Ntak Emi Ndịk Anamde Ererimbot?
ANIE oyom ndidụn̄ ke ndịk? Ukeuke owo oyom ifụre, ye unana n̄kpọ ndidịghe uwem m̀mê mme inyene esie. Ntem, ediwak owo ẹsiwọrọ ẹkpọn̄ mme ikpehe oro ubiatibet okponde. Edi, mme n̄kpọ oro anamde ndịk odu ẹdodu ke kpukpru ebiet.
Mme ndịk otode mme n̄kpọekọn̄ nuclear ye mme unọmọ otode ukwak usio odudu nuclear esịn ubonowo ndịk nsobo ke idem. Afai ndikọri anam ndịk okpon. Ediwak owo ke ẹkop ndịk nte ke AIDS eyekabade edi udọn̄ọ oro akamade n̄kpa akan ke eyo emi. Edisobo n̄kann̄kụk nnyịn esịne ke otu mme ntak ndịk eken. Ndi mme ndịk ẹmi ẹnen̄ede ẹnyene se ọwọrọde? Ndien nte nnyịn imekeme ndidori enyịn ndidu uwem ke ererimbot emi utọ ndịk oro mîdidụhe?
Se Ndịk Ofụri Ererimbot Ọwọrọde
Ntatara ndịk oro odude mfịn enyene se ọwọrọde ke ntak se ẹkebemde iso ẹtịn̄ ẹnịm ke Bible. Ke prọfesi esie aban̄ade ukperedem ini, Jesus Christ ama asiak mme idaha oro edinamde ndịk odu. Enye ọkọdọhọ ete: “Idụt eyedaha an̄wana ye idụt, obio edidem kiet eyenyụn̄ adaha an̄wan̄a ye obio edidem efen: akan̄ ye unyekisọn̄ ẹyenyụn̄ ẹdu ke nsio nsio ebiet.” Jesus n̄ko ama etịn̄ aban̄a ‘ukwan̄ido nditọt.’ Ọtọn̄ọde ke 1914, anana-mbiet ekọn̄, akan̄, mme unyekisọn̄, ye ukwan̄ido omosụn̄ọ ke akwa ndịk ye editaba uwem.—Matthew 24:7-14.
Idem edu mme owo anam ndịk ọkọri mfịn. Ke 2 Timothy 3:1-4, nnyịn ikot mme ikọ prọfesi apostle Paul ite: “Ndiọk eyo eyedu ke ukperedem ini. Koro mme owo eyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄, ẹsọn̄ ibuot ye ete ye eka, ẹnana esịtekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ẹbiari, ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde; mmọ edi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi.” Sia mme utọ owo ẹmi ẹkande nnyịn ẹkụk ke ukperedem ini emi, eyịghe idụhe ndịk odude ntem!
Se Ererimbot Emi Ekemede Ndidori Enyịn Mban̄a
Jesus ekemen ini emi odomo ye ukperedem ini eke ererimbot eyo Noah. Nte eyịghe mîdụhe, ndịk ama okpon ini oro, koro n̄wetnnịm n̄kpọ eke mbụk Bible ọdọhọ ete: “Ererimbot etie oburobụt ke iso Abasi, afai onyụn̄ ọyọhọ ke ererimbot.” Ntre, “Abasi ọdọhọ Noah, ete, Utịt kpukpru obụkowo emedi ke iso mi, koro oto mmọ afai ọyọhọ ke isọn̄.” (Genesis 6:11, 13) Afai ama okpon ke idiọk ererimbot oro tutu Abasi ada enye okosịm utịt ke Ukwọ ofụri ererimbot. Ke ntak ima, nte ededi, Jehovah Abasi ama onịm edinen owo oro Noah ye ubon esie uwem.—2 Peter 2:5.
Nso ke ererimbot afai oro odude kemi ke ntre okpodori enyịn ndikụt? Ọfọn, Abasi asasua afai afai unana ediwụt edikere mban̄a nnọ mfọnọn̄kpọ mbon efen. Ẹkụt emi ke mme ikọ andiwet psalm emi: “Jehovah odomo edinen owo: ndien ama edi idiọkowo, ye owo eke amade afai, ukpọn̄ esie asua mmọ.” (Psalm 11:5) Jehovah ama ada utịt ọsọk ererimbot afai eke eyo Noah. Ntre, ndien, nte nnyịn ikpodorike enyịn Abasi ndida utịt nsọk ererimbot emi enyene-ndịk afai ọnọmọde mi?
Abasi ama ọnọ apostle Peter odudu spirit nditịn̄ mban̄a edidu Christ ndinyụn̄ ntịn̄ prọfesi mban̄a nsobo idiọk ererimbot emi odude kemi. Enye ekewet ete: “Ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọkitọn̄ mmọ, ẹnyụn̄ ẹdọhọ ete, Edidi eke Enye ọkọn̄wọn̄ọde ete iyedi enye? koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.” Ekem Peter ama ada ikọ oro “ikpaenyọn̄” ndida nnọ ndutịm anana mfọnmma ukara emi akarade ubonowo ye ikọ oro “isọn̄” ndida nnọ idiọk n̄kaowo. Enye ọkọdọhọ ete, “Koro ẹkoi ẹfre ete, tutuko ikpaenyọn̄ ama odu, ye isọn̄ emi ikọ Abasi okosiode ke mmọn̄ owụk, onyụn̄ adade mmọn̄ obot; ndien edi mmọn̄ ke ẹkeda ẹfụk ẹnyụn̄ ẹsobo ererimbot [eyo Noah] emi okodude adan̄aoro. Edi ama edi ikpaenyọn̄ ye isọn̄ emi ẹdude kemi, ikọ Abasi okomụm mmọ onịm ọnọ ikan̄; ekpeme mmọ onịm ọnọ usen eke Abasi edikpede ikpe ye mmọemi mîbakke Enye, edinyụn̄ osobo mmọ.”—2 Peter 3:3-7.
Ke ukem usụn̄ oro, Paul ama owụt nte ke Christ ye n̄kpọsọn̄ angel esie “[eyedisio] usiene ọnọ mmọ emi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus; emi . . . ẹdibọ ufen nsinsi nsobo.” (2 Thessalonica 1:6-9) Akpatre n̄wed Bible etịn̄ aban̄a editan̄ mme idụt mbok nnọ “ekọn̄ akwa usen Abasi, Andikara kpukpru n̄kpọ” onyụn̄ ọsọn̄ọ ọnọ nnyịn nte ke Jehovah “[eyesobo] mmọemi ẹsobode isọn̄.”—Ediyarade 11:18; 16:14-16.
Ini Idatesịt, Idịghe Ndịk
Utu ke ndikop ndịk mban̄a se Bible ebemde iso etịn̄ aban̄a ererimbot emi, ndinen owo ẹnyene ntak ndikop idatesịt. Jehovah eyesọp ndida utịt nsọk idiọk ererimbot emi, edi ẹdinam emi ke ufọn mbon oro ẹmade edinen ido. Nso iditiene utịt oro Abasi edidade ọsọk editịm n̄kpọ emi odude kemi? Kamse, obufa editịm n̄kpọ ke idak Obio Ubọn̄ Abasi eke heaven, emi Jesus ekekpepde mme anditiene enye ndibọn̄ akam mban̄a! Enye ọkọdọhọ ete: “Ẹbọn̄ akam ntem ndien, ete, Ete nnyịn emi odude ke heaven: yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Nso mme ukpụhọde ke ẹkeme ndidori enyịn mban̄a ke ini ẹdinamde uduak Abasi ke isọn̄?
Ekọn̄ ye mme oyomonsia esie eyetre. Psalm 46:9 ọdọhọ ete: “Enye [Jehovah Abasi] anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat: eyenyụn̄ ọfọp mme chariot [ekọn̄] ke ikan̄.” Ndien mme owo “ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe.”—Micah 4:4.
Mme akama n̄kpa udọn̄ọ idinamke ẹkop ndịk inyụn̄ isobo uwem aba. Un̄wọn̄ọ Abasi edi: “Andidụn̄ ididọhọke ite, Ndọdọn̄ọ.” (Isaiah 33:24) Nso ntak ndikop idatesịt ke emi edi ntem!
Mme ndịk ẹtode ubiatibet ye afai n̄ko ẹdidi n̄kpọ eset. Psalm 37:10, 11 ọn̄wọn̄ọ ete: “Osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”
Didie ke ata emem ye ifụre ẹdida itie ndịk eke eyomfịn? Edibe ke ubọk edinen ukara kiet—kpa Obio Ubọn̄ Abasi. Kaban̄a eyo nnyịn, Daniel 2:44 ọdọhọ ete: “Ke eyo ndidem oro, Abasi enyọn̄ eyenam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye eyenuak onyụn̄ ama kpukpru mme idụt ẹmi, ndien enye eyeda ke nsinsi.” Edidem oro Jehovah emekde, kpa Jesus Christ, ‘enyene ndida ubọn̄ tutu Abasi onụk kpukpru mme asua Esie esịn ke idak ikpat.’ (1 Corinth 15:25) Ukara Tọsịn Isua eke Jesus eyenam akpa uduak Abasi edide ndinam mme okop idatesịt owo ẹdụn̄ ke paradise isọn̄ ke nsinsi osu.—Luke 23:43; Ediyarade 20:6; 21:1-5.
Ke Paradise isọn̄ oro, eti ndịk kiet edidu. Enye edidi “uten̄e Jehovah.” (Mme N̄ke 1:7) Ke akpanikọ, nnyịn ikpenyene ndinyene ndịk emi idem idahaemi, koro enye edide ntotụn̄ọ ukpono ye uten̄e emi asan̄ade ye mbak ediyat Abasi esịt ke ntak emi nnyịn iwụtde esịtekọm iban̄a ima mfọnido ye eti ido esie. Ndịk emi oyom edinyene ọyọhọ mbuọtidem ke Jehovah ye edikop item nnọ enye ke edinam akpanikọ.—Psalm 2:11; 115:11.
Mme enyene-ndịk n̄kpọntịbe ẹnịm mmọemi idiọn̄ọ nte ukperedem ini. Nte ededi, edieke nnyịn iwụtde ima oro inyenede inọ Abasi, nnyịn imekeme ndikop idatesịt utu ke ndikop ndịk. Mme prọfesi Bible ẹwụt nte ke nsobo emi Abasi edisobode ererimbot emi emekpere. Obufa ererimbot eke edinen ido oro Jehovah Abasi ọkọn̄wọn̄ọde eyeda itie esie. (2 Peter 3:13) Ke akpanikọ, ke idak ukara Obio Ubọn̄, idibịghike ererimbot oro idiọk ndịk mîdidụhe aba eyedu.
[Ekebe ke page 6]
ODUDU EMI N̄WED KIET ENYENEDE
TOMASZ, ekpri akparawa emi otode Poland, ama odụk mfịna ibet emi akanamde enye efehe ọkpọn̄ idụt oro. Ke ọfiọn̄ itiokiet enye odụk n̄kpọisan̄ ke mfọn ebe ke ofuri Europe, edede idap ke ataya onyụn̄ anamde nsio nsio utom. Kan̄a kemi, mbume kiet ama odu enye ke ekikere kpukpru ini: Nso idi uduak uwem?
Ẹma ẹbọrọ mbume Tomasz ke ini ẹkenọde enye idem Enyọn̄-Ukpeme kiet ke usem Poland. Enye ama okot n̄wed emi ediwak ini onyụn̄ okụt ete ke magazine emi ama esịne akpanikọ oro imọ ikoyomde. Tomasz ama odụk n̄kpọisan̄ aka ọfis n̄kọk itieutom Watch Tower ke Selters/Taunus, Germany, emi edide kilomita 200. Ke osịmde ke mbubịteyo Monday, enye ama osio magazine Enyọn̄-Ukpeme esie anyan onyụn̄ ọdọhọ ete: “Nyema owo anam se isịnede ke magazine emi enen̄ede an̄wan̄a mi. Nso ke oyom nnam?”
Ke mbubịteyo oro, Mme Ntiense Jehovah iba ẹma ẹnyene nneme ye Tomasz ẹban̄a uduak uwem, ẹkamade Bible nte isọn̄ nneme mmọ. Ke enyenede udọn̄ ndikpep ekese n̄kpọ, Tomasz ama esifiak aka ọfis n̄kọk itieutom kpukpru usen ke urua oro, ekpepde Bible ye n̄wed Afo Emekeme Ndidu Uwem ke Nsinsi ke Paradise ke Isọn̄.
Tomasz ama ebiere ndifiak nnyọn̄ Poland, okposụkedi enye ekemede ndisobo mme mfịna do. Ntre, ke Friday, n̄kpasịp usen inan̄ ke enye ama ekedisịm ọfis n̄kọk itieutom Selters, Tomasz ama adaha aka obio emana esie. Enye inikiet inikiet ama ọtọn̄ọ ndikpep n̄kpọ ye Mme Ntiense Jehovah ke Poland. Tomasz ama anam usọp usọp n̄kọri onyụn̄ ọtọn̄ọ nditịn̄ nnọ mbon en̄wen mban̄a se enye ekekpepde ye ifịk. Ke October 1993, ọfiọn̄ inan̄ kpọt tọn̄ọ nte enye akaka Selters ke akpa ini, enye ama ana baptism nte kiet ke otu Mme Ntiense Jehovah.
Idem Enyọn̄-Ukpeme kiet kpọt ama an̄wam akparawa emi ndidụn̄ọde uduak uwem!
[Ndise ke page 7]
Ke idak ukara Obio Ubọn̄ ke ubọk Jesus Christ, tutu amama ndịk idifiakke inam ererimbot aba