Nso Isịne ke Ndidiọn̄ọ Enyịn̄ Abasi?
N̄KPỌ obot oro ẹkụtde ke enyịn emetie ntiense nte ke Abasi odu, edi enye iyarakede enyịn̄ Abasi. (Psalm 19:1; Rome 1:20) Owo ndidiọn̄ọ enyịn̄ Abasi ọwọrọ se ikande ikpîkpu edimehe ye ikọ oro. (2 Chronicles 6:33) Enye ke akpanikọ ọwọrọ ndidiọn̄ọ Owo oro—mme uduak esie, utom, ye edu nte ẹyararede ke Ikọ esie. (Men 1 Ndidem 8:41-43; 9:3, 7; Nehemiah 9:10 domo.) Ẹnam emi an̄wan̄a ke n̄kpọ aban̄ade Moses, kpa owo oro Jehovah ‘ọkọfiọkde ke enyịn̄,’ oro edi, ọkọdiọn̄ọde ata edidọdiọn̄ọ. (Exodus 33:12) Moses ama enyene ifet edikụt uyarade ubọn̄ Jehovah onyụn̄ okop nte ‘ẹtan̄ade enyịn̄ Jehovah’ n̄ko. (Exodus 34:5) Editan̄a oro ikedịghe ikpîkpu edikot mfiak n̄kot enyịn̄ Jehovah edi ekedi utịn̄ikọ oro aban̄ade mme edu ye utom Abasi. “Jehovah, Jehovah, Abasi mbọm, ye mfọn, ye anyanime, awak ima ye akpanikọ, onịm ima ọnọ ediwak tọsịn, efen mme ukwan̄n̄kpọ, ye ndudue, ye idiọkido, edi iyakke mbon isop ẹbọhọ; ada usiene mme ukwan̄n̄kpọ mme ete, osio ye nditọ, ye nditọ nditọ, tutu osịm ọyọhọ emana ita ye inan̄.” (Exodus 34:6, 7) Ukem ntre, ikwọ Moses, oro ọdọn̄ọde mme ikọ ẹmi “koro nyetan̄a enyịn̄ Jehovah,” obụk mme edinam Abasi ye Israel onyụn̄ etịn̄ aban̄a edu esie.—Deuteronomy 32:3-44.
Ke ini Jesus Christ okodude ke isọn̄, enye ‘ama ayarade enyịn̄ Ete esie’ ọnọ mme mbet esie. (John 17:6, 26) Okposụkedi ẹma ẹkedọdiọn̄ọ enyịn̄ oro ke mbemiso ẹnyụn̄ ẹmehe ye mme utom Abasi nte ẹwetde ke N̄wed Abasi usem Hebrew, mme mbet ẹmi ẹma ẹdidiọn̄ọ Jehovah ke usụn̄ oro ọfọnde onyụn̄ okponde akan ebe ke Owo “emi odude ke ikpanesịt Ete.” (John 1:18) Christ Jesus ama ada ke ibuot Ete esie ke mfọnmma usụn̄, anamde utom Ete esie onyụn̄ etịn̄de ikọ, idịghe ke odudu idemesie, edi etịn̄ ikọ Ete esie. (John 10:37, 38; 12:50; 14:10, 11, 24) Oro edi ntak Jesus ekekemede ndidọhọ ete, “Owo eke okokụtde Mi okokụt Ete.”—John 14:9.
Emi owụt in̄wan̄în̄wan̄ nte ke n̄kukụre mbon oro ẹnen̄erede ẹdiọn̄ọ enyịn̄ Abasi ẹdi mme okopitem asan̄autom esie. (Men 1 John 4:8; 5:2, 3 domo.) Un̄wọn̄ọ Jehovah ke Psalm 91:14, ke ntre, enyene n̄kpọ ndinam ye mme utọ owo oro: “Nyemenede enye nnịm ke enyọn̄, koro enye ọfiọkde enyịn̄ mi.” Enyịn̄ oro ke idemesie idịghe mfọni, edi Owo oro ẹkotde enyịn̄ oro ekeme ndinọ ikọt esie oro ẹyakde idem ẹnọ, ukpeme. Ntre enyịn̄ oro ada aban̄a Abasi ke idemesie. Oro edi ntak mme n̄ke ọdọhọde ete: “Enyịn̄ Jehovah edi ọkpọsọn̄ tọwa: eti owo efehe odụk ke esịt, ndien odu ke ifụre.” (Mme N̄ke 18:10) Emi edi se mme owo oro ẹtopde mbiomo mmọ ẹnọ Jehovah ẹnamde. (Psalm 55:22) Ukem oro n̄ko, ndima (Psalm 5:11), ndikwọ itoro nnọ (Psalm 7:17), ndikot (Genesis 12:8), ndinọ ekọm (1 Chronicles 16:35), nditomo (Deuteronomy 6:13), nditi (Psalm 119:55), ndibak (Psalm 61:5), ndiyom (Psalm 83:16), ndibuọt idem (Psalm 33:21), nditoro (Psalm 34:3), ye ndikọn̄ idotenyịn ke (Psalm 52:9) enyịn̄ oro edi ndinam mme n̄kpọ ẹmi nnọ Jehovah ke idemesie. Nditịn̄ ikọ esuene esuene mban̄a enyịn̄ Abasi edi ndisụn̄i Abasi.—Leviticus 24:11, 15, 16.
Jehovah esifụbe ufụp aban̄a enyịn̄ esie, iyomke ndomoidem ndomokiet m̀mê unana edinam akpanikọ ke mme n̄kpọ ẹban̄ade utuakibuot. (Exodus 34:14; Ezekiel 5:13) Ẹma ẹwụk nditọ Israel ẹte ẹkûkam ẹsasiak enyịn̄ mme abasi eken. (Exodus 23:13) Ke ikerede iban̄a akpanikọ oro nte ke enyịn̄ mme nsunsu abasi ẹdu ke N̄wed Abasi, nte an̄wan̄ade se ẹtịn̄de ẹban̄a oro enyene ebuana ye edisiak enyịn̄ mme nsunsu abasi ke ido utuakibuot.
Edikpu oro Israel okokpude ndidu uwem ekekem ye mfọnmma ewụhọ esie nte mbon oro ẹkerede enyịn̄ Abasi ọkọwọrọ edibiat m̀mê edisabade enyịn̄ Abasi. (Ezekiel 43:8; Amos 2:7) Sia unana edinam akpanikọ nditọ Israel ọkọsụn̄ọde ke Abasi ndinọ mmọ ufen, emi n̄ko ama ọnọ mme idụt eken ifet nditịn̄ ikọ esuene esuene ndian enyịn̄ esie. (Men Psalm 74:10, 18; Isaiah 52:5 domo.) Ke ẹkpude ndidiọn̄ọ nte ke ufen oro okoto Jehovah, mme idụt ẹmi ke ukwan̄ usụn̄ ẹkedọhọ ẹte ke mme afanikọn̄ oro ẹkesịmde Israel ẹketo ke ntak oro Jehovah akananade ukeme ndikpeme ikọt esie. Man emen utọ esuene oro efep ke enyịn̄ esie, Jehovah ama anam n̄kpọ ke ntak enyịn̄ esie onyụn̄ afiak ada nsụhọ Israel okonịm ke isọn̄ mmọ.—Ezekiel 36:22-24.
Ke ndiyarade idemesie ke mme akpan usụn̄, Jehovah ama anam ẹti enyịn̄ esie. Ke mme ebiet oro akadade itie, ẹma ẹbọp mme itieuwa.—Exodus 20:24; men 2 Samuel 24:16-18 domo.
Enyịn̄ Eyen Abasi
Ke ntak edinam akpanikọ tutu osịm n̄kpa, Ete Jesus Christ ama ọnọ enye utịp, ọbọde idaha oro okponde akan ye “enyịn̄ emi okon̄de akan kpukpru enyịn̄.” (Philippi 2:5-11) Ana kpukpru mbon oro ẹyomde ndidu uwem ẹfiọk se enyịn̄ oro adade aban̄a (Utom 4:12), esịnede idaha Jesus nte Ebiereikpe (John 5:22), Edidem (Ediyarade 19:16), Akwa Oku (Mme Hebrew 6:20), Andifak (Matthew 20:28), ye Akpan Isụn̄utom edinyan̄a.—Mme Hebrew 2:10.
Christ Jesus nte “Edidem ndidem ye Ọbọn̄ mbọn̄” enyene n̄ko ndida udịmekọn̄ eke heaven usụn̄ man ẹn̄wana ekọn̄ ke edinen ido. Nte andisio usiene Abasi, enye eyewụt odudu ye mme edu ẹmi ẹdide ata esen esen ọnọ mbon oro ẹn̄wanade-n̄wana ye enye. Nte odotde, ke ntre, ‘enye enyene enyịn̄ emi ẹwetde emi baba owo kiet mîfiọkke ibọhọke enye ke idemesie.’—Ediyarade 19:11-16.
Nsio Nsio Usụn̄ Nte Ẹdade Ikọ oro “Enyịn̄”
Ẹkeme ndida akpan enyịn̄ kiet ‘ẹkot’ owo, obio, m̀mê ufọk. Jacob, ke ini akadade nditọiren Joseph enyene nte eke esiemmọ, ọkọdọhọ ete: “Yak mmọ ẹnyụn̄ ẹkere enyịn̄ mi, ye enyịn̄ mme ete mi Abraham ye Isaac.” (Genesis 48:16; se n̄ko Isaiah 4:1; 44:5.) Ndida enyịn̄ Jehovah n̄kot nditọ Israel ọkọwọrọ nte ke mmọ ẹkedi ikọt esie. (Deuteronomy 28:10; 2 Chronicles 7:14; Isaiah 43:7; 63:19; Daniel 9:19) Jehovah n̄ko ama onịm enyịn̄ esie ke Jerusalem ye ke temple, ke ntre onyịmede mmọ nte nnennen iwụk ebiet utuakibuot esie. (2 Ndidem 21:4, 7) Joab ama emek nditre ndikụre edikan oro enye akakande Rabbah mbak ẹdida enyịn̄ esie ẹsio obio oro, oro edi, mbak ẹdinọ enye itoro ke ntak akande obio oro.—2 Samuel 12:28.
Yak idọhọ, ẹmen enyịn̄ owo emi akpade ye unana edinyene eyeneren “ẹfep.” (Numbers 27:4; 2 Samuel 18:18) Ntre, ndutịm eyeneka ndidọ n̄wan eyeneka oro Ibet Moses okonịmde ama anam n̄kpọ nditịm enyịn̄ akpan̄kpa nnịm. (Deuteronomy 25:5, 6) Ke n̄kan̄ eken, edisobo idụt, mme owo, m̀mê ubon ọkọwọrọ edisọhi enyịn̄ mmọ mfep.—Deuteronomy 7:24; 9:14; Joshua 7:9; 1 Samuel 24:21; Psalm 9:5.
Nditịn̄ ikọ m̀mê ndinam n̄kpọ ‘ke enyịn̄’ owo en̄wen ọkọwọrọ ndinam ntre nte andida ke ibuot owo oro. (Exodus 5:23; Deuteronomy 10:8; 18:5, 7, 19-22; 1 Samuel 17:45; Esther 3:12; 8:8, 10) Ukem ntre, ndidara owo ke enyịn̄ owo efen okpowụt nte ẹdiọn̄ọde owo oro. Ntre ‘ndidara prọfet ke enyịn̄ prọfet’ ọkpọwọrọ ndidara prọfet ke ntak enye edide prọfet. (Matthew 10:41, KJ, NW) Ndien ndinịm owo baptism ke “enyịn̄ Ete ye Eyen ye edisana spirit” ediwọrọ ke ndidiọn̄ọ Ete, Eyen, ye edisana spirit.—Matthew 28:19.