Ndikụt Ukpọhọde Ima Nditọete

“Ẹdian . . . ima nditọete ke uten̄e Abasi.”—2 PETER 1:5-7, NW.

1. Nso idi kiet ke otu mme akpan ntak emi mboho ikọt Jehovah ẹsidide mme edinam inemesịt ntre?

INI kiet ko ke edem abiaibọk usọbọ kiet oro mîkedịghe kiet ke otu Mme Ntiense Jehovah ama odụk edinam ukụre ukpep eyen esie an̄wan ke Watch Tower Bible School of Gilead, ke ebiet emi enye ọkọbọde ukpep isụn̄utom. Okop-inemesịt akwa otuowo emi ama otịm otụk eren emi ke idem tutu eyedi se enye ọdọhọde ke anaedi mbon ẹmi inyeneke ọkpọsọn̄ mfịna. Nso ikanam akwa otuowo ẹmi ẹkop inemesịt ntre? Ke ukem usụn̄ oro, nso isinam ofụri mboho ikọt Jehovah, ke mme esop, ke mme mbono circuit, ye ke mme mbono district, edi mme edinam inemesịt? Nte isidịghe ima nditọete oro mmọ ẹsiwụtde ẹnọ kiet eken? Nte eyịghe mîdụhe, ima nditọete edi ntak kiet emi esinamde ẹdọhọ ke idụhe otu ido ukpono efen oro okopde inem uwem, inemesịt, ye uyụhọ oto ido ukpono nte eke Mme Ntiense Jehovah.

2, 3. Ewe ikọ Greek iba ẹtịn̄ ẹban̄a nte nnyịn ikpekerede iban̄a kiet eken, ndien nso idi san̄asan̄a edu mmọ?

² Nnyịn ikpenyene ndidori enyịn ndikụt utọ ima nditọete oro ke ikerede iban̄a mme ikọ apostle Peter ke 1 Peter 1:22: “Sia mbufo ẹma ẹkeda nsụkibuot ẹnọ akpanikọ ẹnam ukpọn̄ mbufo ẹsana, ẹkeme ndinyene ata ima nditọete, ẹsọn̄ọ ẹma kiet eken ke ofụri esịt.” Kiet ke otu akpan n̄kpọ ke ikọ Greek oro ẹkabarede “ima nditọete” mi edi phi·liʹa (ima iman). Se enye ọwọrọde enyene n̄kpet n̄kpet ebuana ye se a·gaʹpe ọwọrọde, kpa ikọ emi ẹsiwakde ndikabade nte “ima.” (1 John 4:8) Ke adan̄aemi ẹsiwakde ndida ima nditọete ye ima ntịn̄ ikọ ke ukem usụn̄, mmọ ẹnyene mme edu oro ẹdide san̄asan̄a. Nnyịn ikpemenke kiet itịn̄ n̄kpọ iban̄a eken, nte ediwak mme andikabade Bible ẹnamde. (Ke ibuotikọ emi ye ke enyeoro etienede, nnyịn iyeneme iban̄a ikọ emi kiet kiet.)

³ Kaban̄a ukpụhọde oro odude ke ufọt ikọ Greek iba ẹmi, eyen ukpepn̄kpọ kiet ọkọdọhọ ete ke phi·liʹa edi “ata ikọ oro esịnede ufiop ye n̄kpet n̄kpet ebuana ye ima iman.” Ke n̄kan̄ eken, a·gaʹpe enyene ekese n̄kpọ ndinam ye ekikere. Ntem ke adan̄aemi ẹdọhọde nnyịn inyene ima (a·gaʹpe) inọ mme asua nnyịn, nnyịn inyeneke ima iman inọ mmọ. Ntak-a? Koro “idiọk nsan̄a ababiat eti ido.” (1 Corinth 15:33) N̄kpọ efen oro owụtde ke ukpụhọde odu edi mme ikọ apostle Peter oro: “Ẹdian . . . ima ke iman [“ima nditọete,” NW].”—2 Peter 1:5-7; men John 21:15-17 domo.a

Mme Uwụtn̄kpọ Ata San̄asan̄a Ima Nditọete

4. Ntak emi Jesus ye John ẹkenyenede san̄asan̄a ima nditọete ẹnọ kiet eken?

⁴ Ikọ Abasi ọnọ nnyịn ediwak nti uwụtn̄kpọ ata san̄asan̄a ima nditọete. San̄asan̄a ima emi itoho ntak ndusụk udọn̄ ibio ini edi ọkọn̄ọ ke esịtekọm oro ẹnyenede ẹnọ mme edu n̄wọrọnda edu. Nte eyịghe mîdụhe mfọnn̄kan uwụtn̄kpọ oro ẹtịmde ẹdiọn̄ọ edi enyeoro Jesus Christ ekenyenede ọnọ apostle John. Ye unana mbụme, Jesus ama enyene ima nditọete ọnọ kpukpru mme apostle esie oro ẹkenamde akpanikọ, ndien oro ekedi ye eti ntak. (Luke 22:28) Usụn̄ kiet oro enye okowụtde emi ekedi ke ndiyet mmọ ukot, ke ntre ọnọde mmọ ukpepn̄kpọ nsụhọdeidem. (John 13:3-16) Edi Jesus ama enyene san̄asan̄a ima iman ọnọ John, emi enye John eketịn̄de aban̄a ndien ndien. (John 13:23; 19:26; 20:2) Kpa nte Jesus ekenyenede ntak ndiwụt ima iman nnọ mme mbet ye mme apostle esie, etie nte John ama enen̄ede ọnọ Jesus ntak ndinyene san̄asan̄a ima iman nnọ enye sia enye okotịmde ama Jesus. Nnyịn imekeme ndikụt emi nto mme uwetn̄kpọ John, ke Gospel esie ye mme leta eke odudu spirit esie. Adan̄a ediwak ini didie ntem ke enye asiak ima ke mme uwetn̄kpọ oro! N̄kponn̄kan usụn̄ oro John akadarade aban̄a mme edu eke spirit oro Jesus ekenyenede edi se ẹkụtde ebe ke se enye ekewetde ke John ibuot 1 ye 13 osịm 17, ọkọrọ ye editịn̄ oro enye eketịn̄de n̄kpọ ndien ndien otụk uwem Jesus mbemiso ekedide owo.—John 1:1-3; 3:13; 6:38, 42, 58; 17:5; 18:37.

5. Nso ke ẹkeme nditịn̄ mban̄a san̄asan̄a ima nditọete oro Paul ye Timothy ẹkenyenede ẹnọ kiet eken?

⁵ Kpasụk ntre, nnyịn ikpofụmike ata san̄asan̄a ima nditọete oro apostle Paul ye nsan̄a Christian esie Timothy ẹkenyenede ẹnọ kiet eken, emi, ke akpanikọ, ọkọkọn̄ọde ke esịtekọm oro mmọ ẹkewụtde ẹnọ edu kiet eken. Mme uwetn̄kpọ Paul ọdọn̄ọ nti ikọ itoro ẹban̄a Timothy, utọ nte: “Koro nnyeneke owo eke ebietde enye, eke edikerede n̄kpọ mbufo ke akpanikọ. . . . Mbufo ẹmefiọk nte ẹdomode enye ẹse ẹte, nte eyen asan̄ade ye ete anam utom, ke enye ama asan̄a ye ami asuan gospel.” (Philippi 2:20-22) Ekese ọkpọkpọ editịn̄ ntụk ẹdu ke mme n̄wed oro enye ẹkewetde ọnọ Timothy oro ẹwụtde ufiop ufiop ima iman oro Paul ekenyenede ọnọ Timothy. Ke uwụtn̄kpọ, kere ban̄a 1 Timothy 6:20: “O Timothy, kpeme se ẹkeyakde ẹsịn fi ke ubọk.” (Se n̄ko 1 Timothy 4:12-16; 5:23; 2 Timothy 1:5; 3:14, 15.) Ẹkeme ndikụt ima nditọete oro Paul ekenyenede ọnọ akparawa emi akpan akpan ke ẹmende mme leta oro Paul ekewetde ọnọ Timothy ẹdomo ye leta oro enye ekewetde ọnọ Titus. Anaedi ama otụk Timothy ke idem ukem ntre aban̄a itie ufan mmọ, nte ẹkemede ndikụt nto mme ikọ Paul ke 2 Timothy 1:3, 4: “Sia mmendopke nditi fi ke akam mi . . . ke ọdọdọn̄ mi ndikụt fi, ke adan̄aemi ntide mmọn̄eyet fo, man nyọhọ ye idatesịt.”

6, 7. Nso ntụk ke David ye Jonathan ẹkenyene ẹnọ kiet eken, ndien ntak-a?

⁶ N̄wed Abasi Usem Hebrew n̄ko ọnọ nti uwụtn̄kpọ, utọ nte eke David ye Jonathan. Nnyịn ikot ite ke David ama okowot Goliath, “ukpọn̄ Jonathan eyịre ye ukpọn̄ David, Jonathan onyụn̄ ama enye nte ukpọn̄ esiemmọ.” (1 Samuel 18:1) Nte eyịghe mîdụhe, esịtekọm oro enye ekenyenede aban̄a uwụtn̄kpọ ifịk oro David ekenyenede ọnọ enyịn̄ Jehovah ye enye ndiwọrọ ye unana ndịk n̄kosobo ye n̄kokon̄ Goliath akanam Jonathan enyene san̄asan̄a ima nditọete ọnọ David.

⁷ Jonathan ama enyene utọ ima iman oro ọnọ David tutu eyedi se esịnde uwem esie ke itiendịk ke ndinyan̄a David nsio ke ubọk Edidem Saul. Ikodụhe ini ndomokiet oro Jonathan akayatde esịt aban̄a David ndidi enyeemi Jehovah emekde nte udiana edidem Israel. (1 Samuel 23:17) David ama enyene ukem ntotụn̄ọ ima iman oro ọnọ Jonathan, nte ẹkụtde ẹto se enye eketịn̄de ke ini ekesemede aban̄a n̄kpa Jonathan: “Esịt ayat mi aban̄a fi, eyenete mi Jonathan; afo ama enem mi etieti: ima oro afo akamade mi edi utịbe, akan ima iban.” Ke akpanikọ, ntotụn̄ọ esịtekọm ama onịm itie ebuana mmọ idiọn̄ọ.—2 Samuel 1:26.

8. Ewe iban iba ẹkewụt san̄asan̄a ima nditọete ẹnọ kiet eken, ndien ntak-a?

⁸ Nnyịn imenyene n̄ko eti uwụtn̄kpọ ke N̄wed Abasi Usem Hebrew iban̄a san̄asan̄a ima nditọete emi akabuanade iban iba, Naomi ye ebeakpa an̄wan eyen esie Ruth. Ti mme ikọ oro Ruth eketịn̄de ye Naomi: “Kûkpe mi ubọk, ete nnyọn̄ n̄kpọn̄ fi, ntre nditiene fi: koro nyeka ke ebiet eke afo akade; nyenyụn̄ ndụn̄ ke ebiet eke afo odụn̄de: orụk fo eyedi orụk mi, Abasi fo eyenyụn̄ edi Abasi mi.” (Ruth 1:16) Nte nnyịn ikpebiereke nte ke Naomi, ebede ke eduuwem esie ye enye nditịn̄ mban̄a Jehovah, ama an̄wam ke ndidemede esịtekọm oro Ruth ekenyenede?—Men Luke 6:40 domo.

Uwụtn̄kpọ Apostle Paul

9. Nso iwụt nte ke Paul ekedi eti uwụtn̄kpọ kaban̄a edinyene ima nditọete?

⁹ Nte nnyịn ima ikokụt, apostle Paul ama enyene ata san̄asan̄a ima nditọete ọnọ Timothy. Edi enye n̄ko ama onịm n̄wọrọnda uwụtn̄kpọ ke ndiwụt ufiop ufiop ima nditọete nnọ nditọete esie ke ofụri ofụri. Enye ama ọdọhọ mbiowo ẹketode Ephesus ete ke “ofụri isua ita n̄ketreke nditeme kpukpru owo ke okoneyo ye uwemeyo ye mmọn̄eyet.” Ufiop ufiop ima nditọete? Eyịghe idụhe iban̄a oro! N̄ko mmọ ẹma ẹkere ke ukem usụn̄ oro ẹban̄a Paul. Ke ẹkopde ete ke mmimọ idikwe enye aba, “kpukpru mmọ ẹtua etieti, ẹnyụn̄ ẹwan̄a Paul ke itọn̄ ẹtịm enye inua.” (Utom 20:31, 37) Nte ima nditọete oro ọkọkọn̄ọde ke esịtekọm? Ih! Ẹkụt ima nditọete esie n̄ko ke mme ikọ esie ke 2 Corinth 6:11-13: “Imatat inua itịn̄ ikọ an̄wan̄wa inọ mbufo, O mbon Corinth; imenyene in̄wan̄în̄wan̄ esịt ye mbufo. Idịghe nnyịn inam esịt afaha mbufo, edi unana mbọm anam esịt mbufo afaha nnyịn. Ẹnọ nnyịn usiene eke ekemde se inọde mbufo (ntịn̄ emi nte etịn̄de ẹnọ nditọwọn̄), ẹnyene in̄wan̄în̄wan̄ esịt ye nnyịn.”

10. Nso unana ima nditọete akada okosụn̄o ke Paul nditịn̄ mme idomo oro okosịmde enye ke 2 Corinth ibuot 11?

¹⁰ Nte an̄wan̄ade, ediwak mbon Corinth ikenyeneke ima nditọete oro owụtde esịtekọm oro mmọ ẹkpenyenede ẹnọ apostle Paul. Ntre, ndusụk mmọ ẹma ẹseme ẹte: “N̄wed esie ẹdobi ẹnyụn̄ ẹsọn̄; edi enye ke idemesie edi mmemmem, ikọ inua esie inyụn̄ idịghe n̄kpọ.” (2 Corinth 10:10) Oro edi ntak Paul eketịn̄de aban̄a “mme akakan apostle” mmọ okonyụn̄ edide se ẹnụkde nditịn̄ mban̄a mme idomo oro enye ọkọyọde, nte ẹwetde ke 2 Corinth 11:5, 22-33.

11. Nso n̄kpọ ntiense idu kaban̄a ima oro Paul ekenyenede ọnọ mme Christian ke Thessalonica?

¹¹ Ufiop ufiop ima nditọete oro Paul ekenyenede ọnọ mbon oro enye ọkọkwọrọde ikọ ọnọ ana in̄wan̄în̄wan̄ akpan akpan ke mme ikọ esie ke 1 Thessalonica 2:8: “Koro mbufo ẹdọn̄de nnyịn etieti, nnyịn ikụt inem, idịghe ke edinọ mbufo gospel Abasi ikpọn̄, edi ke edinyụn̄ nyak ukpọn̄ nnyịn nde nnọ mbufo, sia imade mbufo etieti.” Ke akpanikọ, enye ama enyene utọ ima nditọete emi ọnọ mbufa nditọete ẹmi tutu ke ini enye mîkekemeke ndime aba—enye ye ọkpọsọn̄ udọn̄ oyom ndifiọk nte mmọ ẹyọde ukọbọ—enye ama osio Timothy ọdọn̄, emi ọkọnọde eti ntọt oro ekenemde Paul etieti. (1 Thessalonica 3:1, 2, 6, 7) Insight on the Scriptures etịn̄ nte enemde ete: “N̄kpet n̄kpet mbọbọ ima nditọete ama odu ke ufọt Paul ye mbon oro enye ọkọkwọrọde ikọ ọnọ.”

Esịtekọm—Ukpọhọde Ima Nditọete

12. Nso ntak ẹdu ẹnọ nnyịn ndiwụt ufiop ufiop ima nnọ nditọete nnyịn?

¹² Ye unana nditetịn̄, ukpọhọde ima nditọete edi esịtekọm. Nte kpukpru mme asan̄autom Jehovah oro ẹma ẹkeyak idem ẹnọ inyeneke mme edu oro nnyịn iwụtde esịtekọm iban̄a, oro okponụkde nnyịn ndiwụt ima nditọete, anamde nnyịn ima mmọ? Kpukpru nnyịn ibemiso iyom Obio Ubọn̄ Abasi ye edinen ido esie. Kpukpru nnyịn in̄wana ọkpọsọn̄ en̄wan ndibiọn̄ọ ọsọ asua ita oro nnyịn inyenede: Satan ye mme demon esie, idiọk ererimbot emi odude ke idak odudu Satan, ye mme ndammana udọn̄ ibụk eke anamidiọk ikpọkidem. Nte nnyịn kpukpru ini ikpodụhe ke idaha ndikụt nte ke nditọete nnyịn ke ẹnam ukeme mmọ ke ikerede iban̄a mme idaha ẹmi? Kpukpru owo ke ererimbot ẹda ke n̄kan̄ Jehovah mîdịghe ke n̄kan̄ Satan. Nditọete nnyịn iren ye iban oro ẹma ẹkeyak idem ẹnọ ẹdu ke n̄kan̄ Jehovah, ih, ke n̄kan̄ nnyịn, ndien ke ntre ẹdot ndibọ ima nditọete nnyịn.

13. Ntak emi ikpenyenede ufiop ufiop ima inọ mbiowo?

¹³ Nso kaban̄a ediwụt esịtekọm nnọ mbiowo nnyịn? Nte nnyịn ikpenyeneke ufiop ufiop ima ke esịt nnyịn inọ mmọ ke ikerede iban̄a usụn̄ oro mmọ ẹnamde ọkpọsọn̄ utom ke ufọn esop? Kpa nte kpukpru nnyịn, mmọ ẹnyene nditịm n̄kpọ nnọ idemmọ ye ubon mmọ. Mmọ n̄ko ẹnyene ukem mbiomo nte nnyịn eken inyenede ke ndinam ọkpọkpọ ukpepn̄kpọ, ndidụk mme mbonoesop, nnyụn̄ mbuana ke utom ukwọrọikọ. Ke adianade do, mmọ ẹnyene mbiomo nditịm mme ikpehe edinam nnọ mme mbonoesop, ndinọ utịn̄ikọ an̄wa, nnyụn̄ nse mban̄a mme mfịna oro ẹdemerede ke esop, emi ke ndusụk ini esibuanade anyanini ukpe ikpe. Ke akpanikọ, nnyịn iyom “ndinọ orụk owo emi ukpono.”—Philippi 2:29.

Ndiwụt Ima Nditọete

14. Ewe itien̄wed Abasi owụk nnyịn ete iwụt ima nditọete?

¹⁴ Man inem Jehovah esịt, ana nnyịn iwụt ufiop ufiop udọn̄ kaban̄a ima nditọete inọ ekemmọ mme andinịm ke akpanikọ nnyịn, kpa nte Jesus Christ ye Paul ẹkanamde. Nnyịn ikot ite: “Kaban̄a [ima nditọete] ẹnyene ima oro asan̄ade ye mbọm ẹnọ kiet eken.” (Rome 12:10, Kingdom Interlinear) “Ke nditịn̄ mban̄a [ima nditọete], iyomke nnyịn iwewet n̄kpọ inọ mbufo, koro mbufo ke idem mbufo ẹdi se Abasi ekpepde ete ẹma kiet eken.” (1 Thessalonica 4:9, Int) “Ẹyak [ima nditọete] mbufo akaiso.” (Mme Hebrew 13:1, Int) Ke akpanikọ Ete nnyịn eke heaven esikop inemesịt ke ini nnyịn iwụtde ima nditọete inọ nditọ esie eke isọn̄!

15. Nso ẹdi ndusụk usụn̄ ndiwụt ima nditọete?

¹⁵ Ke eyo mme apostle mme Christian ẹma ẹnyene edu ndikọm kiet eken ye “edisana ntịminua” m̀mê “ntịminua eke otode ima.” (Rome 16:16; 1 Peter 5:14) Ke akpanikọ emi edi ediwụt ima nditọete! Mfịn, ke n̄wakn̄kan ikpehe isọn̄, edinam oro odotde akan edidi ima ima edituak inua imam esịt akpanikọ ye ufiop ufiop edikọm owo ubọk. Ke mme idụt oro ẹsemde usem Latin, utọ nte Mexico, ido ekọm odu oro ẹfatde-fat owo, emi ke akpanikọ edi ediwụt ima nditọete. Ekeme ndidi ufiop ufiop ima emi nditọete ẹmi ẹnyenede edi ubak ntak ọnọ akwa n̄kọri emi adade itie ke mme idụt ẹmi.

16. Mme ifet ewe ke nnyịn inyene ndiwụt ima nditọete ke mme Ufọkmbono Obio Ubọn̄ nnyịn?

¹⁶ Ke ini nnyịn idụkde Ufọkmbono Obio Ubọn̄, nte nnyịn imesisịn akpan ukeme ndiwụt ima nditọete? Oro eyenam nnyịn inyene mme ikọ nsịnudọn̄ nditịn̄, akpan akpan ye mbon oro ẹtiede nte ẹdu ke mfịghe. Ẹsian nnyịn ẹte “ẹsọn̄ọ mbon iduọesịt idem.” (1 Thessalonica 5:14) Ke akpanikọ oro edi usụn̄ kiet oro nnyịn ikemede ndiwụt ufiop ufiop ima nditọete. Eti usụn̄ efen edi ndiwụt esịtekọm ke eti utịn̄ikọ an̄wa oro ẹnọde, ikpehe edinam ke ndutịm oro ẹnamde mfọn mfọn, eti ukeme oro eyen Ufọkn̄wed Utom Ukara Abasi esịnde, ye ntre ntre eken.

17. Didie ke ebiowo kiet ekekeme ndibọ ima nto esop?

¹⁷ Nso kaban̄a edinọ nsio nsio owo ikot ẹdi udia ke ufọk nnyịn mîdịghe n̄kpri udia nneminua ke mbonoesop okụrede edieke eyo mîkụtke ikaha? Nte nnyịn ikpenyeneke ndiyak item Jesus ke Luke 14:12-14 ọnọ ndausụn̄? Inikiet ẹma ẹmek akani isụn̄utom nte esenyịn oro etiede ibuot ke esop ke ebiet emi kpukpru mmọ eken ẹkedide mbon orụk efen. Enye ama okụt ete ke ima nditọete ikodụhe, ntre enye ama anam ndutịm ndinen̄ede idaha oro. Didie-e? Ke kpukpru Sunday, enye ama esinọ nsio nsio ubon ikot edi udia. Etisịm isua kiet, kpukpru owo ẹma ẹkeme ndiwụt enye ima nditọete.

18. Didie ke nnyịn ikeme ndiwụt ima nditọete inọ nditọete nnyịn iren ye iban oro ẹdọn̄ọde?

¹⁸ Ke ini eyenete eren m̀mê eyenete an̄wan ọdọn̄ọde, edide ke ufọk m̀mê ke ufọkibọk, ima nditọete eyenam nnyịn iwụt nte ke imekere iban̄a enye. Mîdịghe nso kaban̄a mbon oro ẹdụn̄de ke ufọk ukpeme mbonudọn̄ọ? Ntak mûnamke ọkpọkpọ ediwaha n̄kese, edinọ ikot ke urụk ukopikọ, mîdịghe ọnọ kad oro owụtde ufiop ufiop edikere mban̄a?

19, 20. Didie ke nnyịn ikeme ndiwụt nte ke ima nditọete nnyịn amatara?

¹⁹ Ke ini iwụtde utọ ima nditọete oro, nnyịn imekeme ndibụp idem nnyịn ite, ‘Nte ima nditọete oro n̄wụtde edi ubak ubak? Nte mme utọ n̄kpọ nte uduot ikpọkidem, ifiọkn̄wed, m̀mê inyene obụkidem otụk ima nditọete oro ami n̄wụtde? Nte oyom nnam ima nditọete mi atara akan, nte apostle Paul akakpakde mme Christian ke Corinth ndinam?’ Ima nditọete eyenam nnyịn inyene nnennen ekikere iban̄a nditọete nnyịn, iwụtde esịtekọm iban̄a nti n̄kpọ oro mmọ ẹnamde. Ima nditọete n̄ko eyen̄wam nnyịn ndidat esịt ke n̄kọri oro nditọete nnyịn ẹnamde utu ke ndifụbe ufụp mban̄a oro.

²⁰ Ima nditọete ekpenyene ndinam nnyịn n̄ko idu ke edidemede ndin̄wam nditọete nnyịn ke utom ukwọrọikọ. Enye ekpenyene ndidi nte kiet ke otu ikwọ nnyịn (Nọmba 92) esịnde enye:

“Nọ kpukpru mbon mmemidem un̄wam mfọnido,

Man mmọ n̄ko ẹkeme nditịn̄ ikọ ye uko.

Kûfụmi mbon oro ẹkpride ke isua,

N̄wam mmọ ẹsọn̄ idem ẹkan ndịk mmọ.”

21. Nso utịp ke nnyịn ikeme ndidori enyịn edieke nnyịn iwụtde ima nditọete?

²¹ Ntre ẹyak nnyịn ikûfre ite ke ndiwụt ima nditọete, edumbet oro Jesus eketịn̄de ke Ukwọrọikọ esie oro ke Obot abuana: “Ẹnọ, ndien ẹyenọ mbufo; ẹyedomo ọyọhọ udomo eke ẹmịn̄de osụhọde, eke ẹnyen̄ede, onyụn̄ ọyọhọde ọduọhọ, ẹsịn mbufo ke ọfọn̄. Koro udomo eke mbufo ẹdade ẹdomo ẹnọ owo, ke ẹdida ẹdomo ẹnọ mbufo.” (Luke 6:38) Nnyịn iyeda ufọn isọk idem nnyịn ke ini nnyịn iwụtde ima nditọete, iwụtde ukpono inọ mbon oro ẹdide mme asan̄autom Jehovah nte nnyịn. Ke akpanikọ inemesịt odu ọnọ mbon oro ẹmade ndiwụt ima nditọete!

[Mme Ikọ idakisọn̄]

Didie ke Afo Ọkpọbọrọ?

◻ Ewe ikọ Greek ẹnyene n̄kpọ ndinam ye ntụk nnyịn, ndien didie ke mmọ ẹnyene ukpụhọde?

◻ Nso idi ukpọhọde ima nditọete?

◻ Nso uwụtn̄kpọ N̄wed Abasi ke nnyịn inyene kaban̄a ediwụt san̄asan̄a ima nditọete?

◻ Ntak emi nnyịn ikpenyenede ufiop ufiop ima inọ nditọete nnyịn ye mbiowo?

[Ndise ke page 15]

Apostle Peter ama akpak nditọete esie ete ẹdian ima nditọete ke mbuọtidem ye mme edu Christian eken