt ye mfịghe eke orụk, ekedi inem inem n̄kpọ didie ntem ndikụt otuowo 80,000 oro ẹkedụkde ẹmi ẹketode idụt 24 ẹdianade kiet—ke akpanikọ otu nditọete ofụri ererimbot! Ke ẹma ẹkekụt edidianakiet oro odude ke ufọt mme andidụk mbono oro ke akpa ini, ndusụk ke otu mme awat bọs oro ẹma ẹwụt udọn̄ ndikpep n̄kpọ efen efen mban̄a Mme Ntiense Jehovah. Kiet ke otu mmọ ama ọdọhọ ete: “Akananam n̄kwe orụk n̄kpọ emi!”

[Mme Ikọ idakisọn̄]