Ebiet Emi Uko eke Mîkemeke Ndikpu Otode
“UYOM ama anam nnyịn ituak ida inikiet inikiet ke afan̄usụn̄ nnyịn. Ekem, inuen iba ẹtatde mba ẹma ẹto ikọt ke n̄kan̄ ufien nnyịn ẹfehe ẹbịne nnyịn. Nsen iba ẹma ẹdọn̄ọ ke ekpri odudu kiet ke iso nnyịn. Inuen ẹmi ẹma ẹkpan nnyịn ndidịghi efọk mmọ ke ndudue. Ini kiet kiet oro ikodomode ndisan̄a n̄kpere nnyụn̄ nsio ndiye nsen ẹmi ẹnyenede nsan̄nsan̄ n̄kem mi ndise, inuen ẹmi ẹma ẹfiak ẹnam edinam ndịghe mmọ. Nnyịn ima ikere ite, ‘Mmọ ẹnyene uko didie ntem.’”
Oro ekedi ifiọk n̄kpọntịbe ikpọ owo inan̄ ke ini ẹkesan̄ade ẹkpere efọk dikkop emi etiede n̄kem n̄kem. Inuen efen emi ekpride akan edi blacksmith plover. Ke n̄wed oro Everyone’s Guide to South African Birds, mme ekpepn̄kpọ mban̄a inuen, Sinclair ye Mendelsohn ẹnam an̄wan̄a ẹte: “Ayara ye uman oro ẹbọkde nditọ ẹsikpeme efọk ye nditọ mmọ ọkpọsọn̄ ọkpọsọn̄ ẹsinyụn̄ ẹdama idat etieti ke owo ekededi oyomde ndisan̄a n̄kpere. Mmọ isikopke ndịk iban̄a idaha enyeemi asan̄ade ekpere do ẹnyụn̄ ẹsife ẹnam uyom idat idat, ẹfede ye unana ndịk ẹbịne ọkpọkọm mme owo man ẹbịn mmọ ẹfep.”
Ndusụk owo ẹma ẹkụt ikpọ enen ke unana edifiọk ẹsan̄ade ẹka itie efọk blacksmith plover, anamde inuen emi ọtọn̄ọ edinam esie. Nte ido edide mme enen ẹmi ẹsifiak edem.
Inuen ẹda utọ in̄wan̄în̄wan̄ uko oro ẹto m̀mọ̀n̄? Enye oto Enyeemi okobotde mmọ. Jehovah Abasi akanam n̄kpri unam ẹmi ẹnyene mme ntụk man ẹkeme ndikpan ikpọ unam ndibiat efọk mmọ m̀mê ndinọ nditọ mmọ unan.
Ukpepn̄kpọ Odude Ọnọ Mme Christian
Mme Christian ẹkeme ndikpep n̄kpọ nto emi, idem okposụkedi ẹyomde mmọ ẹka anyan ẹkan ikpîkpu uko asan̄ade ye ntụk. Ẹdọhọ mmọ ẹte ẹkpebe Eteufọk mmọ, Jesus Christ, emi akanamde mme ewụhọ Abasi ye unana ndịk. (Mme Hebrew 12:1-3) Bible obiom mbon oro ẹfiakde edem ẹkpọn̄ edinam n̄kpọ Abasi ikpe. (Mme Hebrew 10:39; Ediyarade 21:8) Ke ukem ini oro, Jehovah ọmọfiọk ke nnyịn idi mme anana mfọnmma onyụn̄ ọfiọk ete ke nnyịn ke ndusụk ini imekeme ndinam idiọkn̄kpọ mîdịghe inana uko oro oyomde man inam uduak esie ọyọhọ ọyọhọ. (Psalm 103:12-14) Nso ke owo ekeme ndinam edieke ndịk anamde enye etre ndinam se inende?
Ana Christian aka ebịne Abasi ke akam oyom ukeme ndikan mme idomo nnyụn̄ n̄kaiso nnam uduak Abasi. Bible esịne akama-nsọn̄ọ un̄wọn̄ọ Jehovah emi ndinọ un̄wam: “Enye ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem. Idem n̄kparawa ẹyekpa mba ẹnyụn̄ ẹkpọt, nyara owo ẹyenyụn̄ ẹduọn̄ọ: edi mmọ eke ẹberede ye Jehovah ẹyekop obufa nsọn̄idem; ẹyedọk ke mba nte ntrukpom; ẹyefen̄e, ndien idikpọtke; ẹyesan̄a, edi idikpaha mba.” (Isaiah 40:29-31) Ediwak mme anana mfọnmma owo ẹmekụt nte mme ikọ ẹmi ẹdide akpanikọ ẹnyụn̄ “ẹwọn̄ọ ẹkpọn̄ mmemidem ẹkabade ẹkop idem.” (Mme Hebrew 11:34) Eti uwụtn̄kpọ kiet ekedi Christian apostle Paul, emi ekewetde ete: “Ọbọn̄ adada mi ke n̄kan̄, ọsọn̄ọ mi esịt nditịn̄ ikọ gospel ọyọhọ ọyọhọ, man kpukpru mme Gentile ẹkop.”—2 Timothy 4:17.
Idem mbon oro ẹnyenede udọn̄ obufa obufa ẹmi ẹyomde ndikabade ndi mme anditiene Jesus Christ ẹkeme ndinyene utọ un̄wam oro ọnọde odudu do. Kere ban̄a eren South Africa ekerede Henry, emi ekedide akamaokụk ufọkabasi mmọ onyụn̄ odụn̄de ekpere pastọ mmọ. Henry ama odụn̄ọde oyom akpanikọ. Kpa ye oro enye ekenen̄erede esịn idem ke ido ukpono esie, usen kiet enye ama onyịme ukpepn̄kpọ Bible mfọn oro Mme Ntiense Jehovah ẹkenọde. Nte ini akakade, enye ama owụt udọn̄ ndikabade ndi Ntiense onyụn̄ obụp m̀mê mme usio-ukot ewe ke imọ ikenyene ndinam man isịm utịtmbuba oro. Ẹma ẹnam an̄wan̄a nte ke enye enyene ndibem iso n̄kpọn̄ ufọkabasi esie. (Ediyarade 18:4) Sia pastọ ekedide mbọhọidụn̄ ye ufan esie, Henry ama okụt ete ke imọ idiwetke leta ediwọrọ n̄kpọn̄ kpọt edi ke oyoyom inam n̄kpọ emi an̄wan̄a iso ye iso. Enye ama anam emi uko uko.
Pastọ oro ama okop n̄kpaidem ndien ekem ama ada etieibuot okpokoro esop ido ukpono oro ye mme andibuana eken ke ufọkabasi oro ndika n̄kese Henry. Mmọ ẹkeyom ndifiọk ntak emi enye ọkọkpọn̄de ufọkabasi mmọ ndikabade ndi andibuana ke ido ukpono emi, nte mmọ ẹkedọhọde, mînyeneke edisana spirit Abasi. “Ke akpa, mma n̄kop ndịk ndibọrọ mmọ,” ntem ke Henry akanam an̄wan̄a, “koro mmọ ẹma ẹsinyene ọkpọsọn̄ odudu ke idem mi kpukpru ini. Edi mma mbọn̄ akam nnọ Jehovah mben̄e un̄wam, ndien enye ama an̄wam mi ndinọ ibọrọ emi: ‘Ke otu kpukpru ido ukpono ofụri ererimbot, ewe edi n̄kukụre emi adade enyịn̄ Abasi, Jehovah? Nte idịghe Mme Ntiense Jehovah? Ndi mbufo ẹkere ke Abasi akpayak mmọ ẹkere enyịn̄ esie edi inọhọ mmọ edisana spirit esie n̄ko?’” Mme akamautom ufọkabasi oro ikekemeke ndifan̄a utọ edibuen ikọ oro. Ye esịtekọm kaban̄a ifiọk ye odudu oro Abasi ọnọde, Henry ke abuana idahaemi uko uko ye Mme Ntiense Jehovah ke utom ukwọrọikọ to ke enyịnusụn̄ sịm enyịnusụn̄.
Ih, ndidi ata Christian oyom uko. Nte utịt ererimbot emi asan̄ade ekpere, mme udomo mbuọtidem ẹyekọri. Satan oyom ndibọ mme asan̄autom Abasi utịbe utịbe idotenyịn nsinsi uwem mmọ nduọk ebe ke ndidomo ndibiat edinam akpanikọ mmọ nnọ Jehovah. (Men Ediyarade 2:10 domo.) Edi inaha nnyịn idede ikpa mba. Idem edieke nnyịn isobode n̄kpọ ubiọn̄ọ ibio ini ke ntak ndịk, Jehovah ekeme ndin̄wam nnyịn ifiak ikop odudu. Kaiso dori enyịn ke enye kaban̄a odudu ndikaiso nnam uduak esie. Ti ete, enyeemi okobotde mme inuen eke mîkopke ndịk edi Ebiet emi uko eke mîkemeke ndikpu otode. Ke akpanikọ, mme ata Christian ẹkpenyene “ndisọn̄ọ esịt ndọhọ ete, Jehovah edi Andin̄wam mi, ndifeheke ndịk: nso ke owo edikeme ndinam mi?”—Mme Hebrew 13:6.