Ntọt M’ọkwọrọ Obio Ubọn̄

“Mme Erọn̄ Ẹnyụn̄ Ẹkop Uyo Esie”

◻ JESUS ọkọdọhọ ete: “Mme erọn̄ ẹnyụn̄ ẹkop uyo [ekpemerọn̄] . . . ndien enye okot mme erọn̄ esiemọ ke enyịn̄ ke enyịn̄, onyụn̄ ada mmọ ọwọrọ.” (John 10:3) Enye ama akaiso adian ete: “Mmọfiọk se inyenede Mi, se inyenede Mi onyụn̄ ọfiọk Mi.” (John 10:14) Mbon mbieterọn̄ ẹkop uyo Jesus nte enye etịn̄de ikọ ọnọ mmọ ebe ke Bible. Tịmfiọk nte owo eti esịt iba ke Italy ẹketienede edinam emi.

Enye Ama Akpan̄ Utọn̄ ke Akpatre

◻ Alberto ewet ete: “Ami n̄kedi isua 16 ke ini n̄kọtọn̄ọde ndin̄wọn̄ ikọn̄ekpo nnyụn̄ nda LSD, ndien ke ndide isua 18 mma ntọn̄ọ ndida heroin. Man n̄keme ndinyene n̄kpọsọn̄ ibọk, mma nnam kpukpru se ẹkpekerede-kere. Mma nyịp inọ, nnyam n̄kpọsọn̄ ibọk, mbian̄a abian̄a, nnyam kpukpru inyene mi. Ami n̄kakam n̄kemeke nditre. Nduọkodudu ke esen idụt, anyanini ke obio-in̄wan̄, m̀mê edibuana ke mbre ukara ye otu mbon ntịme ẹnamde n̄kpọ nditre ukwan̄ikpe—ndomo n̄kpọ ẹmi kiet ikan̄wamke. Mma ndomo ndọ nse, edi ke ekpri ini ebede mma mfiak n̄kodu ke ebiet n̄kọtọn̄ọde. Eyenan̄wan oro akamanade ọnọ mi ikakam itreke mi ndida n̄kpọsọn̄ ibọk. Ke akpanikọ, n̄kpọ ẹma ẹdiọk ẹkan, sia ami kemi n̄koyomde ediwak okụk. Ekem n̄wan mi ama ọkpọn̄ mi, ndien ke isua iba oro n̄kodụn̄de ikpọn̄, n̄kokụt eyenan̄wan mi ikaba kpọt. Ami n̄kesifefehe ọtọn̄ọde ke mbon oro ẹnyamde n̄kpọsọn̄ ibọk tutu osịm mbon oro n̄kakamade isọn, ndien ediwak ini mma nsibọ ufen nto edision̄o idem n̄kpọn̄.

“Ekem mma nti n̄wed kiet oro Mme Ntiense Jehovah ẹkenọde mi ke ndusụk isua ẹmi ẹkebede. Ami ke n̄kosụk nnyenyene enye ndien mma ntọn̄ọ ndikot enye ye Bible. Ke usụn̄ emi mma ndifiọk ata Abasi, Jehovah, mma nnyụn̄ mbọn̄ akam nnọ enye nnyom un̄wam. Nte n̄kesịnde se n̄kekpepde ke edinam sụn̄sụn̄, mfịna edision̄o idem n̄kpọn̄ oro n̄kenyenede ama etek ubọk. Mma nnyene utom, ndien ye un̄wam Jehovah, mma mfiak nda ubon mi ndian ọtọkiet. Mma n̄ka Ufọkmbono Obio Ubọn̄, ndien do mma mfiọk nte ke Mme Ntiense Jehovah ẹnyene akpanikọ. Ke ifiakde idiana kiet, ami ye n̄wan mi ima ikpep Bible ye Mme Ntiense ndien ke akpatre ima ina baptism. Idahaemi, nso idara ke edi ntem ndibuana idotenyịn nnyịn ye mbon en̄wen nte mme asiakusụn̄ ofụri-ini!”

Ẹbọrọ Akam An̄wan Oro Esịnde ifịk ke Ido Ukpono

◻ N̄wan kiet ọtọt ete: “Ke 1958, ami mma mbuana ifịk ifịk ke mme utom n̄kann̄kụk ufọkederi, akpan akpan ke ndinam isan̄ n̄ka Edisana Ebiet Madonna eke Ima Abasi ke Rome. Nte ini akade mma n̄kabade ndi n̄kpet n̄kpet ufan oku kiet emi ekedide isụn̄utom ufọkederi ke Rome, onyụn̄ enyenede ekese ọkpọ ọkpọ nneme ye Pope Paul VI ye Pope John Paul II. Ke mma n̄kodiomi ukaisan̄ ke isua 25, mma mbọ n̄weditoro. Nte ededi, nte ini akade mbuọtidem mi nte ifịk ifịk owo Catholic ama ọtọn̄ọ ndisehede. Mma n̄kụt uyịp inọ, abian̄a, unam n̄kpọ ke unyene-owo, ye esen esen mbubịne. Mma ntọn̄ọ ndida isio isio enyịn nse ufọkederi nte n̄kọfiọkde nte ke ẹma ẹsiwak ndifịk ibet Abasi nnịm ke ikpat. Mme utọ n̄kpọ ẹmi ẹma ẹtịmede mi esịt, ndien mma mben̄e Abasi nte an̄wam mi koro ami ke n̄kọduọk mbuọtidem mi. Mma nsitua eyet ediwak ini.

“Ekem, ke isua inan̄ ẹmi ẹkebede, eyeneren mi ama ada ndusụk magazine Enyọn̄-Ukpeme ye Awake! oro enye ekenyenede oto Mme Ntiense Jehovah ọsọk mi. Mme magazine ẹmi ẹma ẹdemede udọn̄ tutu eyedi se ndọhọde enye ada efen ọsọk mi. Esisịt ini ke oro ebede mma n̄kụt Ufọkmbono Obio Ubọn̄ eke Mme Ntiense Jehovah ndien mma n̄wet n̄kpọ mfak ke usụn̄ mben̄ede nte owo edi edise mi. Mme Ntiense Jehovah ẹma ẹdi ke usen inan̄ ẹbede. Mma ntọn̄ọ ukpepn̄kpọ Bible nnyụn̄ nnam n̄kọri n̄kosịm idaha edina baptism. Idahaemi mmonịm nte ke mmon̄kụt se n̄kesiyomde kpukpru ini ke akpatre—kpa akpanikọ!”

Mme owo ẹmi ẹma ẹkop uyo Eti Ekpemerọn̄, Jesus Christ, ndien ‘akpanikọ ama anam mmọ ẹwọrọ ufụn.’—John 8:32.

[Ebiet Ẹdade Ndise Ẹto ke page 14]

Garo Nalbandian