Nte Mme Ukpan Ẹsinam Fi Okop Mmemidem?
MME ukpan! Idụhe owo ndomokiet oro otịmde ama mmọ; ẹdi kpukpru nnyịn inyene ndiyọ mmọ ke ndusụk udomo. Nte ededi, nte afo ndusụk ini emesikop mmemidem koro uwem fo etiede ukpan ukpan akaha? Eyedi eyefọn fi ke idem akan edieke afo okpụhọrede ekikere fo. Utu ke ndikop editịmede esịt mban̄a se mûkemeke ndinam, ntak mûdaha ifụre ekededi oro afo enyenede unam n̄kpọ ke eti usụn̄ ke ọyọhọ udomo?
Ke uwụtn̄kpọ, ediwak owo oro ẹbuenede ke n̄kan̄ ndutịm uforo ẹyom ndikpedi mbon inyene. Nte ededi, ke adan̄aemi unana ekemede ndinịm adan̄a ke se ikemede ndinam ke editịm n̄kpọ emi, mme akpan n̄kpọ ke uwem ẹdu ẹnọ kpukpru owo. Mme ubuene ọkọrọ ye imọ ẹsidụk ke ima, ẹdọ ndọ, ẹnyene nditọ, ẹdara eti itieufan, ye ntre ntre eken. Edide akpan n̄kpọ akan, mme ubuene ọkọrọ ye imọ ẹfiọk Jehovah ẹnyụn̄ ẹsak iso ẹse obufa ererimbot esie oro ẹn̄wọn̄ọde. Mme ubuene ọkọrọ ye imọ ẹkọri ke ndinyene ọniọn̄ ye ifiọk Christian, oro ẹfọnde ẹkan inyene. (Mme N̄ke 2:1-9; Ecclesiastes 7:12) Kpukpru owo—imọ ye ubuene—ẹkeme ndinam eti enyịn̄ ye Jehovah nnọ idemmọ. (Ecclesiastes 7:1) Ke eyo Paul esop Christian ọkọyọhọ ye mme usụhọde owo ke n̄kaowo—ndusụk mmọ ẹdide ifịn—emi ẹkedade ifụre ekededi oro mme idaha mmọ ẹkeyakde ẹnam n̄kpọ ọniọn̄ ọniọn̄.—1 Corinth 1:26-29.
Itieibuot eke N̄wed Abasi
Ke ndọ Christian, n̄wan odu ke nsụkibuot ọnọ ebe esie—kpa ndutịm oro ẹnịmde man ada ufọn ọsọk ofụri ubon. (Ephesus 5:22-24) Nte n̄wan ekpenyene ndikere ke ẹsụhọde imọ itie ke ntak emi? Baba-o. Ebe ye n̄wan ẹdi nsan̄a. Itieibuot erenowo, ke ini ẹkamade enye ke edu eke Christ, onịm ibat ibat ukpan ọnọ n̄wan esie onyụn̄ anamde enye enyene ediwak ifet ndikụt mme ukeme esie. (Ephesus 5:25, 31) “Enyene ido an̄wan” eke Mme N̄ke ibuot 31 ọkọyọhọ ye ediwak inem inem ye n̄kpọsọn̄ utom. Nte an̄wan̄ade, ndisụk ibuot nnọ ebe esie ikadaha edikpu isọk enye.—Mme N̄ke 31:10-29.
Kpasụk ntre, ufan̄ idụhe ke esop Christian inọ n̄wan ndinọ irenowo oro ẹdotde ndausụn̄. (1 Corinth 14:34; 1 Timothy 2:11, 12) Nte iban Christian ẹkpenyene ndiyat esịt ke idak ukpan oro? Baba-o. Ata ediwak ẹwụt esịtekọm ke ndikụt nte ẹsede ẹban̄a ikpehe utom Christian emi ke usụn̄ eke ukara Abasi. Mmọ ẹkop idatesịt ndibọ ufọn nto ukpeme ye ukpepn̄kpọ mbiowo oro ẹmekde ẹnyụn̄ ẹsịn idem ke akpan utom eke edikwọrọ ikọ ye edinam mbet. (Matthew 24:14; 28:19, 20) Iban Christian ẹnam ekese ke afan̄ emi, ndien emi anam mmọ ẹnyene ukpono ke enyịn Jehovah Abasi.—Psalm 68:11; Mme N̄ke 3:35.
Mme Ukpan Ẹnọde N̄kparawa Owo
N̄kparawa owo n̄ko ẹsiseme ndusụk ini ẹte ke uwem mmimọ ẹtie ukpan ukpan akaha, ediwak ini ke ntak ẹmi mmọ ẹdude ke idak itie odudu ete ye eka mmọ. Edi emi n̄ko ekem ye N̄wed Abasi. (Ephesus 6:1) Utu ke ndikop iyatesịt mban̄a mme ukpan oro ete ye eka ẹdoride mmọ, n̄kparawa Christian oro ẹnyenede ibuot ẹwụk ntịn̄enyịn ke ndidara mme ifụre oro ẹnyenede—ẹwakde ndisịne edibọhọ mme ndodobi mbiomo. Ntem mmọ ẹkeme ndida odudu ye mme idaha ini uyen mmọ ntịm idem nnọ uwem akwaowo.
Akani esenyịn circuit kiet ke Brazil otịm eti eyeneren isua 12 ke ekpri otu oro odude nsannsan emi ẹkedoride ukpan ke se enye ekemede ndinam. Owo oro ekesede aban̄a mme n̄wetnnịm n̄kpọ esop ama esịn idem ke utom idịbi udia inyụn̄ ikemeke ndinọ otu oro eti ntịn̄enyịn, edi enye ama anam ndutịm akparawa emi ndin̄wam enye. Enye ama ọfiọk ebiet emi kpukpru mme babru ẹkedude onyụn̄ esidu ke idaha kpukpru ini ndinọ un̄wam. Udọn̄ esie ama akama nsịnudọn̄, enye okonyụn̄ edi ata nsan̄a ke utom an̄wautom. Idahaemi akparawa oro edi ebiowo oro ẹmekde.
Ediwak idaha ẹdu oro ẹkemede ndinịm adan̄a ke ifụre oro owo enyenede. Udọn̄ọ akpan ndusụk owo ndinam se ẹkpenamde. Ndusụk owo ẹdụn̄ ke ubon oro abaharede ndien mme n̄kpọ oro nsan̄andọ oro mînịmke ke akpanikọ oyomde oto mmọ onịm adan̄a ke ifụre mmọ. Ke adan̄aemi mbon oro ẹdude uwem ye mme ukpan ẹkemede ndiyom mme n̄kpọ ẹkpụhọde, mmọ ẹkeme ndisụk ndu uwem oro ẹkopde uyụhọ. Magazine emi esisịne ediwak mbụk ẹban̄ade utọ mbon oro ẹdide ata n̄kpọ nsịnudọn̄ ẹnọ mmọ en̄wen ke ntak emi mmọ ẹberide edem ke Jehovah ẹnyụn̄ ẹdade mme idaha mmọ ẹnam n̄kpọ ke mfọnn̄kan usụn̄.
Ke etịn̄de aban̄a ọsọ idaha oro okodude ke eyo esie, apostle Paul ama ọdọhọ ete: “Nte ẹkekot fi ke adan̄aemi edide ofụn? Kûkere; edi edieke ekemede ndiwọrọ ufụn, da ifet oro nyan̄a idem.” (1 Corinth 7:21) Nso ekikere oro adade ukem ukem ke emi edi ntem! Ndusụk idaha ẹsikpụhọde. N̄kparawa owo ẹsikọri ẹwọrọ owo. Ndusụk ini mme nsan̄a oro ẹkesịnde ubiọn̄ọ ẹsinyịme akpanikọ. Ẹdiọn̄ọ ẹte ke mme idaha ndutịm uforo ẹsifọn ẹkan. Mbonudọn̄ọ ẹkeme ndikop nsọn̄idem. Ke mme idaha eken, ekeme ndidi mme n̄kpọ idikpụhọkede tutu obufa ererimbot Jehovah edi. Nte ededi, nso ke owo edinyene oto edikop editịmede esịt sia enye mîkemeke ndinam se mbon en̄wen ẹkemede ndinam?
Nte akanam afo emese nte mme inuen ẹfede ke ikpaenyọn̄ onyụn̄ ama uyai ye ifụre oro mmọ ẹnyenede ke ndife? Eyedi emekere nte ekpedide afo emekeme ndife ntre. Ọfọn, afo ukemeke ndien tutu amama udûkemeke ndife nte inuen ẹfede! Edi eyedi afo ukụnike uban̄a oro. Utu ke oro, afo omokop idatesịt ke ukeme oro Abasi ọnọde fi. Afo omodomo etieti ndisan̄a ke iso isọn̄. Kpasụk ntre, se ededi oro idaha nnyịn edide ke uwem, edieke nnyịn iwụkde ntịn̄enyịn ke se nnyịn ikemede ndinam utu ke ndikop editịmede esịt ke se nnyịn mîkemeke ndinam, uwem eyenyene uyụhọ, ndien nnyịn iyekop idatesịt ke utom Jehovah.—Psalm 126:5, 6.
[Ndise ke page 28]
Nte etie fi ke idem nte ke mme ete ye eka fo ẹsịn ọkọ ẹkan fi ẹkụk?