Akwa Bishop Ikemeke Ndiyọ!

ISUA oko, ẹma ẹdiomi akwa esop mme cardinal ndineme mban̄a ndusụk mfịna oro ẹdide akpan n̄kpọ udọn̄ ọnọ Ufọkederi Catholic. Kiet ke otu mmọemi, nte n̄wedmbụk n̄kpọntịbe Il Sabato ọdọhọde, edi “ifịk oro mme n̄ka ido ukpono ẹnyenede.” Nte ededi, n̄wedmbụk oro ọkọdọhọ ete: “Mfịna ikpodụhe inọ mme cardinal ndisịm ubiere ke n̄kpọ emi. Kpukpru ẹwụt nte ke ufọn odu ndinam ata ntotụn̄ọ ndụn̄ọde ke edinam mbufa n̄ka ido ukpono ye n̄ko ufọn ndikpan n̄kọri mmọ, nte ekekeme.”

Nte an̄wan̄ade, okposụkedi, “ifịk oro mme n̄ka ido ukpono ẹnyenede” idịghe mfịna ke Italy kpọt. Il Sabato ọtọt ete: “Ke akade ndise Obio Ukara pope ke ndondo emi, Akwa Bishop, Kirill eke Smolensk [kiet ke otu mbịghi-n̄kan obio Russia] . . . ama eben̄e pope oyom un̄wam esop ido ukpono ke ndiyọ akwa n̄kọri eke Mme Ntiense Jehovah ye mme ukem otu oro ke Soviet Union.”

Ke akpa isua ikie, mme adaiso ke ido ukpono oro okodude ẹma ẹnam ukem eseme oro ke ini Ido Ukpono Christ akatarade ifịk ifịk ebe ke mme andida nnọ enye. Ke idaha kiet mme Jew oro ẹkefụtde esịt ẹma ẹseme ẹnọ mme andikara obio ete: “Mme anditịmede ererimbot emi ẹdi mi n̄ko-o”! (Utom 17:6) Ko ke ini oro, mme adaiso ido ukpono ẹma ẹdomo ọkpọsọn̄ ọkpọsọn̄ nditre n̄kọri Ido Ukpono Christ, edi mmọ ẹma ẹkpu. Mfịn n̄ko, ukeme ekededi nditre n̄kọri ukpepn̄kpọ ata Christian enyene ndikpu. Abasi ke idemesie ọn̄wọn̄ọ ete: “Baba n̄kpọekọn̄ kiet eke ẹbotde ẹban̄a fi idikwe unen; afo eyenyụn̄ anam ikọ otịp kpukpru edeme eke ẹdahade ẹda ẹnam ikọ ye afo. Jehovah ọdọhọ ete, Emi edi udeme ikọt Jehovah, edinen ido mmọ onyụn̄ oto ye ami.”—Isaiah 54:17.