Nte Afo Amabat Se Iditakde?

“EMI-E! Ndi afo emesịn utọ utịbe utịbe enọ oro?” Ama ọsọn̄ eseutom emi ndinịm se enye okosụk okopde ke akpanikọ. Andidu ke idak esie, kpa n̄wan emi ẹkponode ke ntak ifiọk usọutom esie ye eti ido uwem, ama esịn ndibọ enọ edika n̄kọbọ ukpep ke esenidụt ke isua iba emi usiakifia edisede aban̄a ke okụk. Ntak emi n̄wan emi akanamde ntre-e?

N̄wan emi ama anam an̄wan̄a ete ke ndinyịme enọ emi ediwọrọ ndidianade n̄kpọn̄ ebe imọ ye nditọ iba ke isua iba. Imọ iyetaba mmọ ata etieti. Ke edide akpan n̄kpọ akan, imọ n̄ko iyefụmi utom imọ oro Abasi ọnọde nte n̄wanndọ ye eka. Ekọmurua eke n̄kan̄ ntụk ye eke spirit eyekpon akaha ndikpe. Ntem, ke ama akabat se iditakde, enye ama ebiere ndisịn enọ oro.

Nso ke afo akpakanam edieke afo okpodude ke idaha esie? Nte an̄wan̄ade, idịghe kpukpru owo ẹdinyịme ye ubiere oro Christian an̄wan emi akanamde. Ndusụk owo, utọ nte mme nsan̄autom esie, ẹkeme ndikere ke enye ọmọduọk ediye ifet oro enye enyenede ndinam n̄kọri ke ubọkọkọ esie. Mmọ en̄wen ẹkeme ndikam ndori enye ikọ nte ke enye ikereke iban̄a iniso ubon esie, nte, ke idem n̄kpọ, isua ibe ẹyebe usọp usọp. Edi, ubiere esie ikedịghe enyeoro ẹnyịkde-nyịk m̀mê enyeoro mînyeneke iwụk. Enye ọkọkọn̄ọ ke eti ekikere ye mme edumbet oro anamde owo ada okụt n̄kpọ anyanusụn̄. Mmọemi ẹdi nso?

Akan Ndammana Ifiọk

Enyene-ọniọn̄ n̄kan owo oro akanam odude ke isọn̄, kpa Jesus Christ, ama ọnọ ndausụn̄ ke kiet ke otu mme n̄ke esie. Jesus okobụp ete, “Anie owo ke otu mbufo, emi oyomde ndikọn̄ tọwa, idibemke iso itie ibat se iditakde enye, man enye ọfiọk m̀mê emenyene okụk nte edikemde ndida nnam utom mma? Mbak ndusụk utom edikak enye ke ini enye ama ọkọtọn̄ọ ndibọp, ndien kpukpru mmọemi ẹkụtde ẹtọn̄ọ ndisak enye, ẹte, Owo emi ọkọtọn̄ọ ndikọn̄ ufọk, edi ikemeke ndinam mma.”—Luke 14:28-30.

Kpukpru owo ẹyenyịme ke owụt eti ibuot ndibat se iditakde mbemiso owo ebierede ndinam n̄kpọ ekededi oro edide akpan n̄kpọ. Ke uwụtn̄kpọ, edieke owo okoyomde ndidep ufọk, nte enye ọkpọsọsọp esịn ubọk ke n̄wed ediomi ye unana edikam mbobụp ekọmurua nnyụn̄ n̄kụt nte ke imọ imenyene ukeme ndikpe ekọmurua n̄kụre? Ke akpanikọ ẹkpebat enye ke ndisịme edieke enye akpanamde utọ n̄kpọ oro. Ih, edi ndammana ifiọk ndibat se iditakde mbemiso owo ọtọn̄ọde ndinam n̄kpọ.

Nte ededi, nso inen̄ede idi akpan n̄kpọ oro Jesus okosiode owụt ke n̄ke oro? Esisịt ini mbemiso adade n̄ke emi edisịn, enye ọkọdọhọ ete: “Owo ekededi eke mîbiomke eto ndutụhọ esie itiene mi ikemeke ndidi mbet mi.” (Luke 14:27 NW) Ntem, udọn̄ikọ emi owụt ete ke Jesus ikọnọhọ sụk item ndammana ifiọk kaban̄a ikpîkpu, edinam ofụri usen nnyịn. Utu ke oro, enye eketịn̄ aban̄a edibat se iditakde ke ebuana ye edikabade ndi mbet esie.

Ebede ke n̄ke esie, Jesus ama osio owụt ete ke edikabade ndi mbet imọ abuana mme ukpụhọde ye n̄waidem. Ntak-a? Koro editịm n̄kpọ oro odude kemi enyene ntụhọ uyom inyene onyụn̄ edi se udọn̄ idemowo onụkde. Ata ediwak owo ẹnyene udọn̄ akpan akpan ke ndiyụhọ udọn̄ obụkidem mmọ, ẹdọn̄de enyịn esisịt mîdịghe idọn̄ke-dọn̄ enyịn ke mme udọn̄ eke spirit mmọ m̀mê ke itie ebuana mmọ ye Abasi. (2 Timothy 3:1-4) Ido, m̀mê edu emi, nte ededi, edi ata isio isio ye enyeoro Jesus Christ okowụtde. Enye ọkọdọhọ ete, “Eyen Owo [ikedịghe], man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.” Enye ama owụt ke se idide akpan n̄kpọ ikan edi n̄kpọ eke spirit utu ke n̄kpọ obụkidem ke ini enye ọkọdọhọde ete: “Edi spirit anam owo odu uwem: obụkidem inọhọ owo baba udori kiet.”—Matthew 20:28; John 6:63.

Mmọdo, ke ini Jesus ọkọnọde mbon oro ẹkeyomde ndikabade ndi mbet esie item ete ẹbat se iditakde, enye ke akpan iketịn̄ke iban̄a mme n̄kpọ obụkidem, edi eketịn̄ aban̄a n̄kpọ eke spirit. Nso idi akpan n̄kpọ ikan inọ mmọ, mme ufọn n̄kpọ obụkidem oro ererimbot ọnọde m̀mê mme ufọn n̄kpọ spirit oro edidi mbet ọnọde? Ntak edi oro ke ama okotop n̄ke emi ye efen oro enyenede ebuana ye emi, enye ama eberi ete: “Kpa ntre ke owo mbufo ekededi, eke mîsanake kpukpru se enye enyenede iyak, ikemeke ndidi mbet Mi.” (Luke 14:33) Nte owo emi oyomde ndidi mbet onyịme onyụn̄ eben̄e idem ndinam utọ n̄waidem oro, mîdịghe nte emi edi ekọmurua oro okponde akaha ndikpe?

Ekikere Oro Adade Ukem Ukem

Idem okposụkedi mme n̄kpọ obụkidem ẹkemede ndida se itiede nte mme ufọn oro ẹtịmde ẹkụt ke enyịn onyụn̄ edide usọp usọp ndi, mme ufọn ẹtode edibịne mme n̄kpọ eke spirit ẹtịm ẹbịghi ẹkan ẹnyụn̄ ẹnọ uyụhọ. Jesus ekesịn enye ke usụn̄ emi ete: “Ẹkûbon n̄kpọuto ẹnịm ẹnọ idem ke isọn̄, ke ọtọ nte utan̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọuto ẹnịm ẹnọ idem ke heaven, ke ọtọ nte utan̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp.” (Matthew 6:19, 20) Ke eyo nnyịn, ọkpọsọn̄ nsọn̄urua n̄kpọ, urua mbubehe ndiduọ, ye ban̄k ndikpu, ye ntre ntre eken, amada nditaha ọsọk ediwak owo oro ẹkekọn̄de mbuọtidem mmọ n̄kukụre ke inyene obụkidem. Edi apostle Paul akpak nnyịn ete “[ikûdọn̄] enyịn ke se owo okụtde ke enyịn, edi idọn̄ enyịn ke se owo mîkwe ke enyịn; koro se owo okụtde ke enyịn ẹdibede ẹfep, edi se owo mîkwe ke enyịn ẹyebịghi ke nsinsi nsinsi.” (2 Corinth 4:18) Nte ededi, didie ke nnyịn ikeme ndikọri utọ idaha ekikere oro?

Nnyịn imekeme ndinam ntre ebe ke ndikpebe Uwụtn̄kpọ nnyịn, kpa Jesus Christ. Ke ini okodude ke isọn̄, enye ke usụn̄ ndomokiet ikedịghe asua inem uwem, nte ẹkụtde ke akpanikọ oro nte ke enye ke ndusụk ini ama esibuana ke mme usọrọ ndọ ye ikpọ usọrọ. Nte ededi, enye nte an̄wan̄ade ama anam mme n̄kpọ eke spirit ẹdi ebeiso n̄kpọ ẹnọ enye. Man anam uduak Ete esie ama, enye ama onyịme ndiyak se ẹkam ẹbatde nte se ẹyomde ẹtak. Inikiet enye ọkọdọhọ ete: “Ebuaikọt ẹnyene ndudu, inuen enyọn̄ ẹnyụn̄ ẹnyene mme efọk: edi Eyen Owo inyeneke ọtọ eke odoride ibuot Esie.” (Luke 9:58) Enye ama ada edinam uduak Ete esie ke ata akpan n̄kpọ ye inem n̄kpọ tutu eyedi se enye ọkọdọhọde ye ọyọhọ esịt akpanikọ ete: “Udia Mi edi ndinam uduak Andidọn̄ Mi, nnyụn̄ mma utom Esie.”—John 4:34.

Jesus ama ananam ifiọk ido uwem esie owụt ebe ke usụn̄ oro enye ekesịnde mme idomo Satan. Devil ama odomo ndinam Jesus ada odudu Esie oro Abasi ọkọnọde anam ufọn ọnọ Idemesie, ada oyụhọ mme udọn̄ obụkidem Esie, onyụn̄ enyene uwọrọiso ye uwọrọetop eke ererimbot. Jesus ama ọfiọk nte ọfọnde ete ke ẹkeme ndinyene mme utọ eyịghe eyịghe ufọn oro n̄kukụre ke ata akamba ekọmurua—kpa editaba unyịme Abasi—emi edide ekọmurua oro ọsọn̄de akan se enye okonyịmede ndikpe, koro enye akadade eti itie ebuana esie ye Ete esie ke ọsọn̄urua n̄kpọ akan n̄kpọ efen ekededi. Ntak edi oro enye ekesịnde se Satan ọkọnọde ata in̄wan̄în̄wan̄, ye unana mmen̄e.—Matthew 4:1-10.

Nte mme anditiene Christ, nnyịn ke akpanikọ iyom ndinyene ukem ifiọk ido uwem nte eke Eteufọk nnyịn. Ke editịm n̄kpọ oro odude kemi ke idak ukara Satan, odu ediwak n̄kpọ oro ẹkemede nditie nte ke ẹyeda nti ufọn ẹdi, edi oro ke akpanikọ ẹkemede ndibiat itie ebuana nnyịn ye Abasi. Mme utọ n̄kpọ nte edikaiso nyom ikpọ itie ke itieutom, edibịne akwa ifiọkn̄wed man emenede idaha owo ke enyọn̄, ndiyom uma ye owo emi mînịmke ke akpanikọ, m̀mê ndisịn idem ke mme eyịghe eyịghe ediomi mbubehe ẹkeme ndida mmemmem mmemmem n̄kosịm ediduọk mbuọtidem ye ediduọ ke akpatre n̄kpọn̄ mfọn Jehovah. Ana nnyịn ye ntịn̄enyịn ibat se iditakde ke ini isobode mme utọ idomo oro.

Ata Eti Ibuot Edi N̄kpọ Ukpeme

Ke isua ifan̄ ẹmi ẹkebede, akparawa Christian kiet ke akwa obio kiet ke Far East ama enyene ifet edika esenidụt man akakaiso ke ukpep esie. Okposụkedi enye ama ekenyenyene eti ifiọkn̄wed ye eti utom, enye ama ekere ke emi ikemke; enye okoyom ndinam idaha esie ọfọn akan ke uwem. Ekemmọ mme Christian ẹma ẹdọmọ ndikọk ibuot ye enye nte ekemde ye mme akpan n̄kpọ eke N̄wed Abasi oro isụk inemede mi, edi enye ama ọsọn̄ obotitọn̄ onyụn̄ akaiso ke ediomi emi. Okposụkedi enye ke akpa okodomode ndisọn̄ọ mmụm mbuọtidem esie n̄kama, sụn̄sụn̄ enye ama ọduọk esịtekọm oro enye ekenyenede ọnọ akpanikọ Bible, ndien eyịghe ama ọtọn̄ọ ndidụk ndi. Ke n̄kpasịp isua kiet m̀mê n̄kpọ ntre, enye ama ọduọk mbuọtidem esie ofụri ofụri onyụn̄ ọdọhọ nte idide owo emi mînịmke edidu Abasi ke akpanikọ. Ih, edinyene n̄weditoro oro okponde akan ebe ke n̄kaiso ubọ ukpep eke ifiọkn̄wed ama ada ndusụk udomo uyụhọ ọsọk enye. Edi ke ntak okoyomde ubọn̄ eke ibio ini, nso akwa ekọmurua ke enye ekenyene ndikpe ntem—kpa mbuọtidem esie ndiwụre ye edidu ke itiendịk editaba nsinsi uwem!—1 Timothy 1:19.

Ke n̄kan̄ eken, mbon oro ẹsịnde ndiyak n̄kpọ ekededi esịn itie ebuana mmọ ye Abasi ke itiendịk ẹbọ mme akwa edidiọn̄ ẹto Jehovah.

Uwụtn̄kpọ kiet edi enyeoro aban̄ade akparawa kiet emi utom esie ekesidide edidọn̄ mme n̄kpọ mbana ke ufọk ke ukem obio oro ẹtịn̄de ẹtụk ke enyọn̄ emi. Ke n̄kpasịp ọfiọn̄ ifan̄ ke enye ama ọkọtọn̄ọ ndikpep Bible ye Mme Ntiense Jehovah, enye ama osobo utom idomo—ndinam utom edifiak ndiọn̄ ufọk emi akpade $30,000. Nte ededi, emi eyebuana editre ndisọn̄ọ nyịre ye mbet ubọpufọk ye ibet akpande edibọp ufọk oro mîkemke ye ibet. Sia enye ama ekekpep ete ke ana mme Christian ẹnịm ibet, enye ama ọfiọk ete ke edinyịme utom oro ekeme ndiwọrọ editaba mfọn Abasi. (Rome 13:1, 2) Ke ama ekekere aban̄a n̄kpọ emi ye ntịn̄enyịn, enye ama esịn ndinam utom oro. Nso ikedi utịp? Edinam mbuọtidem emi ama ada osịm enye ndinam n̄wọrọnda n̄kọri eke spirit. Ke ufan̄ isua kiet, enye ama anam n̄kọri okosịm idaha uyakidem nnọ ye baptism. Enye ama anyam mbubehe esie onyụn̄ anam utom oro ọkọnọde enye ekese ini efen efen ndida mbịne mme n̄kpọ eke spirit. Enye ke anam n̄kpọ Jehovah idahaemi ke idatesịt ye ifiopesịt.

N̄kparawa iba ẹmi ẹma ẹbat se iditakde. Nso ikanam ukpụhọde odu ke edimek mmọ? Eti ibuot eke otode Abasi! Didie ke edi ntre? Eti ibuot edi ukeme edida ifiọk nsịn ke edinam ke usụn̄ oro awakde ndida nsinsi ufọn ndi, ndien eti ibuot eke otode Abasi ọwọrọ edida ifiọk nnam n̄kpọ ke n̄kemuyo ye uduak Abasi kaban̄a nnyịn. Ke adan̄aemi n̄kparawa iba ẹmi ẹma ẹkenyene ndusụk ifiọk Bible, mmọ ndida enye nsịn ke edinam ama ada osịm nsio nsio utịp. N̄wed Mme N̄ke ọdọhọ ete: “Eti ibuot eyedụk fi esịt, ifiọk eyenyụn̄ enem ukpọn̄ fo; Ekikere eyetie ekpeme fi, mbufiọk eyenịm fi, Man osio fi ke idiọk usụn̄ efep.”—Mme N̄ke 2:10-12.

Ikọ Abasi, kpa Bible, edi ebiet emi ata eti ibuot otode emi afo kpukpru ini ekemede ndiwọn̄ọde mbịne kaban̄a ndausụn̄ ke ini afo enyenede ndinam mme akpan ubiere. Utu ke ndikabade ndi ọniọn̄ ke enyịn fo, nam item emi: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.” (Mme N̄ke 3:5, 6) Ana nnyịn isụhọde idem inyụn̄ inyịme ekpep nnyịn n̄kpọ, ifepde edu itụn ye nda-ke-idem oro otịmde ọyọhọ ererimbot mfịn.

Ih, nnyịn ikemeke nditre ndidọk se nnyịn itọde, ndien akam ọfọn onyụn̄ enen nnyịn ndibọ utịp oro osụn̄ọde oto mme ubiere ye edimek oro nnyịn inamde. (Galatia 6:7, 8) Ntre bat se iditakde mbemiso anamde n̄kpọ ekededi. Kûyak n̄kpọ ekededi oro etiede nte akama ufọn ọbọ fi eti idaha eke spirit fo m̀mê itie ebuana fo ye Jehovah Abasi. Bọn̄ akam ben̄e eti ibuot ye eti ubiere ndida nnam nnennen ubiere, koro mme ubiere oro afo anamde idahaemi ẹkeme ndiwọrọ edinyene uwem m̀mê n̄kpa—ke nsinsi!—Men Deuteronomy 30:19, 20 domo.

[Mme ndise ke page 28]

Nte enye edinịm mme utom eke spirit akpa ke uwem m̀mê ubọkọkọ ererimbot?