Ntọt M’ọkwọrọ Obio Ubọn̄
Eti Mbụk Otode Edem Usiahautịn Europe
EDIWAK n̄kpọ idatesịt ke ẹda itie ke an̄wautom ukara Abasi ke Edem Usiahautịn Europe. N̄wọrọnda ekedi mbono ofụri ererimbot ke Zagreb, August 16-18, 1991, ke ini Mme Ntiense 7,300 ẹkedarade nditọete mmọ ẹmi ẹtode idụt 15 ke ofụri esịt. Ke ofụri ofụri, owo 14,684 ẹkedụk. Ekedi utịbe utịbe ediwụt ima ye edidianakiet ke idụt oro en̄wan enyen̄ede!
Mme Ntiense ke Edem Usiahautịn Europe ke ẹsịn idem ẹtịn̄ eti mbụk Obio Ubọn̄ Jehovah ẹnọ mmọ en̄wen, emi mmọ ẹkụtde nte edide n̄kukụre idotenyịn kaban̄a ata emem. Ke ndusụk ikpehe edi n̄kpọ-ata ọnọ mmọ ndimụm edida san̄asan̄a mmọ n̄kama. Nte ededi, mme owo ẹsiwak ndinọ n̄kpan̄utọn̄, Mme Ntiense ẹnyụn̄ ẹtọt ediwak nti ifiọkutom.
Ke obio kiet eyenan̄wan emi edide isua 16 ke emana ama okop eti mbụk oto n̄kukụre Ntiense Jehovah emi odude ke obio oro. Ẹma ẹtọn̄ọ ukpepn̄kpọ Bible ofụri ini, ndien esịtekọm oro enye owụtde ọnọ akpanikọ ama ọkọri. Ke enyenede ọkpọsọn̄ udọn̄ nditịn̄ mme utịbe utịbe n̄kpọ oro enye ekekpepde nnọ mbon en̄wen, enye ama odomo ndineme ye mme nsan̄a ufọkn̄wed esie edi ama osobo ubiọn̄ọ ye nsahi. Nsan̄a ufọkn̄wed kiet akpan akpan ama esibiọn̄ọ enye edi ime esie ama akpa enye idem onyụn̄ otụk enye ke esịt, koro ekpri eyen ukpepn̄kpọ Bible oro ikayatke esịt kpa ye ofụri esuene oro. Ke ukperedem, ẹma ẹnọ eyenan̄wan emi ikọ ntiense mfọn mfọn, ndien enye ama edifiọk ete ke edu imọ ikọfọnke. Ẹma ẹtọn̄ọ ukpepn̄kpọ Bible ye enye, ndien ekem akpa eyen ukpepn̄kpọ Bible oro ye obufa nsan̄a esie ẹma ẹdomo ndibuana inemesịt mmọ ye mmọ en̄wen, kpa ye ubiọn̄ọ otode mme ete ye eka mmọ, andikpep mmọ, ye mme nsan̄a ufọkn̄wed mmọ.
Nte utịp unọ ikọ ntiense mmọ, eyen ufọkn̄wed en̄wen ama ọbọ akpanikọ. Idahaemi mmọ owo ita ẹkedu ke ubet ukpepn̄kpọ, ndien mmọ mbita ẹkedi nti uwụtn̄kpọ ke ndinyịme ndin̄wam mmọ en̄wen ye ke ediwụt ima ke otu idemmọ. Ekem eyenan̄wan efen ama adiana ye mmọ.
Idahaemi mmọ ẹdide owo inan̄ ẹsitie ọtọkiet ke an̄wa ufọkn̄wed ke ebiet emi mmọ ẹkesinemede Bible ọtọkiet. Ndien ke n̄kpaidem ediwak owo, ibat mmọ ama ọkọri. Eyenan̄wan en̄wen ke ubet ukpepn̄kpọ oro, ke enyenede udọn̄ aban̄a eti eduuwem mmọ, ama ebiere nditiene mbuana ke ukpepn̄kpọ Bible oro. Mmọ mbition ẹma ẹkaiso ndinọ mbon en̄wen ikot, nditọ ufọkn̄wed ye mme andikpep, ndinam kpasụk ntre. Edi, nditọiban ẹmi ẹma ẹkaiso ndisobo ọkpọsọn̄ mfịghe otode ete ye eka mmọ. Mme ete ye eka mmọ ẹma ẹdomo ọkpọsọn̄ ndinyịk nditọiban oro man ẹtre ukpepn̄kpọ Bible mmọ ebe ke ndifọp mme n̄wed mmọ nnyụn̄ n̄kama mmọ ke idiọk usụn̄.
Nso ikedi utịp unọ ikọ ntiense emi ọkọtọn̄ọde ye ekpri eyen kiet kpọt emi ekenyenede udọn̄ mi? Owo kiet ke otu nditọiban ẹmi ama ana baptism ke mbono district ke 1990, ndien owo inan̄ eken ke mbono circuit ke ini utọ eke 1991. Emi ekedi ntak akwa idara! Mfịn, nditọiban mbition ẹmi ẹnam utom nte mme asiakusụn̄ ofuri ini! Ke obio oro emi okotịbede, asuanetop 11 ẹdu idahaemi, owo 8 ke otu mmọ ẹdu ke utom usiakusụn̄.
Jehovah ke omụm Mme Ntiense esie akama onyụn̄ ọdiọn̄ mmọ ke Edem Usiahautịn Europe. In̄wan̄în̄wan̄ idotenyịn odu kaban̄a n̄kọri ke otu mbon oro ẹnyenede esịt akpanikọ ke ikpehe ererimbot n̄kan̄ emi.