Nditan̄a Eti Mbụk ke “Akwa Obio Mbon Polynesia” ke New Zealand
“N̄KPON N̄kan Akwa Obio Mbon Polynesia ke Ererimbot.” Oro edi se ndusụk owo ẹkotde Auckland akpan obio New Zealand. Ntak-a? Idịghe n̄kukụre koro enye edide obio mbon Polynesia ke New Zealand, kpa mbon Maori, edi n̄ko koro ediwak tọsịn mbon Polynesia eken ke mme itie duop ẹdụn̄de do. Ke mme isua ndondo ẹmi, mmọ ẹma ẹwọn̄ọ ẹkpọn̄ Western Samoa, Cook Islands, Tonga, Niue, ye mme isuo Pacific eken. Kamse, idahaemi mbon Maori ẹmi ẹtode Cook Island ẹwak ke New Zealand ẹkan nte ẹwakde ke ofụri ofụri otu Cook Island ke idemesie! Ukem ntre, mbon Niue oro ẹdụn̄de ke Auckland ẹnen̄ede ẹwak ke ibat ẹkan mbon oro ẹdun̄de ke Niue.
Okposụkedi mbon isuo Pacific ẹmi ẹkewọn̄ọde idụn̄ ẹka Auckland akpan akpan ke ntak ndutịm uforo, mmọ n̄ko ẹnyene mme udọn̄ efen ndiyụhọ. N̄kpọ kiet oro edide akpan n̄kpọ ọnọ mme owo ẹmi ẹmade Bible akpan akpan mi edi udọn̄ n̄kpọ eke spirit mmọ. (Matthew 5:3) Ke ẹfiọkde emi, Mme Ntiense Jehovah ke New Zealand ẹmesịn ọkpọsọn̄ ukeme nditan̄a “gospel Ubọn̄ Abasi” ke otu mbon isuo ẹmi. (Matthew 24:14) Nso ke ẹkenam ke afan̄ emi, ndien didie ke mbon isuo ẹmi ẹnam n̄kpọ?
Mbon Samoa Ẹnam N̄kọri
Ikọ oro isụn̄utom kiet ke Samoa eketịn̄de asian nnyịn n̄kpọ aban̄a nte mbon isuo ẹmi ẹsede n̄kpọ eke spirit. Enye anam an̄wan̄a ete, “Ke ini afo osobode ye owo akpa ini ke New Zealand, edi ido ndibụp mban̄a utom idịbi udia esie. Ke Samoa akpa mbụme oro ẹsibụpde ẹsiwak ndinyene ebuana ye ido ukpono oro owo abuanade.” Idịghe n̄kpọ n̄kpaidem, ke ntre, nte ke esop Mme Ntiense Jehovah iba oro ẹsemde usem Samoa ke Auckland ke ẹkọri usọp usọp ẹkan ukem esop oro ke New Zealand ke ẹbaharede ukem ukem.
Ẹketọn̄ọ akpa esop usem Samoa ke Auckland ke 1977. Ke ntak n̄kọri otode Abasi, ẹma ẹtọn̄ọ ọyọhọ iba isua itiaba ke ukperedem. (Men 1 Corinth 3:6 domo.) Ke esop mbiba ẹmi, ofụri ibat mme anditan̄a etop Obio Ubọn̄ 154 ẹdu, 12 ke otu ẹmi ẹnamde utom uyọhọ-ini ifịk ifịk. Ke ediwak ini ke Sunday, mme owo ẹwakde ẹbe 275 ẹsidụk mme mbonoesop ẹkamade Bible oro ẹsinịmde ke Ufọkmbono Obio Ubọn̄.
Nditọete iren ye iban ẹtode Samoa ẹda mbuọtidem mmọ ke akpan n̄kpọ, nte ẹwụtde ke ifịk ye ubiere oro mmọ ẹwụtde ke utom edikwọrọ Obio Ubọn̄ ye edinam mbet. (Matthew 28:19, 20) Ẹkeme ndikụt emi ke ifiọkutom eyenete an̄wan kiet otode Samoa oro etienede mi:
Ke utom eke ufọk-ke-ufọk, eyenete an̄wan emi ama osobo ye n̄wan oro eketịn̄de ikọ adian kpukpru ido ukpono nte edide mbubịk onyụn̄ eberide usụn̄. Ke odude ke n̄kpaidem onyụn̄ okụtde edikpu, eyenete an̄wan emi ama ekere se akpanamde. Enye ama ekere ete, ‘N̄kemeke ndiyak enye ekere ke Mme Ntiense Jehovah edi mbon mbubịk.’ Ntre enye ama ebiere ndiwet n̄wed nnịm. “Mma nnam isọn̄ ntak N̄wed Abasi kaban̄a utom mi an̄wan̄a ke ibio ibio usụn̄ nnyụn̄ mbụp m̀mê enye eyenọ mi ini ndinam idotenyịn oro Bible ọnọde an̄wan̄a enye. Mma nsịn nọmba urụk ukopikọ mi n̄ko.”
Eyenete an̄wan emi ama akaiso ke utom esie, awahade ke mme ufọk efen. Nte enye osịmde ọyọhọ ufọk inan̄ ke usụn̄ oro, ẹma ẹnọ enye etop ke urụk ukopikọ ndifiak edem n̄ka n̄kokụt n̄wan oro ke mbemiso ekeberide usụn̄ ke iyatesịt. Eyenete anwan emi obụk ete, “N̄wan emi ama atua n̄kpọfiọk aban̄a akpa edinam esie onyụn̄ owụt esịtekọm aban̄a n̄wed oro n̄kewetde nnịm. Nneme oro on̄wụmde mfri ama etiene, ndien ẹma ẹtọn̄ọ ukpepn̄kpọ Bible.”
Edi n̄ko n̄kpọ edemerede owo esịt ndikụt edu n̄waidem isụn̄utom oro ndusụk Mme Ntiense mbon Samoa ẹwụtde. Eyenete eren kiet ye ubon esie ẹma ẹkpọn̄ Auckland ẹka Wellington ke 1981 ndikan̄wam ekpri otu ẹnamde utom ke otu mbon Samoa do. Esop enyenede owo 47 ama ọtọn̄ọ, oto ekpri otu mme asuanetop Obio Ubọn̄ 11 eke ini oro. Eyenete eren oro ọdọhọ ete, “Mme utịp ẹnen̄ede ẹkpon ẹkan n̄waidem.” Ke ndondo emi, enye ye ubon esie ẹma ẹyere ‘ikot owo Macedonia’ ẹnyụn̄ ẹfiak ẹka Western Samoa. (Utom 16:9, 10) Mbon en̄wen n̄ko ẹma ẹfiak ẹnyọn̄ọ akpa itieidụn̄ mmọ ẹnyụn̄ ẹtọn̄ọ utom akpan asiakusụn̄, isụn̄utom, m̀mê Bethel.
Mbon Niue Ẹyere Ikot
Utom ukwọrọikọ ke akaiso n̄ko ke otu mbon Niue ke Auckland. Esenyịn emi asan̄ade-san̄a ọtọt ete: “Ke utom eke ufọk-ke-ufọk, edi ido ndikot owo odụk edi. Bible ubon esidu ekpere kpukpru ini, ẹnyụn̄ ẹda edineme enye nte n̄kpọ enyenede ndinam.”
Ata ọsọn̄idem esop odu idahaemi ke usem Niue ke Auckland. Ke ini edidi esenyịn emi asan̄ade-san̄a isua oko, mme asuanetop Obio Ubọn̄ 76 ẹmi ẹbuanade ke enye ẹma ẹkeme ndidara owo 127 oro ẹkedụkde an̄wan̄wa utịn̄ikọ Bible ke Sunday. Ndien eti edu odu ke ufọt nditọete iren ye iban.
Esenyịn emi asan̄ade-san̄a ọdọhọ ete, “Kpukpru owo ẹse edidi emi nte san̄asan̄a urua nsịnudọn̄. Udia ini kiet kiet edi mbubehe esop. Ndien ẹmi edi ini ndinọ mme udia oro mbon Niue ẹmade ẹkan utọ nte takihi (pawpaw [papaya], taro [bia obio ufiop], ye ukọkọk isịp mbakara oro ẹbọpde ke ikọn̄ mboro), pitako (bred ẹdade taro, mboro, ye iwa ẹnam), ye punu povi (unam iko), ndusụk ini ẹsitịn̄de ke mbubru ẹban̄a nte ubak unam enan̄ mbon isuo.”
Mme N̄wed Usem Polynesia
Man ẹyụhọ udọn̄ n̄kpọ spirit mbon Polynesia ke Auckland ye ke ebiet en̄wen, Watch Tower Society amanam ndutịm ndision̄o ediwak n̄wed Bible ke mme usem Polynesia. Ke uwụtn̄kpọ, ẹmịn̄ Enyọn̄-Ukpeme ikaba ke ọfiọn̄ ke usem Rarotonga, m̀mê Maori eke Cook Island. Ẹsibọ Enyọn̄-Ukpeme eke ọfiọn̄ ke ọfiọn̄ n̄ko ke usem Niue mfọn mfọn. Edisuan oro ẹsuande mme nsiondi Enyọn̄-Ukpeme ke usem Rarotonga ye Niue idahaemi edi n̄kpọ nte idem 1,000 ke nsiondi kiet kiet, ẹmenyụn̄ ẹsuan n̄kpọ nte idem 900 ke nsiondi eke usem Samoa idahaemi ke New Zealand.
Adianade ye Enyọn̄-Ukpeme, ekese ikpọ ye n̄kpri n̄wed ẹdu ke nsio nsio usem mbon Polynesia. N̄wed oro Akpanikö Oro Adade Osim Nsinsi Uwem, oro ẹkemịn̄de ke usem Niue ke 1989, edi akpa n̄wed anamde akpan ukpepn̄kpọ Bible an̄wan̄a ke usem oro. Okụtde unen akpan akpan ke efakutom Maori eke Cook Island (Rarotonga) edi n̄wed Afo Emekeme Ndidu Uwem ke Nsinsi ke Paradise ke Isọn̄ ke usem oro. Ekpere ndidi ẹnịm kpukpru ukpepn̄kpọ Bible ye un̄wam n̄wed oro. Ebiowo kiet ọdọhọ ete, “N̄kpọ ntiense ke enye edi n̄wed un̄wam ukpepn̄kpọ oro okụtde unen edi edinyịme oro nditọ ukpepn̄kpọ ẹnyịmede nditọn̄ọ ndidụk mme ukpepn̄kpọ esop.”
Ke adianade ye edisuan oro mmọ ẹsuande n̄wed ẹmi kpukpru ini ke ufọk-ke-ufọk, ikọt Jehovah ẹsinịm ediwak n̄wed ke se ẹkemede ndikot edinọ ikọ ntiense ke an̄wan̄wa urua. Ke ntak ibat mbon Polynesia ẹwakde ẹkaha ke Auckland ke mme isua ndondo emi, ẹma ẹtọn̄ọ ikpọ urua ẹnyenede mme efe urua ibio ini, oro ẹnyamde mme akpan udia ye utom usọ eke Isuo Pacific oro. Se iwakde isịm owo 25,000 ẹkeme ndidi utọ urua emi ke usenubọk Saturday. Ke ẹdade ifet emi ẹnam n̄kpọ ọniọn̄ ọniọn̄, Mme Ntiense ẹsika mme urua ẹmi ẹnyụn̄ ẹsineme ye mme ẹnyene efe urua ye mbonudep ẹban̄a Obio Ubọn̄ Abasi.
Ebede ke utom ukwọrọikọ mmọ, Mme Ntiense Jehovah ẹma ẹkeme ndisuan uwak n̄kpasịp Obio Ubọn̄ ẹnyụn̄ ẹnịm akpakịp n̄wed Bible ye mbon Polynesia. Ọfis n̄kọk itieutom Watch Tower Society ọtọt ete ke isua utom 1990, ẹma ẹnọ idem n̄wed 23,928 ke usem mbon Polynesia ẹto ke ufọk umịn̄-n̄wed ẹwọrọ.
Ndidara ke Okpokoro eke Spirit Kiet
Ke ẹnyenede udọn̄ ẹban̄a n̄kpọ eke spirit mmọ, Mme Ntiense ẹtode Polynesia ẹda edidụk mme mbonoesop Christian eke urua ke urua ke Ufọkmbono Obio Ubọn̄ nte ata akpan n̄kpọ, ọkọrọ ye edidụk n̄kpri ye ikpọ mbono mmọ. (Mme Hebrew 10:23-25) Ke Mbono District “Unenikpe Abasi” oro ẹkenịmde ke Auckland ke December 1988, ẹma ẹnịm nsio nsio ikpehe ndutịm ke usem Samoa, Niue, ye Maori eke Cook Island. Akpan n̄kpọ ke ndutịm eke usem Samoa ekedi drama eketịmde idem mfọn mfọn onyụn̄ edemerede owo udọn̄. Mme Ntiense ẹtode Niue ye Cook Island ẹma ẹwụt mfọnido Christian ke ndinam n̄kpọ nte mme ọfọn-mfọn enyeneufọk nnọ mme isenowo oro ẹtode mme isuo emana mmọ ẹdi. Mbono oro ama akabade edi ifet edidia nnyụn̄ ndara ke okpokoro eke spirit Jehovah. Ke Mbono “Edisana Usem” eke 1990 ke Auckland, n̄wakn̄kan ibatowo ẹkedụkde ikpehe edinam eke usem Samoa ekedi 503.
In̄wan̄în̄wan̄ edinam n̄kpọ mban̄a etop Obio Ubọn̄ edi an̄wan̄wa uyarade nte ke mme owo ẹtode mme isuo Edem Usụk Pacific mbon Polynesia ‘ẹkebet mme ẹwụhọ Jehovah.’ (Men Isaiah 42:4, 12 domo.) Nte utịp, mmọ ẹbuana idara idara ke nditan̄a eti mbụk ke “akwa obio mbon Polynesia” ke New Zealand.