Ndikụt Ata Inyene ke Hong Kong
HONG KONG edi ebiet emi ẹkemede ndinyene ediwak okụk ke ekpri ibio ini—edieke kpukpru n̄kpọ ẹfọnde ẹnọ fi. Ke isua 40 ẹmi ẹkebede m̀mê n̄kpọ ntre, obio ukara Britain oro omoto ke ekpri esụk mbehe ọkọri okosịm ata akwa odudu ndutịm uforo idịghe ke Ufọt Edem Usụk ye Edem Usiahautịn Asia ikpọn̄ edi n̄ko ke edinam mbubehe ofụri ererimbot.
Usụhọde ekọmurua tax omodụri mme esịn okụk ke mbubehe oro ẹtode esenidụt onyụn̄ esịn udọn̄ ọnọ ifịk ifịk utom oro ẹkụtde ke otu owo miliọn itiokiet ẹmi ẹdụn̄de ke Hong Kong. Se ifọnde, n̄ko, edi ebiet emi enye odude nte inuaotop ke ufọt usụk usụk China ye ikpehe Asia ye Pacific ye se ikade anyan ikan oro. Ye mme ndutịm ukaisan̄ ye eke unyene nneme eyomfịn ye ndutịm unyam n̄kpọ ke eboho ye edisosion̄o nnyam oro ẹtịmde ẹkọri, Hong Kong odu ke mben̄eidem ndinam n̄kpọ usọp usọp mban̄a se mbubehe urua ofụri ererimbot oyomde.
Unen oro ndutịm uforo okụtde ọmọnọ Hong Kong kiet ke otu n̄kon̄n̄kan idaha uduuwem ke ererimbot. Nte ededi, nte ofụri uforo obụkidem ẹmi amada uyụhọ ye inemesịt oro ebịghide ọsọk mme andidụn̄ Hong Kong? Baba, edi ndusụk owo ẹma ẹyom ẹnyụn̄ ẹkụt orụk inyene oro ọfọnde akan.
Mmọ Ẹma Ẹkụt Inyene eke Spirit
Kiet ke otu mbon oro ẹkụtde ọsọn̄urua inyene eke spirit edi Alfred emi akamanade ke Hong Kong. Enye ama enyene uforo uforo ubọkọkọ nte esenyịn n̄ka mbubehe ofụri ererimbot emi ibuot mbubehe odude ke Britain. Ukem nte ediwak owo efen ke Hong Kong, utịtmbuba esie ke uwem ekedi ndidia ediwak okụk, ndinyene ufọk idemesie, ndidia nti udia, nnyụn̄ ndu eti uwem. Ye idaha ye okụkutom esie, eketie nte enye ama osịm ofụri oro. Edi nte enye ama okop inemesịt? Alfred ekeseme ete, “Ebede ke ifiọk eyouwem mma mfiọk nte ke okụk enen̄ede enyene adan̄a esie.” Esịt ama esitịmede enye kpukpru ini aban̄a adan̄a ini oro okụk oro enye ekesibọk onịm edibịghide edieke enye atabade utom esie. Ke ini enye ekesịnde uwak ini ke utom esie, mme mfịna ubon ẹma ẹtọn̄ọ ndikọri. N̄wan esie, Emily, ama okop mfụhọ ke ini eyen mmọ ke mbuari akakpade. Enye ọkọdọhọ ete, “Mma nyom ndifiọk ebiet emi enye okodude man n̄keme ndinam n̄kpọ ndin̄wam enye.” Sia enye mîkekemeke ndinam n̄kpọ ndomokiet, enye ama enen̄ede okop mfụhọ.
Justina ama ataba ete esie ke ntọn̄ọ ntọn̄ọ isua emana. Edi ebede ke nsịnifịk esie enye ama okụre n̄wed ke ọwọrọetop Unifesiti Hong Kong. Emi ama ada okosụn̄ọ ke ukara ndinọ enye utom. Ke usem Canton ẹkot emi gum fan woon, utom eti emana—eti utom ye eti okụk. Edi, Justina ikokopke inemesịt ye uyụhọ. Enye ama esiwak ndiyịk se uduak uwem edide ye se ini iso akamade. Ebe esie, Francis, n̄ko ama esikere ete ke uwem ikenyeneke uduak. Enye okokụt idem nte idide ekpri ubak oro mîdịghe akpan n̄kpọ ke ata akamba ukwakutom, nte mîdịghe n̄kpọ ndomokiet, emi ido unam n̄kpọ oro mînyeneke utịt akarade.
Owo en̄wen edi Ricky, kpa etubom mbubehe. Okposụkedi oro enye akanamde ediwak okụk, enye ama ọtọn̄ọ ndikụt ikpehe uwem efen—ọkpọsọn̄ ndomoidem ke otu ekemmọ mbonutom ye mme mfịna ke ndọ esie. Okụk ikekemeke ndin̄wam enye ndikọk mme mfịna esie. Ye n̄wan esie, Wendy, ndinyene ifụre ọkọwọrọ eti ubọkọkọ, ediwak okụk, ye edidu uwem ke n̄kaowo oro ukara ukaraidem enyenede iwụk. Edi adan̄a anyanini didie ke mbiet ifụre esie emi edibịghi? Oro ama afịna enye koro ata idem n̄kpọ aban̄ade n̄kpa ama anam enye ekere ke uwem imọ ikenyeneke se ọwọrọde ye uduak.
David enyene mbụk esie ndinọ. Ifiọkn̄wed unifesiti esie ama anam enye enyene eti utom ye ifụre ndutịm uforo, edi enye ikokopke uyụhọ. Ntak-a? Enye ama enen̄ede emehe ye ukpepn̄kpọ edito ke unam mforo owo ye ukpepn̄kpọ akwaifiọk, enye okonyụn̄ onịm ke akpanikọ ete ke uwem ikanke se idude kemi. David ekekere ete ke imọ inyeneke n̄kpọ ndomokiet ndisak iso nse, ndien kpukpru inyene obụkidem esie ikakpanke enye ndikere ke imanana un̄wam.
Okposụkedi mme owo ẹmi ẹkenyenede nsio nsio idaha ke uwem, mmọ ẹma ẹnyene ọsọ n̄kpọ kiet. Kpukpru mmọ ẹma ẹsịm se mmọ ẹkekerede ke eyeda inemesịt ye uyụhọ edi. Nte ededi, ke ini mmọ ẹkesịmde idaha emi mmọ ẹkekerede ke idotenyịn mmimọ eyesu, uwem mmọ ekedi ikpîkpu.
Ndinyene Inyene ke N̄kan̄ Abasi
Idaha Alfred, Justina, ye mbon eken oro isụk isiakde ikụre ẹkenen̄ede ẹbiet eke owo inyene oro ke n̄ke Jesus. Enye ama ‘ọkọ inyene ọnọ idemesie, edi inyeneke inyene ke n̄kan̄ Abasi.’ (Luke 12:21) Nte ededi, ke edide n̄kpọ inemesịt, mmọ ẹma ẹkụt n̄kpọ oro ọfọnde akan—kpa uwem oro ọyọhọde ye ata inyene. Inaha mbon oro ẹyomde ata inemesịt ye uyụhọ “ẹdori enyịn ke se iyan̄ade owo nte enyene, edi ẹdori enyịn ke Abasi, emi ọnọde nnyịn kpukpru n̄kpọ uwak uwak, ete idara ke esịt.” (1 Timothy 6:17) Ih, ndidi ndifiọk ata Abasi, kpa Jehovah, nnyụn̄ n̄kọn̄ mbuọtidem mmọ ke enye ama anam ukpụhọde odu ke uwem mme owo ẹmi kiet kiet. Ẹyak nnyịn ise nte kpukpru ẹmi akasan̄ade.
Alfred ye Emily ẹma ẹkop mfụhọ ke ini eyen mmọ akakpade ke mbuari, ndien kpukpru inyene obụkidem mmọ ikekemeke ndisụhọde ubiak mmọ. Mmọ ẹma ẹsika ufọkabasi edi okosụk etie mmọ ukpọk ukpọk ke idem ẹnyụn̄ ẹnana uyụhọ. Ekem kiet ke otu Mme Ntiense Jehovah ama awaha enyịnusụn̄ mmọ onyụn̄ obụp ete: “Nso idi idotenyịn owo kaban̄a ini iso?” Alfred ama ọbọrọ nte ekemde ye se ẹkesiande enye ke ufọkabasi ẹban̄a heaven ye hell. Nte ededi, ẹma ẹwụt enye ke Bible ẹte ke mme akpan̄kpa “ifiọkke baba n̄kpọ kiet” mbon oro ẹdude ke ibuot utin̄kpọ Abasi ẹdu ke udi ubonowo ẹbet ediset ke n̄kpa. (Ecclesiastes 9:5, 10; John 5:28, 29) Emi ama esịne ifiọk onyụn̄ owụt eti ibuot ọnọ Alfred. Idahaemi enye ama ọfiọk ete ke eyen imọ ikọbọhọ ufen ke ebiet ekededi edi ke ekedede ke n̄kpa, ye idotenyịn nte ke iso-ọfọn eyefiak adiana ye ubon esie ebe ke ediset ke n̄kpa. Nso ndọn̄esịt ye nsụkesịt! Nte ini akade Alfred ye n̄wan esie ẹma ẹnyịme ukpepn̄kpọ Bible ẹnyụn̄ ẹtọn̄ọ ndisan̄a ke usụn̄ edisọn̄ọ mmụm ata inyene oro Bible ọnọde n̄kama.
Justina ama anana inemesịt ke ini enye okokpude ndikụt edu unyịmesịt ke otu ekemmọ mbonutom esie ndin̄wam ke ndise mban̄a mme owo. Nte enyene ifịk owo Catholic, enye ama okụt edikpu ke ini enye ọkọfiọkde ete ke oku ama esin̄wọn̄ sika onyụn̄ aka unek, ukem nte iren eken. Ekem enye ama osobo ye Mme Ntiense Jehovah onyụn̄ ọtọn̄ọ ndinyene mme ibọrọ N̄wed Abasi oro ọnọde uyụhọ ke ediwak mbụme. Oku ikesinọhọ baba n̄kpọ kiet ikan ekikere idemesie, ndien enye ikokûbọkede Bible ke isua 16, idem okposụkedi oro enye ekesikade ufọkabasi kpukpru ini okonyụn̄ edide ikpîkpu anamutom ke isua 10.
Nte Mme Ntiense ẹkekpepde Bible ye Justina ye Francis, ebe esie, edidianakiet mmọ eke ofụri ererimbot ke se ẹnịmde ke akpanikọ ye edinam ama otụk eren emi. Francis ama onịm ke akpanikọ ete ke Abasi odu. Kamse, oduuwem, ata Abasi ikpọn̄îkpọn̄ ekpekeme ndinyene utọ odudu oro ke idem otu mme owo eke ofụri ererimbot. Ebe ye n̄wan ẹmi ẹkekop inemesịt didie ntem nte ke mmimọ ima ikụt ata inyene!
Ricky ye Wendy ẹma ẹfiọk ẹte ke ana mmimọ inam n̄kpọ ke ini mmọ ẹkekụtde ẹte ke mmimọ nsịtnsịt ke ikenyene ikpọ ọkpọkpọ mfịna. Sia mmọ mbiba ẹma ẹkesobo ye Mme Ntiense Jehovah ke ini edem, mmọ kiet kiet ẹma ẹnam usio-ukot ndifiak nyom mmọ. Ebede ke ukeme esịt akpanikọ, Ricky ye Wendy ikekwe nti usọbọ inọ mme mfịna mmọ kpọt edi n̄ko ata inyene ke ọkpọkpọ itie ebuana ye “Abasi inemesịt,” kpa Jehovah.—1 Timothy 1:11, NW.
Uwem David n̄ko ama okpụhọde ke ini Mme Ntiense Jehovah ẹkekade ebịne enye. Ye uduak ndiyarade mme ndudue mmọ, enye ama onyịme mmọ ẹfiak ẹdi. Nte ededi, nte ini akakade, enyịn ama an̄wan̄a enye, koro enye ama ọtọn̄ọ ndikụt nte ke Bible ama enen ke n̄kan̄ ifiọk ntaifiọk, ke n̄kan̄ mbụkeset, ye ke mme usụn̄ efen. Kpukpru emi ama an̄wam David ndise Bible nte n̄wed akpanikọ oro ọkọnọde enye ata uduak ke uwem. Nso inem inem ye uforo uforo ukpụhọde ke emi ekedi ntem ọnọ enye!
Ndin̄wam Ediwak Mbon Efen Ẹkụt Ata Inyene
Ke Hong Kong emi ibatowo awakde etieti, Alfred, Emily, Justina, Francis, ye mbon eken oro ẹsiakde mi ẹdi sụk ibat ibat ke otu mbon oro ẹkekụtde ata inyene akpanikọ Bible ye mbuọtidem ke Jehovah Abasi. Ke 1992 n̄kpọ nte Mme Ntiense Jehovah 2,600 ẹma ẹbiat ofụri ibat hour oro ekekperede ndisịm 900,000 ke ndiwaha mbịne mbon Hong Kong ẹnyụn̄ ẹnịm mme ukpepn̄kpọ Bible oro ẹkewakde ẹbe 3,800 ye mmọ. Nte ededi, n̄kọri uwem ke Hong Kong edi usọp usọp, ndien mme owo inyeneke ini. Ke ntre, ke adianade ye ediwaha ke ufọk ke ufọk, mme anditan̄a Obio Ubọn̄ ẹkụt ekese unen ke unọ ikọ ntiense efak. Mmọ n̄ko ẹsisobo mme owo ke mme itieutom mmọ ke ndiwaha mbịne mme anamutom ọfis, mme anyam ufọkurua, mme ọtọin̄wan̄, ye mbon oro ẹnyọn̄de isan̄ ukọiyak ke Inyan̄ibom Edem Usụk China.
Ke akpanikọ ẹkeme ndidọhọ ke “idọk okpon, edi mme anamutom iwakke” ke Hong Kong. (Matthew 9:37) Idahaemi, ke ẹdemede ibatowo ẹnọ Mme Ntiense owo 1 enyene 2,300. Ke ẹfiọkde nte utom idọk edide usọp usọp, se ikperede owo 600 ke otu mme asuanetop Obio Ubọn̄ 2,600 do ẹdi mme asiakusụn̄, m̀mê mme ọkwọrọ eti mbụk uyọhọ-ini. Mme Ntiense Jehovah ke Hong Kong, ukem nte mbon oro ẹdude ke ebiet efen, ẹfiọk ẹte ke “ufọn Jehovah ofori owo.” (Mme N̄ke 10:22) Ntem, mmọ ke ẹnam utom ọkpọsọn̄ ndin̄wam ediwak owo efen efen ke obio uforo oro ndikụt ata inyene.
[Ndise obio ke page 23]
(Ama oyom ndikụt nte enye enen̄erede etie, se n̄wed)
INYAN̄ EDEM USỤK CHINA
CHINA
Hong Kong
Kilomita
Itiat
15
15