Kpa Nte Ataktak

NTE akanam afo amanam isan̄ ebe awawa mbiet ke ndaeyo onyụn̄ okụt anana-ibat ataktak ẹfrọde ke afan̄usụn̄ emi asan̄ade? Etie nte mmọ ẹsidu ke kpukpru ebiet, okposụkedi ekemede ndidi afo ọkọnọ mmọ esisịt ntịn̄enyịn. Idem n̄kpọ, mmọ ẹsitie nte inọhọ unan ẹnyụn̄ ẹkpri ẹkaha.

Edi, se ikperede nditie nte ekpri idaha mme ataktak anam mmọ ẹdi idiọn̄ọ oro odotde ọnọ ubonowo. Okposụkedi ndusụk mme ọwọrọiso owo ẹkemede ndibat idem ke imenen̄ede idi akpan n̄kpọ, Andibot nnyịn ekere se idide isio ye oro. Isaiah prọfet esie ọkọdọhọ ete: “Enyeemi odorode ke ekara ererimbot, ndien mme andidụn̄ enye ẹbiet n̄kukun̄kpọyọriyọ [“ataktak,” NW].”—Isaiah 40:22.

Uyai, ukeme, ye ọniọn̄ Jehovah Abasi anam enye enen̄ede okon̄ akan ikpehe mme ikpîkpu owo, kpa nte owo otịmde okon̄ akan ataktak ke ifiọk ye odudu. Nte ededi, akakan edu Abasi edi ima. Ndien anana-mbiet ima esie onụk enye ndiwụk enyịn nse nnyịn, n̄n̄wam nnyịn, nnyụn̄ nnyan̄a nnyịn—edieke nnyịn imade inyụn̄ ikopde uyo esie. Jehovah anam n̄kpọ ye nnyịn ke ima, idem okposụkedi nnyịn ibietde ata n̄kpri ataktak. Andiwet psalm ọkọdọhọ ete: “Anie ebiet Jehovah Abasi nnyịn, emi odụn̄de ke enyọn̄, emi onyụn̄ osụhọrede ese n̄kpọ ke enyọn̄ ye ke isọn̄? Enye osio mme ubuene ke ntan emen.”—Psalm 113:5-7.

Nte psalm emi anamde an̄wan̄a, Jehovah ke ima an̄wam mme ubuene. Ih, Enye an̄wam mbon oro ke nsụhọdeidem ‘ẹyomde Abasi man mmọ ẹnen̄ede ẹkụt enye.’ (Utom 17:27) Mmọ oro ẹyomde Abasi—ẹnyụn̄ ẹnamde n̄kpọ esie—ẹkam ẹkabade ẹdi ọsọn̄urua n̄kpọ ke enyịn esie. (Men Isaiah 43:4, 10 domo.) Usụhọde ataktak ke ntem anam n̄kpọ nditi nnyịn mban̄a usụhọde idaha nnyịn ye ima ata ọkpọsọn̄ Andibot nnyịn, emi ọnọde mme okopitem owo itieufan esie ye mfọnido oro owo mîdotke. Nte afo ke owụt esịtekọm aban̄a ima Abasi?