Akan Adaha Ẹmi Ẹdụride Udọn̄

Isenowo ẹsinyene ọkpọsọn̄ udọn̄ ẹban̄a mme adaha ẹmi ẹdade ke Inyan̄ Mediterranean ke Caesarea, kpa esụk mbehe eset ke mbenesụk Israel. Akwa Herod ọkọbọp itie mbehe ubom emi onyụn̄ osio obio oro enyịn̄ ke ndikpono Caesar Augustus.

Mme ọdọkisọn̄ nnyom n̄kpọeset ẹma ẹdọk ekese itie ke obio oro, esịnede akwa efembre esie. Mmọ n̄ko ẹma ẹdụk ẹka esịt mmọn̄ man ẹkefiọk nte ẹkebọpde itie mbehe ubom oro ẹdori ke utatan mbenesụk oro.

The New York Times (January 8, 1991) ama ọtọt aban̄a edikụt oro ẹkụtde mme adaha ke n̄wụre ufọkubọn̄ oro ke akpa akatarade okosịm inyan̄ oro. Mmọemi ẹdi san̄asan̄a koro mme uwetn̄kpọ oro ẹkụtde ke mmọ ẹsiak enyịn̄ ndusụk mme andikara Rome ẹmi owo mîkọfiọkke ke mbemiso. Ẹsiak “esenyịn” nsụn̄ikan̄ n̄ko, emi edide “akpa uwetn̄kpọ oro akanam ẹkụtde nte enyenede ebuana ye itie mbehe ubom.”

Nditọ ukpepn̄kpọ Bible ẹfiọk ẹte ke apostle Paul ama awat akadian ke itie mbehe ubom emi ke utịt isan̄ utom isụn̄utom esie iba. Mi ke enye okodu ye Philip ọkwọrọikọ, ndien anaedi mme ifiọkutom esie ẹma ẹsọn̄ọ mme mbet idem akamba akamba. (Utom 18:21, 22; 21:7, 8, 16) Nnyịn imekeme ndikot mban̄a ediwak inem inem ifiọkutom ẹmi ke N̄wed Utom Mme Apostle ke Bible.

Ntre mme adaha ẹmi ẹdade mi ke mbenesụk idịghe ikpîkpu n̄wụre eke mbụk. Mmọ ẹnam mme Christian ẹti nditọete mmọ eke eset, ẹmi ẹkesuande eti mbụk ifịk ifịk ke mme itie mbehe ubom ẹnyụn̄ ẹnamde enye atara “tutu osịm utịt ererimbot.”—Utom 1:8.

[Ebiet Ẹdade Ndise Ẹto ke page 32]

Garo Nalbandian