Usio-Ukot ke Usụn̄ Edifiak Ndi
‘ENYE eketịn̄ ikọ ọnọ mmọ ke n̄ke.’ Bible ke ntre etịn̄ aban̄a akpan n̄ke ita oro Jesus eketịn̄de emi ẹban̄ade mbọm—eke erọn̄ kiet oro okosopde, okụk oro okosopde, ye idiọk udọ.—Luke 15:3-32.
Ibuotikọ iba ke Enyọn̄-Ukpeme eke April 15, 1991, ama odụn̄ọde mme n̄ke oro onyụn̄ an̄wam ediwak mme andikot ẹkeme ndikụt nte ẹkemede ndiwụt mbọm mfịn. Akpan ebiet ntịn̄enyịn akaban̄a mme ekpemerọn̄ eke spirit ndibemiso nnam usio-ukot ke ndisobo mbon oro ẹkesiode ẹfep edi emi ẹkemede ndinam n̄kpọ mban̄a mfọnido eke edika n̄kese oro. Nso idi utịp ibuotikọ ẹmi ye obufa ndutịm emi?
Ibịghike ke ẹma ẹkemịn̄ ibuotikọ emi, eren kiet otode Washington, U.S.A., ama ewet ete: “Uyarade akpakịp ima mfọnido Jehovah ama edibehe ke itie udọn̄ leta mi mfịn. Mma nsụhọde ntie ye mmọn̄eyet ke enyịn mi ye idara ke esịt mi kaban̄a ndutịm ye edinen̄ede oro Ata Edikon̄ ọnọde. Edi ata edinen Abasi ikpọn̄îkpọn̄ ekeme ndinọ mbon mbieterọn̄ oro ẹma ẹkesop usụn̄ un̄wam. . . . Ih, ẹma ẹsio mi ẹfep edi ndu ke usụn̄ ndidi se ẹfiakde ẹda.” Ke October ẹma ẹfiak ẹda enye.
Edi nso kaban̄a edika n̄kese oro mbiowo iba ke esop ẹkenamde? N̄wanndọ kiet edide Christian ekewet ete: “Nyeneke ikọ ndida ntịn̄ nte etiede mi ke idem. Ẹma ẹsio ebe mi ẹfep ke n̄kpọ nte isua 13. Mbiowo ẹma ẹdi ẹdise enye, nte ẹkenọde ekikere ẹban̄a ke ibuotikọ oro. Okoneyo oro ekebede enye ke akpa ini ama aka kiet ke otu mme mbonoesop ke ediwak isua ẹma ẹkebe. Enye kemi ke an̄wana ndikpụhọde uwem esie nnyụn̄ mfiak ndi.”
Nte mme esenyịn oro ẹsan̄ade-san̄a ẹkade ẹkese mme esop, mmọ ẹsikụt mme utịp. Esenyịn circuit kiet ekewet ke ndondo emi ete:
“Ke ini ẹkesiode Enyọn̄-Ukpeme eke April 15, 1991, ediwak owo ẹma ẹkere m̀mê edinam n̄kpọ didie ye mme mbiowo oro ẹkade ẹkese. Ibọrọ amakabade ana ata in̄wan̄în̄wan̄.
“Ke circuit nnyịn, akpatre esop inan̄ oro n̄kakade n̄kese ẹma ẹnyene owo usụkkiet ẹfiakde ẹdi Ufọkmbono Obio Ubọn̄. Okposụkedi edide owo kiet kpọt ke ẹkefiak ẹda, itiaita eken ke ẹnam eti n̄kọri. Mbiowo ye ofụri owo ke esop ẹkop inemesịt ndikụt nti mbun̄wụm utom mmọ ye eti ibuot oro odude ke editiene ndausụn̄ ukara Abasi.
“Nnyịn imokop inemesịt ke eti, mbọm mbọm ndutịm emi. Nte eyenete an̄wan kiet emi ẹkefiakde ẹda ọkọdọhọde, ‘N̄kenyeneke uko ndifiak ndi ke idemmi, sia mma n̄kenyene ubiomikpe ke iso Jehovah. Edi ke ini mbiowo ẹkedide, ekedi nsịnudọn̄ nte ke oyom ami mfiak ndi.’ Ifiopesịt esie emesịn udọn̄ ọnọ esop akamba akamba.”
Idem ekpedi ediwak mbon oro ẹkekade ẹkese inamke n̄kpọ iban̄a, ke akpanikọ mbọm mbọm usio-ukot emi ẹnyene nti utịp. Ntem, ọtọn̄ọde ke September mbiowo ke esop kiet kiet ẹyefiak ẹdụn̄ọde enyịn̄ mbon oro ẹkesiode ẹfep ẹmi ẹdude ke efakuktom mmọ ẹnyụn̄ ẹnam ndutịm ndika n̄kese kpukpru mbon oro mmọ ẹkerede ke ẹkeme ndinam n̄kpọ mban̄a mbọm oro ẹnamde atara osịm mmọ.