Utom Erenowo
“¡Ropa, zapato, casa, y comida!” Mme ikọ ẹmi ẹto akani ikwọ usem Spain oro etịn̄de mme akpan n̄kpọ inan̄ ẹmi ẹdoride enyịn ndikụt nte erenowo ọnọde ubon esie: ọfọn̄, ikpaukot, ufọkidụn̄, ye udia. Ndien n̄wakn̄kan nti irenowo ke asian ke ẹdomo ndibiom mbiomo oro.
Nte ededi, edieke afo edide ete ubon, nte afo emese aban̄a mme udọn̄ n̄kpọ eke spirit ubon fo oro edide akpan n̄kpọ akan? Mîdịghe nte afo, ukem nte ediwak irenowo, ekere ke ndise mban̄a mme mbubehe ido ukpono ke ufọk inen̄ekede idi utom erenowo? Ke ndusụk ntatenyịn, owo ikam idorike enyịn nte ke irenowo ẹkpeda ini ndikpep nditọ mmọ n̄kpọ mban̄a Abasi ye Bible.
Ikọ Abasi odori akpan akpan ibuotufọk mbiomo ndisịn ke ubon esie ima ẹnyenede ẹnọ Abasi ye ntotụn̄ọ esịtekọm ẹnyenede ẹnọ mme edumbet Abasi. Ke uwụtn̄kpọ, ke Ephesus 6:4, N̄wed Abasi eteme irenowo ẹdide Christian nte etienede mi ete: “Mbufo mme ete, ẹkûfiomo nditọ mbufo; edi ẹkama mmọ ke ntụnọ ye item Ọbọn̄ [“Jehovah,” NW].”
Ekeme ndidi ndusụk owo, okposụkedi ẹmehede ye mme ikọ ẹmi, idiọn̄ọke ọyọhọ ọyọhọ nte ke itien̄wed emi akpan akpan enyene ete, kpa ibuotufọk. Ke uwụtn̄kpọ, ekeme ndin̄wan̄a mbon oro ẹsemde usem Spain ye Portugal nte ke ẹtịn̄ mme ikọ eke Ephesus 6:4 oro ẹnọ ete ye eka. Ke mme usem ẹmi ikọ oro adade ọnọ “mme ete” ye ikọ oro adade ọnọ “mme ete ye eka” ẹdi ukem. Nte ededi, ke ufan̄ikọ 1 eke Ephesus ibuot 6 oro, apostle Paul etịn̄ otụk ete ye eka ke ndida ikọ Greek oro go·neuʹsin, nto go·neusʹ, ọwọrọde “ete m̀mê eka.” Edi ke ufan̄ikọ 4, ikọ Greek oro akadade ekedi pa·teʹres, ọwọrọde “mme ete.” Ih, ke Ephesus 6:4, Paul eketịn̄ mme ikọ esie nnennen ọnọ erenowo ke ubon.
Nte ededi, edieke erenowo mîdụhe ke ubon ndida usụn̄, do ana n̄wan obiom mbiomo emi. Ye un̄wam Jehovah, ediwak eka ẹkụt unen ke ndibọk nditọ mmọ ke ntụnọ ye item Jehovah. Nte ededi, ke ini Christian erenowo odude, enye ekpenyene ndida usụn̄. Edieke enye ofụmide mbiomo emi, eyetịm ọsọn̄ mbonubon eken ndinyene eti ndutịm udia eke spirit. Ndien utọ erenowo oro eyenam ibat ọnọ Jehovah ke edifụmi esie oro.
Ekikere Abasi ke n̄kpọ emi ẹyarade ke mme n̄kpọ N̄wed Abasi ẹnamde owo odot oro ẹnịmde ẹnọ mme esenyịn ye mme asan̄autom unamutom ke esop Christian. Bible owụt ke owo oro ẹmekde ẹnọ utọ itie oro ekpenyene ndidi “owo emi otịmde akama ufọk esiemmọ, onyụn̄ anamde nditọ esie ẹsụk ibuot ke kpukpru ido eke odotde ukpono (edi edieke owo mîfiọkke ndikama ufọk esiemmọ, enye edikeme didie ndikpeme ufọk Abasi?).”—1 Timothy 3:4, 5, 12; Titus 1:6.
Ana ibuotufọk onyịme ndiyak inemesịt ye ọkpọkpọ ini atak ke ibuot mfọnọn̄kpọ eke spirit nditọ esie. Ndusụk ini enye ekeme ndisụhọde ubọk ke ini oro enye ayakde esịn ke mme edinam efen man enyene ini oro ekemde ndidu ye nditọ esie kpukpru ini. (Deuteronomy 6:6, 7) Edi, enye idikpọnọkede utom oro Abasi ọnọde mi inọ mbon en̄wen. Ima ye udọn̄ oro enye enyenede ọnọ nditọ esie eyeka anyan akan ndinọ ọfọn̄, ikpaukot, ufọkidụn̄, ye udia.
Edi ata n̄kpo-ata ndibọk nditọ “ke ntụnọ ye item Jehovah.” Ntak edi oro akpan mbiomo oro edide eke erenowo. Ke ini ete edide Christian anamde utom esie ọfọn, do enye ekeme ndise nditọ esie oro ẹbakde Abasi nte edidiọn̄ ẹtode Jehovah. Enye ekeme ndidọhọ ye andiwet psalm ete: “Nditọ uyen ẹtie kpa nte idan̄ ke ubọk owo uko. Ọfọfọn ọnọ owo eke adade mmọ ọyọhọ ke odịbi-idan̄ esie.”—Psalm 127:4, 5.