Nte Afo Emeti?
Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:
▫ Nso ke mme ifetutom efen efen oro ẹkenọde mme Nethinim ye nditọ ikọt Solomon ke mmọ ẹwọn̄ọde ke ntan̄mfep ke Babylon enen̄ede ada aban̄a? Mfịn, nte nsụhọ Israel eke spirit oro odude ke isọn̄ akade iso ndikpekpri ke ibat, mme erọn̄ en̄wen ẹkaiso ndikọkọri ke ibat. Ndusụk ke otu mbon mbieterọn̄ ẹmi, ukem nte mme Nethinim ye nditọ ikọt Solomon, edi se ẹnọde ndodobi mbiomo idahaemi ke idak edise enyịn eke nsụhọ. (Isaiah 61:5)—4/15, page 16-17.
▫ Nso ke ikọ prọfet Zephaniah ọkọwọrọ ke ini enye ọkọdọhọde ete: “M̀mê mbufo ẹyedịbe ke usen iyatesịt Jehovah”? (Zephaniah 2:2, 3) Man ẹkpeme owo ekededi ke “akwa ukụt” oro edide, emi idịghe n̄kpọ oro ẹdọhọde ke ẹma ẹkenyan̄a ini kiet, ẹnyan̄a kpukpru ini. (Matthew 24:13, 21) Ndidịbe ke usen oro edikọn̄ọ ke owo ndikaiso nnam n̄kpọ mbita ẹmi: Ana enye oyom Jehovah, oyom edinen ido, onyụn̄ oyom sụn̄sụn̄ ido.—5/1, page 15-16.
▫ Ke nso usụn̄ifiọk ke Michael ‘adaha ada’ ke “utịt ini”? (Daniel 12:1, 4) Toto nte ẹkenịm enye nte Edidem ke 1914, Michael ke “ada” ke ibuot ikọt Jehovah. Edi ibịghike Michael “eyedaha ada” ke ata san̄asan̄a usụn̄ifiọk—nte Isụn̄utom Jehovah ke ndisio kpukpru idiọkido mfep ke isọn̄ ye nte Andinyan̄a ikọt Abasi.—5/1, page 17.
▫ Ata inemesịt ọkọn̄ọ ke nso? Ata inemesịt ọkọn̄ọ ke ọsọn̄urua itie ebuana nnyịn ye Jehovah, unyịme esie, ye edidiọn̄ esie. (Mme N̄ke 10:22) Ntem, owo ikemeke ndinyene ata inemesịt ke ẹsiode edikop uyo Jehovah ye idara idara edisụk ibuot nnọ uduak esie ẹfep. (Luke 11:28)—5/15, page 16, 19.
▫ Ke ini Jesus akanamde mme utịbe utịbe ukọkudọn̄ọ esie, nte ẹma ẹyom mbuọtidem ke n̄kan̄ owo emi ẹkọkde? Ẹma ẹyom ndusụk udomo mbuọtidem ke n̄kan̄ ediwak owo man ẹkpeka ẹbịne Jesus ẹkeyom ẹkọk mmimọ. (Matthew 8:13) Nte ededi, owo ikoyomke ikọ uyarade mbuọtidem ndomokiet man Jesus anam mme utịben̄kpọ esie, utọ nte ini emi enye ọkọkọkde eren kiet emi ekedide mbụn̄ọ emi mîkọfiọkke enyeemi Jesus ekedide. (John 5:5-13) Jesus ama akam anam utọn̄ asan̄autom akwa oku oro ẹkesịbede akabade ọfọn, emi okodude ke otu mme asua Jesus. (Luke 22:50, 51) Ẹkenam mme utịben̄kpọ ẹmi ye odudu edisana spirit Abasi, idịghe ke ntak mbuọtidem ọdọn̄ọ udọn̄ọ.—6/1, page 3.
▫ Nso ke “iyịre” oro ẹtịn̄de ẹban̄a ke n̄ke Jesus ke Matthew 13:47-50 ada aban̄a? “Iyịre” ada aban̄a n̄kpọutom eke isọn̄ emi ọdọhọde nte idide esop Abasi onyụn̄ omụmde “iyak.” Enye esịne Christendom ye esop mme Christian oro ẹyetde aran, eke ukperedem emi ke akaiso ndimụm ‘nti iyak,’ ke idak ndausụn̄ mme angel, ke n̄kemuyo ye Matthew 13:49.—6/15, page 20.
▫ Nso idi ndusụk edumbet oro mme ebiereikpe ke Israel ẹkenyenede ndida nsịn ke edinam ke ẹnamde mme utom mmọ? Unenikpe oro adade ukem ukem kaban̄a imọ owo ye ubuene, unana editen̄e owo enyịn ke ofụri ofụri, owo inyụn̄ inyeneke ndibọ ubọkedem. (Leviticus 19:15; Deuteronomy 16:19)—7/1, page 13.
▫ Nso ke mbiowo ẹkpedomo ndisịm ke itie ikpe? Uduak kiet edi ndifiọk mme akpanikọ ẹban̄ade n̄kpọ oro, ẹnamde emi ke ima. Ndondo oro ẹfiọkde ẹmi, ana mbiowo ẹnam sededi oro oyomde ẹnam man ẹkpeme esop ẹnyụn̄ ẹmụm n̄kokon̄ edumbet Jehovah ẹkama ye ifụre ifụre edinam spirit Abasi. Edikop ikọ emi edi n̄ko ndinyan̄a anamidiọk oro odude ke afanikọn̄, edieke ẹkemede. (Men Luke 15:8-10 domo.)—7/1, page 18-19.
▫ Ntak emi mme mfụmmfụm ekikere oro ẹnyenede ebuana ye oburobụt ido idan̄ ẹdide se inen̄erede inọ unan? Ke ikerede iban̄a mme ikọ Jesus ke Matthew 5:27, 28, kpukpru mbon oro ẹsisịnde idem ke mfụmmfụm ekikere oburobụt ido idan̄ kpukpru ini ẹdue isop edisịn efịbe ke esịt mmọ. Ndien ata n̄kpọndịk odu nte ke mme utọ mfụmmfụm ekikere oro ẹkeme ndida n̄kosịm oburobụt ido.—7/15, page 15.
▫ Ke mme usụn̄ ewe ke Jehovah ekeme ndin̄wam nnyịn ndise mme idomo nnyịn nte enende ndien ke ntre iyọde mmọ? Ẹkeme ndidụri ntịn̄enyịn nnyịn n̄wụt mme Itien̄wed Abasi ebe ke ekemmọ mme andinịm ke akpanikọ m̀mê ke ini ukpepn̄kpọ Bible. Mme n̄kpọntịbe oro ẹdade itie ebe ke ndausụn̄ Abasi ẹkeme ndin̄wam nnyịn ndikụt se ikpanamde. Mme angel ẹkeme ndibuana ke ndinọ nnyịn ndausụn̄, mîdịghe nnyịn imekeme ndibọ ndausụn̄ ebe ke edisana spirit. (Mme Hebrew 1:14)—7/15, page 21.
▫ Ndi Esop eke Nicaea ke 325 E.N. ọkọtọn̄ọ mîdịghe ọkọsọn̄ọ ukpepn̄kpọ Abasi-Ita-ke-Kiet? Baba, Esop eke Nicaea n̄kukụre okonịm Eyen ke n̄ka ye Ete ke ndidi “ukem owo.” Ekikere oro nte ke Ete, Eyen, ye edisana spirit ekedi ata Abasi—Abasi esịnede ita-ke-kiet—ikọtọn̄ọke ito esop oro m̀mê Mme Ewetn̄wed Ido Ukpono eke eset.—8/1, page 20.
▫ Nte Job ekedi n̄kukụre owo oro akanamde akpanikọ ọnọ Jehovah ke eyo oro enye okodude uwem? (Job 1:8) Baba, n̄wed Job ke idemesie owụt ete ke Abasi ama onyịme Elihu. N̄ko, ke ini oro Job okodude uwem, ediwak nditọ Israel ẹma ẹdu oro ẹkedụn̄de ke Egypt, ndien ntak ndomokiet idụhe ndikere nte ke kpukpru mmọemi ikanamke akpanikọ ye nte ke Abasi ikonyịmeke mmọ.—8/1, page 31.