Mme Ntiense Jehovah ndutịm Oro Odude ke Edem Enyịn̄ Oro

KE OCTOBER 6, 1990, otuowo oro ẹkperede ndisịm 5,000 ẹma ẹsop idem ke Ufọkmbono Mme Ntiense Jehovah ke Jersey City, New Jersey, U.S.A., koro utịben̄kpọ okoyom ndida itie ke mbono ofụri isua eke Watch Tower Bible and Tract Society. Etieibuot okpokoro, John E. Barr, ama asian otuowo aban̄a edisio kaset video oro ebịghide ke minit 55 emi ẹkotde Jehovah’s Witnesses—The Organization Behind the Name. Emi ekedi akpa video oro akanam N̄ka osiode, edi ke akpanikọ idịghe akpatre.

Video emi owụt nte ẹtịmde ikọt Jehovah nditie ntiense nnọ enyịn̄ Abasi nnyụn̄ n̄kwọrọ “gospel Ubọn̄ Abasi.” (Matthew 24:14) Ẹsio ibuot itieutom ye mme n̄kpọutom ke In̄wan̄ Enyọn̄-Ukpeme ke Brooklyn, New York ẹwụt. Ẹmenam se iwakde ikan idem 500,000 ke Ikọmbakara, ndien enye omodu idahaemi (m̀mê eyedu ke mîbịghike) ke mme usem 26 efen.a

Didie ke Ẹnam N̄kpọ Ẹban̄a?

Didie ke mme owo oro mîdịghe Mme Ntiense Jehovah ẹnam n̄kpọ ẹban̄a video emi? Eren anam mbubehe kiet ekewet ete:

“Mmokụt ke ọkpọ umụm ndise emi edi mfọnn̄kan ke uduot. Ami n̄kenyene udọn̄ akpan akpan ke uyama ye usọ oro ẹdade ẹtịm mme ndise. Mma nsifre nte ke enye ekedi ọkpọ umụm ndise nnyụn̄ nsikere ke edi senima. Anaedi ọkpọ umụm ndise emi eyenen̄ede enyene ufọn ke ndinam uduak ibuot itieutom mbufo ke New York an̄wan̄a. Ẹmenam etieti ke n̄wọrọnda n̄kpọ emi.”—J. J.

Mmọ oro ẹkpepde Bible ye Mme Ntiense Jehovah ẹbọ ufọn ẹto edise video emi. Se itienede emi anam an̄wan̄a:

“Ami n̄kpep Bible ye akparawa emi edide isua 20 ke emana emi onyụn̄ akade n̄wed ke ufọkn̄wed ntaifiọk n̄kann̄kụk. Enye esikere aban̄a idaha ererimbot oro akade-kaiso ndidiọk n̄kan. Edi ke enye ama ekese ọkpọ umụm ndise emi onyụn̄ okụt ofụri ndiye n̄kparawa nditọete Bethel ẹmi ẹnyenede ata uduak ke uwem, ofụri edu esie ama okpụhọde. Enye ama odụk Usen Akpan Mbono nnyịn onyụn̄ ọdọhọ ẹkpep Bible ye imọ ikaba ke urua. Eyen ukpepn̄kpọ Bible efen, andikpep ke akamba ufọkn̄wed, ama ọbuọt video emi ndimen n̄kowụt iman esie. Mmọ ẹkekere ke Mme Ntiense Jehovah ẹdi sụk mmemmem, mbon oro owo mîmaha, ekpri esop. Idem ama akpa mmọ aban̄a uduot utom ofụri ererimbot nnyịn ye ukpụhọde oro nnyịn inamde, ekọm enyene Jehovah.”—J. B.

“Inua ikemeke nditịn̄ idatesịt oro ami n̄kokopde ke ini mmọn̄eyet idatesịt ye esịtekọm ọkọwọrọde n̄wan oro nsikpepde Bible ke enye ama ekese video emi. Enye eketịn̄ ye mmọn̄eyet ete: ‘Didie ke owo ndomokiet mîkemeke ndikụt nte ke emi edi esop ata Abasi, kpa Jehovah? Akananam n̄kọdiọn̄ọke ke mme utọ owo ẹmi ẹdu.’ Ndien ekem enye ama ọdọhọ ete: ‘Mmoyom ndida baptism.’”—C. D.

“Nnyịn imenyene ekese uforo ke ndida video emi nnam n̄kpọ ye nditọ ukpepn̄kpọ Bible. Okoneyo emi ekebede ebe owo kiet ke otu nditọ ukpepn̄kpọ Bible an̄wan mi ama awaha edi. Enye esibọbiọn̄ọ etieti. Enye ama ese video emi. Ke oro ebede enye ama obụp mme mbụme onyụn̄ ọkpọn̄ mi ye Bible ye n̄wed ukpep Bible oro Afo Emekeme Ndidu Uwem ke Nsinsi ke Paradise ke Isọn̄. Ke mbemiso enye ama ọfọp kpukpru n̄wed ukpep Bible n̄wan esie!”—D. H.

N̄kparawa owo n̄ko ẹkụt video emi nte odụride owo udọn̄, nte mme utịn̄ikọ ẹtienede mi ẹwụtde:

“Ami ndi isua itiokiet ye ubak. Ami mma mma ikpehe oro aban̄ade Bible ye ini oro mme ekebe ebede usọp usọp.”—K. W.

“N̄kpri nditọ nnyịn ẹkedọhọ ke enye ọfọn akan edinam TV ekededi oro akanam mmọ ẹkụtde.”—R. C.

“Ke ama ekese video emi ọyọhọ ikaba, eyeneren nnyịn edide isua ition, emi okowụkde ntịn̄enyịn ketket tutu okụre, ama obụp ete, ‘Nte nnyịn imekeme ndise emi kpukpru usen?’ Eyenan̄wan nnyịn edide isua ita ama osịbe odụk ete, ‘Nyom ndika Bethel nnyụn̄ n̄kanam n̄wed!’”—M. E.

“Nditọ mi, Robin ye Shannan, ẹdide isua 12 ye 9 ke emana, ẹkaiso ndibre ọkpọ umụm ndise emi mfiak mbre. Ke ekperedem eyenan̄wan mi ama ekese ọkpọ umụm ndise emi ama ọdọhọ ete, ‘Ami mmama ndisika an̄wautom. Enye akama ekese inem.’ Nnyịn ikere ite ke video emi enyene nnennen utịp ke uwem ubon nnyịn. Ọnọ nduọkodudu didie ntem ndikpọhọde edinam television oro okụtde ke inọhọ unan ndise!”—N. B.

“Ami ndi isua 13 ¹/2 ke emana. Obufa video emi anam mi mfiọk adan̄a nte ndade mme utịbe utịbe enọ ẹtode Jehovah ke mfefere n̄kpọ. Edi ifet ndidi kiet ke otu ikọt Abasi.”—K. W.

“Ami ndi isua 16 ke emana, ndien video emi an̄wam ndisọn̄ọ nsịn mi ke ekikere nte ke utom ofụri ererimbot ke ẹnam emi.”—A. M.

“Nditọ nnyịn ẹma ẹtịn̄ ẹte ke TV ofụri ini idịghe n̄kpọ aba ke enyịn mmọ nte utịp edikụt oro mmọ ẹkụtde nte ata edinọ idem inemesịt eke ukara Abasi ekemede nditie. Enye n̄ko ọmọsọn̄ọ udọn̄ mmọ ndidụk utom uyọhọ-ini.”—L. M.

Se mmọ ẹkekụtde akam edemede mmọ oro ẹma ẹkedi Mme Ntiense Jehovah ke ediwak isua.

“Edieke video emi otụkde nnyịn nte ikọt Jehovah ke idem ntre, adan̄a didie akan oro ke enye editụk mmọ efen? Ke ini editịm n̄kpọ emi ọsọn̄de akaha ndise mban̄a, ami nsio hour kiet ke ini mi n̄kese Bethel inem inem ke akwaufọk mi!”—K. B.

“Ke mma n̄kokụt ntịn̄enyịn oro ẹnọde ye edidi oro utom kiet kiet edide ata nnennen, etie nte n̄kpọ eke n̄kpodụkde ubet mi nnyụn̄ n̄ka n̄kafat n̄wed ukpep Bible mi n̄kama.”—L. P.

Nnyịn imesịn udọn̄ inọ fi, n̄ko, ndida ini nse video oro Jehovah’s Witnesses—The Organization Behind the Name. Enye eyenọ fi isio isio uduak ke uwem onyụn̄ an̄wam fi ndinyene mbuọtidem ke ini iso oro enyenede ifụre.

[Mme Ikọ idakisọn̄]